Read berom Tomong Betom Yɛsu 6 Bible Online

Tomong Betom Yɛsu 6 - berom bible

Tomong Betom Yɛsu 6

¹E jeng cak, jeng de nepyak bemat-raà Yɛsu ná sè gwɛsɛ hɛn, BeYuda de ba ha relêm BeGirik yɛn a hwo tow nu na bwang BeYuda de ba ha relêm BeYuda zɔng. Vemo de ba ha relêm BeGirik ba vey na sekun wɔgɔ, bemat de be gas pyɛ́ kahɛ tuk yɛn a mâk nɔngɔ̂s bekuma mɛn pyɛ́ mo wɛt.

²Yaga ano, betom Yɛsu kuru na vɛ beba mo (12) ba yila mwa bemat-raa, yɛn a yang ɛn, “Ê sè naka wɛt na wot a tik sharâ rehâ Dagwi na wot a wet ot e ra gâs pyɛ̂ re zɔng.

³Ano kwong, à begwa, kasa hin bemat betaama yi e tē min, vemo de bemat be ha há rat e ra yɛn. Tik na yɛn a sè yerê bemat de Gabik Jɛrɛ ha vɔk reto e ra yɛn, na yɛn a vɔk netsitsɛng ding-ding arɔng. E yɛn vɛ de wot a rɔda gang fwom gwomo e vɔ mɛn.

⁴Ko wot, wot ê tɛ̀ nehywɛ mot e ra râ won, na wot a shara a bemat rehâ Dagwi arɔng.”

⁵Pyɛ de betom o ba ha ya pɛngɛ a bemat o mwa yey. Yaga ano, yɛn a kasa Istifanus, yɛ de a sey tsak o na Dagwi sana tô yey, ko Gabik Jɛrɛ ha vɔk reto e ra yɛ; yɛn a to kasa Filip, na Porokorus, na Nikanor, na Timon, na Parmenas, na Nikolas, mwât Antyokya de a hwo raa negwɔn BeYuda.

⁶Mwa bemat-raa mo yɛn a vey na bemat o na betom Yɛsu. Betom o ba ra won, ko ba tɛ̀sɛ vɔ mɛn e ra yɛn.

⁷Ba re nuyel na sharâ rehâ Dagwi, ko nepyak bemat-raa e Yɛrusalɛm na gwɛsɛ hɛn ding-ding. Pyak e ji bepiris ba sey tsak o na Yɛgɛt Yat e ra Yɛsu arɔng.

⁸E jeng yane mo, Dagwi a tɛ̀ nerat mɛ sizɔng e ra Istifanus, ko a nɔng ɛ gbɔng reto, na a ra mɛ̀ pyɛ̂ langat na pyɛ̂ bes ryey o, ko mwa bemat ba di pyɛ́ de a ra mo.

⁹Ko bemat behak ba hwo kyɛ́ ɛn Istifanus o. Yɛn a sé vê duk re fongol de ba tâng wɛ, à wo bemat de ba ga tɛ̀ ɛn washak. Bemat o ba yi e bapomô Kirene na Aleksandariya, tanga behak yi e bavwêl Kilikya na Asiya. Yɛn a hwo tó cuna na Istifanus.

¹⁰Ko Gabik Jɛrɛ ha nɔng ɛ netsitsɛng sizɔng. Yaga ano, jeng de a hanat, vit a hwak de a tɔk gang ɛ na cuna.

¹¹Ano kwong, bemat o ba wɔ̀ tɔgɔs bemat behak, yaga na be ye, yɛn a wok Istifanus jeng de a ha há ves e ra Mose tanga e ra Dagwi.

¹²Yi ano, yɛn a tɛ̀ nehywɛ bemat ne sogo, tanga ne bemakuk, na ne bemât basâ Badu. Yɛn a vo Istifanus, ko ba wɔ́ na yɛ e nuyêl bemakûk badu.

¹³Ano kwong, yɛn a vey na bemat behak na be nɔng nuha bɔs e ra yɛ. Bemât bɔs o ba ye, “Mwat womo e sang tik hâ há ves e ra Gbɔng Duk Re Fongol de wa sé jɛrɛ tanga e ra Badu Mose wɛt.

¹⁴Yaga wot a wok ɛ e jeng de a ye, yɛ Yɛsu wo Nazarɛt a rɔda gang duk womo, ko ê to sege negwɔn detidetu de Mose à kana masa a wot.”

¹⁵Mwa bemat de ba sé e kwɔ̂n badu mo, yɛn a shusha bayis mɛn gbir e ra Istifanus, ko yɛn a di, bwang bayis mɛ gwa nɛp sede bwang bayîs tom-lagwi.