Read berom Tomong Betom Yɛsu 21 Bible Online

Tomong Betom Yɛsu 21 - berom bible

Tomong Betom Yɛsu 21

¹Jeng de wot a de tɔk gas ot na bemât Ɛfɛsus, wot a yel e dwa-nshi, ko wot a kyè cik vɔk e kerezîk Kos. Tuk het, wot a wɔ̀ wul rezîk Rɔdɔs; ko yi e hwomo, wot a kyè vɔk e repomô Patara.

²E Patara mo, wot a sɛ̀ dwa-nshi de wa sé kyè wɔ e sevwêl Finikya. Wot a yel e ji mo, ko wot a hàla repomo mo.

³E ji kwɛngɛl mot, wot a di rezîk Kipirus, ko wot a hàla rɛ e vwɔ mwɛlɛng mot, wot a kyè vɔk e sevwêl Sirya. Jeng de wot a wul repomô Tur, wot a gyirik, yaga a sé e dem a hane de ba paa ɛ̀ pyɛ́ de ya sé e dwa-nshi mo.

⁴E repomo mo, wot a sɛ̀ bemat-raa behak, ko wot a sangal na yɛn sati gwining. Bemat o ba yâng Bulus yi na retô Gabik Jɛrɛ wɔgɔ, yɛ a wɔ́ e Yɛrusalɛm wɛt.

⁵Ko sede jeng sogo mot ya vey, wot a hàla kwɔn o. Mwa bemat o, tanga beha mɛn na nèy mɛn, yɛn a raa hot wɔ e bamâ repomo mo. E rekwogôm gworep, wot a ye guduruk, ko wot a ra won.

⁶Bama de wot a yang ɛn kala, wot a yel e dwa-nshi, ko yɛn a to ɛn wɔ e lɔ.

⁷Wot a re nuyel na kwɛngɛl mot yi e Tur, ko wot a kyè vɔk e repomô Tɔlɛmais. E hwomo, wot a wɔ̀ yâng bemat-raa show, ko wot a sangal na yɛn pɔlɔ hining.

⁸Tuk het, wot a sogo, ko wot a kyè vɔk e repomô Kaisariya. Kwɔn a hane de Filip, mwât sharâ Yɛgɛt Yat a sé ɛ̀, ko wot a sangal e lɔ mɛ mo. Yɛ Filip o a sé gwining e ji bemât sɛlɛ betaama de bá kana kasa hɛn e Yɛrusalɛm.

⁹Yɛ mo a vɔk behwóng mɛ benaas de ba rɔngɔl nà ra weneng, vemo de ba sé bezarap Dagwi.

¹⁰E bamâ nepɔlɔ tyɔng, zarap Dagwi hwak a vey yi e sevwêl Yudiya, reza mɛ, à Agabus.

¹¹Jeng de a wul na wot, a jut gyindi de Bulus a rɔgɔs e rawit mɛ. A rɔgɔs mɛ̀ vɔ tanga bol mɛ pyɛ mɛ, ko a ye, “Pyɛ ma yemo de Gabik Dagwi ha ha wɔgɔ: ‘BeYuda de ba sé e Yɛrusalɛm bê jut dâ gyindi womo, na be rɔgɔs hɛ e gwong gwomo de yin a di ma ra. Yɛn ê to nára hɛ e vɔ bemât yére dyuk.’ ”

¹²Jeng de wot a wok ano, wot na bemat de ba sé e hwomo wot a ra won na Bulus, a wɔ́ e Yɛrusalɛm wɛt.

¹³Ko Bulus a kyɛ́ ɛ, a ye, “Yaga sɛ́ de yin a sé tosho, na yin a lashe a me yey ano arɛt? Me ma ga yóng me, na be rɔgɔs me e Yɛrusalɛm zɔng wɛt, ko na be mɔrɔ me arɔng yaga rezâ Darwey Yɛsu.”

¹⁴Jeng de wot a di, wot a tɔk hwɔtɔ nehywɛ mɛ wɛt, wot a tik ɛ, ko wot a ye, “Tik na pyɛ̂ mwa ye té tyɛng sede remo de Darwey Yɛsu e simo.”

¹⁵E bamâ nepɔlɔ tyɔng, wot a yong ot, ko wot a kyè vɔk e Yɛrusalɛm.

¹⁶Bemat-raa behak yi e Kaisariya ba raa hot, ko yɛn a wɔ̀ tik ot e lɔ mwat-raa hwak de bá kana yong ɛ̀, wot ê gyirik e lɔ mɛ. Ba tang ɛ, à Manason, ko yɛ a sé mwât Kipirus. Yɛ á kana tɛ́ ɛ mwat-raà Yɛsu yi e susu mo.

¹⁷Jeng de wot a wul Yɛrusalɛm, bemat-raa ba sey ot na yey pyɛng.

¹⁸Tuk het, Bulus tanga wot, wot a wɔ́ na Yakɔp. Mwa bemakûk ekilisiya yɛn á kana tula hɛn e hwomo.

¹⁹Bulus a yang ɛn show, ko a misang a yɛn yɛɛlɛl mwa pyɛ́ de Dagwi a ga ra e ji bemât yére dyuk yi na fwom mɛ.

²⁰Sede yɛn a wok ano, yɛn a somo Dagwi. Ko yɛn a yâng Bulus, “À gwa, hwà tɔk, BeYuda gu (1,000) pyak yɛn a ga tɛ́ ɛn bemat-raa, ko mwa hɛn yɛn a to sé gyeng Badu Mose naka.

²¹Bemat ba ga ha a yɛn e ra hwo wɔgɔ, hwà sé basa a mwa BeYuda de ba sé sangal e bavwêl yére dyuk pyɛ́ yemo ngan: Yɛn a tik nà gyeng Badu Mose, yɛn a tik nà kyese a nèy mɛn e cwɛl, na yɛn a tik nà raa negwɔn BeYuda mo arɔng.

²²E sɛ́ de wot ê ra arɛt? Mwin, yɛn a rɔda wok, hwà ga vey wul e ngamo.

²³Di, wot ê ha a hwo pyɛ de hwô ra: Bemat benaas ba sé tanga wot de ba ga jut sira e nuyêl Dagwi.

²⁴Raa hɛn, na hwo wuna tó mo na yɛn e jeng de bê tɛ̀ ɛn jɛrɛ, na hwo tala dyâm tɛ́ ɛn jɛrɛ mo yaga yɛn. Ano kwong, yɛn ê tɔk hwon bato mɛn. Ka sede hwô ra ano, ko mwa bemat bê tɔk, hwo pyɛ mo hwà sé raa Badu Mose. Bê to tɔk, bemat vane de ba ha neha e ra hwo, neha mɛn o na sé bɔs.

²⁵Ko e ra tɛ̂t bemât yére dyuk à, vemo de ba ga tɛ́ ɛn bemat-raa, wot a ga jɛk a yɛn bwok-rwang e ra pyɛ́ de wot a nɔng nu na be ra. Pyɛ́ ma yet ngan: Be re pyɛ de ba yɛrɛ yaga sekwit wɛt; be re nemi wɛt kɛ namâ pyɛ de ba tik nà shushu nemî yɛ; be ra nejwang arɔng wɛt.”

²⁶Ano kwong tuk het, Bulus a jut bemat vane mo, ko yɛn a ra sede remo de Mose à kana ha a BeYuda na be ra, yaga na be tɛ̀ ɛn jɛrɛ. E bama mo, a yel e Gbɔng Duk Re Fongol, a ha a piris tuk de bemat o bê ba yɛnɛ tɛ́ ɛn jɛrɛ mo, ko bê ba yɛt nɔrɔ̂ yas vɔk na Dagwi yaga bato mɛn.

²⁷Jeng de nepɔlɔ netaama nè tɛ́ ɛn jɛrɛ mo na vey bagât yɛnɛ hɛn, BeYuda behak de ba vey yi e sevwêl Asiya ba di Bulus e Gbɔng Duk Re Fongol. Yɛn a tɔgɔs regyɛng bemât mwa, ko yɛn a vo ɛ.

²⁸Yɛn a gbɔ, ba ye, “À begwa BeIsrayɛl, vey in, na yin a sɛlɛ hot! Mwat á womo de e kyě kyè e kahɛ kwɔn, e basa a bemât mwa, be raa negwɔn BeIsrayɛl wɛt. E to basa a yɛn, bē lashe Badu Mose, na be to nɔ̂ng Gbɔng Duk womo nerey wɛt! Ko di, a vey na bemât yére dyuk e nelalâ Gbɔng Duk womo de wa sé jɛrɛ; yi ano, a tɛ̀ kwɔn o ligis.”

²⁹Yɛn a ha ano, yaga yɛn á kana di Bulus e ji repomo tanga Torofimus, mwât Ɛfɛsus. Yaga ano, yɛn a bare, Bulus a jut ɛ na be yel e nelalâ Gbɔng Duk o.

³⁰Lwɛ́lɛ gwa sogo e mwa repomo mo. Bemat pyak ba yi na setele yi e bebak detidetu, ko yɛn a vo Bulus, ba hwɔlɔ hɛ, ko ba pat ɛ yi e Gbɔng Duk Re Fongol. Remo-remo, ba bang ruhûp wɛ.

³¹Jeng de bemat o ba sé simo be mɔrɔ hɛ, mwat hwak a wɔ̀ ha a gwɔ̀m bemât comô BeRoma wɔgɔ, nehywɛ bemât Yɛrusalɛm mwa na ga sogo.

³²E ji jeng o, gwɔ̀m o a pe vɛ́ bemât como tanga bemât nuyel mɛn, ko a tele na yɛn wɔ na regyɛng bemat o. Jeng de bemat o ba di gwɔ̀m bemât como mo tanga bemat mɛ, yɛn a tik dâk Bulus o.

³³Yɛ gwɔ̀m o a vey, a vo Bulus o, ko a tɛ̀, be rɔgɔs hɛ na ngyang bya. Ko a rangâl bemat, a ye, “Mwat womo a sé wà arɛt? E yɛ̌ pyɛ de a ra arɛt?”

³⁴Yɛn a hwo gbɔ, behak be tē yet ko behak be tē yet. Ko yaga gwolwɛlɛ mo, gwɔ̀m o a tɔk wok retîn pyɛ mo wɛt. Yaga ano, a tɛ̀ bemât como mɛ be wɔ́ na Bulus e kwɔ̂n fwom mɛn.

³⁵Ko jeng de ba wul nekwɔn turus, a sé a bemât como mo gbing-gbing na yɛn a jut ɛ e rak o, yaga regyɛng bemat o ba ra yol sede bemat lolong.

³⁶Yɛn mwa yɛn a raa hɛn, ko ba dak sekun, ba tē, “Bē wey na yɛ!”

³⁷Sede bemât como mo ba vey bagat na be yel na Bulus e kwɔ̂n fwom mɛn, Bulus o a yâng gwɔ̀m mɛn, “Kɛ hwô simo na me hanat na hwo bɛ?” Gwɔ̀m o a langat hɛ, a yang ɛ, “Hwà tɔk relêm BeGirik arɛt?

³⁸Hwà sé WoMisra wane de e neshey de ná kwey a tɛ̀ BeYuda be sogo nehywɛ wɛt arɛt? Yɛ mo a hwɔtɔ bemat gu banaas (4,000) wɔ e hey na be ra yol na wot; ba tang ɛn, à Bemât Nebǎ.”

³⁹Bulus a toyo a yɛ, a yang ɛ, “Me ma sé WoYuda yi e bak sevwêl Kilikya. Ma sé mwât gbɔng repomô Tarsus de ra vɔk reza rerey e jey. Kɛ hwô simo a me na me hanat na bemat vemo bɛ?”

⁴⁰Gwɔ̀m bemât como mo a simo. Ano kwong, Bulus a tumal e ra nekwɔn turus o, a nára vwɔ mɛ e gwi na a ha na bemat. Jeng de yɛn a sǎ yuu, a hwo ha na yɛn na relêm BeYuda, a yang ɛn: