Read berom Tomong Betom Yɛsu 1 Bible Online

Tomong Betom Yɛsu 1 - berom bible

Tomong Betom Yɛsu 1

¹À Teyofilus, e ji bwok-basa hom gwo susu mo, ma kana jɛk e ra pyɛ̂ mwa de Yɛsu á kana hwo ra tanga yēmo de á kana hwo basa a bemat yimo yi e jeng de a pɛrɛ fwom mɛ

²pere wɔ e tuk de ba jut ɛ vɔk e lagwi. Gyam tuk hane mo, á tānga nɔ̂ng betom mɛ de á kana kasa nu e ra pyɛ́ de yɛn a rɔda ra. A ra ano yi na retô Gabik Jɛrɛ.

³E bamâ reku mɛ, a dura a yɛn tó mɛ zang pyak e gwong de gwa tɛ̀ ɛn be tɔk tsɛng-tsɛng, a sé kwen mwin. A dura a yɛn tó mɛ e jeng e jeng nepɔlɔ kuru banaas (40), ko a ha a yɛn e ra gwong de Dagwi ê re negwɔm e ra bemat.

⁴E jeng cak de yɛn á sè e dem hining mwa na yɛ, Yɛsu á nɔng ɛn nu, a yang ɛn, “Yin hàla Yɛrusalɛm wɛt; ko gyéng in nɔrɔ de Da hom a sira na a nɔng in. Yin a ga kana wok me ha na yin e ra nɔrɔ mo.

⁵Yohana á kana tɛ̀sɛ a bemat batisma na nshi; ko e bamâ nepɔlɔ tyɔng, Dagwi ê tɛ̀ a yin batisma na Gabik Jɛrɛ.”

⁶Jeng de betom Yɛsu ba man e dem hining tanga Yɛsu, yɛn a rangal hɛ, ba ye, “À Darwey, a sé e jeng yemo de hwà rɔda tɛ̀ BeIsrayɛl be to re negwɔm arɛt?”

⁷Yɛsu a toyo a yɛn, a ye, “A sé e Da hom pyɛ mɛ zɔng de a tɛ̀ jeng, kɛ negasi de pyɛ́ yemo yê té. Pyɛ min ya sé na tɔ̂k jeng o wɛt.

⁸Ko jeng de Gabik Jɛrɛ ha rɔda vey e ra yin, Dagwi ê nɔng in reto, ko yin a rɔda sè bemât nuha hom e ngamo e Yɛrusalɛm, na e mwa sevwêl Yudiya, na e sevwêl Samariya, tanga e neyɛnɛ̂ jêy mwa.”

⁹E bama de Yɛsu a ha ano, ba jut ɛ vɔk e lagwi e bayis mɛn, ko rele ra bang ɛ, yɛn a to tɔk di ɛ wɛt.

¹⁰Yɛn a rɔ̌ sɛt bayis mɛn gbir e lagwi jeng de a sé kyè, ko remo-remo, bemat beba de ba tɛ̀ berugu bepɛng ba tumal bagat na yɛn,

¹¹ba yang ɛn, “À yin bemât Galili, yaga sɛ́ de yin a sé e tumal e ngamo, yin e bɛrɛng lagwi arɛt? Yɛ Yɛsu de ba jut ɛ yi na yin vɔk e lagwi a rɔda to ba vɛ̄ hɛ e gwong gwining de yin a di ɛ a sé kyè vɔk e lagwi.”

¹²E bama mo, betom Yɛsu ba to ɛn vɔk e Yɛrusalɛm yi e raku de be tâng wɛ, à Raku Pàt. Raku mo wa sé sede lyosho jining yi e repomo mo.

¹³Jeng de yɛn a pom, yɛn a wɔ̀ yel e duk wo lɔ̂ rak o de yɛn a sé ɛ̀ na sangal. Bemat de ba sé e hwomo, vɛ à Bitrus, na Yohana, na Yakɔp, na Andarawus, na Filip, na Tomas, na Bartɔlɔmayus, na Matayus, na Yakɔp Alfayus, na Simɔn de á sè e yong ɛ na a dul sevwel mɛ, tanga Yuda Yakɔp.

¹⁴Yɛn mwa ba wuna hɛn kayɛ jeng e de râ won tanga beha de ba sé tanga yɛn, na Marya nêng Yɛsu, na begwa Yɛsu mo arɔng.

¹⁵E bamâ nepɔlɔ tyɔng jeng de bemat-raa mo ba man, Bitrus a sogo na a hanat. Nepyak bemat o na sé sede naga na kuru baba (120).

¹⁶A ye, “À begwa, á sè gbing-gbing na pyɛ de bà jɛk e Bwok-basa Dagwi ye sila. Gabik Jɛrɛ hà kana ha e nû Davit e ra Yuda, yɛ de a kyɔk bemat e dem de yɛn a vo ɛ̀ Yɛsu.

¹⁷Yɛ mo á sè hwak e ji mot, yaga bá kasa hɛ na wot a ra fwom o mwa hot.”

¹⁸(Yuda á sey hwiri na pyɛ de ba tala hɛ mɛ̀ yaga fwom vwes de á ra. Kwɔn a hane de á gaba ɛ̀ det; rebek mɛ ra takla, ko balagey mɛ mwa bá lusha hɛn e vwel.

¹⁹Mwa bemat e Yɛrusalɛm bá wok pyɛ de ya té mo, ko yɛn á hwo tâng cap o na relem mɛn, à Hakeldama wɔgɔ, Cap Nemi.)

²⁰“Yaga bà kana jɛk e Bwok-basa Lɛlɛ wɔgɔ, “ ‘Tik na be hàla lɔ mɛ na he sè hal; tik na mwat hwak a sangal e hɛ wɛt.’ “Ko bà to jɛk wɔgɔ, “ ‘Tik na mwat hwak a jut kwɔn mɛ hê mwât nuyel.’

²¹“Yaga ano, a sé gbing-gbing na mwat hwak a wuna hɛ na wot, na a nɔ̂ng bemât nuha tanga wot wɔgɔ, Darwey Yɛsu a sene yi e reku. A sé gbing-gbing na yɛ a sè mwat de á sè e ji mot mwa jeng de Darwey Yɛsu á kyě kyè tanga wot wɔgɔ, yi e jeng de Yohana á tɛ̀sɛ a bemat batisma vɔk e tuk de bá jut Yɛsu yi na wot vɔk e lagwi.”

²³Ano kwong, yɛn a vey na bazâ bemat beba: Yɛn vɛ, à Yɔsɛf de ba to yila hɛ, à Barsabas kɛ Yustus tanga Matiyas.

²⁴Ano kwong, yɛn a ra won, ba ye, “À Darwey, hwà tɔk pyɛ́ de bemât mwa be bare e neyey mɛn. Dura a wot e wɛ̌ e ji bemat beba vemo de hwà ga kasa,

²⁵na a jut fwôm tom mō e tô Yuda. Yɛ mo á hàla gwɛ na a kyè vɔk e dem de há jam yaga yɛ.”

²⁶E bamâ won o, yɛn a hwo kasa na masâ sesek, ko mwat de ba kasa, yɛ à Matiyas. Ano kwong, ba wuna hɛ na bwang betom Yɛsu kuru na wɛ gwining o (11).