Read berom Yohana 6 Bible Online

Yohana 6 - berom bible

Yohana 6

¹E bamâ pyɛ́ yane, Yɛsu a hwo ye dɔ vɔk e gurâ Gworep Galili de be to tâng gwɛ, à Gworep Tiberiyas.

²Gbɔng regyɛng bemat ba raa hɛ, yaga bá kana di pyɛ̂ bes de a ra e jeng de a tɛ̀ bemât serɔ tyang.

³Yɛsu tanga bemât masâ fwom mɛ ba tút vɔk e raku, ko a sangal e hwomo tanga yɛn.

⁴E jeng yane mo nzem BeYuda de be tâng nɛ, à Nzem Gyilsit Nelɔ BeIsrayɛl nà kana vey bagat.

⁵Yɛsu a hwo ye ganga, ko a di gbɔng regyɛng bemat ba sé kyè vey na yɛ, ko a yâng Filip, “Wot ê sey pyɛ̂ re e gwa, na wot a nɔ̂ng bemat vemo mwa na ye vey a yɛn arɛt?”

⁶Yɛsu a ha ano, yaga na a wok pyɛ de Filip ê ye. Yɛ pyɛ mɛ á kana tɔk pyɛ de ê ra.

⁷Filip a yang ɛ, “Kée kàa! Ka wot a ka sey kpam-tuk e nû dyâm fwôm mwat yê pɛl rwit, ê ka vey na kawɛ mwat a sɛ̀ kecɛk o wɛt!”

⁸Hwak e ji bemât masâ fwom mɛ mo de ba tang ɛ, à Andarawus, gwa Simɔn Bitrus, a yâng Yɛsu,

⁹“Wen hwak a sé e ngamo de a vɔk bāgat kpam-tuk batungun tanga betɔk beba. Ko kepyɛ kane kê tɔk ra a yerê nepyak bemat vemo sɛ́ arɛt?”

¹⁰Sɔng lwa gwa sè pyak e kwɔn o. Ko Yɛsu a yâng bemat mɛ, “Há in a bemat o be sangal e vwel.” Bemat o ba hwo sangsal. E ji mɛn beras ba wul sede gu batungun (5,000).

¹¹Ko Yɛsu a jut bagat kpam-tuk o, a feng a Dagwi yaga vɛ, ko a hwo gas a bemat de ba sé sangal e hwomo. A to ra ano na betɔk o. Ko mwa hɛn ba re, ba siris.

¹²E bama de bemat o ba ga re, ba ga siris mwa, Yɛsu a yâng bemât masâ fwom mɛ, “Tula hin cɛ̂k pyɛ́ mo de ya pɔl, yaga na be kwon lashe pyɛ cak wɛt.”

¹³Ba tulsa cɛ̂k pyɛ́ mo, ko ba sila sháp kuru na yɛ bya (12) na cɛ̂k pyɛ́ de ya pɔl yi e bagat kpam-tuk batungun de bemat o ba re.

¹⁴Jeng de bemat ba di pyɛ bes yane de Yɛsu a ra, ba hwo ye, “Mwin, mwat womo a sé zarap Dagwi de Mose à kana ha e ra yɛ wɔgɔ, ê vey e jey.”

¹⁵Ko Yɛsu a pere tɔk, bemat vane ba sé simo na be vey jut ɛ, na be tɛ̀ a yɛ negwɔm na retek. Yaga ano, a to toyo vɔk e raku, yɛ nju mɛ.

¹⁶Jeng de nawiri na vey, bemât masâ fwôm Yɛsu ba gyirik vɔk e hagât gworep o.

¹⁷Ba yel e ji dwa-nshi, ko ba hwo ye dɔ vɔk e Kafarnahum. Kwɔn o ha tɛ́ ɛ mwangalang, ko Yɛsu a rɔngɔl nà vey na yɛn.

¹⁸Nshi mo na hwo lolong, yaga gwogul gwa pɛsɛl nɛ ding-ding.

¹⁹Jeng de ba gangas dwa-nshi mo sede lyōsho tyungun kɛ tyiimin, ba di Yɛsu a sé kyè e ra tɛ̂t nshi, a vey bagat na dwa mɛn o. Yaga ano, bengyip ba vo ɛn,

²⁰ko Yɛsu a yang ɛn, “A sé e me. Yin wok bengyip wɛt!”

²¹Jeng de a hanat ano, ba hwo sey ɛ na yey pyɛng e ji dwa-nshi mo, ko remo-remo, ba pere wul vwâ gworep o e kwɔn de ba sé kyè vɔk ɛ̀.

²²Tuk het, regyɛng bemat de bá kana nàra e gurâ gworep o ba hwo bare, bá kana vɔk dwa-nshi gwining zɔng e hwomo. Ba to tɔk, bemât masâ fwôm Yɛsu ba ga kyè e ji wɛ nju mɛn zɔng, ko Yɛsu a kyè na yɛn wɛt.

²³Bedwa-nshi behak de bá vey yi e repomô Tiberiyas ba vey e vwâ gworep bagat na kwɔn de bemat bá kana re ɛ̀ kpam-tuk de Darwey Yɛsu á kana feng a Dagwi yaga wɛ.

²⁴Yaga ano, jeng de regyɛng bemat o ba di, Yɛsu tanga bemât masâ fwom mɛ ba sé e hwomo wɛt, ba yel e ji bedwa mo, ko ba kyè vɔk e Kafarnahum na be bin jāma hɛ.

²⁵Jeng de bemat o ba sɛ̀ Yɛsu e gurâ gworep, ba yang ɛ, “À Mwat Basa, e yɛ̌ jeng de hwá vey e ngamo arɛt?”

²⁶Yɛsu a yang ɛn, “Tsak o mwin me ha a yin: Yin a sé jāma me, yaga yin á re kpam-tuk, yin á siris; ko yin a sé jāma me wɛt, yaga yin a di pyɛ̂ bes de ma ra.

²⁷Yin kwon sè bûm jāma pyɛ̂ re yemo de ye lashe hɛ dey-dey, ko sè in e de bûm jāma pyɛ̂ re de ye nɔngɔ̂s bemat neken gbak-gbak e negya. E pyɛ̂ re yemo mo de Me de ma tɛ́ me mwat ma rɔda nɔng in yɛ̄, yaga Dagwi Da hom a dura, yɛ a simo pyɛ de me ra.”

²⁸Ba hwo rangal hɛ, “E vɛ̌ tomong de wot a rɔda ra vemo de Dagwi e simo na wot a ra arɛt?”

²⁹Yɛsu a toyo a yɛn, a ye, “Fwom gwomo de Dagwi e simo na yin a ra, gwɛ à: Yin tɛ̀ gap min e ra me de a tomo me.”

³⁰Ba yang ɛ, “E yɛ̌ pyɛ bes de hwà rɔda ra, na wot a di na bayis mot, na wot a to sey tsak o na há mō arɛt? Hwà rɔda ra sɛ́ arɛt?

³¹E ji kwɛngɛl mɛn e hey, bedabeda mot bà kana re pyɛ́ de be tâng yɛ, à mana, sede remo de bà jɛk e Bwok-basa Dagwi wɔgɔ, ‘À nɔng ɛn kpam-tuk yi e lagwi na be re.’ ”

³²Ko Yɛsu a yang ɛn, “Tsak o mwin me ha a yin: Kpam-tuk de Mose à kana nɔng in wà sè kpam-tuk yi e lagwi wɛt. A sé e Da hom wɛ de e nɔngɔs hin tsak kpam-tuk de wo yi e lagwi.

³³Kpam-tuk de Dagwi e nɔngɔs, e wɛ à mwat de e gyiris yi e lagwi, ko e nɔngɔ̂s bemât jey neken.”

³⁴Ba yang ɛ, “À Da, nɔngɔs hot yerê kpam-tuk womo mo kayɛ jeng.”

³⁵Yɛsu a yang ɛn, “E me de ma sé kpam-tuk de wo nɔngɔ̂s bemat neken. Kawɛ mwat de ê vey na me ê sang wok vyong wɛt; ko kawɛ mwat de a tɛ̀ gap mɛ e ra me ê sang wok yêy hwɔshɔ arɔng wɛt.

³⁶Ko a sé tyɛng na pyɛ de ma kana ha a yin wɔgɔ, mwa ano de yin a ga di me na bayis, ko yin a sey tsak o na há hom wɛt.

³⁷Mwa mwat de Da hom e nɔng me ê vey na me. Kawɛ mwat de ê vey na me, mê sang kyɛ́ me hɛ wɛt.

³⁸Yaga ma gyirik yi e lagwi, na me ba ra pyɛ de Dagwi, de a tomo me, a simo na me ra. Ko ma gyirik wɛt, na me ba ra pyɛ de me pyɛ hom me simo.

³⁹Pyɛ de yɛ womo de a tomo me e simo a yet ngan: Me kwon vuru gwining e ji mwa vemo de a nɔng me wɛt, ko na me ba sene hɛn na neken e tuk talâ jey.

⁴⁰Yaga pyɛ de Da hom e simo a yet ngan: Kawɛ mwat de e di Hwey Dagwi, ko a to tɛ̀ gap mɛ e ra hɛ a rɔda ba sɛ̀ neken gbak-gbak. Ko e tuk talâ jey mê ba sene hɛ na neken.”

⁴¹Bemat ba hwo gwɔrɔng e ra yɛ, yaga a ye, “Ma sé kpam-tuk de wa yi e lagwi.”

⁴²Ba ye, “Mwat womo a sé Yɛsu, hwêy Yɔsɛf wɛt a? Wot a tɔk da mɛ na neng mɛ wɛt arɛt? Yi e rɛ̌ de a ye a remo, a gyirik yi e lagwi arɛt?”

⁴³Yɛsu a yang ɛn, “Tik in gwɔrɔng na bemin!

⁴⁴Vit a mwat de e tɔk vey na me, sɛ̌ Da hom, de a tomo me, a vey na yɛ. Ko mê ba sene hɛ na neken tuk talâ jey.

⁴⁵A raane, bezarap Dagwi bà kana jɛk wɔgɔ, ‘A sé e Dagwi de ê basa a yɛn pyɛ̂ mwa.’ Kawɛ mwat de e wok basâ Da hom, na a to wet betong na hɛ, ê vey na me.

⁴⁶Vit a mwat de a ga di Da hom; me de ma vey yi na Dagwi, a sé e me nju hom zɔng de ma ga di Da hom.

⁴⁷Tsak o mwin me ha a yin: Kawɛ mwat de a tɛ̀ gap mɛ e ra me a ga sɛ̀ neken gbak-gbak.

⁴⁸E me de ma sé kpam-tuk de wo nɔngɔ̂s bemat neken.

⁴⁹Mwa ano de bedabeda min bà kana re mana e ji kwɛngɛl mɛn e hey, ko yɛn a kushu.

⁵⁰Ko e rà kpam-tuk de wo yi e lagwi kene — kawɛ mwat de e re wɛ a rɔda ku wɛt.

⁵¹Ma sé kpam-tuk de wo nɔngɔ̂s bemat neken de wa yi e lagwi. Kawɛ mwat de e re kpam-tuk o a rɔda vɔk neken gbak-gbak. Kpam-tuk o, wɛ à rebek hom de mê nɔ̂ng bemât jey, yaga na be bin sɛ̀ neken.”

⁵²Yaga há mo de Yɛsu a ha, bemat ba hwo ra cuna ding-ding na bemɛn, ba tē, “Yi e rɛ̌ de mwat womo e tɔk nɔng ot rebek mɛ na wot a re arɛt?”

⁵³Yɛsu a yang ɛn, “Tsak o mwin me ha a yin: Ka sede yin e re rebêk Me de ma tɛ́ me mwat wɛt, na yin e to sɔ nemi hom arɔng wɛt, ko yin a vɔk tsak neken wɛt.

⁵⁴Ko kawɛ mwat de e re rebek hom, na e sɔ nemi hom, e yɛ wɛ de a vɔk neken gbak-gbak, ko mê ba sene hɛ na neken tuk talâ jey.

⁵⁵Yaga rebek hom ra sé tsak pyɛ̂ re, ko nemi hom arɔng na to sé tsak pyɛ̂ sɔ.

⁵⁶Kawɛ mwat de e re rebek hom na a sɔ nemi hom a sé sangal e ji nesa na me, ko me ma sé sangal e ji nesa na yɛ.

⁵⁷Da hom de e nɔngɔ̂s bemat neken a tomo me, ko a tɛ̀ me vɔk neken. Ano arɔng, ka sede mwat e re rebek hom, mê tɛ̀ ɛ a vɔk neken.

⁵⁸A sé e rebek hom kwong de ra sé tsak kpam-tuk de wa yi e lagwi. Wa sé sede pyɛ̂ re de bedabeda min bà kana re wɛt, yaga pyɛ́ yane mo yà tɔk ro ɛn nà kushu wɛt. Ko kawɛ mwat de e re kpam-tuk de mê nɔng ɛ a rɔda vɔk neken gbak-gbak.”

⁵⁹Yɛsu a ha há hemo e jeng de a sé basa a bemat e duk re fongol e Kafarnahum.

⁶⁰Jeng de bemat de ba raa Yɛsu ba wok há hane, pyak e ji mɛn ba ye, “Há hemo ha sé gbang! E wɛ̌ mwat de ê tɔk sey hɛ arɛt?”

⁶¹Yɛsu a tɔk e yey mɛ, ba sé gwɔrɔng e ra há de a ha. Yaga ano, a yang ɛn, “Há hemo hê tɛ̀ yin a tɛ́ in gbɛrɛk arɛt?

⁶²Ko sɛ̌ yin ê ye ala, ka sede yin ê ba di Me de ma tɛ́ me mwat mê ba tút vɔk e kwɔn de ma kana yi ɛ̀ arɛt?

⁶³A sé e Gabik Dagwi de he nɔngɔ̂s bemat neken; bemasi pyɛ vɛ be tɔk ra ano wɛt. A sé yi na neha hom de ma ga ha a yin de yin ê sɛ̀ Gabik o tanga neken.

⁶⁴Ko behak ba sé e ji min de ba tɛ̀ gap mɛn e ra me wɛt.” Yaga yimo susu mo, Yɛsu á kana tɔk vane de ba sé kyè wɔ̀ tɛ̀ gap mɛn e ra yɛ wɛt, á to tɔk mwat de a sé kyè wɔ̀ row ɛ arɔng.

⁶⁵Ko a to ye, “Pyɛ ma yane de ya tɛ̀, ma kana ha a yin, vit a mwat de ê tɔk vey na me, sɛ̌ Da hom a wunta a yɛ gwong o.”

⁶⁶Yi e jeng yane, pyak e ji bemat de bá kana raa Yɛsu ba to ɛn na bama, ba to raa hɛ wɛt.

⁶⁷Ano kwong, Yɛsu a rangâl bemât masâ fwom mɛ kuru na vɛ beba, a ye, “Ko yin ɛ̀, yin a sé simo na yin a kyè arɔng arɛt?”

⁶⁸Simɔn Bitrus a toyo a yɛ, a ye, “À Darwey, wot ê kyè vɔk na wà arɛt? E neha mō de ne nɔngɔs neken gbak-gbak.

⁶⁹Wot a ga sey tsak o, ko wot a tɔk, hwo wɛ de hwà sé mwât Dagwi de yɛ a tomo hɛ.”

⁷⁰Yɛsu a yang ɛn, “A sé e me de ma kasa hin, yin bemat kuru na vɛ beba wɛt arɛt? Mwa ano, gwining e ji min a sé gwɔ̀m cēng hwak!”

⁷¹Á sè ha e ra Yuda, hwêy Simɔn Iskaryot. Mwa ano de Yuda mo a sé gwining e ji bemât masâ fwôm Yɛsu kuru na vɛ beba, ko e yɛ de e ba row ɛ e yɛnɛ mo.