Read berom Tomong Betom Yɛsu 23 Bible Online

Tomong Betom Yɛsu 23 - berom bible

Tomong Betom Yɛsu 23

¹Bulus a bɛrɛng bemakûk badu mo gbir, a yang ɛn, “À begwa hom, yimo me rɔngɔl hwey vey e tuk hemo, ma sé raa mwa badu Dagwi. Ko yey hom ya gang me na shɔt wɛt.”

²Jeng de Hananiyas, yɛ darwêy bepiris, a wok ano, a nɔ̂ng bemat de ba sé bagat na Bulus o nu be fala hɛ e nu.

³Ko Bulus a yang ɛ, “À hwo mwât nenu-neba! Dagwi ê ra a hwo ano arɔng. Hwo hwà sé sangal e hane na hwo ra a me shɔt e gwông Badu mot, ko mwin, hwà sé kwɔrɔ Badu mo, yaga hwà nɔng nu be fala me.”

⁴Bemat de ba sé tumal bagat na Bulus ba ye, “Ányé yēè! Hwà sé wà de hwô dùsa darwêy bepiris ɛ?”

⁵Bulus a ye, “À begwa, me ma tɔk, e yɛ de a sé darwêy bepiris wɛt. Yaga bà jɛk e Bwok-basa Dagwi, ‘Hwo ha há ves e ra mwât nuyêl bemat mō wɛt.’ ”

⁶Sede remo de Bulus a tɔk, e ji bemakûk badu mo behak ba sé BeSaduki ko behak ba sé BeFarisi, a hanat na gap, a yang ɛn, “À begwa hom, ma sé WoFarisi, da hom arɔng á sè WoFarisi. Yin a sé ra a me shɔt, yaga ma sɛt yey hom, Dagwi a rɔda ba sene bemat yi e reku.”

⁷Jeng de yɛn a wok há hemo, BeFarisi na BeSaduki ba hwo tó cuna na bemɛn sɛ̌ tula mo ha gas ɛ zang ba.

⁸Yaga BeSaduki yɛn e tē, bemat de ba ga kushu yɛn ê to ba sene yi e reku wɛt. Yɛn e to tē, vit a betom-lagwi ko vit a begabik arɔng. Ko BeFarisi be tē, mwa pyɛ́ yane ya sɛ́.

⁹Yaga há hane mo, lwɛ́lɛ gwa sogo ding-ding. Ko bemât basâ Badu behak de ba sé BeFarisi ba tumal, ba tó cuna na gap mɛn mwa, ko ba ye, “Wot a di pyɛ cak vyes e ji mwat womo wɛt. Gyeng rɔ̌ a sé e tom-lagwi de a ha na yɛ kɛ a sé e gabik ayi.”

¹⁰Jeng de cuna mo ya gwɛ̌ tɛ́ ɛ vyes, gwɔ̀m bemât como mo a tele hɛ, gyeng rɔ̌ bemat o bê hama Bulus o. Yaga ano, a nɔ̂ng bemat mɛ nu be gyirik, na be wɔ̀ sey ɛ̀ Bulus o e vɔ bemat o, na be yel na yɛ e kwɔ̂n fwom mɛn.

¹¹E ji nabwalak o, Darwey Yɛsu a vey tumal bagat na Bulus, a yang ɛ, “Vɔk yey ting! Sede remo de hwà nɔng nuha e ra me e ngamo e Yɛrusalɛm, a sé gbing-gbing na hwo ra ano arɔng e Roma.”

¹²Tuk het nagasi, BeYuda behak ba tula hɛn, ko yɛn a hwo yong begwong na be mɔrɔ Bulus. Yɛn a jut sira, yɛn ê re kɛ sɔ pyɛ cak wɛt, sɛ̌ yɛn a mɔrɔ Bulus e ngyen.

¹³Mwa bemat de ba wuna bato mɛn na sira yɛn a dal bemat kuru banaas (40).

¹⁴Yɛn a wɔ́ na begbɔng bepiris tanga bemakuk, ko yɛn a yang ɛn, “Wot a ga vo nu na sira, wot ê re pyɛ cak wɛt, sɛ̌ wot a mɔrɔ Bulus e ngyen.

¹⁵Yaga ano, yin tanga mwa bemakûk badu, tomo hin na há vɔk na gwɔ̀m bemât como, yɛ a tomo a yin na Bulus. Rá in, sede yin e simo na yin a gwɛ̌ ra a yɛ nerangsal, yaga na yin a tɔk pyɛ de a ra mo naka-naka. Ko wot à, wot ê sè e yong ot, na wot a bin mɔrɔ hɛ gyam na a vey wul e ngamo.”

¹⁶Wen hwak a sɛ́ de a sé gwâl Bulus, jeng de a wok pyɛ de ba sé yong o, a kyè wɔ na gwɔ̀m bemât como, a sɛ̀ Bulus e hwomo, ko a kulu a yɛ há mo.

¹⁷Bulus a yila gbɔng o wo bemât como hwak, a yang ɛ, “Ci wɔ̀ kyɔk wen womo na gwɔ̀m bemât como; a vɔk há hak de ê ha a yɛ.”

¹⁸Yɛ gbɔng o mo a kyè na wen o wɔ na gwɔ̀m mɛn, a yang ɛ, “Bulus, mwât ngyang, a yila me, ko a ra won na me, me vey kyɔk wen womo na hwo, yaga a vɔk há hak de ê ha a hwo.”

¹⁹Gwɔ̀m bemât como mo a kaba vwɔ̂ wen o, ko yɛn a wɔ́ e hagat, a rangal hɛ, a ye, “E hɛ̌ há de hwó simo hwo ha a me arɛt?”

²⁰Wen o a yang ɛ, “BeYuda behak ba yong ɛ̀, yɛn ê ra won na hwo, na hwo ba tomo a yɛn na Bulus e kwɔ̂n badu nahwol. Yɛn ê ra, sede yɛn e simo be gwɛ̌ ra a yɛ nerangsal, yaga na yɛn a tɔk pyɛ de a ra mo naka.

²¹Hwo kwon simo a yɛn wɛt, yaga bemat de ba dal kuru banaas (40) ba sé gyeng ɛ e waba na be mɔrɔ hɛ. Yɛn a ga vo nu na sira, yɛn ê re kɛ sɔ pyɛ cak wɛt, sɛ̌ yɛn a mɔrɔ hɛ e ngyen. Yɛn a sé e yong ɛn a remo, ko a sé e há yi na hwo zɔng de yɛn a sé gyeng.”

²²Gwɔ̀m bemât como mo a tusa wen o, “Hwo ha a mwat hwak há hemo de hwà ga ha a me wɛt.” Ko a yang ɛ, a kyè wɔ e lɔ.

²³E bama mo, gwɔ̀m bemât como mo a yila begbɔng o behak beba, a yang ɛn, “Yila hin bemât como naga beba (200), na bemât bedwa kuru bataama (70), na bemât bebara naga beba (200) arɔng. Tik na be sè e yong ɛn nabwalak yunung e dyām shatyat, na be sogo wɔ e repomô Kaisariya.

²⁴Yóng in a Bulus bedwa mo behak arɔng de ê laga. Bɛrɛng hin hɛ naka, yaga na pyɛ cak ye kwon sɛ̀ ɛ e ji kwɛngɛl o wɛt, ko kyè in na yɛ vɔk na Gwɔmna Felis.”

²⁵E bama mo, a jɛk bwok-rwang gwomo ngan:

²⁶Bwok-rwang yi e vwɔ̂ Kalaudiyus Lisiyas, Vɔk na Gwɔmna Felis: Show pyak.

²⁷Mwat womo de ma sé tomo na yɛ vey na hwo, BeYuda bá kana vo ɛ, ko yɛn a simo be mɔrɔ hɛ. Ko jeng de bemat ba ha a me, yɛ a sé WoRoma, ma jut bemât como hom behak, ko ma sey ɛ̀ hɛ.

²⁸E jeng o, ma kana tɔk há de ba tɛ̀ kun mɛ e ra hɛ wɛt. Yaga ano, ma jut ɛ wɔ na bemakûk badu BeYuda, yaga na me wok há mo.

²⁹Ma di, vit a pyɛ de a ra de ya vey na be mɔrɔ hɛ kɛ na be tɛ̀ ɛ e ngyang. Há de ba tɛ̀ kun mɛ e ra hɛ ha sé há e ra tɛ̂t badu mɛn.

³⁰Ko jeng de ba dura a me, BeYuda ba sé jāma gwong na be mɔrɔ hɛ, remo-remo, ma tomo na yɛ vey na hwo. Ma to nɔ̂ng bemât sekun mɛ nu na yɛn a ba tɛ̀ kun mɛ e nuyel mō. Tala ma hane.

³¹Bemât como de ba tomo hɛn o yɛn a ra tyɛng sede remo de gwɔ̀m mɛn o a nɔng ɛn nu. Yɛn a jut Bulus nabwalak, ko yɛn a wul repomo rehak de be tâng rɛ, à Antipatiris.

³²Tuk het, bemât comô bol ba to ɛn wɔ e kwɔ̂n fwom mɛn. Ko vê bedwa ba re nuyel na Bulus o.

³³Jeng de yɛn a wul Kaisariya, yɛn a wɔ̀ nɔ̂ng gwɔmna bwok-rwang de gwɔ̀m mɛn o a jɛk, ko yɛn a nára Bulus e vɔ mɛ.

³⁴Gwɔmna mo a basa bwok-rwang o. Ano, a rangâl Bulus, a ye, “Hwà sé yi e wɛ̌ bak sevwel o arɛt?” Bulus a yang ɛ, “Ma sé yi e Kilikya.”

³⁵Jeng de a wok ano, a yang ɛ, “Mê wok há mō jeng de bemât sekun mō ba vey.” Ko a tɛ̀ be jut Bulus o na be wɔ̀ bang ɛ e lɔ gbɔng gwɔ̀m de Herodes á kana lɔk, na be bɛrɛng hɛ́ naka.