Read berom Tomong Betom Yɛsu 20 Bible Online

Tomong Betom Yɛsu 20 - berom bible

Tomong Betom Yɛsu 20

¹E bama de ba yɛnɛ sogo nehywɛ hane mo, Bulus a yila mwa bemat-raa. A gwɛ̌ a yɛn gap, a tɛ̀ a yɛn netyang, ko a kyè vɔk e sevwêl Makedonya.

²A kyě kyè e mwa bebak sevwel o, a gwɛ̌ a bemat-raa gap na neha pyak, ko a wɔ̀ wul sevwêl Giris.

³A sangal e hwomo pɛl tat, ko a yong ɛ na a yel e dwa-nshi wɔ e sevwêl Sirya. Ko e jeng o, a wok, BeYuda be jāma gwong na be mɔrɔ hɛ. Yaga ano, a yong ɛ̀ e yey mɛ na a to ɛ, ko a kwey e Makedonya.

⁴Bemat behak ba raa hɛ, yɛn vɛ à Sopater Pirus yi e Bereya, na Aristarkus tanga Sɛkundus yi e Tesalonika, na Gayus yi e Dɛrbɛ, na Tikikus tanga Torofimus yi e sevwêl Asiya, na Timotawus arɔng.

⁵Bemat o ba kyè e nuyel mot wɔ e Torowas, yɛn a wɔ̀ gyeng ot e hwomo.

⁶E bamâ Nzem Kpam-tuk Sana Géy-sing, wot a sogo yi e repomô Filipi e dwa-nshi, ko e bamâ pɔlɔ tungun, wot a wɔ̀ sɛ̀ ɛn e Torowas o. Wot a ra pɔlɔ taama e hwomo.

⁷Tuk mɛsɛng e ji sati wo BeYuda[3], wot a tula hot, yaga na wot a re pyɛ̂ Darwey. Bulus a hwo ha na bemat, ko a re nuyel na há mo sɛ̌ têturuk, yaga yɛ a simo na a ba tik Torowas o nagasi.

⁸Bekywa-kya pyak ba sé e duk lɔ̂ rak o de wot a tula hot ɛ̀.

⁹Wen hwak de ba tang ɛ, à Eitikus a sé sangal e ra repɔk duk o. Jeng de Bulus a sǎ e de ha, yɛ wen o a hwo kyese nevwa. Nevwa na vo ɛ sizɔng, ko a pe gaba yi e lɔ̂ rak o de ha sé hê neba vey e vwel. Bemat ba vey jut ɛ revin o zɔng.

¹⁰Bulus a gyirik wɔ e vwel, a dyɛng e ra wen o, a kula hɛ, ko a ye, “Yin sap wɛt. A sé na neken!”

¹¹Ano kwong, a to tút vɔk e rak o mo gbak, a kwɔrɔ kpam-tuk, ko a re. A re nuyel na ha na yɛn sɛ̌ gasi ha ye gbey; e bama mo, a sogo, a kyè.

¹²Ko bemat ba jut wen o kwen wɔ e lɔ, yɛn a gasang hɛn na yey pyɛng sedesi.

¹³Wot a kyè e nuyêl Bulus, wot a yel e dwa-nshi, ko wot a kyè wɔ e repomô Asɔs, kwɔn de wot ê man na yɛ, yaga na a yel e dwa mo na wot. Bulus á kana yong ɛ̀ gyam, na a kyè e bol vɔk e Asɔs o.

¹⁴Jeng de a sɛ̀ ot e hwomo, a yel e dwa mo, ko wot a re nuyel wɔ e repomô Mitilene.

¹⁵Tuk het, wot a sogo yi e hwomo, ko wot a wul bagat na rezîk Kiyɔs. Tuk het gbak, wot a to sogo, ko wot a wɔ̀ wul rezîk Samɔs, ko tuk het arɔng, wot a wɔ̀ wul repomô Miletus.

¹⁶Bulus á kana yong ɛ̀ e yey mɛ, wot ê kwey e ji Ɛfɛsus wɛt, yaga na a kwon lashe jeng e sevwêl Asiya wɛt. A sé ra ziri, yaga na a wɔ̀ wul Yɛrusalɛm e tuk Pɛntɛkɔs, ka sede ê tɔk ra ano.

¹⁷E Miletus, Bulus a tomo bemat wɔ e Ɛfɛsus na be wɔ̀ ha a bemakûk ekilisiya be vey sɛ̀ ɛ.

¹⁸Jeng de ba pom, a ha na yɛn, a yang ɛn, “Yin pyɛ min yin a tɔk yerê sangal de ma ra na yin, mwa jeng yimo tuk hê susu mo de ma pom e ngamo e sevwêl Asiya.

¹⁹Ma dyɛng tó hom sizɔng e de ra a Darwey Yɛsu fwom. Jeng pyak ma tosho, ko ma sɔ gbɔng reyɔm yaga nengyas de BeYuda bá sè yong na be ra a me.

²⁰Yin a to tɔk, ma tó yey wɛt nà ha a yin pyɛ̂ mwa de yê sɛlɛ hin, ko ma basa a yin pyɛ́ e ji bemat tanga e ji nelɔ min.

²¹Ma shonong na BeYuda, mwa na bemât yére dyuk, na yɛn a doyo yi e banɛn mɛn, na be raa Dagwi, na be sey tsak o na Darwey mot Yɛsu.

²²Ko a remo, ma sé kyè wɔ e Yɛrusalɛm, yaga Gabik Jɛrɛ ha tɛ̀ me gbing-gbing na me wɔ. Ma tɔk pyɛ de yê té na me e hwomo wɛt.

²³Ko pyɛ de ma tɔk yɛ zɔng a yet ngan: E kahɛ kwɔn de me wɔ, Gabik Jɛrɛ mo he ha a me wɔgɔ, e ngamo nuyel ba rɔda vo me na be tɛ̀ me e lɔ̂ ngyang, ko bê to tak a me reyɔm.

²⁴Ko kɛ ma sé na neken kɛ mê ku ayi — a sé a me pyɛ wɛt. Ko pyɛ de ya sé a me ryey o a yet ngan: Me yɛnɛ setele hom, me tala fwom de Darwey Yɛsu a nɔng me na me ra. Fwom o, gwɛ à ha a bemat Yɛgɛt Yat wɔgɔ, Dagwi e dura a bemat nerat mɛ.

²⁵“Ma ga kyě kyè e ji min mwa, ma ga ha a yin e ra gwong de Dagwi ê re negwɔm. Ko a remo, ma tɔk, vit a hwak e ji min de a rɔda to di me na bayis.

²⁶Yaga ano, yunung ma sé ha a yin mwin, ka sede hwak e ji min ê wey, ko pyɛ hom cak yê sɛ̀ wɛt.

²⁷Yaga ma tó yey wɛt na me basa a yin pyɛ̂ mwa de Dagwi a ye, ê ra yɛ̄.

²⁸Gyéng in bato min; gyéng in mwa bemat de Gabik Jɛrɛ ha tɛ̀ in e ra yɛn, na yin a bɛrɛng hɛn naka arɔng. Sede belek vyēl be bɛrɛng vyēl mɛn, ano arɔng, bɛrɛng hin ekilisiyâ Dagwi. Yɛ Dagwi o a sey bemât ekilisiya mo na nemi de Hwey mɛ ha shushu e jeng reku.

²⁹Me ma tɔk, e bama de mê kyè, bemat beves de ba sé sede bebwá beves ba rɔda yel e ji min, na be mǎ ekilisiya mo.

³⁰Ko bemat behak e ji min ba rɔda hwo ha hâ bɔs, yaga na be kwɛlɛng mɛ̀ bemat-raa na be hwɔtɔ nehywɛ mɛn na yɛn a raa gwong mɛn.

³¹Yaga ano, tē in naka! Ko bàre hin, ma kana sè na yin neshey netat, ko ma tabak kawɛ e ji min na nemwishil nagasi na naturuk.

³²“A remo, ma sé tik in e vɔ Dagwi na a gyenges hin. Rehâ Dagwi de ra sé e ra nerat mɛ vɔk na yin ra rɔda gyenges hin arɔng. Reha rane mo ra rɔda tɛ̀ in na yin a tumal gak, ko yi na rɛ, yin a rɔda sɛ̀ pyɛ̂ mwa de Dagwi a sé tikis yaga mwa bemat mɛ.

³³Ma ga mara-yis e ra pyɛ̂ mwat hwak wɛt, kɛ a sé dyam shinang, kɛ dyam pyɛng, kɛ berugu ayi.

³⁴Yin pyɛ min yin a tɔk, ma ra fwom na vɔ hom vemo, yaga na me tanga bemat de ba sé na me wot a bin sɛ̀ mwa pyɛ́ de wot e simo.

³⁵E ji pyɛ̂ mwa de ma ga ra, ma ga dura a yin gwong de a sé gbing-gbing na wot a pɛngɛ hot e de râ fwom, yaga na wot a vɔk pyɛ́ de wot ê sɛlɛ mɛ̀ bemat de ba sé gbɛrɛk. Tik na wot a bare kayɛ jeng na neha de Darwey Yɛsu pyɛ mɛ á kana ha, á ye, ‘Mwat de e nɔngɔs pyɛ́ a dal womo de e seres yɛ̄ na yey pyɛng.’ ”

³⁶E bama de Bulus a yɛnɛ mwa neha nemo, a ye guduruk tanga yɛn mwa, ko a ra won.

³⁷Mwa hɛn yɛn a hwo tosho e jeng de yɛn a kula hɛ e ragey, ko ba man ranang mɛn na yɛ, na be dura a yɛ mɛ̀ tɛ̂ yey mɛn.

³⁸Pyɛ de ya dal na lashe a yɛn yey, yɛ à há de a ha a yɛn wɔgɔ, yɛn ê to di ɛ wɛt. Ko yɛn a wɔ̀ kyɔk ɛ e kwɔ̂n dwa-nshi.