Read berom Tomong Betom Yɛsu 25 Bible Online

Tomong Betom Yɛsu 25 - berom bible

Tomong Betom Yɛsu 25

¹Fɛstus a wul yɛnɛ̂ sevwel sane mo, ko e bamâ nepɔlɔ netat, a sogo yi e Kaisariya vɔk e Yɛrusalɛm.

²Begbɔng bepiris na mwa bemât nuyêl BeYuda ba wɔ̀ sɛ̀ ɛ e hwomo, yɛn a tɛ̀ kûn Bulus. Yɛn a ra won na yɛ,

³na a dura a yɛn nerat mɛ na a tomo be vey na Bulus e Yɛrusalɛm. Yɛn a ra won ano, yaga yɛn á kana yong ɛn na be waba hɛn, na be bin mɔrɔ Bulus e gwong.

⁴Ko Fɛstus a toyo a yɛn, a ye, “Bulus a sé e banga e Kaisariya. Ma vey bagat to me e hwomo.

⁵Tik na bemât nuyel min behak be raa me. Ka sede Bulus o a ra pyɛ cak vyes, ko bemat o bê tɔk tɛ̀ kun mɛ e hwomo.”

⁶Fɛstus a tɛ̀ sede nepɔlɔ rwit kɛ kuru e Yɛrusalɛm, ko e bama mo, a sogo, a to ɛ vɔk e Kaisariya. Tuk het, a sangal e duk shɔt, ko a tɛ̀ be vey na Bulus e nuyel mɛ.

⁷Jeng de Bulus a pom, BeYuda de ba vey yi e Yɛrusalɛm ba gwɔrɔ hɛ e tē, yɛn a tɛ̀sɛ sekun mɛ e ra pyɛ́ pyak de ya sé vyes. Ko yɛn a tɔk dura dɛdɛɛt wɛt wɔgɔ, pyɛ́ mo ya sé ano.

⁸Ko Bulus a ha na a dul mɛ̀ tó mɛ, a ye, “Ma ga kwɔrɔ Badu BeYuda wɛt, ko ma ga ra pyɛ vyes cak e ra Gbɔng Duk Re Fongol wɛt; ma ga ha há ves e ra Da vwel BeRoma arɔng wɛt.”

⁹Ko Fɛstus, yaga a simo na BeYuda be simo hɛ, a yâng Bulus, “Hwó simo na hwo wɔ e Yɛrusalɛm na me ra a hwo shɔt e ra sekun semo de bemat vemo ba tɛ̀ e ra hwo arɛt?”

¹⁰Ko Bulus a toyo a yɛ, a yang ɛ, “A sé e kwɔ̂n shɔt Da vwel BeRoma de ma sé tumal ɛ̀ a remo, ko a sé naka na be ra a me shɔt e ngamo. Ma ga ra a BeYuda renɛn rehak wɛt, sede remo de hwo pyɛ mo hwà tɔk tsɛng-tsɛng.

¹¹Ka sede ma ga ra pyɛ cak de ya wul ye reku, ko ma kyɛ́ me na be mɔrɔ me wɛt. Ko ka sede sekun de ba tɛ̀ e ra me sa sé tsak o wɛt, vit a mwat de a vɔk reto na a nára me e vɔ bemat vemo. Ma sé simo na me jut há hom vɔk e nuyêl Da vwel BeRoma.”

¹²Fɛstus a hwo ha na bemat de be nɔngɔs hɛ badu; ko a toyo a Bulus, a yang ɛ, “Sede remo de hwó simo hwo jut há mō vɔk e nuyêl Da vwel BeRoma, a sé na yɛ mo de hwà rɔda wɔ.”

¹³E bamâ jeng cak, Gbɔng Gwɔ̀m Agaripa na Bernike ba pom e Kaisariya, yaga na be vey yâng Fɛstus show na vey.

¹⁴E bama de ba ga ra nepɔlɔ e hwomo, Fɛstus a hwo tɔrɔng na gbɔng gwɔ̀m o e ra rehâ Bulus, a ye, “Mwat hwak a sé e ngamo de Felis á tik ɛ e banga.

¹⁵Jeng de ma wɔ́ e Yɛrusalɛm, begbɔng bepiris na bemakûk BeYuda ba vey tɛ̀ sekun mɛ, ko yɛn a yang me, me gang ɛ na shɔt.

¹⁶Ko ma yang ɛn, e ji negwɔn mot wot BeRoma, ka sede bemat ba tɛ̀ kûn mwat hwak, ko wot e nára mwat o e vɔ mɛn wɛt, sɛ̌ a tānga man na yɛn, na a sɛ̀ kwɔn na a ha, na a dul mɛ̀ tó mɛ e ngyen.

¹⁷Yaga ano, BeYuda mo ba raa me vey e ngamo. Ma to lashe jeng wɛt, ko tuk het, ma sangal e kwɔ̂n shɔt, ko ma tɛ̀ be vey a me na Bulus o.

¹⁸Ma kana sè bare, BeYuda bê vey na neha neves e ra yɛ. Ko jeng de yɛn a tumal na be tɛ̀ kun mɛ, yɛn a vɛ̀sɛ na yerê neha neves nane mo wɛt.

¹⁹Pyɛ de yɛn a ra e negya a yet ngan: Yɛn a ra cuna e ra gwong de yɛn e re a Dagwi fongol tanga e ra mwat hwak de a ga kana ku, reza mɛ, à Yɛsu. Ko Bulus e tē, mwat o a sé na neken.

²⁰Ma ka tɔk gwong de mê ngyɛgɛt há yerê hemo wɛt. Yaga ano, ma rangâl Bulus o, kɛ ê simo na a wɔ́ e Yɛrusalɛm, na be ra a yɛ shɔt e hwomo e ra neha mo arɛt.

²¹Ko Bulus a simo wɛt; a ye, be ka tik ɛ e ngyen, na a jut há mɛ vɔk e nuyêl Da vwel BeRoma, na a ra a yɛ shɔt. Yaga ano, ma tɛ̀ be gyeng ɛ naka sɛ̌ jeng de ma sɛ̀ gwong na me tomo na yɛ wɔ na Da Vwel mot o.”

²²Agaripa a yâng Fɛstus. “Me pyɛ hom mê simo na me wok mwat o arɔng.” Fɛstus a toyo a yɛ, a ye, “Nahwol, hwô tɔk ba wok há mɛ.”

²³Tuk het, Gbɔng Gwɔ̀m Agaripa na Bernike ba wɔ e hwomo na nerey tyɔng wɛt. Yɛn a yel e gbɔng duk tula tanga begwɔ̀m bemât como, na begbɔng bemât repomo mo. Fɛstus a nɔng nu be vey na Bulus, ko ba vey na yɛ.

²⁴Fɛstus a ye, “À Gbɔng Gwɔ̀m Agaripa na yin mwa de yin a sé e ngamo na wot: Di in mwat womo de a sé tumal e nuyel min. Mwa BeYuda e repomo remo tanga e Yɛrusalɛm ba vey na neha e ra yɛ, yɛn a gbɔ wɔgɔ, be to tik ɛ na neken wɛt.

²⁵Ko me pyɛ hom ma ga sɛ̀ pyɛ vyes cak de a ra de ya wul reku wɛt. Ko sede remo de yɛ pyɛ mɛ e simo na a jut há mɛ vɔk e nuyêl Da vwel BeRoma, ma yong ɛ̀ e yey hom na me tomo na yɛ wɔ e Roma.

²⁶Ko ma ka vɔk pyɛ cak yɛ́t de mê jɛk e ra há mɛ wɛt. Yaga ano, ma yila hɛ na a tumal e nuyel min mwa, a dal mɛ̀ e nuyel mō, à Gbɔng Gwɔ̀m Agaripa. Tik na wot a wok há mɛ; gyeng rɔ̌ mê sɛ̀ pyɛ de mê jɛk ayi.

²⁷Yaga ma di, ê sè pyɛ netɔn na me tomo na mwât ngyang wɔ na Da Vwel mot ano sana tānga jɛk neha de ba vey mɛ̀ e ra yɛ e ngyen.”