Read berom Tomong Betom Yɛsu 18 Bible Online

Tomong Betom Yɛsu 18 - berom bible

Tomong Betom Yɛsu 18

¹E bamâ pyɛ́ yane, Bulus a sogo yi e repomô Atena, a kyè vɔk e Kɔrintɔs.

²E hwomo, a man na WoYuda hwak de ba tang ɛ, à Akwila, de ba tɔ ɛ e sevwêl Pɔntus. Yɛ tanga hwā mɛ Piriskila ba mɛsɛ̂ng vey yi e Italya, yaga Kalaudiyus, yɛ Da vwel BeRoma, a nɔng nu, mwa BeYuda be tik repomô Roma. Bulus a wɔ di BeAkwila mo.

³A sangal na yɛn, ko yɛn a ra fwom mwa hɛn, yaga fwom mɛn gwa sé gwining o, gwɛ à yông bǔk.

⁴Kahɛ Tuk Shábat, Bulus o a kyese e duk re fongol, a tɔrɔng na yɛn e ra rehâ Darwey Yɛsu, ko a jāma a tɛ̀ BeYuda na BeGirik be sey rɛ.

⁵Jeng de Silas na Timotawus yɛn a vey yi e sevwêl Makedonya, Bulus a tɛ̀ gap mɛ mwa e de shara a bemat reha e ra Yɛsu. A dura a BeYuda dɛdɛɛt, a sé e Yɛsu mo de a sé Mwat de Dagwi a kasa na a sey bemat.

⁶Ko BeYuda mo ba kyɛ́ ɛn hɛ, yɛn a dùsa hɛ arɔng. Yaga ano, a pagat búm e berugu mɛ, na a dura mɛ̀, a kyɛ́ ɛ pyɛ de yɛn a ra, ko a yang ɛn, “Neves min na rɔda sè e ra bato min! Pyɛ hom ya sɛ́ wɛt. Yi e jeng yemo mê kyè wɔ na bemât yére dyuk na me basa a yɛn reha mo.”

⁷Ano kwong, a hàla hɛn, ko a kyè wɔ̀ sangal na mwat hwak de a sé WoYuda wɛt. Ba tâng mwat o, à Titiyus Yustus; a sé mwat de a re a Dagwi fongol. Lɔ mɛ ha sé bagat-bagat na duk re fongol.

⁸Kirispus de a sé mwât nuyêl duk re fongol o a tɛ́ ɛ mwat-raà Darwey Yɛsu, yɛ tanga mwa belɔ mɛ. Bemât Kɔrintɔs pyak arɔng de ba wok hâ Bulus yɛn a tɛ́ ɛn bemat-raa, ko ba tɛ̀ a yɛn batisma.

⁹Nabwalak tuhak, Darwey Yɛsu a dura a Bulus tó mɛ e negwi-ywey, a yang ɛ, “Hwo wok bengyip wɛt, ko rē nuyel na shara a bemat reha hom. Hwo sǎ yuu wɛt,

¹⁰yaga ma sé tanga hwo. Vit a mwat de ê tɔk ra a hwo pyɛ vyes cak, yaga bemat ba sé pyak e repomo remo de ba sé benang.”

¹¹Ano kwong, Bulus a nàra e hwomo shey hining na rebit o, a sé basa a bemat rehâ Dagwi.

¹²E jeng de Galyo á sè gwɔmna e sevwêl Akaya, BeYuda ba wuna hɛn, ko yɛn a vo Bulus, ba kyè na yɛ wɔ e duk shɔt.

¹³Yɛn a yâng gwɔmna mo, “Mwat womo e jāma na a tɛ̀ bemat be re a Dagwi fongol e gwong de badu mot ba ro mɛ̀.”

¹⁴Jeng de Bulus a sé simo na a hwo hanat, Galyo a yâng BeYuda, “À yin BeYuda, ka sede mwat o a gyili redu rehak kɛ a ra pyɛ cak vyes ayi, ko ma yâng niri na me wok in.

¹⁵Ko a remo de yin a sé ra cuna e ra neha zɔng, na e ra bazâ bemat, na e ra badu de yin pyɛ min yin e raa vɛ, tik na yin pyɛ min yin a wɔ̀ yong ɛ̀ há mo. Me simo na me sè mwât shɔt e ra yerê pyɛ́ yemo wɛt.”

¹⁶Ko a tɛ̀ be ro ɛn yi e duk shɔt o.

¹⁷Yɛn mwa ba vo Sostenes, mwât nuyêl duk re fongol o, ko yɛn a dak ɛ e nuyêl duk shɔt o. Ko pyɛ mo yá sè a Galyo pyɛ cak ko tyɔng wɛt.

¹⁸Bulus a gwɛ̌ sangal nepɔlɔ pyak na bemat-raa e Kɔrintɔs. E bama mo, a tik ɛn na a kyè wɔ e sevwêl Sirya. Piriskila na Akwila ba raa hɛ. Gyam na a yel e dwa-nshi e repomô Kɛnkɛrɛya, a yɛt setot mɛ, yaga á kana sira e nuyêl Dagwi.

¹⁹Yɛn a wul repomô Ɛfɛsus, kwɔn a hane de Bulus a hàla ɛ̀ Piriskila na Akwila. Yɛ pyɛ mɛ a yel e duk re fongol, ko a ra cuna na BeYuda.

²⁰Yɛn a yang ɛ, a gwɛ̌ sangal e hwomo na yɛn, ko a kyɛ́ ɛ.

²¹Ko jeng de a tik ɛn, a yang ɛn, “Ka sede Dagwi a simo, ko mê ba toyo vey e ngamo.” A sogo, a yel e dwa-nshi, ko a hàla Ɛfɛsus, a kyè.

²²Jeng de a wul repomô Kaisariya, a wɔ́ e Yɛrusalɛm, ko a wɔ̀ yâng bemât ekilisiya show. Ano kwong, a kwey wɔ e repomô Antyokya,

²³ko a ros e hwomo. A to sogo, a kyě kyè e bapomô yɛnɛ̂ bavwêl Galatya na Firigya, ko a tɛ̀sɛ mwa bemat-raa be tumal gak.

²⁴E rwa jeng yane, WoYuda hwak de ba tang ɛ, à Apɔlɔs, de ba tɔ ɛ e repomô Aleksandariya, a wɔ́ e Ɛfɛsus. Yɛ a sé mwat de a tɔk ha za wɛt, ko a to tɔk Bwok-basa Dagwi sizɔng.

²⁵Bá kana basa a yɛ pyɛ́ e ra gwông Darwey Yɛsu, ko a ha há mo na yey mɛ mwa, a to basa a bemat pyɛ́ de ya sé tyɛng mwin e ra Yɛsu. Ko a tɔk ha e ra batisma de Yohana a tɛ̀sɛ zɔng.

²⁶A hwo basa a bemat e duk re fongol na yey ting. Jeng de Piriskila na Akwila ba wok há mɛ mo, yɛn a jut ɛ vɔk e lɔ mɛn, na be wɔ̀ gwɛ̌ misang a yɛ pyɛ̂ mwa naka e ra gwông Dagwi.

²⁷Jeng de Apɔlɔs a simo na a wɔ́ e sevwêl Akaya, bemat-raa e Ɛfɛsus ba sɛlɛ hɛ. Yɛn a jɛk bwok-rwang vɔk na bemat-raa e Akaya, na be yang ɛn, bē sey ɛ na yey pyɛng. Jeng de a wul hwomo, a sɛlɛ bemat-raa ding-ding, yɛn de bá kana sey tsak o na Yɛsu, yaga Dagwi a ga dura a yɛn nerat mɛ.

²⁸E nuyêl bemat, a ra cuna na gap na BeYuda, ko a gang ɛn na yɛ. A basa nelang detidetu ne Bwok-basa Dagwi, yi ano, a dura a yɛn wɛshɛrɛk, Yɛsu a sé Mwat de Dagwi a kasa na a sey bemat.