Read berom Tomong Betom Yɛsu 7 Bible Online

Tomong Betom Yɛsu 7 - berom bible

Tomong Betom Yɛsu 7

¹Darwey bepiris a hwo rangâl Istifanus, a yang ɛ, “Pyɛ́ de ba sé tɛ̀sɛ sekun mō e ra yɛ̄ mo ya sé tsak o arɛt?”

²Istifanus a toyo a yɛ, a yang ɛ, “À begwa na beda, wet in betong na há hom! A raane, Dagwi wo gbɔng nerey à kana dura a dâ beda mot Abraham tó mɛ e sevwêl Mɛsɔpɔtamya gyam na a sogo na a wɔ̀ sangal e repomô Haran.

³Dagwi à yang ɛ, ‘Hàla yére mō tanga sevwel mō, na hwo kyè vɔk e sevwel de mê dura a hwo.’

⁴Ko Abraham à sogo, à hàla sevwêl Babilɔnya, à vey e Haran. À sangal e hwomo sɛ̌ jeng de da mɛ a ku. Ko Dagwi à tɛ̀ ɛ a to sogo, na a vey sangal e sevwel semo de yin a sé sangal ɛ̀ a remo.

⁵E jeng o, Dagwi à ka nɔng ɛ kekwɔn kehak e sevwel o na ke sè kemɛ ko tyɔng wɛt, ko à sira a yɛ, a rɔda ba nɔng ɛ sevwel o na se sè semɛ tanga sê yére mɛ. À sira ano, mwa ano de e jeng yane Abraham à vɔk hwey wɛt.

⁶Pyɛ ma yemo de Dagwi à yâng Abraham, ‘Yére mō ya rɔda sè bekɛnɛt e sevwel de sa sé semɛn wɛt. Yɛn a rɔda sè besam e kwɔn hane mo neshey naga benaas (400), ko bê tak a yɛn reyɔm.

⁷Ko me Dagwi ma rɔda tabak bemat de bê vɔk bemat hom sede besam. E bama mo, bemat hom o bê sogo na be hàla sevwel sane mo, na be vey re a me fongol e dem hemo.’

⁸Ano kwong, Dagwi à wuna hɛ na sira tanga Abraham. Pyɛ de ya dura wuna-na-sira mo, yɛ à wɔ́ e cwɛl. Ko Abraham à tɛ́ ɛ dâ Yishak, ko à wɔ́ a yɛ e cwɛl tuk hê rwit e bamâ tɔ́ mɛ. Ano arɔng, Yishak à wɔ́ a hwey mɛ Yakɔp e cwɛl, ko Yakɔp arɔng à ra ano na nèy mɛ kuru na nɛ neba, yɛn vɛ à begbɔng bedabeda mot.

⁹“Bedabeda mó bà ra repugu na gwa mɛn Yɔsɛf. Yɛn à jut ɛ, ko bà row ɛ na a sè sam e sevwêl Misra. Ko Dagwi à sè tanga yɛ,

¹⁰à sɛlɛ hɛ yi e reyɔm mɛ mwa, ko à nɔng ɛ netsitsɛng. Yaga ano, negwɔn mɛ na jam a Farawo, yɛ Gbɔng Gwɔ̀m Misra. Farawo mo à kasa Yɔsɛf na a sè gwɔmna e ra sevwêl Misra tanga e ra lɔ gwɔ̀m o mwa arɔng.

¹¹E bama mo, vyong vyes yà hwo e bavwêl Misra tanga Kanaan. Bemat bà di reyɔm sizɔng, ko beda mot o bà tɔk sɛ̀ pyɛ̂ re wɛt.

¹²Jeng de Yakɔp à wok, pyɛ́ ya sé e sevwêl Misra, à tomo nèy mɛ, yɛn bedabeda mot o, vɔk e hwomo e kwɛngɛl mɛn gwô susu mo.

¹³E jeng de yɛn à wɔ hê neba, Yɔsɛf à ha a begwa mɛ mwat de yɛ a sé. Ano kwong, Farawo à wok rehâ belɔ Yɔsɛf o.

¹⁴Ko Yɔsɛf à tomo a da mɛ Yakɔp, yɛ tanga belɔ mɛ mwa be vey e Misra. Nepyak bemat o nà sè kuru bataama na vɛ betungun (75).

¹⁵Ano kwong, Yakɔp à sogo vɔk e sevwêl Misra. Kwɔn a hane de yɛ tanga bwang bedabeda mot bà sangal ɛ̀ sɛ̌ jeng reku mɛn.

¹⁶Bà vɛ̀sɛ na bavin mɛn e repomô Shɛkɛm, ko bà lɛsɛ vɛ e sak de Abraham à kana sey na dyām yi na belɔ Hamor.

¹⁷“Sede jeng ya vey bagat de Dagwi ê ra pyɛ de à kana sira a Abraham e ra yɛ, nepyak bemat mot e Misra mo nà kana gwɛ̌ hɛn vit a yere mo.

¹⁸E bama mo, gbɔng gwɔ̀m hwak de à kana tɔk pyɛ cak e ra Yɔsɛf wɛt à hwo re negwɔm e sevwêl Misra.

¹⁹À kwɛlsɛng bemat mot, ko à pɛsɛl a yɛn kya, yaga à tɛ̀sɛ hɛn gbing-gbing be tikis nèy necereng mɛn e majey, yaga na ne kushu.

²⁰À sè e jeng o de bà tɔ Mose; yɛ à sè rwat, ko à jam a Dagwi. Bà bɛrɛng hɛ naka pɛl tat e lɔ da mɛ.

²¹Ko jeng de bà pat ɛ e majey, hwông Farawo à jut Mose mo, ko à ras ɛ sede hwey mɛ.

²²Bà basa a yɛ mwa yerê netsitsɛ̂ng bemât Misra, ko à tɛ́ ɛ mwat de à vɔk reto e begwông há mɛ na tomong mɛ.

²³“Jeng de Mose à sila neshey kuru banaas (40), à bare e yey mɛ, ê wɔ̀ di begwa mɛ BeIsrayɛl.

²⁴Sede à wul hwomo, à di WoMisra hwak de à sè teshe na WoIsrayɛl hwak naka wɛt. À wɔ̀ sɛlɛ WoIsrayɛl o, ko à mɔrɔ WoMisra mo na a tala hɛ pyɛ de a ra a mumwɛ mo.

²⁵Mose à bare, begwa mɛ BeIsrayɛl ba rɔda di, Dagwi a sé ra fwom na yɛ, na a vibis hɛn yi e sesam. Ko bemat o bà di ano wɛt.

²⁶Tuk o het, Mose à sɛ̀ BeIsrayɛl beba bà sè ra yol. À simo na a yong ɛn na bemɛn, ko à yang ɛn, ‘À besa, yin a sé begwa! Yaga sɛ́ de yin a sé tak a bemin ano arɛt?’

²⁷Ko mwat de à sè tak a mumwɛ mo à gang Mose e jey, à yang ɛ, ‘E wà a nɔng o negwɔm e ra wot na a to tɛ̀, hwo sè mwât shɔt e ra wot arɔng arɛt?

²⁸Hwó simo hwo mɔrɔ me, sede remo de hwá mɔrɔ WoMisra wane nayos arɛt?’

²⁹Jeng de Mose à wok ano, à tele vɔk e sevwêl Midyan, ko à sangal e hwomo. Hwā mɛ à tɔ a yɛ nèy neba bewen e Midyan o.

³⁰“E bamâ neshey kuru banaas, tom-lagwi à dura a Mose to mɛ e hey bagat na Raku Sinai. Tom o à sè e tê reburuk de kya hà lolo e ji rɛ.

³¹Jeng de à di ano, à langat hɛ pyɛ de à di mo. À kyè wɔ bagat na a gwɛ̌ di naka, ko à wok fwɔ̂ Darwey de gwà ye,

³²‘Me ma sé Dagwî bedabeda mō, Dagwî Abraham, na wo Yishak, na wo Yakɔp.’ Mose à vow na bengyip, ko à ka vɔk yey ting na a bɛrɛng kwɔn o wɛt.

³³Ko Darwey o à yang ɛ, ‘Pat bekpatak mō, yaga kwɔn de hwà sé tumal ɛ̀ ha sé jɛrɛ.

³⁴Ma ga di yerê reyɔm de bemat hom ba sé sɔ e sevwêl Misra, ko ma ga wok rus mɛn arɔng. Yaga ano, ma ga gyirik na me vey vibis hɛn. A remo vey na me tomo hwo vɔk e Misra mo.’

³⁵“E yɛ Mose gwining o de BeIsrayɛl bà kana kyɛ́ ɛn hɛ, ko yɛn à yang ɛ, ‘E wà de a nɔng o negwɔm e ra wot na a tɛ̀, hwo sè mwât shɔt e ra wot arɔng arɛt?’ A sé e yɛ wɛ de Dagwi à tomo na a re negwɔm e ra bemat mɛ, na a pat ɛn yi e hwomo arɔng. Ko Dagwi à ha a yɛ ano yi na tom-lagwi de à dura a Mose to mɛ e reburuk de kya hà lolo e ji rɛ.

³⁶Mose mo à pat BeIsrayɛl yi e sevwêl Misra. À ra pyɛ̂ langat na pyɛ̂ bes e sevwêl Misra mo tanga e Gbɔng Rep Swinang. Ko à re nuyel na ragas ano jeng de yɛn à sè kyě kyè e hey neshey kuru banaas.

³⁷E yɛ Mose mo de à yâng BeIsrayɛl, ‘Dagwi ê tomo na zarap mɛ sede me. Mwat wane mo ê sè yi e ji bemat min.’

³⁸A sé e yɛ mo de à sè na BeIsrayɛl e jeng de yɛn à tula hɛn e hey. À sè e hwomo na bedabeda mot tanga tom-lagwi de à ha a yɛ e ra Raku Sinai, ko à sey neha tsak neken yi na Dagwi na a nɔng ot nɛ.

³⁹“Ko bedabeda mot bà simo be gyeng há mɛ wɛt; yɛn à kyɛ́ ɛn hɛ, ko yɛn à simo na yɛn a to toyo vɔk e sevwêl Misra.

⁴⁰Yɛn à yâng Aharon, ‘Yong a wot pyɛ̂ sekwit cak de yê sè bedagwi mot de ba rɔda hwɔlɔ a wot gwong. E rà yɛ Mose, yɛ de á kana pat ot yi e Misra — wot a tɔk pyɛ de ya té na yɛ wɛt.’

⁴¹À sè e jeng a yane de yɛn à yong ci cak de yà sè sede hwêy mus. Yɛn à vɛ̀sɛ na nenɔrɔ̂ yas de be yɛt vɔk na Dagwi, na be nása a ci o. Ko yɛn à ra nzem na be nɔ̂ng pyɛ de yɛn à yong na vɔ mɛn nerey.

⁴²Yaga ano, Dagwi a doyo yi na yɛn, ko a tik ɛn na yɛn a re a netangacɛn e lagwi fongol. Pyɛ yemo ya té tyɛng na há de bà jɛk e bwok-basa bezarap Dagwi wɔgɔ, “ ‘À yin BeIsrayɛl! Jeng de yin à ros e hey neshey kuru banaas, yin à kana yɛt yas na yin a nása a me a?

⁴³Wey. À sè e kwɔ̂n sekwît dagwi min Molok tanga tangacɛ̂n Rɛfan, yɛ dagwi min arɔng, de yin à kana jut ɛn. Pyɛ́ mo yà sè cī de yin à yong, na yin a re a yɛ̄ fongol. Yaga ano, ma rɔda ro in vɔk e de sesam e nuyêl Babilɔn.’

⁴⁴“E jeng de bedabeda mot bà sè e ji hey, yɛn à vɔk buk de gwa dura, Dagwi a sé e hwomo. Yɛn à yong gwɛ e gwong de Dagwi à kana nɔ̂ng Mose nu na a ra, tyɛng na yerê gwomo de Mose mo à kana di.

⁴⁵E bamâ neshey nehak, bedabeda mot de yɛn à kana re nedanelɔ beda mɛn, yɛn arɔng yɛn à kana vɔk buk gwomo mo. Yɛn à jut gwɛ e jeng de yɛn à raa Yɔshuwa na be re sevwel semo na se sè semɛn. Dagwi à kana sè e nuyel mɛn, à ro mwa yére bemat de bà kana sè sangal e sevwel o. Buk o gwà nàra e ngamo pere vey e jeng de Davit à re negwɔm.

⁴⁶Negwɔn mɛ na jam a Dagwi, ko à rangal kɛ Dagwi ê simo a yɛ, na a sɛ̀ kwɔn de yɛ Dagwî Yakɔp o a rɔda sangal ɛ̀.

⁴⁷Ko à de sè e Sɔlɔmɔn de à de lɔk a yɛ lɔ mo.

⁴⁸“Ko di, Dagwi De A Dal Na Retô Mwa e sangsal e yerê nelɔ wɛt de bemat ba lɔk na vɔ, sede remo de à kana ye yi e nû zarap Dagwi wɔgɔ,

⁴⁹“ ‘Darwey a ye, lagwi wa sé gwofwa negwɔm hom, ko jey ya sé kwɔ̂n tik bol hom. E yerê hɛ̌ lɔ de yin ê lɔk a me arɛt? Kwɔn a hɛ̌ de mê pɔnglɔ ɛ̀ arɛt?

⁵⁰A sé e me wɛ de ma yong pyɛ́ yemo mwa na vɔ hom wɛt arɛt?’

⁵¹“À yin bemat de yin a sé gbàrak! Neyey min na sé sede neyey bemat de ba ga sey tsak o na Dagwi wɛt. Yin a tɛ́ in bekpey e ra pyɛ́ de Dagwi a sé ha. Yin a sé tyɛng na bedabeda min: Yin e dopse kyɛ́ in nà gyeng hâ Gabik Jɛrɛ!

⁵²Zarap Dagwi hwak a sɛ́ de beda min o bà tik nà tak a yɛ reyɔm arɛt? Yɛn à mɔbɔs bemat de Dagwi à kana tomo na be ha a bemat rehâ vêy womo de a sé rwat e bayîs Dagwi, ko yɛn à ha ano gyam na a vey. Ko a remo, e yin de yin a ga row ɛ, yin a ga mɔrɔ hɛ arɔng.

⁵³A sé e yin vɛ de Dagwi à kana nɔng in badu mɛ yi na betom-lagwi, ko yin a ga raa vɛ wɛt.”

⁵⁴Sede bemakûk badu ba wok pyɛ́ de Istifanus a ha, yɛn a tē puu na shom, ko yɛn a roros bekɛn vɔ mɛn.

⁵⁵Ko Istifanus de Gabik Jɛrɛ ha sɛ̀ reto e ra yɛ a bɛrɛng cik vɔk e lagwi, ko a di gbɔng nerât Dagwi, a to di Yɛsu e tumal e vwɔ yegê Dagwi o.

⁵⁶A ye, “Di in, me bɛrɛng lagwi pyot, ko me bɛrɛng Yɛ de a tɛ́ ɛ mwat a sé e tumal e vwɔ yegê Dagwi!”

⁵⁷Jeng de bemakûk badu mo ba wok ano, yɛn a bang betong mɛn na vɔ, yɛn a shusha gwolwɛlɛ, ko mwa hɛn yɛn a tele wɔ̀ gushung hɛn e ra yɛ.

⁵⁸Yɛn a hwɔlɔ hɛ, ba pat ɛ vɔk e bamâ repomo mo, ko ba hwo tó ɛ na beta. Bemât nuha mɛn o ba paa berugu mɛn, ko ba tik vɛ na wen hwak de ba tang ɛ, à Saulus.

⁵⁹Jeng de yɛn á sè tó ɛ na beta, Istifanus o a ra won, a ye, “À Darwey Yɛsu, sey neken hom!”

⁶⁰A gaba e ra bakwot mɛ, ko a gbɔ, a ye, “À Darwey, hwo tɛ̀ banɛn vemo e ra yɛn wɛt.” E bama de a ha ano, a vɔ a kyè.