Read berom Yohana 9 Bible Online

Yohana 9 - berom bible

Yohana 9

¹Tuhak, Yɛsu á sè kwey, a di mwat de a sé bwók yimo tɔ́ mɛ.

²Bemât masâ fwom mɛ ba rangal hɛ, ba ye, “À Mwat Basa, e wà de a ra banɛn de ba tɛ̀ ba tɔ mwat womo bwók arɛt? A sé e mwat o kɛ a sé e da na neng mɛ arɛt?”

³Yɛsu a toyo a yɛn, a ye, “A sé e banɛn de yɛ pyɛ mɛ kɛ beda mɛ ba ra de ba tɛ̀ mwat o bwók wɛt. Ko yɛ a sé bwók, yaga na be bin di gbɔng fwom de Dagwi ê ra na yɛ.

⁴Sede remo de jey ya rɔngɔl gbey, a sé gbing-gbing na wot a ra tom yɛ womo de a tomo me. Nabwalak na sé kyè vey, ko vit a mwat de ê tɔk ra fwom.

⁵E jeng de ma sé e ngamo e jey, ma sé negbêy jey.”

⁶Bama de a ha ano, a tulus netey e vwel, a luk mɛ̀ sebwos na netey o, ko a tɛ̀ sɛ e bayîs mwat o.

⁷A yang ɛ, “Ci wɔ̀ kus bayis mō e didêng Silowam.” — Cap-hâ reza mo ya sé, “Mwat de ba tomo hɛ.” — Ano kwong, mwat o a wɔ́, a kus bayis o, ko a vɛ̄ hɛ e lɔ e bɛrɛng jey.

⁸Bemât vwara mɛ tanga vemo de bá kana bɛrɛng hɛ e de râ won ba rangâl bemɛn, ba ye, “E yɛ ma womo de a dopse sangsal, na a ra won wɛt arɛt?”

⁹Behak ba ye, “A sé e yɛ.” Ko behak ba ye, “Wey, e yɛ wɛt. Bwang bayis o gwa sé sede mwɛ zɔng.” Ko yɛ pyɛ mɛ a yang ɛn, “E me wɛ à mwat o.”

¹⁰Yɛn a yang ɛ, “Yi e rɛ̌ de hwó tɔk bɛɛ jey a remo arɛt?”

¹¹A toyo a yɛn, a ye, “Mwat de be tang ɛ, à Yɛsu a yong bwos, ko a tɛ̀ hɛ e bayis hom. A yang me, me kyè wɔ e Silowam na me kus bayis o. Yaga ano, ma wɔ́, ma kus vɛ, ko e bama mo, ma tɔk bɛɛ jey.”

¹²Yɛn a rangal hɛ, “Ko sɛ̌ mwat o a sé e gwa arɛt?” A yang ɛn, “Ma tɔk wɛt.”

¹³Yɛn a kyè na mwat de á kana sè bwók vɔk na BeFarisi.

¹⁴Ko di, á sè Tuk Shábat de Yɛsu a yong sebwos na a wunta mɛ̀ bayîs mwat o.

¹⁵Yaga ano, BeFarisi arɔng ba rangal hɛ gwong de ba tɛ̀ ɛ a bɛrɛng jey. Mwat o a toyo a yɛn, a ye, “A tɛ̀ bwos e bayis hom; ma kus vɛ, ko a remo, me bɛrɛng jey.”

¹⁶Behak e ji BeFarisi mo ba ye, “Mwat de a ra ano a sé yi na Dagwi wɛt, yaga e gyeng badu Tuk Shábat wɛt.” Ko behak mɛn ba ye, “Yi e rɛ̌ de mwât banɛn ê tɔk ra pyɛ̂ bes yerê yemo arɛt?” Yi ano, yɛn a gas ɛn zang ba.

¹⁷E yɛnɛ mo, yɛn a to doyo vɔk na bwók o, ba rangal hɛ, “E sɛ́ de hwo pyɛ mo hwô ha e ra yɛ arɛt? A sé e bayis mō de a wunta vɛ.” Mwat o a yang ɛn, “A sé zarap Dagwi.”

¹⁸Ko bemât nuyêl BeYuda ba kyɛ́ ɛn nà sey tsak o, mwat o á kana sè bwók, ko ba ga de wunta a yɛ bayis. Yaga ano, yɛn a tomo be yila a yɛn da na nêng mwat o.

¹⁹Yɛn a rangal hɛn, “Hwey min à hemo arɛt? E yɛ ma womo de yin a ye, ba tɔ ɛ bwók arɛt? Yi e rɛ̌ kwong de e bɛrɛng jey a remo arɛt?”

²⁰Da na neng o ba toyo a yɛn, ba ye, “Wot a tɔk, yɛ a sé hwey mot, ko wot a to tɔk, ba tɔ ɛ bwók.

²¹Ko pyɛ de ya tɛ̀, a tɔk bɛrɛng jey a remo, kɛ mwat de a wunta bayis mɛ mo, wot a tɔk wɛt. Rangal hin hɛ. A ga vey mwat, a rɔda ha pyɛ mɛ!”

²²Da mɛ na neng mɛ yɛn a ha ano, yaga yɛn a tele hɛn bemât nuyêl BeYuda. Bemat o ba ga kana yong ɛ̀ gyam, kawɛ mwat de a ha wɔgɔ, Yɛsu a sé Mwat de Dagwi a kasa na a sey bemat ba rɔda pat ɛ yi e nesâ bemât duk re fongol.

²³Pyɛ ma yane de ya tɛ̀, da mɛ na neng mɛ yɛn a ye, “A ga vey mwat; rangal hin hɛ.”

²⁴Ba to yila mwat de á kana sè bwók o yíla hê neba, ba yang ɛ, “Hā tsak o e nuyêl Dagwi! Wot a tɔk mwat wane mo a sé mwât banɛn.”

²⁵A toyo a yɛn, a yang ɛn, “Kɛ a sé mwât banɛn kɛ a sé mwât banɛn wɛt ayi, ma tɔk wɛt. Ko pyɛ jining de ma tɔk à yet ngan: Ma kana sè bwók, ko a remo, me bɛrɛng jey!”

²⁶Yɛn a to rangal hɛ, ba ye, “Mwat o a ra a hwo sɛ́ arɛt? A wunta bayis mō mo e rɛ̌ arɛt?”

²⁷A toyo a yɛn, “Ma ga kana ha a yin, ko yin a wok wɛt. Yaga sɛ́ de yin e simo na yin a to wok arɛt? Yin e simo na yin a tɛ́ in bemât raa mɛ arɔng arɛt?”

²⁸Ko yɛn a tabas a yɛ nengyas, ba ye, “E hwo de hwà sé mwât raà sa womo mo! Ko wot, wot a sé bemât raà Mose!

²⁹Wot a tɔk, Dagwi à kana ha na Mose, ko e rà sa womo à — wot a ka tɔk kwɔn de a yi ɛ̀ mwa wɛt.”

³⁰Mwat o a toyo a yɛn, a ye, “Pyɛ̂ langat a yemo! Yin a tɔk kwɔn de a yi ɛ̀ wɛt, ko a wunta a me bayis!

³¹Wot a tɔk, Dagwi e wet betong na bemât banɛn wɛt. Ko e wet betong na bemat de be re a yɛ fongol, vemo de be ra pyɛ́ de yɛ̀ e simo be ra.

³²Yimo yi e jeng de bà yong jey, mwat hwak a ga wok rehâ wuntâ bayîs mwat de ba tɔ ɛ bwók wɛt.

³³Ka sede mwat o a yâng yi na Dagwi wɛt, ka a yâng tɔk ra pyɛ cak wɛt.”

³⁴Yɛn a toyo a yɛ, “Hwo de hwà sé mwât banɛn yi e jeng tɔ mō, hwó simo na hwo basa a wot arɛt?” Ko yɛn a pat ɛ.

³⁵Yɛsu a wok, ba ga pat mwat wane mo. A jāma hɛ, ko jeng de a sɛ̀ ɛ, a yang ɛ, “Hwà tɛ̀ gap mō e ra Yɛ de a tɛ́ ɛ mwat arɛt?”

³⁶Mwat o a yang ɛ, “À Da, e yɛ à wà arɛt? Hā a me, yaga na me bin tɛ̀ gap hom e ra yɛ.”

³⁷Yɛsu a yang ɛ, “Hwà ga di ɛ, a sé e yɛ de a sé ha na hwo.”

³⁸Ko mwat o a yang ɛ, “À Darwey, ma tɛ̀ gap hom e ra hwo!” Ko a gaba e nuyel mɛ, a re a yɛ fongol.

³⁹Yɛsu a ye, “Ma vey e jey yemo na me gas bemat, yaga na bebók be bɛrɛng jey, ko vemo de be bɛrɛng jey be tɛ́ ɛn bebók.”

⁴⁰BeFarisi behak de ba sé tanga yɛ ba wok há hemo, ko yɛn a rangal hɛ, ba yɛ, “Ala? Wot a sé bebók arɔng arɛt?”

⁴¹Yɛsu a yang ɛn, “Ka yin a yâng sé bebók, ka yin a yâng vɔk banɛn wɛt. Ko sede remo de yin e tē, yin e bɛrɛng jey, banɛn min bê nàra na yin.”