Read berom Tomong Betom Yɛsu 15 Bible Online

Tomong Betom Yɛsu 15 - berom bible

Tomong Betom Yɛsu 15

¹E jeng yane mo, bemat behak ba vey yi e Yudiya vɔk e repomô Antyokya. Yɛn a hwo basa a begwa mɛn bemat-raa wɔgɔ, “Ka sede ba tānga wɔ́ a yin e cwɛl wɛt tyɛng na negwɔn de Mose à kana basa, ko Dagwi ê tɔk sey neken min wɛt.”

²Há hemo ha vey na há pep tyɔng wɛt, ko Bulus na Barnabas yɛn a tó cuna na bemat vane mo e ra hɛ ding-ding. Yaga ano, bemat-raa ba kasa Bulus na Barnabas o tanga behak e ji bemat-raa mo, ko ba tomo hɛn vɔk e Yɛrusalɛm, yaga na be wɔ̀ di betom Yɛsu tanga bemakûk ekilisiya e ra há mo.

³Ano kwong, bemât ekilisiya mo ba tɛ̀ ɛn e gwong. E ji kwɛngɛl mɛn o, yɛn a kwey e bavwêl Finikya na Samariya, ko yɛn a ha a bemat e bavwel o wɔgɔ, bemat de ba sé BeYuda wɛt, yɛn arɔng ba ga tɛ́ ɛn bemat-raà Yɛsu. Há hemo ha tɛ̀ mwa begwa mɛn bemat-raa ba vɔk yey pyɛng sizɔng.

⁴Jeng de yɛn a wul Yɛrusalɛm, bemât ekilisiya, mwa na betom Yɛsu, tanga bemakuk ba sey ɛn na yey pyɛng. Ko BeBulus o kwong yɛn a ha a yɛn kayɛ pyɛ de Dagwi a ga ra yi na yɛn.

⁵Ko bemat-raa behak de ba sé vê BeFarisi yɛn a sogo, ba ye, “A sé gbing-gbing na be wɔ́ a bemat-raa vê yére dyuk e cwɛl, na be tɛ̀ ɛn be gyenges Badu Mose arɔng.”

⁶Betom Yɛsu na bemakûk ekilisiya ba man na be tɔrɔng e ra há mo.

⁷E bama de yɛn a ga tɔrɔng ding-ding e ra hɛ, Bitrus a sogo na a ha na yɛn, a ye, “À begwa, yin a tɔk, e jeng de yá kwey, Dagwi á kana kasa me e tē min, na me shara a bemât yére dyuk Yɛgɛt Yat, yaga na be wok yɛ̄, na be sey tsak o na Yɛsu arɔng.

⁸Dagwi, yɛ de a tɔk neyey bemât mwa, á nɔng ɛn Gabik Jɛrɛ mɛ, tyɛng sede remo de á kana nɔng ot. Nɔrɔ hane há dura, yɛ á sey ɛn sede bemɛ.

⁹Yaga yɛn á sey tsak o na yɛ, á tɛ̀ neyey mɛn ne sè jɛrɛ. Ano, á dura kasa hak e tē mot de wot a sé BeYuda na yɛn de ba sé vê yére dyuk wɛt.

¹⁰Ko di, yaga sɛ́ de yin e simo na yin a mara Dagwi arɛt? Yaga sɛ́ de yin e simo yin a tɛ̀ a bemat-raa swesêk vɔk berɔndɔng yerê yemo de wot kɛ bedabeda mot wot á tɔk jut yɛ wɛt arɛt?

¹¹Yin ra ano wɛt! Wot BeYuda, wot a sey tsak o, Dagwi a sey neken mot yi na nerat de Darwey Yɛsu a dura a wot, ko a sey neken mɛn e gwong gwining o arɔng.”

¹²Mwa bemat de ba sé e de tula mo ba sǎ yuu, ko yɛn a sé wokos neha Barnabas na Bulus jeng de ba sé ha há e ra gwong de Dagwi a ga ra fwom yi na yɛn. A ga tɛ̀ ɛn, be ra pyɛ̂ langat na pyɛ̂ bes e tê bemât yére dyuk.

¹³Sede yɛn a yɛnɛ há mo, Yakɔp a hanat, a ye, “À begwa, wok in há hom!

¹⁴Simɔn Bitrus a sé mɛsɛ̂ng misang a wot gwong de Dagwi a dura a bemât yére dyuk tɛ̂ yey mɛ. A dura ano yi na kasâ bemat e tē mɛn na be sè bemɛ.

¹⁵Ko jeng de bezarap Dagwi yɛn à kana ha neha mɛn, ko neha mɛn o nà sè e ra pyɛ́ yemo mo arɔng, sede remo de bà jɛk wɔgɔ,

¹⁶“ ‘E bamâ pyɛ́ yemo, ma rɔda toyo, ko mê to lɔk lɔ̂ Davit de hà kana gaba. Ma rɔda to lɔk barîn lɔ mo na he to sè lɔ rat.

¹⁷Mê ra ano, yaga na bwang bemasi be bin jāma me, yɛn vɛ à mwa yére bemât jey de ma kana kasa na be sè benang.

¹⁸A sé ano de Darwey Dagwi a sé ha, womo de à kana dura a wot pyɛ́ yemo yimo gyam.’ ”

¹⁹Yakɔp o a re nuyel na ha, a ye, “E di hom, ê sè naka na wot a tɛ̀ a bemât yére dyuk de ba tɛ́ ɛn bemat-raa pyɛ negbang wɛt.

²⁰Tik na wot a jɛk a yɛn bwok-rwang, na wot a dura a yɛn pyɛ́ de bê raa. Pyɛ́ ma yet ngan: Be re pyɛ́ de ba yɛrɛ yaga sekwit wɛt; be ra nejwang wɛt; be re namâ pyɛ de ba tik nà shushu nemî yɛ wɛt; be re nemi arɔng wɛt.

²¹Yaga yimo gyam vey e remo, ba shara a bemat neha Mose e karɛ repomo, ko kahɛ Tuk Shábat ba sé basa nɛ e ji beduk re fongol.”

²²Ano kwong, betom Yɛsu, na bemakuk, tanga mwa bemât ekilisiya mo yɛn a yong ɛ̀ na yɛn a kasa bemat behak yi e tē mɛn, na be tomo hɛn tanga Bulus na Barnabas wɔ e Antyokya. Bemat de ba kasa mo yɛn vɛ, à Yuda de ba to tang ɛ, à Barsabas, na Silas; yɛn á sè bemat de mwa bemat-raa ba nɔngɔs hɛn nerey.

²³Bwok-rwang de ba tomo hɛn mɛ̀ mo ba jɛk gwɛ ngan: Bwok-rwang gwomo yi e vɔ betom Yɛsu tanga bemakûk ekilisiya de wot a sé begwa min, Vɔk na yin bemat-raa de yin a sé vê yére dyuk e repomô Antyokya tanga e bavwêl Sirya na Kilikya: Show in pyak.

²⁴Wot a wok, bemat behak de ba nusu yi e ji mot ba ga wɔ̀ bɔrɔk hin, ba ga to shɔk a yin yey na pyɛ de yɛn a ha a yin. Ko a sé e wot de wot a tomo hɛn na be ra ano wɛt.

²⁵Yaga ano, wot a man mwa hot, ko wot a yong ɛ̀, wot ê kasa bemat behak na wot a tomo hɛn vey na yin. Yɛn ê vey tanga besâ yey mot Barnabas na Bulus,

²⁶vemo de bá kana ye waa a neken mɛn, yaga yɛn á ra a Darwey mot Yɛsu Kristi fwom.

²⁷Ano kwong, wot a sé tomo a yin na Yuda tanga Silas; yɛn vemo mo ba rɔda ha a yin há de ha sé hining na pyɛ de wot a jɛk e bwok-rwang gwomo.

²⁸Pyɛ de ya jam a Gabik Jɛrɛ, de ya to jam a wot arɔng yɛ à yet ngan: Wot e simo na wot a to tɛ̀ a yin pyɛ nedirik cak wɛt sɛ̌ badu de a sé gbing-gbing na yin a raa vɛ. Badu ma vemo ngan:

²⁹Yin re pyɛ́ de ba yɛrɛ yaga sekwit wɛt; yin re nemi wɛt kɛ namâ pyɛ de ba tik nà shushu nemî yɛ; yin ra nejwang arɔng wɛt. Ka sede yin a gyeng bato min yi e pyɛ́ yemo, ko yin ê ra naka. Tala ma hane.

³⁰Ba tɛ̀ bemat de ba tomo hɛn o e gwong, ko yɛn a kyè vɔk e Antyokya. Jeng de yɛn a wul hwomo, yɛn a tula mwa bemât ekilisiya, ko yɛn a nɔng ɛn bwok-rwang o.

³¹Sede bemat-raa mo ba basa gwɛ, yɛn a vɔk yey pyɛng, yaga há mo ha gwɛ̌ a yɛn gap.

³²Yuda na Silas, yɛn de ba sé bezarap Dagwi, yɛn a ha na bemat-raa mo na neha pyak, na be gwɛ̌ a yɛn gap, na be to tɛ̀ ɛn be tumal gak.

³³Yɛn a sangal e hwomo yaga jeng. E bama mo, bemat-raa mo ba tɛ̀ ɛn e gwong, ba yang ɛn kala, yaga na be to ɛn vɔk e Yɛrusalɛm e kwɔ̂n vemo de bá kana tomo hɛn. [

³⁴Ko Silas a yong ɛ̀ na a nàra e hwomo.]

³⁵Bulus na Barnabas, yɛn a ka nàra e Antyokya yaga jeng. Yɛn na bemat o behak pyak yɛn a basa a bemat rehâ Darwey, ko yɛn a to shara rɛ arɔng.

³⁶E bamâ jeng, Bulus a yâng Barnabas, “Tik na wot a toyo, na wot a wɔ̀ di begwa mot bemat-raa e karɛ repomo de wot á kana basa a yɛn rehâ Darwey, yaga na wot a di gwong de yɛn a sé re nuyel.”

³⁷Barnabas a simo a vɔk ɛ̀ Yohana de ba to tang ɛ, à Markus wɔ e hwomo.

³⁸Ko Bulus a bare, a jam na be vɔk ɛ wɛt, yaga e jeng de yɛn á kana sè e Pamfilya, á tik kwɛngɛl na yɛn, ko á hàla fwom o gyam na be yɛnɛ gwɛ.

³⁹Yɛn a hwo tow nu e ra há mo sizɔng, ko e yɛnɛ mo, yɛn a gas kwɛngɛl mɛn o. Barnabas a jut Markus, ko yɛn a yel e dwa-nshi, yɛn a kyè vɔk e rezîk Kipirus.

⁴⁰Ko Bulus a kasa Silas na a raa hɛ. Bemat-raa ba tɛ̀ ɛn e vwɔ̂ Darwey na a dura a yɛn nerat mɛ.

⁴¹A hwo kwɛngɛl mɛ, ko a kwey e bavwêl Sirya na Kilikya. E kahɛ kwɔn, a tɛ̀ bemât be-ekilisiya mo be tumal gak e ji gwông raa.