Read berom Tomong Betom Yɛsu 13 Bible Online

Tomong Betom Yɛsu 13 - berom bible

Tomong Betom Yɛsu 13

¹E ji ekilisiya wo Antyokya, bezarap Dagwi tanga bemât basa bá sè e hwomo. Yɛn vɛ, à Barnabas, na Simɛyɔn de ba yila hɛ à Mwat Swi, na Lukiyus de a yi e Kirene, na Manayɛn de yɛn á ras na Herodes, hwak e ji begbɔng begwɔ̀m betat, tanga Saulus.

²Tuhak, jeng de yɛn a tula hɛn na be re a Darwey fongol, na be to tik rê pyɛ́, Gabik Jɛrɛ ha yang ɛn, “Tik a me hin detu Barnabas na Saulus, yaga na be ra fwom de ma ga yila hɛn yaga gwɛ.”

³Ano kwong, bemat-raa mo ba tik rê pyɛ́, yɛn a jut Barnabas na Saulus, ba tɛ̀ vɔ mɛn e ra yɛn, ko ba tɛ̀ ɛn e gwong.

⁴Sede remo de Gabik Jɛrɛ ha tomo Barnabas na Saulus na be wɔ̀ ra fwom o, yɛn beba mo ba kyè vɔk e repomô Selekya. Yi e hwomo, yɛn a yel e dwa-nshi, yɛn a kyè vɔk e rezîk Kipirus.

⁵Jeng de yɛn a wul rezik o, yɛn a wɔ́ e repomô Salamis, yɛn a kyě shara rehâ Dagwi e beduk re fongôl BeYuda. Yɛn a vɔk ɛ̀ Yohana Markus sede mwât sɛlɛ mɛn.

⁶Yɛn a kyě kyè be kwey e tê rezik o pere vɔk e repomô Pafɔs. E hwomo, yɛn a man na WoYuda hwak de a vyoshon, reza mɛ, à Bar-Yɛsu. A to kwɛlsɛng bemat wɔgɔ, yɛ a sé zarap Dagwi.

⁷A sé sâ gwɔmna rezik o, yɛ de ba tang ɛ, à Sɛrgiyus Bulus. Yɛ gwɔmna mo a vɔk tɔ́k tyɔng wɛt. Tuhak, a tomo be yila a yɛ Barnabas na Saulus, yaga a simo a wok hâ Dagwi.

⁸Ko yɛ mwât vyoshon wane mo de ba tang ɛ na relêm BeGirik, à Elimas a ra retek na yɛn, a jāma na a doyo gwɔmna mo yi e gwông raa.

⁹Ano, Gabik Jɛrɛ ha sɛ̀ reto e ra Saulus de ba to tang ɛ, à Bulus. A sɛt bayis mɛ gbir e ra mwât vyoshon o,

¹⁰a yang ɛ, “À hwo hwêy gwɔ̀m cēng! Hwà sé wo repugû kayɛ pyɛ de ya sé ryat! Yey mō ya sila na kayɛ yerê setɔgɔs na neves. Hwô sang tik nà tē net a gwòng Darwey de ba sé cik wɛt arɛt?

¹¹Dagwi ê tabak hwo a remo. Hwô sè bwók, hwô to tɔk di negbey gwi wɛt yaga jeng.” E ji jeng o, gbɔng lwīl gwa hwo e ra yɛ, ko a kyě mɔgɔm na vɔ, a jāma mwat de ê hwɔlɔ a yɛ vwɔ.

¹²Sede gwɔmna mo a di pyɛ de ya ga té, a tɛ́ ɛ mwat-raa, yaga bása de ha sé e ra Darwey Yɛsu ha tɛ̀ ɛ a langat hɛ sizɔng.

¹³BeBulus ba sogo yi e Pafɔs, yɛn a yel e dwa-nshi, ko yɛn a kyè vɔk e repomô Pɛrgɛ e sevwêl Pamfilya. Yohana Markus a hàla hɛn e hwomo, a to ɛ vɔk e Yɛrusalɛm.

¹⁴Yi e Pɛrgɛ yɛn a kwey wɔ e Antyokya wo Pisidya. Tuk Shábat, yɛn a yel e duk re fongol, ko ba sangal.

¹⁵E bama de mwat hwak a basa a bemat o yi e Bwok-basa Badu tanga yi e neha bezarap Dagwi, bemât nuyêl duk re fongol o ba tomo na há vɔk na BeBulus wɔgɔ, “À begwa, ka sede yin a vɔk há de hê gwɛ̌ a bemat gap, ko ci há in hɛ.”

¹⁶Bulus a sogo, a nára vwɔ mɛ, a yang ɛn, “À yin BeIsrayɛl na yin bemât yére dyuk de yin e re a Dagwi fongol, wet in betong na me.

¹⁷A raane, Dagwi de BeIsrayɛl be re a yɛ fongol à kana kasa bedabeda mot na be sè bemɛ. E jeng de yɛn à sè bekɛnɛt e sevwêl Misra, a tɛ̀ ɛn be tɛ́ ɛn yere ryey o. À dura a yɛn gbɔng retô mɛ e jeng de à kyè na yɛn yi e sevwel sane mo.

¹⁸Ko à niri na negwɔn mɛn e hey neshey kuru banaas (40).

¹⁹Jeng de yɛn à wul Kanaan, à re yére bemat tyaama na como, ko à nɔ̂ng bemat mɛ bavwel mɛn o na be tɛ́ ɛn benap mɛn.

²⁰Pyɛ́ mo mwa yà re sede neshey naga benaas na kuru batungun (450). “E bama mo, Dagwi à kasa bemat na be sè vê nuyel mɛn pere vey e jeng Samwɛl de à sè zarap Dagwi.

²¹E jeng o, bemat o bà rangal na be nɔng ɛn gbɔng gwɔ̀m. Ko Dagwi à kasa Saul, hwêy Kish wo yerê Bɛnyamin. Yɛ mo à re negwɔm e ra yɛn neshey kuru banaas.

²²E bama de Dagwi à pat Saul yi e negwɔm o, à tɛ̀ Davit a tɛ́ ɛ gbɔng gwɔ̀m mɛn. Há de à ha e ra yɛ a het ngan: ‘Ma ga sɛ̀ Davit, hwêy Yɛsɛ, de a sé mwat de e pɛngɛ a me yey. Yɛ a rɔda ra mwa pyɛ́ de me simo na a ra.’

²³A raane, Dagwi à kana sira hɛ, ê jut mwat yi e yére Davit, na a sè Mwât Sêy BeIsrayɛl. Yɛsu a sé mwat wane mo.

²⁴Gyam na Yɛsu mo a vey, Yohana á kana basa a BeIsrayɛl mwa wɔgɔ, yɛn a doyo yi e banɛn mɛn, na be tɛ̀ a yɛn batisma.

²⁵Sede jeng yɛnɛ̂ fwom mɛ ya vey bagat, Yohana mo á rangâl bemat o, ‘Yin e bare, ma sé wà arɛt? Ma sé yɛ wane wɛt de yin a sé gyeng ɛ. Ko di, mwat o a sé kyè vey e bama hom, ko ma ka vey na me viri batsɛ̂p bekpatak mɛ wɛt!’

²⁶“À begwa hom, yin de yin a sé yére Abraham, na yin bemât yére dyuk de yin e re a Dagwi fongol: A sé vey na wot de Dagwi a ga tomo na reha e ra gwong de ê sey neken mot.

²⁷Bemât Yɛrusalɛm na bemât nuyel mɛn yɛn á tɔk yerê mwat de Yɛsu a sé wɛt. Kahɛ Tuk Shábat be basa neha bezarap Dagwi e beduk re fongol, ko neha mo ná sè a yɛn wɛshɛrɛk wɛt. Ko mwin, yɛn á sila nɛ e jeng de yɛn á yɛrɛ a Yɛsu shɔt reku.

²⁸Ko mwa ano de yɛn á sɛ̀ pyɛ cak de ya jam na be yɛrɛ a yɛ shɔt reku wɛt, yɛn á ra won na Pilatus na a tɛ̀ be mɔrɔ hɛ.

²⁹A sé ano de yɛn a ra mwa pyɛ́ de bà kana jɛk e ra yɛ e Bwok-basa Dagwi. Ano, yɛn á gyirik hɛ yi e ra cɔ́gɔt-kak, ko bá lɛrɛ hɛ e sak.

³⁰Ko Dagwi á sene hɛ yi e reku.

³¹Nepɔlɔ pyak Yɛsu mo á dura a bemat de bá kana raa hɛ yi e Galili wɔ e Yɛrusalɛm tó mɛ. E yɛn vɛ de, a remo, ba sé ha a bemat mot e ra pyɛ́ de yɛn á kana di, ko yɛn á to wok e jeng yane mo.

³²“Ano kwong, wot a sé ha a yin Yɛgɛt Yat wɔgɔ: Dagwi a ga sene Yɛsu yi e reku. Yi ano, a ga sila há de à kana sira a bedabeda mot, ko a ga sila hɛ yaga wot nèy mɛn. E Bwok-basa Lɛlɛ e retin o rê neba, bà jɛk wɔgɔ: “ ‘Hwà sé Hwey hom. Yunung ma ga tɛ́ me Da mō.’

³³

³⁴“Ko Dagwi à kana ha e ra sene Hwey mɛ yi e reku, yaga na he sang bɔsɔ wɛt; a ha ano na neha nemo ngan: “ ‘Ma rɔda nɔng in nenɔrɔ nemo de na sé jɛrɛ, de na to sé ne mwin, nemo de mà kana sira e ra nɛ wɔgɔ, mê nɔ̂ng Davit nɛ.’

³⁵“E kwɔn o hak, bà to jɛk ngan: “ ‘Hwô simo na mwât fwom mō de a sé jɛrɛ a ku na a bɔsɔ wɛt.’

³⁶“E jeng de Davit à sè na neken, à ragas pyɛ́ de yà kana sè e yêy Dagwi. E bama mo, à ku, bà lɛrɛ hɛ e dem de bà lɛsɛ ɛ̀ bedabeda mɛ, ko revin mɛ rà bɔsɔ.

³⁷Ko Yɛsu de Dagwi á sene hɛ yi e reku á bɔsɔ wɛt.

³⁸À begwa, me simo na yin a tɔk pyɛ yemo ngan: A sé yi na Yɛsu de ba sé shara a yin reha wɔgɔ, Dagwi e halsa a bemat banɛn. Be viri kawɛ mwat de a tɛ̀ gap mɛ e ra Yɛsu mo washak yi e banɛn mɛ mwa. Pyɛ ma yemo de Badu Mose bà kana vɔk reto na be ra wɛt.

³⁹

⁴⁰Tē in naka, pyɛ́ de bezarap Dagwi bà kana ha ye kwon té na yin wɛt:

⁴¹“ ‘Wok in, à yin de yin e byɛs Dagwi! Tik na yin a langat hin gyam na yin a weres! Yaga ma rɔda ra pyɛ cak e nepɔlɔ min, yemo de yin ê sang sey tsak o na yɛ wɛt, mwa ano de mwat hwak ê ha a yin e ra yɛ.’ ”

⁴²Jeng de Bulus na Barnabas yɛn a sogo yi e duk re fongol o, bemat o ba rini hɛn, na yɛn a to toyo e Tuk Shábat de he kyè vey, na be gwɛ̌ ha a yɛn e ra pyɛ́ mo.

⁴³E bama de bemat o ba gasang hɛn, pyak e ji BeYuda mo tanga pyak e ji bemât yére dyuk de bá kana hwo raa negwɔn BeYuda de ba raa Dagwi naka, ba raa Bulus na Barnabas o. BeBulus o ba ha a yɛn, ko ba shonong e ra yɛn na yɛn a re nuyel e de tɛ́sɛ gap mɛn e ra Dagwi de e dúsa a yɛn nerat mɛ.

⁴⁴E Tuk Shábat het o mo, bwang o tyɔng na bemât repomo mo mwa ba tula hɛn na yɛn a bin wok rehâ Darwey.

⁴⁵Sede BeYuda ba di bagyɛng bemat o, ko yɛn a sila na repugu. Yɛn a hwo ra cuna na neha de Bulus a sé ha, yɛn a to lashe reza mɛ.

⁴⁶Ko Bulus na Barnabas ba toyo a yɛn na há na yey ting, ba ye, “Á sè gbing-gbing na wot a tānga ha a yin rehâ Dagwi e susu mo. Ko a remo de yin a ga kyɛ́ in rɛ, ko yin a jut bato min, yin a vey na yin a sɛ̀ neken gbak-gbak wɛt, wot à vemo wot ê tik in na wot a wɔ̀ ha a bemât yére dyuk reha mo.

⁴⁷Yaga pyɛ ma yemo de Dagwi a nɔng ot nu na wot a ra: “ ‘Ma ga tɛ̀ na hwo tɛ́ o negbey vɔk na bemât yére dyuk, yaga na Dagwi a sey nekên bemât jêy mwa yi na hwo.’ ”

⁴⁸Jeng de bemât yére dyuk o ba wok ano, yɛn a vɔk yey pyɛng, ko yɛn a somo hâ Darwey. Ko mwa vemo de Dagwi à kana kasa na be sey neken gbak-gbak, yɛn a tɛ́ ɛn bemat-raa.

⁴⁹Rehâ Darwey ra shara hɛ e yɛnɛ̂ sevwel o mwa.

⁵⁰Ko BeYuda ba hwo tɔgɔs begbɔng o e ji beha behak de ba re a Dagwi fongol, tanga bemât nuyêl repomo mo. Yɛn a sogo nehywɛ bemat o, ba tɛ̀ ɛn na yɛn a hwo tak a Bulus na Barnabas reyɔm, ko yɛn a ro ɛn yi e yɛnɛ̂ sevwel mɛn o.

⁵¹Yaga ano, BeBulus o ba pagat búm de gwa dyɛng e bol mɛn, na be dura mɛ̀, ba kyɛ́ ɛn pyɛ de yɛn a ra. Ano, yɛn a sogo, yɛn a kyè vɔk e repomô Ikonyum.

⁵²Bemat-raa e Antyokya mo yɛn a vɔk yey pyɛng sizɔng, ko Gabik Jɛrɛ ha vɔk reto e ra yɛn arɔng.