Read berom Tomong Betom Yɛsu 28 Bible Online

Tomong Betom Yɛsu 28 - berom bible

Tomong Betom Yɛsu 28

¹Jeng de wot a ye dɔ tyang, bemat ba ha a wot, be tâng kerezik o, à Malta.

²Bemat de ba sé e hwomo ba dura a wot nerat sizɔng. E jeng o, rwak wa sé rop, ko jey ya vɔk gul. Yaga ano, yɛn a pɛl a wot kya na wot mwa wot a wok, na be sey ot mɛ̀ na yey pyɛng.

³Bulus a wɔ̀ tula cɔgɔ̂t kya. Ko jeng de a tɛ̀ yɛ̄ e ji kya mo, gàbak de nevɛ̂t kya mo na pat gwɛ gwa nusu yi e cɔ́gɔt o, gwa pe man ɛ e ra vwɔ̂ Bulus, ko gwa rot ɛ.

⁴Sede bemat o ba di gwɔ̄m de wa man ɛ e vwɔ̂ Bulus o, yɛn a yâng bemɛn, “Mwin, mwat womo a sé mwât mɔbɔs bemat. Mwa ano de a ga sey tó mɛ e nshi, ko byɛ̂ talâ neves mɛ ya sé rɔɔ raa hɛ; yaga ano, ê ku.”

⁵Ko Bulus a digta vwɔ mɛ, gwɔ̄m o wa gaba e ji kya, ko vit a pyɛ de ya té na yɛ.

⁶Bemat o ba bare, vwɔ mɛ mo gwô pu, kɛ remo-remo ê vɔ̌ gaba a ku. Yɛn a ros e de bɛrɛng hɛ, ko pyɛ cak ya té na yɛ wɛt. Yaga ano, yɛn a to hwo bare, yɛn a ye, “Mwat womo a sé dagwi hwak!”

⁷Bagat na kwɔn de pyɛ yemo ya té ɛ̀, mwat hwak de ba tang ɛ, à Pubiliyus a vɔk cāp pyak. Yɛ à mwât nuyêl kerezik kane mo. A sey ot na yey pyɛng, ko wot a sangal e lɔ mɛ sede bekɛnɛt mɛ pɔlɔ tat.

⁸Dâ Pubiliyus o a ro ɛ, a vɔk serɔ̂ fes na tân nemi. Bulus a wɔ̀ sɛ̀ ɛ e dyɛngɛ, a ra won na Dagwi, ko a tɛ̀ vɔ mɛ e ra yɛ, a tɛ̀ ɛ tyang.

⁹E bamâ hane, bwang bemât serɔ e kerezik o ba wok pyɛ de ya té, yɛn a vey, ko Bulus a tɛ̀ ɛn tyang.

¹⁰Bemat o ba nɔngɔs hot nenɔrɔ pyak, ko e jeng de wot a sé kyè wɔ̀ kyè, yɛn a nɔng ot pyɛ̂ mwa de wot a simo yaga kwɛngɛl mot.

¹¹E bamâ pɛl tat, wot a yel e dwa-nshi hwak de ba tâng wɛ, à Shambyâ Bedagwi. Wa sé yi e repomô Aleksandariya, ko wá kana sè gyeng e kerezik kemo mo na be pat gul zɛng e ngyen. Wot a sogo yi e Malta mo,

¹²ko wot a kyè, wot a wul repomô Sirakusa, wot a ra pɔlɔ tat e hwomo.

¹³Yi e hwomo, wot a to kyè e dwa-nshi, wot a wɔ̀ wul repomô Regyum. Tuk het, gul gwa hwo pɛsɛl yi e bama mot yi e rwa batin, gwa gangas hot, ko e het à gasi, wot a wɔ̀ wul Puteyoli.

¹⁴E hwomo, wot a sɛ̀ bemat-raa behak de yɛn a rini hot na wot a sangal na yɛn nepɔlɔ netaama. Gwong a gwomo de wot a wɔ̀ wul Roma.

¹⁵Bemat-raa e Roma yɛn á kana wok, wot a sé kyè vey; yaga ano, yɛn a wɔ̀ gyeng ot e gwong. Behak ba wɔ̀ gyeng ot e bajang Apya, ko behak e repomo de be tâng rɛ, à Beduk Bekɛnɛt Betat. Jeng de Bulus a di ɛn, a hwo feng a Dagwi, ko a vɔk yey ting.

¹⁶Jeng de wot a wul Roma, ba tik Bulus a sangal yɛ nju mɛ e duk mɛ, ko ba tɛ̀ mwât como hwak a gyenges hɛ.

¹⁷E bamâ pɔlɔ tat, Bulus a yila bemât nuyêl BeYuda de ba sé e repomo mo, na be wɔ̀ sɛ̀ ɛ e hwomo. Jeng de yɛn a tula hɛn, a yang ɛn, “À begwa hom, mwa ano de ma ga ra a bemat mot renɛn rehak wɛt, ko mwa ano de ma ga lashe negwɔn bedabeda mot arɔng wɛt, ba vo me e Yɛrusalɛm, ko ba nára me e vɔ BeRoma.

¹⁸BeRoma mo ba rangsal me neha detidetu, ko yɛn a di, vit a pyɛ de ma ra de ya wul ye reku. Yaga ano, yɛn a ye, yɛn ê hàla me na me kyè.

¹⁹Ko BeYuda ba kyɛ́ ɛn nà simo na be hàla me. Yaga ano, vit a pyɛ de ma tɔk ra, sɛ̌ ma ye, me simo na me jut há hom vey e nuyêl Da vwel BeRoma. Ko ma simo na me wɔ̀ tɛ̀ sekûn bemat hom wɛt.

²⁰A sé e pyɛ ma yane de ya tɛ̀, ma yila hin na me di in, na me ha a yin arɔng. Ba tɛ̀ me e ngyang, yaga me shara a bemat pyɛ de mwa BeYuda be sɛt yey na be ra yɛ.”

²¹Yɛn a yang ɛ, “Wot a ga sɛ̀ bebok-berang yi e Yudiya e ra hwo wɛt. Ko vit a hwak e ji begwa mot de ba ga tomo hɛ yi e hwomo na há hak e ra hwo, kɛ womo de a ga ha pyɛ cak vyes e ra hwo arɔng.

²²Ko wot a tɔk, e kahɛ kwɔn bemat ba sé ha há ves e ra gwong gwomo de hwà sé raa mo. Yaga ano, a sé naka na hwo ha a wot báre mō, yaga na wot a tɔk.”

²³Ano kwong, yɛn a yong ɛ̀ tuk de yɛn ê man na Bulus o. Tuk hane mo, BeYuda pyak ba wɔ́ e dem de Bulus a sé sangal ɛ̀ mo. Yimo gasi vɔk e nabwalak, Bulus a ha na yɛn e ra Segwɔm Dagwi, a misang a yɛn kayɛ pyɛ. A ra fwom na Badu Mose tanga bebok-basa ve bezarap Dagwi, na a dura a yɛn mɛ̀ pyɛ́ de bà jɛk e ra Yɛsu. A jāma na a tɛ̀ ɛn be sey tsak há wɔgɔ, pyɛ́ de a sé ha a yɛn ya sé tsak o.

²⁴Sede yɛn a wok há hane mo, behak e ji mɛn ba sey tsak o na há mɛ mo, ko behak ba sey hɛ wɛt.

²⁵Yɛn a tó cuna na bemɛn e ra há mo, ko yɛn a gas ɛn zang ba, e bama de Bulus a tānga ha a yɛn há hining hemo ngan: “Gabik Dagwi hà kana ha tsak o na bedabeda min jeng de hà ye yi e nû Yɛshaya, zarap Dagwi, wɔgɔ:

²⁶“ ‘Ci wɔ̀ ha na bemat vemo, na hwo yang ɛn: Yin ê sǎ e de wokos, ko yin ê tɔk há mo wɛt, yin ê sǎ e de bɛrɛng, ko yin ê di pyɛ cak wɛt.

²⁷Yaga neyey bemat vemo na ga tɛ́ ɛn kashalang, yɛn a bang betong mɛn, yɛn a to bang bayis mɛn. Ka a sé ano wɛt, ka yɛn a yâng bɛrɛng na bayis mɛn, yɛn a yâng wokos na betong mɛn, yɛn a yâng tɔk tsak o e ji neyey mɛn, ko yɛn a yâng doyo vɔk na Dagwi, womo de ê tɛ̀ ɛn tyang.’ ”

²⁸Ko Bulus a yɛnɛ na neha nemo: “Tɔk in ngan: Dagwi a ha hâ sêy neken bemat, ko a tomo hɛ vɔk na bemât yére dyuk. Ko e yɛn vɛ de yɛn ê wet betong na há hemo mo.” [

²⁹E bama de Bulus a ha ano, BeYuda ba kyè, ko yɛn a kyě tó cuna ding-ding na bemɛn.]

³⁰Bulus a sangal e lɔ mɛ de a tala byɛ̂ hɛ e Roma yaga neshey neba, ko a seres mwa bemat de ba wɔ̀ di ɛ na yey pyɛng.

³¹A shara a bemat rehâ Segwɔm Dagwi, a to basa a yɛn reha e ra Darwey Yɛsu Kristi. A ha na yey ting, ko vit a mwat de a dul ɛ.