Read berom Tomong Betom Yɛsu 26 Bible Online

Tomong Betom Yɛsu 26 - berom bible

Tomong Betom Yɛsu 26

¹Gbɔng Gwɔ̀m Agaripa a yâng Bulus, “Ma nɔng o gwong na hwo ha há mō.” Yaga ano, Bulus a nára vwɔ mɛ, ko a hwo ha há de ê dul mɛ̀ tó mɛ, a ye,

²“À Gbɔng Gwɔ̀m Agaripa! Ma vɔk yey pyɛng sizɔng, yaga hwô wok hâ dul tó hom yunung. Mê ha a hwo mwa pyɛ́ de BeYuda be tɛ̀sɛ kun hom e ra yɛ̄.

³A gwɛ̌ sé a me ano, yaga hwà tɔk mwa negwɔn BeYuda tanga cuna de yɛn e ra e rà pyɛ́ detidetu hwo dal mɛ̀ bwarwêy bemat. Yaga ano, ma sé ra won na hwo, hwo niri, na hwo wok neha de mê ha a hwo.

⁴“Yimo jeng de ma sè hwey, mwa BeYuda ba tɔk negwɔn hom. Yɛn a tɔk begwông sangal hom yimo e tɔ hom e sevwel hom mwa na e Yɛrusalɛm arɔng.

⁵Yɛn a ga ros na tɔk, ma kana raa basâ BeFarisi, yɛn de be gyeng Badu be dal mɛ̀ mwa BeYuda. Ka sede yɛn e simo, ko yɛn ê tɔk nɔng nuha wɔgɔ, há hemo ha sé tsak o.

⁶Ko a remo, ma sé tumal e ngamo, ko ba sé ra a me shɔt yunung, yaga ma sɛt yey hom e ra pyɛ de Dagwi à kana sira a bedabeda mot e ra yɛ.

⁷E pyɛ ma yane de yére mot kuru na yɛ bya (12), e jeng de ye sɛt yey e de re a Dagwi fongol nagasi na nabwalak, ye sɛt yey e ra yɛ̀ na ye sey ɛn. Ko di, à Gbɔng Gwɔ̀m, a sé yaga pyɛ mo de BeYuda be vɛ̀sɛ na neha e ra me.

⁸Yaga sɛ́ de yin e bare, a dal gâp Dagwi na a sene bemat yi e reku arɛt?

⁹“Me pyɛ hom arɔng, ma kana bare, a sé gbing-gbing na me ra kayɛ pyɛ de mê tɔk ra, na me kyɛ́ me mɛ̀ rezâ Yɛsu wo Nazarɛt.

¹⁰A sé ano de ma kana ra e Yɛrusalɛm a raane. Begbɔng bepiris yɛn á kana nɔng me reto na me tɛ̀sɛ bemât Dagwi pyak e ngyang. Ko jeng de bá gang ɛn na shɔt reku, ma dura simo hom e ra pyɛ de yɛn á ra mo arɔng.

¹¹Ma tabak hɛn zang pyak e ji mwa beduk re fongol, ma to jāma na me tɛ̀ ɛn gbing-gbing be kyɛ́ ɛn nà sey tsak o na Darwey Yɛsu. Ma wok shom mɛn sedesi; yaga ano, ma raa hɛn wɔ e bapomo baduk na me tak a yɛn reyɔm e hwomo arɔng.”

¹²“Tuhak, ma sogo wɔ e repomô Damaskus, yaga na me wɔ̀ tak a bemat-raa reyɔm e hwomo. Begbɔng bepiris bá kana nɔng me reto na me ra ano, bá kana ha a me pyɛ́ de mê ra arɔng.

¹³Ko di, à Gbɔng Gwɔ̀m, e ji kwɛngɛl hom e gwong e tê-gwi, ma di negbey nehak. Ná yi e lagwi, ko ná nɛp na dal gwi, ná lolo, ná gwɔrɔ me mwa na bemat de bá sè kyè tanga me.

¹⁴Wot mwa wot á gaba e vwel. Ko ma wok fwɔ hwak de gwa yang me na lêm BeYuda, ‘À Saul! À Saul! Yaga sɛ́ de hwó tak a me reyɔm arɛt? Hwô mǎ tó mo, ka sede hwô sǎ e de dirîs cɔgɔt de ya sé myóm-myom.’

¹⁵Ma yang ɛ, ‘E hwo à wà, à Darwey arɛt?’ Ko Darwey o a toyo a me, a ye, ‘A sé e me Yɛsu de hwó tak a me reyɔm.

¹⁶Ko di, sogo, na hwo tumal. Ma ga vey dura a hwo tó hom, yaga na me ha a hwo, ma ga kasa hwo na hwo ra a me fwom. Ma ga kasa hwo arɔng, na hwo nɔ̂ng bemat nuha e ra pyɛ́ de hwà ga di na me yunung tanga e ra pyɛ́ de ma rɔda to dura a hwo.

¹⁷Ma rɔda tomo hwo vɔk na BeYuda tanga vɔk na bemât yére dyuk, ko ma rɔda sey o yi na yɛn.

¹⁸Ma rɔda tomo hwo na hwo tɛ̀ bayis mɛn be wunta hɛn, na hwo tɛ̀ ɛn be vey yi e ji lwīl vɔk e ji negbey, na hwo to tɛ̀ ɛn be tik sángal e nɛ̂n retô Shetan, na be vey raa Dagwi e negya. Yaga, ka sede ba sey tsak o na me, Dagwi ê hàla a yɛn banɛn mɛn, ê to jut ɛn na be sè bemɛ, ko ê nɔng ɛn kwɔn de a ga tik yaga bemɛ.’ ”

¹⁹“Ano kwong, à Gbɔng Gwɔ̀m Agaripa, ma kyɛ́ me nà gyeng hâ mwat wane mo wɛt, womo de a yi e lagwi, ko ma di ɛ e negwi-ywey.

²⁰E mɛsɛng o, ma tānga shara Yɛgɛt Yat e repomô Damaskus na e Yɛrusalɛm, e bama mo, e ji mwa sevwêl Yudiya tanga e nekwɔn de bemât yére dyuk ba sé ɛ̀. E ji mwa nekwɔn o, ma ha a yɛn, yɛn a doyo yi e banɛn mɛn, na yɛn a raa Dagwi, na yɛn a to ra tomong rat de be dura, a sé tsak o de yɛn a ga doyo yi e banɛn mɛn.

²¹A sé yaga ma ra ano de BeYuda bá kana vo me e Gbɔng Duk Re Fongol, ko bá jāma be mɔrɔ me.

²²Ko pere vey e yunung, Dagwi e sɛlsɛ me. Yi na sɛlɛ mɛ mo, ma sé tumal e ngamo na me nɔ̂ng bemât mwa nuha, kɛ yɛn a sé berey kɛ yɛn a sé besɛl ayi. Pyɛ de ma sé ha ya sé jining na yemo de bezarap Dagwi na Mose pyɛ mɛ yɛn à kana ye, yê ba té.

²³Pyɛ ma yet: Mwat de Dagwi a kasa na a sey bemat a rɔda ba sɔ reyɔm. A rɔda ba sè wo susu mo arɔng de ê sene yi e reku, yaga na a ha a BeYuda mwa na bemât yére dyuk wɔgɔ, yɛn a rɔda sɛ̀ negbey.”

²⁴Sede Bulus a sé ha na a dul mɛ̀ tó mɛ mo, Fɛstus a pe gbɔ na gbɔng fwɔ, a ye, “À Bulus, hwà to sé e ji nehywɛ mō wɛt! Nepyak tɔ́k mō na ga doyo a hwo to!”

²⁵Bulus a yang ɛ, “À Da, to hom ha ga doyo hɛ wɛt. Neha de ma sé ha mo na sé tsak o, ko ma ha nɛ e ji nehywɛ hom.

²⁶À Gbɔng Gwɔ̀m, ma tɔk, hwà tɔk pyɛ́ yemo mwa. Yaga ano, ma tɔk ha a hwo yɛ̄ sana tô yey. Pyɛ́ yemo ya té e lɛrɛ wɛt. Yaga ano, ma tɔk tsɛng-tsɛng, hwo pyɛ mo hwà ga di kayɛ pyɛ e ji pyɛ́ de ya té mo.

²⁷À Gbɔng Gwɔ̀m, hwà sey tsak o na pyɛ́ de bezarap Dagwi bà ha arɛt? Ma tɔk, hwà sey tsak o na yɛ̄.”

²⁸Agaripa a toyo a yɛ, a ye, “Hwó bare, e ji kejeng tyɔng kemo hwô tɛ̀ me me tɛ́ me mwat-raà Kristi arɛt?”

²⁹Bulus a yang ɛ, “Ma sé ra won na Dagwi, kɛ e ji kejeng tyɔng kɛ e ji jeng pyak, hwo na bwang bemat de yin a sé wet betong na neha hom yunung yin a bin tɛ́ in sede me — ko sana ngyang yemo zɔng.”

³⁰E bamâ há hane, gbɔng gwɔ̀m, na gwɔmna, na Bernike, tanga mwa bemat de ba sé na yɛn, ba sogo.

³¹Jeng de yɛn a wɔ́ e hagat hak, yɛn a yâng bemɛn, “Mwat womo a ra pyɛ vyes cak de ya wul reku kɛ ya vey na be tɛ̀ ɛ e ngyang wɛt.”

³²Ko Agaripa a yâng Fɛstus, “Ka mwat womo á kana ye, e simo a jut há mɛ vɔk e nuyêl Da vwel BeRoma wɛt, ka wot a yâng tɔk hàla hɛ na a kyè.”