Read berom Tomong Betom Yɛsu 8 Bible Online

Tomong Betom Yɛsu 8 - berom bible

Tomong Betom Yɛsu 8

¹Saulus a simo na mɔrɔ̂ Istifanus o. Tuk hane, ba hwo tak a bemât ekilisiya e Yɛrusalɛm gbɔng reyɔm, ko yɛn mwa yɛn a shara hɛn vɔk e nedem detidetu e yɛnɛ̂ bavwêl Yudiya na Samariya. E betom Yɛsu nju vɛ zɔng de ba tɛt ɛ̀ e hwomo.

²Bemat behak de ba raa Dagwi na yey mɛn mwa ba jut revîn Istifanus na be wɔ̀ lɛrɛ rɛ, ko yɛn a ra sesin sizɔng yaga yɛ.

³Ko Saulus a simo na a wey na ekilisiya mo. A kyě kyè e nelɔ, a hwɔlɔ bemat-raa, beras na beha, ko a tɛ̀ be tɛ̀sɛ hɛn e lɔ̂ ngyang.

⁴Bemat-raa de ba ga shara hɛn o yɛn a kyě kyè, ko ba ha a bemat rehâ Dagwi.

⁵Filip a kyè vɔk e repomo rehak rê Samariya, ko a shara rehâ Mwat de Dagwi a kasa na a sey bemat.

⁶Jeng de bagyɛng bemat o ba wok neha Filip, ko yɛn a to di pyɛ̂ bes de a ra, yɛn a tɛ̀ nehywɛ mɛn e de wokos pyɛ́ de a sé ha.

⁷Cēng ya nunus yi e ji bemat pyak, ko e jeng nunus o ya dak sekun na gap. Bemat pyak de ba vɔk serɔ̂ gbɛrɛk nedem tanga vemo de ba sé nà bol, ba tɛ̀ ɛn tyang.

⁸Yaga ano, bemât repomo mo ba vɔk yey pyɛng sizɔng.

⁹Mwat hwak de ba tang ɛ, à Simɔn a sé e hwomo e repomo mo, a ragas vyoshon vyes, ko bemât Samariya mwa ba langat hɛn hɛ tyɔng wɛt. A dak kaa wɔgɔ, yɛ a sé gbɔng mwat.

¹⁰Mwa bemât repomo mo, berey o mwa na besɛl o, ba tɛ̀ nehywɛ mɛn e ra yɛ, ko yɛn a ye, “Yɛ dagwi de be tang ɛ, à Gbɔng Reto a vêy gabik e ji mwat womo!”

¹¹Yɛn a tɛ̀ nehywɛ mɛn e ra yɛ, yaga a ga ros e de tɛ́sɛ hɛn na yɛn a langat hɛn yerê vyoshon mɛ mo.

¹²Ko jeng de yɛn a wok Yɛgɛt Yat de Filip a shara e ra jeng de Dagwi ê re negwɔm e ra bemat, tanga e ra retô rezâ Yɛsu Kristi, bemat o, mwa yɛn beras na beha, yɛn a sey tsak o na há mo, ko ba tɛ̀ a yɛn batisma.

¹³Yɛ Simɔn arɔng a tɛ́ ɛ mwat-raa, ko ba tɛ̀ a yɛ batisma. Ano kwong, a wuna tó mɛ gak na Filip. Á sè a yɛ pyɛ langat tyɔng wɛt jeng de á bɛrɛng pyɛ̂ bes na gbɔng tom reto de Filip o a ragas.

¹⁴Betom Yɛsu de bá sè e Yɛrusalɛm bá wok, bemât Samariya ba ga sey rehâ Dagwi. Yaga ano, yɛn á tomo Bitrus na Yohana vɔk na yɛn.

¹⁵Jeng de yɛn á wul e hwomo, yɛn á ra a Dagwi won, yaga na a bin nɔ̂ng bemat o Gabik Jɛrɛ.

¹⁶Yaga bá kana tɛ̀ a yɛn batisma e ji rezâ Darwey Yɛsu zɔng, ko Gabik Jɛrɛ há kana vey e ra hwak e ji mɛn e ngyen wɛt.

¹⁷Ano kwong, Bitrus na Yohana bá tɛ̀ vɔ mɛn e ra yɛn, ko Dagwi á nɔng ɛn Gabik Jɛrɛ.

¹⁸Simɔn a di, Dagwi a nɔ̂ng bemat-raa Gabik Jɛrɛ mɛ jeng de betom Yɛsu ba tɛ̀ vɔ mɛn e ra yɛn. Yaga ano, a jut dyām na a nɔ̂ng Bitrus na Yohana,

¹⁹ko a yang ɛn, “Nɔt me hin yerê reto remo mo arɔng, yaga na kawɛ mwat de mê tɛ̀ vɔ hom e ra yɛ a sɛ̀ Gabik Jɛrɛ arɔng.”

²⁰Ko Bitrus a yang ɛ, “A sé a hwo, hwô tɔk sɛ̀ nɔrɔ̂ Dagwi na dyām arɛt? Wéy in mwa na dyām mō mo!

²¹Vwɔ mō gwa sɛ́ e ji fwom gwomo ko tyɔng wɛt, yaga yey mō ya sé cik e nuyêl Dagwi wɛt.

²²Doyo yi e neves mō nemo! Rá won na Darwey, gyeng rɔ̌ ê hàla a hwo yaga báre yere hemo de hwà kana vɔk e yey mō.

²³Yaga ma di, yey mō ya sila na nekpashak, ko neves na vɔk reto e ra hwo mwa.”

²⁴Simɔn a yâng betom Yɛsu mo, “Gabɔk wɛt, rá in won na Darwey yaga me, yaga na ko hining e ji neha de yin a ha he kwon té na me.”

²⁵E bama de Bitrus na Yohana yɛn a ha a bemat pyɛ́ de yɛn a tɔk e ra Darwey Yɛsu, ko yɛn a shara a yɛn reha mɛ arɔng, yɛn a to ɛn wɔ e Yɛrusalɛm. E jeng de yɛn a sé to ɛn o, yɛn a shara Yɛgɛt Yat e nebapomô sevwêl Samariya pyak.

²⁶A vane ano, tom-lagwi wo Darwey a vey sɛ̀ Filip, a yang ɛ, “Sogo, kyè wɔ e rwa batin, sɛ̌ hwà wul gwong de gwa yi e Yɛrusalɛm vɔk e Gaza.” Gwong o gwa kwey e kwɔ̂n gbingiring.

²⁷Filip a sogo, a kyè. Jeng de a wul e hwomo, a sɛ̀ mwât Etiyopya hwak de ba ga tɛ̀ ɛ rɛmɛt. Á sè gbɔng mwat de kwɔ̂n tikîs pyɛ̂ nedanerey Kandake há sè e vwɔ mɛ. Yɛ Kandake mo á sè hwā de á sè gbɔng gwɔ̀m e sevwêl Etiyopya. Yɛ mwat o á kana wɔ́ e Yɛrusalɛm na a re a Dagwi fongol,

²⁸ko e jeng o á sè to ɛ wɛrɛ e sevwel mɛ, á sè sangal e kyɛkyɛ̂ bedwa mɛ, ko á sè basa bwok-basa de Yɛshaya, zarap Dagwi, à kana jɛk.

²⁹Gabik Dagwi ha yâng Filip, “Kyè vɔk na kyɛkyɛ̂ bedwa woro, na hwo kyè e hagât wɛ.”

³⁰Filip a tele wɔ̀ sɛ̀ kyɛkyɛ mo, ko a wok mwat o á sè basa bwok-basa Yɛshaya, zarap Dagwi. Yaga ano, a rangal hɛ, a yang ɛ, “Hwà tɔk pyɛ de hwó basa mo arɛt?”

³¹Mwat o a toyo a yɛ, a yang ɛ, “Mê tɔk e rɛ̌? Vit a mwat de ê misang a me cap-há mo!” Ko a yâng Filip, a vey tút e ra kyɛkyɛ mo, na a sangal ɛ̀ tanga yɛ.

³²Neha Dagwi de mwat o á sè basa à nemo ngan: “Yɛ á sè sede tyimit de be hwɔlɔ yɛ na be wɔ yɛrɛ, yɛ á to sè sede ketyimit de ke sǎ yuu jeng de be yɛt a kɛ setot, yɛ á wunta nu mɛ na a ha pyɛ cak wɛt.

³³Bemat bá byɛs ɛ, ko bá gas a yɛ badu e tē wɛt. Vit a mwat de ê tɔk ha há e ra yére mɛ, yaga ba ga jut neken mɛ yi e jey yemo.”

³⁴Gbɔng mwat o a rangâl Filip, a yang ɛ, “Ko sɛ̌, hemo ha dura sɛ́ arɛt? Zarap Dagwi o a sé ha e ra tó mɛ kɛ e ra mwat hwak arɛt?”

³⁵Ko Filip a hwo misang a yɛ, a susu na neha nane yi e Bwok-basa Dagwi, ko a ha a yɛ Yɛgɛt Yat e ra Yɛsu.

³⁶Sede yɛn a sé kyè e gwong, yɛn a pom e dem de nshi na sɛ́, ko gbɔng mwat o a yâng Filip, “Di, nshi a nemo. E sɛ́ de yê ro mɛ̀ na be tɛ̀ a me batisma arɛt?” [

³⁷Filip a yang ɛ, “Ka sede hwà sey tsak o na Yɛsu na yey mō mwa, vit a pyɛ de yê dul o.” Mwat o a toyo a yɛ, a yang ɛ, “Ma sey tsak o, Yɛsu Kristi a sé Hwey Dagwi.”]

³⁸A tɛ̀ be vo nerwěy bedwa mo. Ano, Filip mwa na gbɔng mwat o ba gyirik, ba wɔ̀ yel e ji nshi mo, ko Filip a tɛ̀ a yɛ batisma.

³⁹Sede yɛn a nusu yi e ji nshi mo, Gabik Darwey ha pere jut Filip yi e hwomo, ko gbɔng mwat o a to di ɛ wɛt. Yɛ a hwo re nuyel na kwɛngɛl mɛ na yey pyɛng.

⁴⁰Ko ba sɛ̀ Filip o e repomô Azotus. A re nuyel na kwɛngɛl mɛ, a kyě shara a bemat Yɛgɛt Yat e mwa bapomo, sɛ̌ a wɔ̀ wul gbɔng repomô Kaisariya.