Read berom Yohana 7 Bible Online

Yohana 7 - berom bible

Yohana 7

¹E bamâ pyɛ́ yemo, Yɛsu a kyě kyè e sevwêl Galili. A simo na a wɔ́ e sevwêl Yudiya wɛt, yaga bemât nuyêl BeYuda e hwomo ba jāma na be mɔrɔ hɛ.

²E jeng o, nzem BeYuda de be tâng nɛ, à Nzem Buk ná kana vey bagat.

³Yaga ano, begwa Yɛsu ba yang ɛ, “Sogo yi e ngamo, na hwo kyè vɔk e Yudiya, yaga na bemât raa mō e hwomo be bin di pyɛ̂ bes de hwó ra.

⁴Vit a mwat de e ra pyɛ́ e lɛrɛ, ka sede e simo bemat be tɔk ɛ. Sede remo de hwà sé ra pyɛ́ yemo, ko rá yɛ̄ wɛshɛrɛk, yaga na jêy mwa ye tɔk pyɛ́ mo e ra hwo!”

⁵Ko begwa mɛ ba ka tɛ̀ gap mɛn e ra yɛ wɛt.

⁶Yɛsu a yang ɛn, “Jeng de ma rɔda kyè ya rɔngɔl e ngyen; ko yin à — kayɛ jeng ya sé a yin ryat.

⁷Bemât jey bê tɔk sɛ̀ pyɛ wɛt de yê tɛ̀ be kyɛ́ ɛn hin; ko me à — ba kyɛ́ ɛn me, yaga me dopse ha a yɛn, tomong mɛn ba sé ves.

⁸Kyè in à yin vɔk e dem nzem o. Mê wɔ̂ nzem o wɛt, yaga jeng hom ya rɔngɔl e ngyen.”

⁹A ha ano, ko a nàra e Galili.

¹⁰E bama de begwa mɛ ba ga kyè wɔ̂ nzem o, Yɛsu a kyè wɔ e hwomo arɔng. A kyè gbey-gbey wɛt, ko a kyě lɛsɛ hɛ, yaga na bemat be bin tɔk ɛ wɛt.

¹¹Bemât nuyêl BeYuda bá sè jāma hɛ e dem nzem o, ko bá sè kyě rangsâl bemat, “A wɛ̌ arɛt?”

¹²E ji regyɛng bemat o, bemat behak pyak bá sè ha show-show e ra yɛ; behak ba tē, “A sé mwat rwat”, ko behak ba tē, “Wey, a sé tɛ̀sɛ bemat e gwong vwes.”

¹³Ko vit a mwat de a simo na a ha pyɛ cak wɛshɛrɛk e ra yɛ, yaga ba wok bengyip bemât nuyel mɛn.

¹⁴Jeng de ba ga gas nzem o e tē, Yɛsu a yel e lalâ Gbɔng Duk Re Fongol, a hwo basa a bemat.

¹⁵Bemât nuyêl BeYuda ba langat hɛn bása mɛ, ba tē, “Mwat womo á kana sè e nɛ̂n mwât basa hwak wɛt! Yi e rɛ̌ de a vɔk tɔ́k ano arɛt?”

¹⁶Yɛsu a yang ɛn, “Pyɛ́ de me basa ya yi e bare hom wɛt, ko ya yi na Dagwi de a tomo me.

¹⁷Kawɛ mwat de e simo a ra pyɛ de Dagwi e simo ê tɔk kɛ pyɛ de me basa ya yi na Dagwi, kɛ ma sé ha há de ha yi na reto hom zɔng.

¹⁸Mwat de e ha há de ha yi na reto mɛ e dura, e simo nerey yaga tó mɛ zɔng. Ko mwat de e simo na be nɔ̂ng mwat de a tomo hɛ nerey yɛ a sé ha tsak o, a sé kwɛlɛng bemat ko tyɔng wɛt.

¹⁹A sé e Mose de à kana nɔng in Badu wɛt arɛt? Ko vit a hwak e ji min de e gyeng Badu mo. Yaga sɛ́ de yin a sé simo na yin a mɔrɔ me arɛt?”

²⁰Regyɛng bemat o ba yang ɛ, “Hwó lolong! E wà de e simo a mɔrɔ hwo arɛt?”

²¹Yɛsu a yang ɛn, “Ma kana ra pyɛ bes jining e Tuk Shábat, ko mwa hin yin a langat hin.

²²Mose à kana ha a yin na yin a wɔ́ a hwey e cwɛl tuk hê rwit. Yaga ano, yin e tɔk wɔ́ a hwey o e cwɛl e Tuk Shábat mwa arɔng. (Mwin, à kana sè e Mose de à tānga nɔng in redu wɔ́ e cwɛl wɛt, ko à sè bedabeda min de bà hwo ra ano e susu mo.)

²³Sede remo de be tɔk wɔ́ a hwey e cwɛl e Tuk Shábat, yaga na be kwon gyili Badu Mose wɛt, yaga sɛ́ de yin a wok shom na me, yaga ma tɛ̀ mwa rebêk mwat tyang e Tuk Shábat arɛt?

²⁴Tik in nà ra a bemat shɔt tyɛng na pyɛ́ de yin e bɛrɛng na bayis zɔng, ko rá in yɛ̄ e gwong de gwa sé cik.”

²⁵Bemât Yɛrusalɛm behak ba ye, “A sé e mwat a womo de ba sé jāma na be mɔrɔ hɛ wɛt arɛt?

²⁶Ko di in, a sé ha wɛshɛrɛk, ko vit a mwat de a wunta nu na a yang ɛ pyɛ cak. Gyeng rɔ̌ ba ga tɔk, yɛ a sé Mwat de Dagwi a kasa na a sey bemat.

²⁷Ko wot a tɔk, jeng de Mwat de Dagwi a kasa ê vey, vit a mwat de ê tɔk kwɔn de a yi ɛ̀. Ko mwat womo à, wot a tɔk kwɔn de a yi ɛ̀.”

²⁸Jeng de Yɛsu a sé basa a bemat e lalâ Gbɔng Duk Re Fongol, a gbɔ, a ye, “Yin a sé tē, yin a tɔk me, ko yin a to tɔk kwɔn de ma yi ɛ̀. Ko ma vey na reto hom pyɛ hom wɛt. Yɛ de a tomo me — be tó yey na yɛ ko tyɔng wɛt. Yin a tɔk ɛ wɛt,

²⁹ko me ma tɔk ɛ, yaga ma vey yi na yɛ, a to sé e yɛ de a tomo me.”

³⁰Yaga ano, ba hwo jāma begwong na be vo ɛ. Ko vit a mwat de a ra ɛ, yaga jeng mɛ ya rɔngɔl e ngyen.

³¹Pyak e ji regyɛng bemat o ba hwo tɛ̀ gap mɛn e ra yɛ, ba ye, “Jeng de Mwat de Dagwi a kasa na a sey bemat ê vey, ê ra pyɛ̂ bes de ya dal yê mwat womo arɛt?”

³²BeFarisi ba wok pyɛ́ de regyɛng bemat ba ha show-show e ra Yɛsu. Yaga ano, ba wuna bato mɛn na begbɔng bepiris, ko ba tomo bemât gyeng Gbɔng Duk Re Fongol na be wɔ̀ vo ɛ.

³³Yɛsu a ye, “Ma rɔngɔl tyɔng na yin e ngyen, sɛ̌ jeng ya vey na me kyè vɔk na womo de a tomo me.

³⁴Yin ê jāma me, ko yin ê sɛ̀ me wɛt; yaga yin ê tɔk wɔ̀ wul kwɔn de mê sè ɛ̀ wɛt.”

³⁵Bemât nuyêl BeYuda mo ba hwo yâng bemɛn, “Mwat womo a sé kyè vɔk e gwa de a ye, wot ê sɛ̀ ɛ wɛt arɛt? A sé kyè wɔ na bemat mot de ba shara hɛn e sevwêl BeGirik, na a to basa a BeGirik o arɛt?

³⁶E hɛ̌ há a hane de a ha wɔgɔ, wot ê jāma hɛ, ko wot ê sɛ̀ ɛ wɛt, ko wot ê tɔk wul kwɔn de ê sè ɛ̀ wɛt arɛt?”

³⁷E tûk talâ nzem o de ha dal mwa na nerey, Yɛsu a sogo, ko a gbɔ, a ye, “Kawɛ mwat de e wok yêy hwɔshɔ, tik na a vey na me na a sɔ.

³⁸Sede remo de bà jɛk e Bwok-basa Dagwi wɔgɔ, ‘Lèl nshi de ne nɔngɔs neken na rɔda nunus yi e yêy kawɛ mwat de a tɛ̀ gap mɛ e ra me!’ ”

³⁹Yɛsu a ha há hemo e ra Gabik Dagwi de mwa vemo de ba tɛ̀ gap mɛn e ra yɛ ba rɔda sɛ̀. E jeng o, Dagwi a rɔngɔl nà nɔng Gabik o, yaga ba rɔngɔl na nɔ̂ng Yɛsu gbɔng nerey mɛ na Dagwi e ngyen.

⁴⁰Jeng de ba wok há hemo, behak e ji regyɛng bemat ba ye, “Mwin, mwat womo a sé zarap Dagwi de wot a sé gyeng ɛ!”

⁴¹Bemat behak ba ye, “Yɛ a sé Mwat de Dagwi a kasa na a sey bemat!” Ko behak ba ye, “Mwat de Dagwi a kasa a rɔda yi e Galili wɛt!

⁴²Bà jɛk e Bwok-basa Dagwi wɔgɔ, Mwat de Dagwi a kasa na a sey bemat a rɔda vey yi e yerê Gbɔng Gwɔ̀m Davit yi e Bet-Lɛhɛm, kerepomo de Davit à kana sè ɛ̀.”

⁴³Yaga ano, bemat ba gas ɛn yaga Yɛsu.

⁴⁴Behak e ji mɛn ba simo be vo ɛ, ko vit a mwat de a ra ɛ.

⁴⁵Bemât gyeng Gbɔng Duk Re Fongol ba to ɛn vɔk na begbɔng bepiris tanga BeFarisi. Yɛn a yang ɛn, “Yaga sɛ́ de yin a vey na yɛ wɛt arɛt?”

⁴⁶Bemât gyeng o ba yang ɛn, “Vit a mwat de a sang ha há na reto sede mwat womo!”

⁴⁷BeFarisi mo ba yang ɛn, “Hàa! Yin arɔng, a ga kwɛlɛng hin arɛt?

⁴⁸Mwat hwak a sɛ́ e ji bemakuk kɛ e ji mot BeFarisi de a ga tɛ̀ gap mɛ e ra yɛ arɛt?

⁴⁹A sé e regyɛng bemat zɔng de be ra ano, vemo de ba tɔk Badu Mose wɛt; Dagwi a rɔda wey na yɛn!”

⁵⁰Gwining e ji BeFarisi mo, yɛ à Nikodemus de á kana wɔ́ na Yɛsu nabwalak a yang ɛn,

⁵¹“E rà Badu mot, wot ê tɔk gang mwat na shɔt sana wok há mɛ wɛt, yaga na wot a tɔk pyɛ de a ra e ngyen.”

⁵²Ba yang ɛ, “Hwà sé mwât Galili arɔng a? Bàsa Bwok-basa Dagwi, ko hwô di, vit a zarap Dagwi hwak de e kyè vey yi e Galili.” [Bebok-basa beroso behak ba vɔk nelang o ne 7:53 — 8:11 wɛt.]

⁵³E bama mo, kawɛ mwat a kyè vɔk e lɔ mɛ,