Read berom Roma 1 Bible Online

Roma 1 - berom bible

Roma 1

¹Bwok-rwang gwomo yi e vwɔ hom Bulus, sam Kristi Yɛsu. Dagwi a yila me na me sè tom Yɛsu, ko a to tik me jaram, yaga na me shara Yɛgɛt Yat mɛ.

²A sé e Yɛgɛt Yat o de Dagwi à kana sira e ra yɛ̄ yi na bezarap mɛ, sede remo de bà jɛk e Bwok-basa mɛ.

³Yɛgɛt Yat o ya sé e ra Hwey mɛ, Darwey mot Yɛsu Kristi: E rà rehâ sángâl hɛ e ji rebek — há sè yi e yére Davit.

⁴Ko e rà rehâ gabîk hɛ de ha sé jɛrɛ — ha sé Hwey Dagwi. Dagwi a dura ano na gbɔng reto yi na sene hɛ yi e reku.

⁵Ko a sé yi na Kristi de Dagwi, yi na nerat mɛ, a nɔng me nɔrɔ hemo, ma sé tom Yɛsu, na me nɔ̂ng reza mɛ nerey. A ra ano, yaga na me bin tɛ̀ bemat yi e mwa yére bemât jey yɛn a sey tsak o, na yɛn a to gyeng hâ Dagwi arɔng.

⁶Ko yin arɔng yin a sé e ji vane de Dagwi a yila hɛn na yɛn a sè vê Yɛsu Kristi.

⁷Bwok-rwang o gwa sé vey na yin mwa e Roma, yin de Dagwi a tɛ̀ yey mɛ na yin, ko a to yila hin na yin a sè bemat mɛ: Tik na Dagwi Da mot tanga Darwey Yɛsu Kristi be dura a yin nerat mɛn, na be tɛ̀ yey min ye dyɛng.

⁸E mɛsɛng o, ma feng a Dagwi hom yi na Yɛsu Kristi yaga yin mwa. Ma feng, yaga ba sé kyě ha rehâ sêy tsak o min e jêy mwa.

⁹Dagwi a sé mwât nuha hom. Yɛ womo de me ra a yɛ fwôm sharâ Yɛgɛt Yat e ra Hwey mɛ na yey hom mwa, yɛ a tɔk, me bare na yin

¹⁰kayɛ jeng de me ra won. Me lolo, yaga na Dagwi a simo na gwong gwo wunta hɛ, yaga na, e yɛnɛ mo, me kyɛm me vey na yin e jeng yemo.

¹¹Me wok cwey di in, yaga na me nɔt in nerat nehak de Gabik Dagwi he nɔngɔs, yaga na neyey min ne tɛ́ ɛn gak.

¹²Me simo me di in, yaga na me tanga yin wot a rɔda gwɛ̌ a bemot gap: Yin, yaga yin a tɔk gwong de ma sey tsak o na Kristi, ko me, yaga ma tɔk gwong de yin a sey tsak o na yɛ arɔng.

¹³À begwa, me simo na yin a tɔk, zang pyak ma ga yong ɛ̀ na me vey na yin, ko pere vey e jeng yemo, ba ga dul me nà vey o. Me simo na me tɛ̀ behak e hane na yin be raa Kristi, sede remo de ma ga ra e ji bemât yére dyuk cak arɔng.

¹⁴Ba tɛ̀ me na me ra fwom e ji bemat de be jut bato mɛn yɛn a sé berey o tanga vemo de yɛn e jut ɛn ba sé berey o wɛt, e ji vemo de ba vɔk tɔ́k tanga vemo de ba vɔk tɔ́k wɛt.

¹⁵Pyɛ ma yane de ya tɛ̀, ma vɔk cwey sharâ Yɛgɛt Yat vey na yin de yin a sé e gbɔng repomô Roma arɔng.

¹⁶Ma vɔk rekyên Yɛgɛt Yat wɛt, yaga retô Dagwi ra sé ra fwom yi na yɛ̄, na a sey nekên kawɛ mwat de a sey tsak o na yɛ̀. A tānga sey nekên BeYuda e ngyen, ko e bama mo nè vemo de ba sé BeYuda wɛt.

¹⁷Yɛgɛt Yat o ye dura wɛshɛrɛk gwong de Dagwi e tɛ̀sɛ bemat be sè cik e bayis mɛ. Gwong o, yi e susu mo vɔk e yɛnɛ mo, gwa sé ngan: Bemat bē sey tsak o na Dagwi. A sé sede remo de bà jɛk e Bwok-basa Dagwi wɔgɔ, “Mwat de Dagwi a tɛ̀ a sè cik e bayis mɛ, yaga a sey tsak o na yɛ, a rɔda vɔk neken.”

¹⁸Dagwi a sé dura shom mɛ wɛshɛrɛk yi e lagwi. Shom mɛ mo ye hwo e ra mwa vemo de be kyɛ́ ɛn Dagwi tanga e ra vemo de be ragas neves detidetu. Yi na negwɔn neves mɛn o yɛn e dulus bemat yi e tɔ̂k tsak o.

¹⁹Yɛ a sé dura shom mɛ, yaga kayɛ pyɛ de bemat be kyɛm be tɔk yɛ e ra Dagwi ya sé a yɛn tɛɛrɛ. Dagwi pyɛ mɛ a ga tɛ̀ pyɛ́ mo tɛɛrɛ e bayis mɛn.

²⁰Yimo yi e jeng de Dagwi à yong jey, pyɛ́ de à yong ye dura a wot wɛshɛrɛk yerê mwat de Dagwi a sé, mwa ano de wot a tɔk di ɛ na bayis mot wɛt. Ye dura, reto mɛ ra vɔk yɛnɛ wɛt, ko yɛ a sé Dagwi mwin. Yaga ano, bemat o ba tɔk ra cuna e ra pyɛ cak wɛt.

²¹Mwa ano de yɛn a tɔk Dagwi, ko yɛn a nɔng ɛ nerey sede Dagwi wɛt, yɛn a to feng a yɛ arɔng wɛt. Ko báre mɛn ha tɛ́ ɛ yapyi zɔng, ko neyey mɛn de na tɔk bare pyɛ cak wɛt na tɛ́ ɛn mwangalang.

²²Mwa ano de yɛn a tē, yɛn a vɔk netsitsɛng, ko yɛn a tɛ́ ɛn betɔn.

²³Yɛn a kyɛ́ ɛn nà ré a Dagwi de e ku wɛt fongol, ko yɛn a re a cī fongol e negya, yēmo de ba yong sede bemat de be kushu, kɛ sede benon, kɛ ngyāma, kɛ pyɛ̂ gabaga.

²⁴Yaga ano, Dagwi a tik ɛn e de ragâs cwey pyɛ́ vyes de ye tɛ̀ ɛn ligis, yēmo de neyey mɛn ne simo. Ko yɛn a ragas pyɛ̂ rekyen na bemɛn.

²⁵Yɛn a sege tsak o e ra Dagwi na bɔs. Yɛn a re a pyɛ́ de ba yong fongol, na be to ra a yɛ̄ fwom, ko ba tik nà re a mwat de a yong yɛ̄ fongol. E yɛ̀ de a vey na be somo hɛ gbak-gbak! Ano.

²⁶Yaga pyɛ́ de yɛn a ra mo, Dagwi a tik ɛn e de vɔkɔs cwey pyɛ́ vyes de ya tɛ̀ ɛn na yɛn a ragas pyɛ̂ rekyen. Beha arɔng ba ga vɔ be kyɛ́ ɛn nà dyɛngɛs na beras e gwong de gwa sé tyɛng, ko ba dal na simo be dyɛngɛs na bemɛn.

²⁷Ano arɔng, beras ba kyɛ́ ɛn nà dyɛngɛs na beha e gwong de gwa sé tyɛng, ko ba vɔk gbɔng cwey dyɛngɛs na bemɛn. Beras ba ragas pyɛ́ de ya sé byɛm-byɛm na bemɛn. Yi ano, ba hwɔtɔ a bato mɛn tabak de ha jam yaga buru mɛn.

²⁸Sede remo de yɛn a kyɛ́ ɛn nà vɔk tɔ̂k Dagwi e neyey mɛn, ko Dagwi a tik ɛn na yɛn a bare yapyi zɔng, yaga na yɛn a ra pyɛ́ de ya sé naka be ra yɛ̄ wɛt.

²⁹Neyey mɛn na sila na kayɛ pyɛ de ya sé cik wɛt, na neves, na gananâng pyɛ́, tanga nengyas. Yɛn e kyɛ́ ɛn nà simo mwat hwak a sɛ̀ pyɛ cak, ko be mɔbɔs bemat; be ragas yol, be kwɛlsɛng bemat, ko be ragas netsitsɛng neves arɔng. Yɛn e ryɔgɔt bemat,

³⁰ko be to ha há ves e ra bemat. Be bɛrɛng Dagwi fus, ko be byɛs bemat; be toros bato mɛn, ko be dak ragey arɔng. Yɛn e vey na begwong bepas na be ra neves, ko yɛn e gyeng hâ beda na beneng mɛn wɛt.

³¹Yɛn e tɔk bare pyɛ cak wɛt, ko yɛn e gyeng há de yɛn a ga kana ha wɛt. Yɛn e dura tɛ̂ yey wɛt, ko yɛn e wok nemwishish mwat hwak arɔng wɛt.

³²Bemat o yɛn a tɔk redu Dagwi wɔgɔ, mwa bemat de be ra pyɛ́ yemo ba sé jāma a bato mɛn reku. Ko mwa ano, yɛn e re nuyel na ragâs yɛ̄, yɛn e to ra pyɛ de ya dal negwɔn nane mo na neves wɔgɔ, yɛn e simo a behak be ragas yɛ̄ arɔng.