Read berom Tomong Betom Yɛsu 5 Bible Online

Tomong Betom Yɛsu 5 - berom bible

Tomong Betom Yɛsu 5

¹Mwat hwak á sɛ̀ de bá tang ɛ, à Hananiyas; yɛ tanga hwā mɛ Safira ba row cap mɛn cak.

²A jut dyâm cap o, a gas yɛ̄, a tik cak yaga tó mɛ, ko a wɔ̀ nɔ̂ng betom Yɛsu bwang o. Hwā mɛ a tɔk pyɛ de rwas o a ra arɔng.

³Bitrus a rangal hɛ, a ye, “À Hananiyas, yaga sɛ́ de hwà simo a Shetan na a yel e yey mō arɛt? Yaga sɛ́ de hwà vɛ́ a Gabik Jɛrɛ bɔs, na hwo tɛt dyâm cap o yaga tó mo arɛt?

⁴Cap o yá kana sè myo gyam na hwo row yɛ wɛt arɛt? Ko e bama de hwà row yɛ arɔng, dyām o ya to sé myo wɛt arɛt? E sɛ́ de ya tɛ̀, hwà ra yerê pyɛ yemo arɛt? A sé e bemat de hwà ga vɛ́ a yɛn bɔs wɛt, ko a sé e Dagwi wɛ!”

⁵Jeng de Hananiyas a wok ano, a pere gaba e vwel, ko a ku. Kawɛ mwat de a wok pyɛ de ya té a wok bengyip sizɔng.

⁶Bewen behak ba vey, ba jut gworugu, ba hanas mɛ̀ revin mɛ, ko ba jut rɛ, ba wɔ̀ lɛrɛ.

⁷E bamâ jeng sede dyām tyat, hwā mɛ a vey, a yel e hwomo. Ko a tɔk pyɛ de ya ga kana té wɛt.

⁸Bitrus a rangal hɛ, a ye, “Hā a me, e dyām a yemo de yin a sɛ̀ e ra cap min o arɛt?” Hwā mo a ye, “Ey, a sé ano.”

⁹Ko Bitrus a yang ɛ, “Yaga sɛ́ de hwo tanga rwas mō yin a wuna nu na yin a mara Gabik Darwey arɛt? Di, bemat de ba ga yi e de lɛrɛ̂ rwas mō a vemo e rwi duk, ko yɛn ê to jut o arɔng na be wɔ̀ lɛrɛ!”

¹⁰E ji jeng, hwā mo a vɔ̌ gaba e cât bol Bitrus, ko a ku. Bewen o ba yel, ko yɛn a di a ga kana ku; yɛn a jut ɛ, ko ba wɔ̀ lɛrɛ e vwâ rwas mɛ.

¹¹Mwa bemât ekilisiya tanga mwa vemo de ba wok pyɛ́ de ya té ba wok bengyip sizɔng.

¹²Betom Yɛsu mo ba ragas pyɛ̂ bes pyak de ya tɛ̀ bemat ba langat hɛn sizɔng. Ko mwa bemat-raa ba dopse manas e Fwàm Sɔlɔmɔn.

¹³Vit a mwat hwak de a vɔk yey ting na a wuna hɛ na yɛn, mwa ano de bemat ba ha há rat e ra yɛn.

¹⁴Ko nepyak beras na beha de ba sey tsak o na Darwey na sǎ e de gwɛsɛ hɛn, ko yɛn a wuna hɛn na bemat-raa mo.

¹⁵Pyɛ̂ mwa de ya té ya tɛ̀ bemat be vɛ̀sɛ na bemât serɔ e nehyok, ko ba tɛ̀sɛ vɛ e ra gat na e ra beput. Yɛn a simo na gyeng rɔ̌ rezinâ Bitrus re gaba e ra behak e ji bemât serɔ mo e jeng de a sé kwey.

¹⁶Bemat pyak arɔng ba tula hɛn yi e bapomo de ba gwɔrɔ Yɛrusalɛm, yɛn a vɛ̀sɛ na bemat mɛn de ba ro ɛn tanga vemo de cēng ya tak a yɛn reyɔm, ko ba tɛ̀ mwa hɛn tyang.

¹⁷Darwey bepiris tanga besâ fwom mɛ mwa de ba sé BeSaduki yɛn a hwo wok repugû betom Yɛsu.

¹⁸Yaga ano, yɛn a vo ɛn, ko ba tɛ̀ ɛn e lɔ̂ ngyang.

¹⁹Ko nabwalak, tom-lagwi de Darwey a tomo wɔ e hwomo a wunta ri lɔ̂ ngyang o, ko a nusu na yɛn e jey. A yang ɛn,

²⁰“Kyè in, na yin a wɔ̀ tumal e nelalâ Gbɔng Duk Re Fongol, na yin a ha a bemât mwa rehâ neken de Yɛsu a vey na nɛ.”

²¹Betom o ba ra ano, ko jeng de gasi ha ye gbey, yɛn a yel e nelalâ Gbɔng Duk o, ko yɛn a hwo basa a bemat reha mo. Yɛ darwêy bepiris tanga besâ fwom mɛ yɛn a vey man, ko yɛn a yila bemakûk badu mwa, na yɛn a bin tula hɛn. E bama mo, yɛn a tomo na be wɔ̀ vey a yɛn na betom Yɛsu de yɛn á kana tɛ̀ ɛn e lɔ̂ ngyang o.

²²Ko jeng de bemat de ba tomo hɛn o ba wul lɔ̂ ngyang o, yɛn a sɛ̀ betom Yɛsu mo e ji mo wɛt. Yaga ano, yɛn a to ɛn, ko yɛn a ha a bemakûk badu, ba ye,

²³“Jeng de wot a pom e hwomo, wot a sɛ̀ lɔ̂ ngyang o e banga naka gyat, ko mwa bemât gyeng hɛ ba sé e tumal e ri lɔ mo. Ko jeng de wot a wunta ri mo, wot a sɛ̀ mwat hwak e ji mo wɛt!”

²⁴Jeng de yɛn a wok há hemo, a sé a gbɔng o wo bemât gyeng Gbɔng Duk Re Fongol na begbɔng bepiris kpɛɛ, ko yɛn a langat hɛn pyɛ de ya té.

²⁵E jeng o, mwat hwak a vey, ko a yang ɛn, “Di in! Bemat de yin a tɛ̀ e ngyang o a vane e nelalâ Gbɔng Duk o, yɛn a sé basa a bemat!”

²⁶Yɛ gbɔng o mo a pere jut bemat mɛ, yɛn a kyè wɔ e hwomo, ko yɛn a wɔ̀ vey na betom Yɛsu mo. Yɛn a jut ɛn na gap wɛt, yaga yɛn a tele hɛn kɛ gyeng bemat o bê tó ɛn na beta na be mɔbɔs hɛn.

²⁷Yɛn a vey na betom o, ko yɛn a tɛ̀ ɛn be tumal e nuyêl bemakûk badu. Yɛ darwêy bepiris a hwo yang ɛn,

²⁸“Wot a nɔng in nu gak, yin to basa a bemat e ji rezâ mwat wane mo wɛt. Ko di, yin a re nuyel na basa min, ko bemât mwa e Yɛrusalɛm ba ga wok hɛ. Yin e to ha wɔgɔ, a sé e wot vɛ de wot a tɛ̀ mwat o a ku!”

²⁹Bitrus na bwang betom o ba toyo a yɛn, ba ye, “A sé a wot gbing-gbing na wot a gyeng hâ Dagwi e ra hâ bemat!

³⁰Yin á kana kak Yɛsu e ra cɔ́gɔt, yin á mɔrɔ hɛ, ko Dagwi wo bedabeda mot á sene hɛ yi e reku.

³¹Dagwi a jut ɛ, a tɛ̀ ɛ a sangal e ra gwofwa negwɔm e vwɔ yege mɛ, yaga na a re negwɔm e ra bemat, na a to sey neken mɛn. A ra ano, yaga na BeIsrayɛl be bin doyo yi e banɛn mɛn, na be hàla a yɛn vɛ arɔng.

³²Wot a sé bemât nuha e ra pyɛ́ yemo, ko Gabik Jɛrɛ ha sé nɔng nuha arɔng. Gabik Jɛrɛ mo ha sé e nɔrɔ̂ Dagwi vɔk na bemat de be gyeng há mɛ.”

³³Jeng de bemakûk badu ba wok há hemo, yɛn a wok shom sizɔng, ko yɛn a simo be mɔbɔs betom o.

³⁴Ko gwining e ji mɛn de a sé WoFarisi, de ba tang ɛ, à Gamalyel, a sogo e tumal na a hanat. Yɛ a sé mwât basâ Badu, ko bemât mwa ba nɔng ɛ nerey tyɔng wɛt. A nɔng nu, be ka pat betom o e jey kejeng tyɔng.

³⁵Ko a yâng bemakûk badu mo, “À yin BeIsrayɛl, tē in naka na pyɛ de yin e simo yin a ra a bemat vemo.

³⁶Bàre hin na pyɛ de yá kana té e neshey tyɔng de na kwey. Mwat hwak de bá tang ɛ, à Teyudas á hwo tē, yɛ a sé gbɔng mwat. Bemat sede naga benaas (400) bá wuna bato mɛn na yɛ. Bemat behak bá mɔrɔ hɛ, ko vemo de bá raa hɛ mwa bá shara hɛn, ko yɛnɛ mɛn a hane.

³⁷E bama mɛn, mwat o hwak á nusu; bá tang ɛ, à Yuda wo Galili. Jeng yane yá sè jeng basâ nepyak bemat, ko á tɛ̀ bemat pyak be sogo nehywɛ. Yɛ arɔng, bá mɔrɔ hɛ, ko bemât mwa de bá raa hɛ bá shara hɛn arɔng.

³⁸Yaga ano, e ra betom Yɛsu vemo kene — ma sé ha a yin: Tík in bemat vemo yaang zɔng! Tík in hɛn na be kyè! Ka sede pyɛ de ya sé e neyey mɛn, yemo de yɛn a sé ra mo ya yi na barê mwasi zɔng, ko yê wey ɛ̀ arɔng.

³⁹Ko ka sede ya yi na Dagwi, yin ê kyɛm yin dul bemat vemo mo wɛt. Tē in naka! Yin sɛ̀ bato min e de râ yol na Dagwi wɛt!”

⁴⁰Bemakûk badu mo yɛn a simo há mɛ mo. Yɛn a to yila betom o vey e ji mo, ko ba tɛ̀ be dak ɛn na zining. Ko yɛn a nɔng ɛn nu, yɛn a to ha há e ji rezâ Yɛsu wɛt. Ko yɛn a hàla hɛn na be kyè.

⁴¹Sede betom o ba sé nusu yi e kwɔ̂n badu mo, yɛn a vɔk yey pyɛng, yaga yɛn a ga vey na yɛn a sɔ reyɔm yaga rezâ Yɛsu.

⁴²Kahɛ tuk yɛn a re nuyel e de basa e nelalâ Gbɔng Duk Re Fongol tanga e nelɔ bemat, ko yɛn a shara a bemat Yɛgɛt Yat wɔgɔ, Yɛsu a sé Mwat de Dagwi a kasa na a sey bemat.