Read berom Tomong Betom Yɛsu 24 Bible Online

Tomong Betom Yɛsu 24 - berom bible

Tomong Betom Yɛsu 24

¹E bamâ pɔlɔ tungun, Hananiyas de a sé darwêy bepiris tanga bemakûk BeYuda behak yɛn ba wul Kaisariya. Mwat hwak de ba tang ɛ, à Tɛrtulus a sé tanga yɛn; yɛ a sé mwât fwɔ̂ redu. Yɛn a wɔ̀ tɛ̀ kûn Bulus e nuyêl Gwɔmna Felis o.

²Jeng de ba yila Bulus, Tɛrtulus a hwo tɛ̀ sekun mɛ e nuyêl gwɔmna mo, a ye, “À Darwey, a sé yaga hwà sé mwât nuyel rwat de wot a sɛ̀ sangâl netyang na bemot pere vey e jeng yemo. A to sé yi na netsitsɛng mō de hwà sé yong pyɛ́ detidetu de ya tɛ̀ bemat mot be wok netâ sangal mɛn.

³E kahɛ kwɔn tanga e kayɛ jeng wot e wokos netâ yerê negwɔm nemo, ko wot e feng a hwo sizɔng.

⁴Ko me simo na me lashe a hwo jeng wɛt. Yaga ano, ma sé ra won na hwo, ka sede hwà simo, ko tik na hwo wet betong na hwo wok há mot hemo tyɔng.

⁵Wot a di, mwat womo mo a kat cɛk. E kahɛ kwɔn e ji jey yemo, e yɛ wɛ de e tɛ̀sɛ BeYuda be sogo nehywɛ, ko a to sé mwât nuyêl bemat-raà Yɛsu wo Nazarɛt.

⁶Wot a vo ɛ, yaga yɛ á sè jāma na a tɛ̀ Gbɔng Duk Re Fongol mot ligis. [Yaga ano, wot a simo na wot a ra a yɛ shɔt e gwong de Badu mot ba dura.

⁷Ko gwɔ̀m bemât como Lisiyas a vey sey ɛ̀ hɛ na gbɔng retek e vɔ mot,

⁸a to nɔng ot nu wɔgɔ, bemât sekûn mwat o be vey tɛ̀ kun mɛ e nuyel mō.] Ka sede hwà rangal hɛ, hwo pyɛ mo, ko hwô tɔk di mwa pyɛ́ de wot e tɛ̀ sekun mɛ e ra yɛ.”

⁹BeYuda arɔng yɛn a wuna nu, ba ye, pyɛ́ de Tɛrtulus a sé ha e ra Bulus ya sé tsak o.

¹⁰Gwɔmna mo a nára vwɔ wɔ na Bulus na a ha. Bulus o a hwo ye: “À Da, ma tɔk, neshey pyak hwà sé ra a wot BeYuda shɔt. Yaga ano, ma vɔk yey pyɛng na me ha, na me dul mɛ̀ tó hom e nuyel mō.

¹¹Hwô tɔk rangal na hwo tɔk, a dal nepɔlɔ kuru na nɛ neba (12) wɛt de ma kana wɔ e Yɛrusalɛm na me wɔ̀ re a Dagwi fongol.

¹²E jeng o, bemât sekun hom o yɛn á sɛ̀ me e de râ cuna na bemat kɛ e de tɛ́sɛ bemat be sogo nehywɛ wɛt — kɛ a sé e Gbɔng Duk Re Fongol, kɛ e beduk re fongol, kɛ e dem hak e ji repomo mo ayi.

¹³Yɛn ê kyɛm be dura a hwo wɛt wɔgɔ, há hemo de ba tɛ̀ kun hom e ra hɛ ha sé tsak o.

¹⁴Ko pyɛ cak ya sɛ́ de ya sé tsak o, yemo de me simo me dura a hwo yɛ, yɛ à yet ngan: Me raa gwông Darwey Yɛsu de bemat vemo be tâng gwɛ, à gwông bɔs. Ko yi ano, me re a Dagwi fongol, yɛ de bedabeda mot bà kana raa hɛ. Ma sey tsak o na kayɛ pyɛ de bà kana jɛk e Badu Mose tanga e bebok-basa vê bezarap Dagwi.

¹⁵Ko tyɛng sede bemat vemo, ma sɛt yey hom Dagwi ê ba sene mwa bemat yi e reku, kɛ ba sé berat kɛ ba sé beves ayi.

¹⁶Yaga ano, ma sé ye ngyɛ́k, yaga na yey hom ye gang me na shɔt wɛt e nuyêl Dagwi kɛ e nuyêl bemasi gbak.

¹⁷“E bama de ma ga tɛ̀ neshey pyak e jey, ma toyo wɔ e Yɛrusalɛm, yaga na me wɔ̀ nɔ̂ng bepɛng behak e ji BeYuda dyām, na me wɔ̀ nása nenɔrɔ̂ yas de be yɛt vɔk na Dagwi arɔng.

¹⁸E jeng de ma sè e de ra ano e Gbɔng Duk Re Fongol, ma ga yɛnɛ mwa pyɛ́ de ya jam na me sè jɛrɛ e nuyêl Dagwi. Á sè e jeng o de bá sɛ̀ me; vit a regyɛng bemat de bá sè tanga me, ko pyɛ hom cak yá sè na sogô nehywɛ arɔng wɛt.

¹⁹Ko BeYuda behak de bá vey yi e sevwêl Asiya yɛn á sè e hwomo. A yâng sé naka ka e yɛn vɛ de ba yâng vey tumal e nuyel mō na be tɛ̀ kun hom e negya, ka sede yɛn a vɔk há na me.

²⁰Ka ano wɛt, ko tik na bemat vemo pyɛ mɛn be ha a hwo renɛn de yɛn a sɛ̀ me na rɛ e jeng de ma tumal e nuyêl bemakûk badu.

²¹Sɛ̌ gyeng rɔ̌ pyɛ jining de ma tɔk yɛ a yet ngan: E jeng de ma kana tumal e nuyêl bemakûk badu mo, ma hanat na gap, ma ye, ‘Yin a sé ra a me shɔt yunung, yaga ma sey tsak o, Dagwi a rɔda ba sene bemat yi e reku.’ ”

²²E bama mo, Felis de á kana tɔk pyɛ́ cak e ra gwông Darwey Yɛsu naka a tik shɔt o, a yang ɛn, “E jeng de Lisiyas, yɛ gwɔ̀m bemât como, ê vey, mê yɛrɛ shɔt o.”

²³A nɔ̂ng gbɔng o wo bemât como nu na a to kyè na Bulus, na be gyeng ɛ naka. Ko a to yang ɛ, bē teshe na Bulus o sede mwât ngyang wɛt, ko bē simo a besa mɛ be nɔngɔs hɛ pyɛ́ de e simo.

²⁴E bamâ nepɔlɔ tyɔng, Felis a wɔ́ e hwomo, yɛ tanga hwā mɛ Durusila de a sé WoYuda. A tɛ̀ be vey na Bulus, ko a wet betong na a wok hâ Bulus e ra gwong de mwat e sey tsak o na Kristi Yɛsu.

²⁵Jeng de Bulus a ha e ra ragas nerat, na e ra gyêng to, tanga e ra shɔt de Dagwi ê ba ra a bemat, Felis a wok bengyip, ko a ye, “Kā tik ano e ngyen na hwo ka kyè. Ka sede ma sɛ̀ jeng, ko mê to yila hwo.”

²⁶Yɛ mo a sɛt yey, Bulus ê nɔng ɛ dyām. Yaga ano, a yila Bulus o e jeng e jeng, na be ra berem na yɛ.

²⁷E bamâ neshey neba, Felis a hàla fwôm gwɔmna mo, ko ba tɛ̀ Pɔrkiyus Fɛstus e to mɛ. E jeng de a sé kyè wɔ̀ hàla fwom o, a tik Bulus e banga mo, yaga na BeYuda be bin simo hɛ mɛ̀.