Read berom Tomong Betom Yɛsu 16 Bible Online

Tomong Betom Yɛsu 16 - berom bible

Tomong Betom Yɛsu 16

¹Bulus a kyè kwɛngɛl mɛ pere wɔ̀ wul bapomô Dɛrbɛ na Listira. E hwomo, a sɛ̀ mwat-raa hwak de ba tang ɛ, à Timotawus. Neng mɛ a sé WoYuda de a tɛ́ ɛ mwat-raa, ko da mɛ a sé WoGirik.

²Mwa bemat-raa vê Listira na Ikonyum yɛn a ha há rat e ra yɛ.

³Bulus a simo na Timotawus o a raa hɛ e kwɛngɛl mɛ. Yaga ano, a wɔ́ a yɛ e cwɛl, yaga mwa BeYuda de ba sé sangal e yɛnɛ̂ sevwel o yɛn a tɔk, da mɛ a sé WoGirik.

⁴E kwɛngɛl BeBulus o, yɛn a kwey e repomo het vɔk e het, ko yɛn a ha a bemat-raa pyɛ de betom Yɛsu na bemakûk ekilisiya ba yong ɛ̀ e Yɛrusalɛm. Yɛn a ha a yɛn, a sé gbing-gbing na yɛn a gyenges badu vane mo.

⁵Ano kwong, bemât be-ekilisiya ba gwɛ̌ tumal gak e gwông raa, ko kahɛ tuk yɛn a gwɛsɛ hɛn na nepyak.

⁶Gabik Jɛrɛ ha nɔ̂ng BeBulus gwong wɛt na be wɔ̀ ha a bemât sevwêl Asiya rehâ Darwey Yɛsu. Yaga ano, yɛn a kyě kyè e yɛnɛ̂ bavwêl Firigya na Galatya.

⁷Jeng de yɛn a wul sevwêl Misiya, yɛn a simo be yel e sevwêl Bitinya, ko Gabik Yɛsu ha simo a yɛn wɛt.

⁸Yaga ano, yɛn a kwey e Misiya, ko yɛn a gyirik vɔk e repomô Torowas.

⁹Nabwalak tuk hane mo, Dagwi a dura a Bulus e ji negwi-ywey: A di mwat hwak wo sevwêl Makedonya e tumal, ko mwat o a ra won na yɛ, a yang ɛ, “Vey ye dɔ, na hwo ba sɛlɛ hot e Makedonya!”

¹⁰E bama de ba dura a Bulus pyɛ mo, wot a di, Dagwi a ga yila hot na wot a shara a bemât Makedonya Yɛgɛt Yat. E ji jeng o, wot a pe yong ot, na wot a kyè wɔ e hwomo.

¹¹Wot a yel e dwa-nshi e Torowas, wot a kyè cik, wot a ye dɔ a gworep, ko wot a wul kerezîk Samotarake. E tuk het, wot a to sogo, ko wot a wul e repomô Neyapolis.

¹²Yi e hwomo, wot a kyè e bol vɔk e Filipi. Repomo mo ra sé rehak e ji bagbɔng bapomô bak sevwel swɛl wane mo wo Makedonya. Rā to sé repomo de BeRoma ba sangal ɛ̀. Wot a sangal e hwomo nepɔlɔ tyɔng.

¹³Tuk Shábat, wot a nusu vɔk e bamâ repomo mo, wot a wɔ́ e vwarâ rɔt, yaga wot a bare, BeYuda ba tɔ́k ɛn e de tulsa hɛn e dem o na be ra won. E hwomo, wot a sangal, ko wot a hwo ha na beha behak de ba tula hɛn.

¹⁴E ji beha de ba wok reha mot o, hwak a sé de ba tang ɛ, à Lidiya. A sé mwât rɛsɛ̂l berugu de bà sé zwey, ko bà vɔk dyām pyak; a yi e repomô Tiyatira. Á kana tɔ́k ɛ na re a Dagwi fongol. Darwey a wunta yey mɛ, yaga na a tɛ̀ nehywɛ mɛ e ra neha Bulus.

¹⁵Yɛ tanga mwa belɔ mɛ yɛn a vey, ko ba tɛ̀ a yɛn batisma. E bama mo, a rini hot vɔk e lɔ mɛ, a ye, “Ka sede yin a di, ma ga sey tsak o na Darwey, ko yin ê vey sangal e lɔ hom.” A shonong e ra wot, ko wot a wɔ́ e hwomo.

¹⁶Tuhak, wot á sè kyè wɔ e kwɔn de ba ragas ɛ̀ won. E gwong, wot a man na hwong hwak de a sé sam ko a vɔk ceng. Ceng o ya tɛ̀ ɛ a ha a bemat pyɛ́ de yê ba té na yɛn. Bemat de a sé na yɛn ba sɛsɛm dyām pyak yi na vyoshon de a ragas a bemat.

¹⁷Yɛ hwong o a hwo raa Bulus tanga bwang mot, a gbɔ, a tē, “Bemat vemo ba sé besam Dagwi De A Dal Na Reto Mwa! Yɛn a sé ha a yin gwong de bê sey neken min!”

¹⁸A dopse ra ano nepɔlɔ pyak sɛ̌ tuk de Bulus a yang ɛ shagarak na yɛ. A doyo, ko a yâng ceng o, “E ji rezâ Yɛsu Kristi, ma yang o, nusu hwo yi e ji mɛ!” Remo-remo, ceng o ya pe nusu hɛ.

¹⁹Bemat de hwong o a sé na yɛn ba di, ba ga bang a yɛn gwông sɛsɛ̂m dyām mɛn. Yaga ano, yɛn a vo Bulus na Silas, yɛn a hwɔlɔ hɛn vɔk e dúra e kwɔn de bemakûk repomo mo ba sé ɛ̀.

²⁰Yɛn a wɔ́ na yɛn na bemât shɔt, yɛn a ye, “Bemat vemo ba sé BeYuda, ba sé vɛ̀sɛ na sogô nehywɛ e repomo mot.

²¹Yɛn a sé basa a bemat, bē raa negwɔn de badu mot ba kyɛ́ ɛn nɛ. A jam na wot BeRoma wot a sey kɛ wot a raa negwɔn nane mo ko tyɔng wɛt.”

²²Regyɛng bemat de ba sé e hwomo yɛn arɔng ba wɔ̀ hwo e ra BeBulus o. Bemât shɔt o ba paa a yɛn berugu, ko ba tɛ̀ be dak ɛn na zining.

²³E bama de ba ga dak ɛn ding-ding, bemât shɔt o ba tɛ̀ be bomo hɛn e lɔ̂ ngyang, ko ba nɔ̂ng mwât bɛrɛng lɔ̂ ngyang o nu, a bɛrɛng hɛn gak.

²⁴E bama de a wok há hane, a jut ɛn, ko a tɛ̀ ɛn e duk wo ji mo, a tɛ̀ bol mɛn e tê besesêk cɔ́gɔt.

²⁵Nakabadem, Bulus na Silas yɛn a sé ra won, yɛn a to sé ra a Dagwi lɛlɛ, ko bwang bemat de ba sé re ngyang arɔng ba sé wokos hɛn.

²⁶E ji jeng o, vwel ha digis sizɔng, ko lɔ̂ ngyang o ha digis arɔng yi e retîn hɛ. Remo-remo, mwa ri hɛ ba pe wuma hɛn, ko ngyang de bá kana tɛ̀ a bemat o mwa ya gabsa.

²⁷Mwât bɛrɛng lɔ̂ ngyang o a sene yî nevwa, a di mwa ri mo pyot, ko a sé a yɛ sede bemât ngyang o ba ga tele. Yaga ano, a hwɔltɔ wal mɛ na a mɔrɔ mɛ̀ tó mɛ.

²⁸Ko Bulus a gbɔ na gbɔng fwɔ, a yang ɛ, “Hwo mǎ tó mo wɛt! Wot a sé e ngamo mwa hot!”

²⁹Yɛ mwât bɛrɛng o a yila be vey na kya gbey, a sogo hák, a yel e ji mo, ko a gaba e cât bol Bulus na Silas, ko rebek mɛ ra vow na bengyip.

³⁰A nusu na yɛn e majey, a rangal hɛn, “À beda, e sɛ́ de ya sé gbing-gbing na me ra, na be sey neken hom arɛt?”

³¹Yɛn a yang ɛ, “Tɛ̀ gap mō e ra Darwey Yɛsu, ko ba rɔda sey neken mō, nemo tanga ne mwa belɔ mō.”

³²Ko yɛn a ha a yɛ na mwa belɔ mɛ rehâ Darwey.

³³E jeng nabwalak yane mo, mwât bɛrɛng lɔ̂ ngyang o a jut ɛn, ko a kus a yɛn baram mɛn. Ko sana lashê jeng, ba tɛ̀ a yɛ na mwa belɔ mɛ mo batisma.

³⁴Ano, a jut Bulus na Silas, a kyè na yɛn vɔk e lɔ mɛ, ko a nɔng ɛn pyɛ̂ re. Yɛ tanga belɔ mɛ mwa ba vɔk yey pyɛng sizɔng, yaga a remo, yɛn a tɛ̀ gap mɛn e ra Dagwi.

³⁵Jeng de gasi ha ye gbey, bemât shɔt o ba tomo bemat mɛn na há vɔk na mwât bɛrɛng lɔ̂ ngyang, ba ye, “Hàla bemat vane mo na be kyè.”

³⁶Yɛ mwat o a ha a Bulus há hane, a ye, “Bemât shɔt ba nɔng nu, wot hàla hin na yin a kyè. Ano kwong, yin ê tɔk nusu na yin a kyè. Kyè in tyang.”

³⁷Ko Bulus a kyɛ́ ɛ, a yâng bemat de ba tomo hɛn o, “Yɛn a tɛ̀ be dak ot e ji bemat, ko yɛn a to bomo hot e lɔ̂ ngyang. Yɛn a ra ano sana ra a wot shɔt, mwa ano de wot a sé nèy vwêl BeRoma. Ko a remo, yɛn a de sé simo be hàla hot yaang arɛt? Tyɔng tyɔng wɛt! Tik na yɛn bemât shɔt o be vey pyɛ mɛn na be wɔ̀ kyɔk ot.”

³⁸Bemat de ba tomo hɛn o ba toyo, ba wɔ̀ ha a bemât shɔt há mo. Sede yɛn a wok, Bulus na Silas yɛn a sé nèy vwêl BeRoma, bengyip ba vo ɛn.

³⁹Yɛn a wɔ́ na BeBulus o, na yɛn a wɔ̀ tosho a yɛn gabɔk. Ko ba kyɔk ɛn yi e lɔ̂ ngyang, yɛn a ra won na yɛn, na yɛn a hàla repomo mo.

⁴⁰Bulus na Silas ba tik lɔ̂ ngyang o, yɛn a nára hɛn vɔk e lɔ Lidiya. E hwomo, yɛn a man na bemat-raa, yɛn a gwɛ̌ a yɛn gap, ko yɛn a kyè.