Read berom Tomong Betom Yɛsu 19 Bible Online

Tomong Betom Yɛsu 19 - berom bible

Tomong Betom Yɛsu 19

¹E jeng de Apɔlɔs a rɔngɔl e Kɔrintɔs, Bulus a sé kyě kyè e yɛnɛ̂ sevwel o, ko a kyè wɔ̀ gyirik vɔk e repomô Ɛfɛsus. Sede a wul hwomo, a sɛ̀ bemat-raà Yɛsu behak.

²A rangal hɛn, a yang ɛn, “E jeng de yin á tɛ́ in bemat-raa, Gabik Jɛrɛ há hwo e ra yin arɛt?” Yɛn a toyo a yɛ, yɛn a yang ɛ, “Wot a ga ka wok pyɛ cak e ra rehâ Gabik Jɛrɛ wɛt.”

³Bulus a to rangal hɛn, a ye, “Ba tɛ̀ a yin ɛ̀ yerê wɛ̌ batisma arɛt?” Yɛn a ye, “Yerê womo de Yohana á kana ha e ra wɛ.”

⁴Bulus a ye, “Batisma de Yohana á kana tɛ̀sɛ a bemat wa sé yaga bemat de ba doyo yi e banɛn mɛn. Á kana to ha a BeIsrayɛl wɔgɔ, bē tɛ̀ gap mɛn e ra yɛ de a sé kyè vey e bama mɛ, yɛ wɛ à Yɛsu.”

⁵Jeng de yɛn a wok ano, yɛn a simo, ko ba tɛ̀ a yɛn batisma e ji rezâ Darwey Yɛsu.

⁶Bulus a tɛ̀ vɔ mɛ e ra yɛn, ko Gabik Jɛrɛ ha hwo e ra yɛn. Yɛn a hwo ha na balem de yɛn a tɔk vɛ wɛt, ko yɛn a zarap na Dagwi arɔng.

⁷Bemat o ba sé sede kuru na vɛ beba.

⁸Bulus a ra pɛl tat, a dopse yeles e duk re fongol, ko a ha a bemat na yey ting. A ra cuna na yɛn, a jāma na a tɛ̀ ɛn be tɔk, pyɛ́ de a sé ha e ra Segwɔm Dagwi ya sé tsak o.

⁹Ko bemat behak e ji mɛn ba vɔk bato gbarak, yɛn a kyɛ́ ɛn nà sey tsak o, ko yɛn a ha há ves e ra gwông Darwey Yɛsu e ji bemat o. Yaga ano, Bulus a hàla hɛn, ko a jut bemat-raa vɔk e dem hak. Kahɛ tuk a sangsal e lɔ̂ basa hê Tiranus, a tɔrɔng na yɛn e ra rehâ Dagwi.

¹⁰Bulus a ra ano neshey neba. Yi ano, mwa bemat de ba sé e sevwêl Asiya, BeYuda na bemât yére dyuk, mwa hɛn yɛn a wok rehâ Darwey Yɛsu.

¹¹Dagwi a ra fwom na Bulus na a ra yerê pyɛ̂ bes cak de ya sé yê langat sizɔng.

¹²Bemat ba hashe cɛ̂k rugu de Bulus a vɔkɔs, na wap ragey de a tɛ̀sɛ jeng de a ra fwom, ko ba nɔngɔ̂s bemât serɔ na be ra vɛ. Pyɛ́ mo ya tɛ̀ nerɔ mɛn o na hàla hɛn, cēng arɔng ya nunus yi e babek mɛn.

¹³BeYuda behak de ba kyě kyè ba paa a bemat cēng e babek mɛn, yɛn a mara ra ano na yíla rezâ Darwey Yɛsu arɔng. Yɛn a yâng cēng o, “Ma sé nɔng in nu e ji rezâ Yɛsu, de Bulus e ha e ra yɛ, nusu hin!”

¹⁴Nèy bewen netaama ne Sekeva na ra ano. Yɛ Sekeva mo á sè gbɔng piris wo BeYuda.

¹⁵Ko ceng o ya yang ɛn, “Ma tɔk Yɛsu, ma to tɔk Bulus, ko yin ɛ̄, yin a sé beva arɛt?”

¹⁶Yɛ mwat de a vɔk ceng o a hwo e ra yɛn na yol ding-ding, ko a dal gap mɛn mwa. A dak ɛn sedesi, ko yɛn a tele yi e lɔ mɛ mo warap na baram.

¹⁷BeYuda na bemât yére dyuk de ba sé sangal e Ɛfɛsus yɛn mwa ba wok há hane mo. Bengyip ba vo ɛn tyɔng wɛt, ko yɛn a nɔ̂ng rezâ Darwey Yɛsu nerey sizɔng.

¹⁸Bemat pyak e ji vemo de bá kana tɛ́ ɛn bemat-raa yɛn a vey, ko yɛn a kulsa pyɛ́ vyes de yɛn á kana ragas a nuyêl bemat.

¹⁹Bemat pyak de bá kana ra vyoshon yɛn a hashe bebok-basa mɛn o, ko yɛn a rangas vɛ e nuyêl mwa bemat. Yɛn a tula dyâm bebok-basa mo, ko ya sé sede dyâm fwôm tuk hining yê bemat gu kuru batungun (50,000).

²⁰E gwong gwomo, rehâ Darwey Yɛsu ra gwɛ̌ shara hɛ, ko vit a pyɛ de ya tɔk dul rɛ.

²¹E bamâ pyɛ́ yane, Bulus a yong ɛ̀ e yey mɛ na a wɔ́ e Yɛrusalɛm, ko ê kwey bavwêl Makedonya na Akaya. A ye, “E bama de ma ga yɛnɛ yi e Yɛrusalɛm, a sé gbing-gbing na me kyè wɔ̀ di gbɔng repomô Roma.”

²²Yaga ano, a tomo bemât sɛlɛ mɛ beba, yɛn vɛ à Timotawus na Ɛrastus, na be wɔ́ e Makedonya. Ko yɛ pyɛ mɛ a gwɛ̌ sangal e sevwêl Asiya jeng tyɔng.

²³E jeng o, gbɔng sogo nehywɛ ha hwo e Ɛfɛsus yaga rehâ gwông Darwey Yɛsu.

²⁴Mwat hwak a sé e hwomo de ba tang ɛ, à Demetiriyus. A sé zu de a yongos pyɛ́ na dyam pyɛng. A yongos nekwɔn sekwit nesɛl o ne dagwi hwā de ba tang ɛ, à Artemis. Yɛn bemât yông pyɛ́ mo ba sɛsɛm dyām sizɔng na fwom mɛn o.

²⁵Tuhak, Demetiriyus a tula hɛn mwa na bemat de ba ragas yerê fwom mɛn o, a yang ɛn, “À besa, yin a tɔk, wot e sɛsɛm dyām naka yi e fwom gwomo.

²⁶Yin pyɛ min, yin e bɛrɛng, ko yin e to wokos yerê pyɛ de yɛ Bulus wane mo a sé ra e jeng de e tē, pyɛ̂ sekwit de bemat ba yong na vɔ ya vɔk reto wɛt. A ga hwɔtɔ nehywɛ bemat pyak na be raa há mɛ mo. A ga ra ano e ngamo e Ɛfɛsus zɔng wɛt, ko a ga vey bagât man sevwêl Asiya mwa.

²⁷Ko di in, pyɛ de wot e tele hot yɛ a yet: Vɔk e nuyel, bemat ba rɔda ba kyɛ́ ɛn fwom mot gwomo. Ko ba rɔda jut gbɔng kwɔ̂n sekwit hê gbɔng dagwi mot hwā, Artemis sede pyɛ cak wɛt. Ko gbɔng nerêy Artemis o nê wey arɔng, yɛ womo de mwa bemât Asiya na vê jêy mwa be re a yɛ fongol.”

²⁸Jeng de yɛn a wok há mo, yɛn a wok shom sizɔng. Yɛn a hwo gbɔ, yɛn a tē, “Artemis wo Ɛfɛsus a dal mwa na nerey!”

²⁹Lwɛ́lɛ mɛn o gwa shara hɛ e repomo mo mwa. Bemat o ba vo Gayus na Aristarkus, yɛn bemât Makedonya de ba sé besâ kwɛngɛl Bulus. Bemat o ba hwɔlɔ hɛn vɔk e kwɔn jɔgɔ.

³⁰Bulus a simo na a wɔ̀ man na regyɛng bemat o, ko bemat-raa ba yang ɛ, a wɔ́ wɛt.

³¹Behak e ji bemât nuyêl sevwel o de ba sé besa mɛ, yɛn arɔng ba tomo a yɛ na há, na yɛn a ra won na yɛ, a wɔ́ e kwɔn jɔgɔ mo wɛt.

³²E jeng o, gwolwɛlɛ gwa sogo sizɔng. Bemat o ba sé ha neha kpɛɛ, vemo be ha nehak ko vere be ha nehak detu. Bwarwêy bemat o ba ka tɔk pyɛ de ya wɔ́ na yɛn e hwomo wɛt.

³³Yaga BeYuda ba tɛ̀ Aleksanda a wɔ́ e nuyel, ko bemat ba jut, a sé e yɛ de a vey na sogo nehywɛ mo. Yɛ Aleksanda mo a nára vwɔ mɛ e gwi na be sǎ yuu, a simo na a ha há de ê dul mɛ̀ tó mɛ.

³⁴Ko jeng de bemat o ba di, a sé WoYuda, yɛn a hwo gbɔ mwa hɛn, yɛn a gbɔ ano sede dyâm gwi bya. Yɛn a tē, “Artemis wo Ɛfɛsus a dal mwa na nerey!”

³⁵E yɛnɛ mo, mwat de a sé gbɔng mwât jɛ̂k repomo mo a kyɛm a tɛ̀ regyɛng bemat o be sǎ yuu. A yang ɛn, “À yin bemât Ɛfɛsus, mwa bemat ba tɔk, bemât Ɛfɛsus be gyenges kwɔ̂n sekwit hê Artemis de a vɔk nerey, yɛn e to gyenges gwofwa sekwit gwane de gwa kana gaba yi e lagwi.

³⁶Vit a mwat de ê tono na pyɛ́ yemo. Yaga ano, a sé naka na yin a vɔk lɛ̀ɛ; de yin ra pyɛ cak na nefufǔl wɛt.

³⁷Yin a vey na bemat vemo e ngamo, mwa ano de yɛn a shigi pyɛ cak ye nekwɔn sekwit kɛ yɛn a ha há ves e ra Artemis o arɔng wɛt.

³⁸Ka sede Demetiriyus tanga besâ fwom mɛ ba vɔk há na mwat hwak, ko negasi shɔt na sɛ́, ko bemât shɔt o ba sé e hwomo arɔng. Tik na yɛn a wɔ́ e duk shɔt o, na be wɔ̀ tɛ̀ kun mɛn.

³⁹Ka sede pyɛ cak ya sé de yin e simo, ko tik na wot a di yɛ e ji tula hemo de bemakuk mot ba ga yila hin yaga hɛ.

⁴⁰Ko di in, pyɛ de wot e tele hot yɛ a yet ngan: BeRoma bê ra a wot shɔt yaga sogo nehywɛ de wot a ga ra yunung. Vit a mwat de ê kyɛm a dura wɔgɔ, pyɛ de ya tɛ̀ sogo nehywɛ hemo ya sé naka.”

⁴¹E bama de a ha ano, a yɛnɛ tula mo, ko a tɛ̀ bemat o e gwong.