Read berom Tomong Betom Yɛsu 11 Bible Online

Tomong Betom Yɛsu 11 - berom bible

Tomong Betom Yɛsu 11

¹E jeng yane mo, betom Yɛsu tanga bwang bemat-raa e yɛnɛ̂ sevwêl Yudiya ba wok, bemat de ba sé BeYuda wɛt ba ga sey rehâ Dagwi.

²Bemat behak ba sé de ba ye, ka sede mwât yere dyuk a hwo raa Yɛsu, ko a sé gbing-gbing be wɔ́ a yɛ e cwɛl. Jeng de Bitrus a toyo e Yɛrusalɛm, bemat o yɛn a hwo ɛ na neha detidetu,

³ba yang ɛ, “Hwà wɔ̀ yel e ji lɔ̂ bemat beduk de ba ga wɔ́ a yɛn e cwɛl wɛt, ko hwà re pyɛ́ na yɛn!”

⁴Yaga ano, Bitrus a hwo misang a yɛn yɛɛlɛl pyɛ̂ mwa de ya té, a pɛrɛ yi e susu mo, a ye:

⁵“Ma sè e ji repomô Yafa e de râ won, ko bá dura a me pyɛ cak e ji negwi-ywey. Ma di pyɛ cak de yá sè sede gwogbɔng gwopyɛ banga. Bá sè gyira gwɛ yi e lagwi e bato-kwɔng gwɛ banaas, ko ya gyirik vey e dem de ma sè ɛ̀.

⁶Sede ma ye ganga e ji mo, ma di nezap ngyāma detidetu, mwa na ngyāma rê banama, na pyɛ̂ gabaga tanga benon hey.

⁷Ko ma wok fwɔ hwak de gwa yang me, ‘À Bitrus, sogo! Yɛt ngyāma mo na hwo re.’

⁸Ko ma toyo a yɛ, ma ye, ‘Kée wey, à Darwey! Vit a pyɛ cak de ya sé kyiri e ji negwɔn mot kɛ de ya sé ligis de ya ga sang yel e nu hom.’

⁹Fwɔ mo gwa to vey gbak yi e lagwi, gwa ye, ‘Pyɛ de Dagwi a ga tɛ̀ yɛ jɛrɛ, hwo jut yɛ, ya sé kyiri wɛt!’

¹⁰Hemo ha té ano zang tat, ko e bama mo, ba to jut pyɛ́ mo mwa vɔk e lagwi.

¹¹E ji jeng o, bemat betat de ba tomo hɛn vey na me yi e Kaisariya ba pom e lɔ de ma sè sangal ɛ̀.

¹²Gabik Dagwi ha ha a me, me tó yey nà raa hɛn wɛt. Ano kwong, begwa mot bemat-raa vemo betyiimin yi e Yafa ba dopɛ̀ e me vɔk e Kaisariya. Ko jeng de wot a wul hwomo, wot a yel e lɔ̂ mwat wane mo.

¹³A ha a wot gwong de a di tom-lagwi e tumal e ji lɔ mɛ, a yang ɛ, ‘Tomo bemat vɔk e Yafa na be wɔ̀ yila Simɔn de be to tang ɛ, à Bitrus.

¹⁴Há de a rɔda ha a hwo ha rɔda tɛ̀ be sey neken mō tanga ne belɔ mō mwa.’

¹⁵E bama de ma hwo ha, Gabik Jɛrɛ ha hwo e ra bemat o, tyɛng sede remo de há kana hwo e ra wot e mɛsɛng o.

¹⁶Ko ma bare na pyɛ de Darwey Yɛsu á kana ha wɔgɔ, ‘Yohana á kana tɛ̀sɛ a bemat batisma na nshi, ko Darwey ê tɛ̀ a yin batisma na Gabik Jɛrɛ.’

¹⁷Dagwi a nɔ̂ng bemat beduk vane mo nɔrɔ hining o de á kana nɔng ot e jeng de wot a sey tsak o na Darwey Yɛsu Kristi. Sede remo de a sé ano, me ma sé wǎ de mê bare, mê kyɛm na me ra retek na Dagwi arɛt?”

¹⁸Jeng de yɛn a wok há hemo, yɛn a sǎ yuu, ko yɛn a hwo somo Dagwi, ba ye, “Wot a di, Dagwi a ga nɔ̂ng bemât yére dyuk gwong na be doyo yi e banɛn mɛn, na be to sey neken ne mwin.”

¹⁹E bama de ba mɔrɔ Istifanus, ba hwo tak a bwang bemat-raa reyɔm arɔng. Yaga ano, yɛn a shara hɛn e nekwɔn detidetu. Behak ba kyè wɔ e tyɛl Finikya, behak wɔ e rezîk Kipirus, ko behak wɔ e gbɔng repomô Antyokya. Yɛn a kyě ha a BeYuda zɔng rehâ Yɛsu.

²⁰Bemat o behak de yɛn a sé yi e Kipirus tanga Kirene yɛn a kyè vɔk e Antyokya, ko yɛn a hwo shara a bemat de ba sé BeYuda wɛt Yɛgɛt Yat e ra Darwey Yɛsu arɔng.

²¹Darwey a sɛlɛ hɛn, a nɔng ɛn reto, ko bemat pyak de ba wok há mɛn yɛn a sey tsak o, ko yɛn a doyo na be raa Darwey Yɛsu.

²²Bemât ekilisiya e Yɛrusalɛm yɛn a wok pyɛ́ de ya té e Antyokya, ko yɛn a tomo Barnabas wɔ e hwomo.

²³Jeng de a wul, ko a di fwom de Dagwi a ra yi na nerat mɛ, a vɔk yey pyɛng. A ha a yɛn, yɛn a re nuyel na vɔ̂k yey ting, na yɛn a to raa Darwey na yey mɛn mwa.

²⁴Yɛ Barnabas o á sè mwat rwat de Gabik Jɛrɛ há vɔk reto e ra yɛ, ko á sey tsak o na Dagwi sana tô yey. E jeng o, bemat pyak bá hwo raa Darwey Yɛsu.

²⁵A vane ano, Barnabas a kyè vɔk e repomô Tarsus, na a wɔ̀ jāma Saulus.

²⁶Jeng de a sɛ̀ ɛ, a vey na yɛ e Antyokya. Yɛn a sangal e hwomo na bemât ekilisiya mo shey hining burang, ko yɛn a basa a bemat pyak rehâ Dagwi. A sé e repomô Antyokya mo de ba tānga hwo yishi bemat-raa, à Bemat-Raà Kristi.

²⁷E jeng yane, bezarap Dagwi behak ba sogo yi e Yɛrusalɛm vɔk e Antyokya.

²⁸Hwak e ji mɛn de ba tang ɛ, à Agabus a sogo e tumal, ko yi na retô Gabik Dagwi a hwo há a bemat pyɛ de ya rɔda ba té wɔgɔ, vyong vyes sizɔng ya rɔda hwo e jêy mwa. (Ko di, vyong o yá hwo e jeng de Kalaudiyus á sè Da vwel BeRoma.)

²⁹Ko bemat-raa mo yɛn a yong ɛ̀ na kawɛ e ji mɛn a nɔng pyɛ de ya sé tyɛng na gap mɛ, na be tomo sɛlɛ vɔk na begwa mɛn bemat-raa de ba sé e sevwêl Yudiya.

³⁰Yɛn a ra ano mo, ko yɛn a tomo sɛlɛ mɛn o vɔk na bemakûk ekilisiya e vɔ Barnabas tanga Saulus.