Read berom Tomong Betom Yɛsu 12 Bible Online

Tomong Betom Yɛsu 12 - berom bible

Tomong Betom Yɛsu 12

¹E rwa jeng yane, Gbɔng Gwɔ̀m Herodes a hwo tak a bemât ekilisiya behak reyɔm.

²A tɛ̀ be mɔrɔ Yakɔp, gwa Yohana, na wal.

³Sede a di, pyɛ de a ra ya pɛngɛ a BeYuda yey, a re nuyel, ko a tɛ̀ be vo Bitrus arɔng. Pyɛ mo ya té e jeng Nzem Kpam-tuk Sana Géy-sing.

⁴Bama de ba vo Bitrus o, ba tɛ̀ ɛ e lɔ̂ ngyang, ba tɛ̀ bemât como benaas be gyeng ɛ. Kahɛ tuk be segsa bemât como mo zang naas. Ko Herodes a yong e yey mɛ wɔgɔ, e bamâ Nzem Gyilsit Nelɔ BeIsrayɛl ê vey na Bitrus o e jey, na be ra a yɛ shɔt e nuyêl bemât mwa.

⁵Yaga ano, ba gyeng Bitrus e hwomo e lɔ̂ ngyang. Ko bemât ekilisiya ba sé ra won na yey mɛn mwa, yaga na Dagwi a sɛlɛ hɛ.

⁶Tuhak, Herodes a yong ɛ̀ na a ba vey na Bitrus o, na be ra a yɛ shɔt e nusu hwol o. Nabwalak o, Bitrus a sé e de nevwa e tê bemât como beba. Yɛn a rɔgɔs hɛ na ngyang bya, ko bemât como behak ba sé e ruhup e de gyêng lɔ̂ ngyang o.

⁷Gòbok, tom-lagwi hwak a pere tumal e hwomo, ko negbey na lolo e keduk ngyang o. Tom o a fala Bitrus e hagat mɛ, a sene hɛ, ko a yang ɛ, “Sogo dey!” Ngyang de bá kana tɛ̀ a yɛ ya pere gaba yi e vɔ mɛ.

⁸Tom-lagwi o a to yang ɛ, “Rɔgɔs gworugu mō; tɛ̀ bekpatak mō!” Bitrus a ra ano, ko tom o a yang ɛ, “Tɛ̀ pyɛ banga mō, na hwo raa me!”

⁹Bitrus a raa hɛ pere wɔ̀ nusu yi e lɔ̂ ngyang o. A sé a yɛ sede a di pyɛ yemo e ji negwi-ywey, a tɔk kɛ pyɛ de tom-lagwi o a sé ra ya sé mwin wɛt.

¹⁰Yɛn a kwey bemât gyêng lɔ̂ ngyang o vê mɛsɛng, ko ba to kwey behak. E yɛnɛ mo, yɛn a pom e ruhup de ba yong gwɛ na dyam, gwomo de gwa kwey cik vɔk e ji repomo. Ruhup o gwa wunta hɛ pyɛ gwɛ yaga yɛn, ko yɛn a nusu hɛn e gwɛ. Sede yɛn a ga kyè lyoshô hyôk repomo mo hining, ko remo-remo, tom-lagwi o a hàla hɛ.

¹¹Bitrus a tumal e hwomo, ko nehywɛ mɛ na toyo a yɛ, a ye, “Ma tɔk a remo, pyɛ de ya té ya sé negwi wɛt! Darwey a ga tomo tom-lagwi mɛ na a vey sey ɛ̀ me yi e vɔ Herodes, na a to pat me yi e mwa reyɔm de BeYuda ba tɛ̀ e yey mɛn na be tak a me.”

¹²Jeng de a ga yang ɛ wɛng-wɛng, a hwo kyè vɔk e lɔ Marya nêng Yohana, de ba tang ɛ, à Markus arɔng. E hwomo, bemat pyak ba ga kana tula hɛn, ba sé ra won.

¹³Bitrus a kwɔgɔt rwi ruhup, ko hwông fwôm lɔ mo hwak de ba tang ɛ, à Roda a vey na a ba simo yíla mo.

¹⁴Jeng de a wok fwɔ̂ Bitrus, a pere tɔk gwɛ. Yey mɛ ya pɛngɛ sizɔng, ko a to tele vɔk e ji lɔ mo sana wunta rwi ruhup o, a yang ɛn, “Bitrus a sé e rwi ruhup!”

¹⁵Yɛn a toyo a yɛ, yɛn a yang ɛ, “E tang o how ayi!” Sede hwong o a shonong wɔgɔ, há de a ha ha sé ano, ko yɛn a ye, “A sé e tom-lagwi de e gyenges hɛ.”

¹⁶Ko Bitrus a re nuyel na kwɔgɔ̂t rwi ruhup o. E yɛnɛ mo, yɛn a wɔ̀ wunta gwɛ, ko jeng de yɛn a di ɛ, a yang ɛn kpɔrɔk.

¹⁷A nára vwɔ mɛ e gwi na yɛn a sǎ yuu, ko a misang a yɛn gwong de Darwey a pat ɛ yi e lɔ̂ ngyang. A to yang ɛn, “Há in a Yakɔp tanga bwang begwa mot há mo.” Ano, a sogo, a nára hɛ vɔk e kwɔn hak.

¹⁸Sede gasi ha ye gbey, lwɛ́lɛ gwa sogo e hwomo e lɔ̂ ngyang o tyɔng wɛt. Mwa bemât como mo yɛn a hwo rangsâl bemɛn pyɛ de ya té na Bitrus o.

¹⁹Herodes a tɛ̀ be jāma hɛ, ko ba tɔk sɛ̀ ɛ wɛt. Ko a rangsâl bemât gyeng o pyɛ de ya té mo ngyɛ̄k-ngyɛk. Ko yɛn a tɔk ha pyɛ cak wɛt. Yaga ano, a tɛ̀ be mɔbɔs hɛn. E jeng o, Herodes a sogo yi e sevwêl Yudiya, a wɔ́ e repomô Kaisariya, ko a sangal e hwomo jeng cak.

²⁰Herodes á kana kyě ra nu na bemât bapomô Tur na Sidɔn. Yɛn a wuna hɛn na yɛn a wɔ̀ di ɛ. Ko yɛn a tānga wɔ̀ man nu na Bilastus de a sé gbɔng o wo lɔ gwɔ̀m, na a sɛlɛ hɛn. Ko yɛn pyak ba sogo wɔ na Herodes, na yɛn a jāma sangâl netyang na yɛ. Yɛn a ra ano, yaga pyɛ̂ re de yɛn e sangal mɛ̀ ye yís yi e sevwêl gbɔng gwɔ̀m o.

²¹Herodes a kwɔrɔ a yɛn tuk véy o. Sede tuk o ha vey, a tɛ̀ gworugû negwɔm mɛ gworwat, a wɔ̀ sangal mɛ̀ e ra gwofwa negwɔm mɛ, ko a ha na bemat de ba tula hɛn o mwa.

²²Bemat o ba gbɔ, ba tē, “Fwɔ mo gwa sé fwɔ̂ dagwi hwak, gwa sé gwô mwasi wɛt!”

²³Remo-remo, tom-lagwi Darwey a tɛ̀ a ro ɛ, yaga a nɔ̂ng Dagwi nerey wɛt. Bekǔt ba hwo re rebek mɛ, ko a ku.

²⁴Ko ba re nuyel na sharâ rehâ Dagwi, ko bemat pyak ba sey tsak o na rɛ.

²⁵Barnabas na Saulus yɛn a yɛnɛ fwom mɛn e Yɛrusalɛm, ko yɛn a toyo wɔ e Antyokya. Yɛn a jut Yohana tanga yɛn, yɛ womo de ba to tang ɛ, à Markus.