Read berom Tomong Betom Yɛsu 2 Bible Online

Tomong Betom Yɛsu 2 - berom bible

Tomong Betom Yɛsu 2

¹Jeng de Tuk Pɛntɛkɔs ha vey, mwa bemat-raa yɛn a man e dem hining.

²Remo-remo, yɛn a wok wûs pyɛ cak yi e lagwi sede wûs gul de gwo pɛsɛl na gap tyɔng wɛt, ko gwa sila lɔ de yɛn a sé sangal e ji hɛ.

³Yɛn a di pyɛ cak de ya sé sede balêm kya; ya shara hɛ, ko ya wɔ̀ gyirik e ra kawɛ e ji mɛn.

⁴Gabik Jɛrɛ ha vey, ko ha sɛ̀ reto e ra bemat o mwa, ko yɛn a hwo ha na balem baduk, tyɛng na pyɛ de Gabik Jɛrɛ mo ha simo a yɛn.

⁵E jeng yane, BeYuda behak de ba vey yi e bavwêl mwa e jey ba sé sangal e hwomo e Yɛrusalɛm. Yɛn a sé bemat de ba sap Dagwi.

⁶Jeng de yɛn a wok wus hane mo, regyɛng bemat ba tele, ba wɔ̀ man e hwomo. A sé a yɛn kpɛɛ, yaga kawɛ e ji mɛn a wok bemat-raà Yɛsu mo ba sé ha na lem mɛ.

⁷A sé a yɛn kpɔrɔk sizɔng, ko yɛn a yâng bemɛn, “Mwa bemat de ba sé ha mo ba sé bemât Galili wɛt arɛt?

⁸Yi e rɛ̌ kwong de kawɛ e ji mot e wokos ba sé ha na relem mɛ arɛt?

⁹Behak e ji mot ba sé vê bavwêl Partya, na Medya, na Ɛlam. Behak ba sé vê bavwêl Mɛsɔpɔtamya, na Yudiya, na Kapadokya, na Pɔntus, na Asiya,

¹⁰na vê bavwêl Firigya, na Pamfilya, na Misra, ko behak ba vey yi e bebak sevwêl Libya de ba sé bagat na repomô Kirene. Behak ba sé bekɛnɛt de ba vey yi e Roma.

¹¹Bemat o behak ba sé BeYuda, ko behak ba sé yi e yére dyuk de ba hwo raa negwɔn BeYuda. Behak ba sé bemât rezîk Kereta tanga BeArap arɔng — ko mwa ano, wot a sé wokos pyɛ́ de ba sé ha na balem mot e ra gbɔng pyɛ́ de Dagwi a ga ra!”

¹²A sé a yɛn mwa hɛn kpɔrɔk, a to sé a yɛn zii, ko yɛn a hwo rangsâl bemɛn, “Pyɛ yemo ya sé sede sɛ́ arɛt?”

¹³Ko bemat o behak ba ragas neshɔngɔlɔng na bemat-raà Yɛsu mo, yɛn a tē, “Bemat vemo ba ga feng.”

¹⁴Bitrus a sogo e tumal na bwang betom Yɛsu kuru na wɛ gwining (11), a gbɔ, a hanat na bemat o, a ye, “À begwa hom BeYuda tanga yin mwa de yin a sé sangal e ngamo e Yɛrusalɛm! Wet in betong, na yin a wok há hom. Tik na me misang a yin pyɛ́ yemo.

¹⁵Bemat vemo ba ga feng wɛt, sede remo de yin e bare. A remo, jeng ya sé dyām shatyat zɔng nagasi!

¹⁶Ko a sé pyɛ ma yemo de Yɔwɛl, zarap Dagwi, à kana ha e ra yɛ:

¹⁷“ ‘Dagwi a ye: E negasi ne yɛnɛ mo, ma rɔda tomo na Gabik hom, na me nɔ̂ng bemât mwa hɛ vit a yere mo. Nèy min bewen na behwong na rɔda ba zarap yi na me; bewen min ba rɔda ba di pyɛ́ de mê dura a yɛn yɛ̄ sede e ji negwi-ywey, ko bemakuk min arɔng yɛn a rɔda ba ranas negwi.

¹⁸E negasi nane mo, ma rɔda nɔ̂ng bemât fwom hom, beras na beha, Gabik hom vit a yere mo, ko yɛn a rɔda ba zarap yi na me.

¹⁹Ma rɔda ba ra pyɛ̂ langat e lagwi tanga pyɛ̂ bes e ngamo e jey. Yin a rɔda ba di nemi, na kya, tanga sekyeng ding-ding.

²⁰Gwi gwa rɔda ba tɛ́ ɛ mwangalang, ko pwɛl gwa rɔda ba senge sede nemi. Pyɛ́ yane ya rɔda ba té gyam na gbɔng jeng gbɔng nerat ye vey, jeng de Darwey a rɔda to ba vɛ̄ hɛ.

²¹E jeng o, kawɛ mwat de ê yila Darwey na a sɛlɛ hɛ, Darwey o a rɔda sey neken mɛ.’

²²“À yin BeIsrayɛl, wet in betong na pyɛ de ma sé ha a yin! Yɛsu wo Nazarɛt á sè mwat de Dagwi á dura a yin hɛ wɛshɛrɛk wɔgɔ, yɛ a tomo hɛ. Á dura ano yi na pyɛ̂ langat na pyɛ̂ bes detidetu de á ra yi na Yɛsu mo. Yin pyɛ min yin a tɔk, a sé ano, yaga pyɛ́ mo yá kana té e tē min.

²³Dagwi, yɛ de a tɔk kayɛ pyɛ gyam na ye té, à kana yong ɛ̀ e yey mɛ wɔgɔ, ba rɔda nára Yɛsu e vɔ min. Ko yin a simo na bemat de be raa Dagwi wɛt be kak ɛ e ra cɔ́gɔt. A sé ano de yin a mɔrɔ hɛ.

²⁴Ko Dagwi a sene hɛ yi e reku, a viri hɛ yi e retô reku, yaga reku mo ra tɔk re nuyel na kaba hɛ wɛt.

²⁵A raane, Davit à kana ha e ra yɛ, à ye, “ ‘Kayɛ jeng me bɛrɛng Darwey hom e nuyel hom. Yaga yɛ a sé e tumal e vwɔ yege hom, pyɛ cak ya rɔda digta me wɛt.

²⁶Yaga ano, yey hom ya pɛngɛ, ko neha hom ne dura yey pyɛng hom. Mwa ano de ma sé mwasi zɔng, ko ma rɔda tɛ̀ gap hom e ra Dagwi, yaga ma sɛt yey hom e ra pyɛ de a rɔda ra a me.

²⁷Ma tɔk, hwo Dagwi hwà rɔda kyini me e kwɔ̂n bevuvwel wɛt. Hwô simo na mwât fwom mō de a sé jɛrɛ a ku na a bɔsɔ wɛt.

²⁸Hwà ga dura a me begwong de mê raa na me sɛ̀ tsak neken. Yey hom ya pɛngɛ sizɔng, yaga hwà sé tanga me.’

²⁹“À begwa, me tɔk ha a yin sana tô yey e ra Gbɔng Gwɔ̀m Davit, yɛ dâ beda mot. À ku, ko bà lɛrɛ hɛ, ko sak mɛ ba rɔngɔl e ngamo na wot pere vey e yunung.

³⁰À kana sè zarap Dagwi, ko à tɔk, Dagwi à sira hɛ, a rɔda tɛ̀ hwak e ji yére mɛ a re negwɔm sede yɛ Davit.

³¹Davit à kana tɔk pyɛ de ya sé kyè wɔ̀ té. Jeng de à ye, ‘Dagwi a kyini hɛ e kwɔ̂n bevuvwel wɛt, ko revin mɛ ra bɔsɔ wɛt’, à ha há e ra sene yi e reku hê Mwat de Dagwi a kasa na a sey bemat.

³²Yɛ Yɛsu mo, a sé e yɛ wɛ de Dagwi a sene hɛ yi e reku. Ko wot mwa hot wot e tɔk nɔng nuha e ra pyɛ yemo mo.

³³Dagwi Da mɛ a ga jut Yɛsu, a ga tɛ̀ ɛ a sangal e ra gwofwa negwɔm e vwɔ yege mɛ. A to nɔng ɛ Gabik Jɛrɛ, sede remo de à kana sira na a nɔng ɛ hɛ. Ko Yɛsu a jut Gabik o, a nɔng ot hɛ. A sé e nɔrɔ mo de yin a sé bɛrɛng a remo, yin a to sé wokos hɛ arɔng.

³⁴Yaga Davit pyɛ mɛ à tut vɔk e lagwi wɛt, ko à ye, “ ‘Dagwi Darwey a yâng Darwey hom: Sangal e ngamo e vwɔ yege hom,

³⁵sɛ̌ ma tɛ̀ bemât repugu mō be tɛ́ ɛn kwɔ̂n tik bol mō.’

³⁶“Yaga ano, tik na BeIsrayɛl mwa be tɔk pyɛ yemo tsɛng-tsɛng: Yɛ Yɛsu de yin a kak ɛ e ra cɔ́gɔt a sé e yɛ de Dagwi a ga tɛ̀ ɛ na a sè Darwey, ko a to kasa hɛ na a sey bemat.”

³⁷Jeng de bemat ba wok há hemo mwa, há mo ha luga hɛn e neyey mɛn, ko yɛn a yâng Bitrus na bwang betom o, “À begwa, e sɛ́ de wot ê ra arɛt?”

³⁸Bitrus a toyo a yɛn, a yang ɛn, “Tik na kawɛ e ji min a doyo yi e banɛn mɛ, ko be tɛ̀ a yɛ batisma e ji rezâ Yɛsu Kristi, yaga na Dagwi a hàla a yɛ banɛn mɛ; ko Dagwi ê nɔng ɛ Gabik Jɛrɛ arɔng.

³⁹Pyɛ yane de Dagwi à kana sira e ra yɛ ya sé yaga yin tanga nèy min, na mwa vemo de ba sé yikyik — ya sé yaga mwa vemo de Dagwi Darwey mot a rɔda ba yila hɛn vey na yɛ.”

⁴⁰Bitrus a shonong e ra yɛn na gap na neha nehak pyak, a yang ɛn, “Séy in bato min yi e reyɔm de ra sé kyè wɔ̀ hwo e ra bemat beves vê jeng yemo!”

⁴¹Bemat pyak ba sey há mɛ, ko ba tɛ̀ a yɛn batisma. E tuk hane mo, Darwey a tɛ̀ bemat sede gu batat (3,000) ba wuna hɛn na bemat-raa mɛ mo.

⁴²Yɛn a nɔng bato mɛn e de masâ pyɛ́ yi na betom Yɛsu, na e de wunâ nesa na bemɛn, na e de kwɔrɔs kpam-tuk, tanga e de ragâs won.

⁴³Dagwi a ra pyɛ̂ langat na pyɛ̂ bes pyak yi na betom Yɛsu, ko bemât mwa ba wok bengyip, sede yɛn a di ano.

⁴⁴Mwa bemat-raa ba re nuyel na wunâ nesa na bemɛn, ko yɛn a ra fwom na pyɛ́ de yɛn a vɔk mwa e dem o.

⁴⁵Yɛn a rɛsɛl pyɛ̂ mwa de yɛn a vɔk na nedok nekyɔrɔk mɛn, yɛn a jut dyām o, ko ba gas a kawɛ mwat tyɛng na pyɛ de e simo.

⁴⁶Kahɛ tuk yɛn a dopse manas e nelalâ Gbɔng Duk Re Fongol, ko yɛn a kwɔrɔs kpam-tuk e dem hining e nelɔ mɛn. Yɛn a re pyɛ́ na yey pyɛng na yey rining arɔng.

⁴⁷Yɛn a somo Dagwi, ko bemât mwa ba simo hɛn tyɔng wɛt. Ko kahɛ tuk Darwey Yɛsu a gwɛsɛ nepyak vemo de a sey neken mɛn, ko ba wuna hɛn na bwang o.