Read berom Tomong Betom Yɛsu 14 Bible Online

Tomong Betom Yɛsu 14 - berom bible

Tomong Betom Yɛsu 14

¹E repomô Ikonyum, Bulus na Barnabas yɛn a wɔ̀ yel e duk re fongôl BeYuda, sede remo de ba tɔ́k ɛn mɛ̀. Há de yɛn a ha mo ha vɔk reto tyɔng wɛt, ha pere wɔ̀ tɛ̀ BeYuda na bemât yére dyuk pyak ba tɛ́ ɛn bemat-raa.

²Ko bwang BeYuda de ba kyɛ́ ɛn nà sey tsak o mo ba tɔgɔs bemât yére dyuk, ko ba sow a yɛn sɔng e jim, yaga na yɛn a ra repugu na bemat-raà Yɛsu.

³Bulus na Barnabas yɛn a ros e hwomo; yɛn a ha a bemat na yey ting e ra Darwey, yɛ de e dura a bemat nerat mɛ. Ko Darwey o a dura a bemat wɔgɔ, há de BeBulus o ba sé shara ha sé tsak o. A dura ano yi na pyɛ̂ langat na pyɛ̂ bes de yɛn a ra yi na reto de a ga nɔng ɛn.

⁴Bemât repomo mo ba gas ɛn zang ba: Behak ba raa BeYuda, ko behak ba raa betom Yɛsu.

⁵A vane ano, bemât yére dyuk, na BeYuda, mwa na bemât nuyel mɛn yɛn a man nu na yɛn a tak a BeBulus o reyɔm, na be tó ɛn na beta na be mɔbɔs hɛn.

⁶Jeng de betom Yɛsu mo ba wok hywɛ́ mo, yɛn a tele vɔk e bapomô Listira na Dɛrbɛ e sevwêl Likawonya, ko yɛn a kyě kyè e nebapomo de na gwɔrɔ vɛ.

⁷Yɛn a re nuyel na sharâ Yɛgɛt Yat e hwomo.

⁸E repomô Listira, mwat hwak á sɛ̀ de á sè nà bol; yimo e tɔ́ mɛ a ga sang mara kwɛngɛl wɛt.

⁹Yɛ mwat o a wok pyɛ de Bulus a sé ha. Sede Bulus a bɛrɛng hɛ gbir, a di, mwat o a ga sey tsak o, bê tɔk tɛ̀ ɛ tyang.

¹⁰Yaga ano, a ye ngyat, a yang ɛ, “Sogo e tumal!” Mwat o a gyili e tumal, ko a hwo kyě kyè.

¹¹Sede bagyɛng bemat de ba sé e hwomo ba di pyɛ de Bulus a ra mo, yɛn a gbɔ na relêm BeLikawonya, ba ye, “Bedagwi ba ga gyirik vey na wot e ji babêk bemasi!”

¹²Yɛn a yila Barnabas, à Zeyus, ko yɛn a yila Bulus, à Hɛrmɛs, yaga e yɛ wɛ de a sé mwât nuyêl há mo.[1]

¹³Duk sekwît Zeyus wa sé bagat e mâ repomo mo. Ko gwɔ̀m sekwit o a vey na bemus tanga yerê bèlɛlɛ de ba yong na bejamuk e ruhûp repomo, ko a ye, yɛ na mwa bemat o yɛn e simo be nára vɛ sede nenɔrɔ̂ yas vɔk na BeBulus o.

¹⁴Jeng de Barnabas na Bulus yɛn a wok ano, yɛn a hama berugu mɛn, yɛn a tele vɔk e tê regyɛng bemat o, yɛn a gbɔ, ba tē,

¹⁵“À besa, yaga sɛ́ de yin a sé ra ano arɛt? Wot a sé bemasi zɔng tyɛng sede yin arɔng! Wot a vey shara a yin Yɛgɛt Yat, yaga na yin a doyo neyey min yi e de ragâs sekwit de sa vɔk nerat nehak wɛt, na yin a raa Dagwi de a vɔk neken. A sé e yɛ wɛ de à kana yong lagwi, na jey, na gworep, tanga mwa pyɛ́ de ya sé e ji yɛ̄.

¹⁶A raane, à simo a mwa yére bemât jey ye raa begwong de ba jam a yɛ̄.

¹⁷Ko kayɛ jeng, nerat de e ragas ne dúsa a bemat, yɛ wɛ a sé Dagwi. A sé e yɛ de e tɛ̀sɛ rwak wo rop, ko e nɔngɔs hin pyɛ̂ hwiri e jeng yɛ̄ detidetu; e nɔngɔs hin pyɛ̂ re, ko e tɛ̀sɛ neyey min ne pɛngɛ arɔng.”

¹⁸Mwa ano de betom Yɛsu mo ba ha a yɛn neha nemo, a sé a yɛn gbang tyɔng wɛt na yɛn a dul regyɛng bemat o nà nára a yɛn nenɔrɔ̂ yas de be yɛt.

¹⁹Ko BeYuda behak ba yi e Antyokya wo Pisidya na Ikonyum. Yɛn a hwo hwɔtɔ nehywɛ bemat o na be raa há mɛn, ko yɛn a tó Bulus na beta. Ko ba hwɔlɔ hɛ vɔk e bamâ repomo, yaga yɛn a bare, a ga ku.

²⁰Ko jeng de bemat-raa ba wɔ́ e dem de Bulus o á sè ɛ̀, yɛn a gwɔrɔ hɛ, ko a hwo sogo, a to kyè wɔ̀ yel e ji repomo mo. Tuk het, yɛ tanga Barnabas yɛn a hàla repomo mo vɔk e Dɛrbɛ.

²¹Bulus na Barnabas yɛn a shara Yɛgɛt Yat e repomô Dɛrbɛ, ko yɛn a tɛ̀ bemat pyak be tɛ́ ɛn bemat-raà Yɛsu. E bama mo, yɛn a to ɛn e Listira, na Ikonyum, na Antyokya wo Pisidya.

²²E kahɛ kwɔn de yɛn a wɔ́, yɛn a gwɛsɛ a bemat-raa gap, ko yɛn a shonong e ra yɛn na yɛn a re nuyel na yey ting e gwông raa. Yɛn a yang ɛn, “A sé gbing-gbing na wot a sɔ reyɔm detidetu gyam na wot a de yel e Segwɔm Dagwi.”

²³E kawɛ ekilisiya, yɛn a kasa a yɛn bemakuk. E bama de yɛn a ra won, na be tik rê pyɛ́ arɔng, yɛn a tik ɛn e vwɔ̂ Darwey, de bemat o ba tɛ̀ gap mɛn e ra yɛ.

²⁴Yɛn a sogo, ko yɛn a kwey e sevwêl Pisidya wɔ e sevwêl Pamfilya.

²⁵Ko jeng de yɛn a ha a bemat rehâ Dagwi e repomô Pɛrgɛ, yɛn a gyirik vɔk e repomô Ataliya.

²⁶Yi e hwomo, yɛn a yel e dwa-nshi, ko yɛn a to ɛn vɔk e Antyokya wo Sirya. Á sè kwɔn a hane de bá kana tik ɛn e vwɔ̂ Dagwi na a dura a yɛn nerat mɛ e de ragâs fwom de yɛn a mɛsɛ̂ng yɛnɛ gwɛ.

²⁷Jeng de yɛn a wul e hwomo, yɛn a yila bemât ekilisiya na be wɔ̀ tula hɛn. Yɛn a ha a yɛn e ra pyɛ̂ mwa de Dagwi a ga ra yi na yɛn. Ko yɛn a ha a yɛn, Dagwi a ga wunta a bemât yére dyuk gwong na be tɔk sey tsak o na yɛ arɔng.

²⁸Yɛn a ros e hwomo na bemat-raa mo.