Read berom Roma 11 Bible Online

Roma 11 - berom bible

Roma 11

¹Ma sé rangal ngan: Dagwi a kyɛ́ ɛ bemat mɛ arɛt? Kée wey! Me pyɛ hom ma sé WoIsrayɛl. Ma sé yerê Abraham yi e yerê Bɛnyamin.

²Dagwi a kyɛ́ ɛ bemat mɛ wɛt, vemo de à kana tɔk ɛn yimo gyam wɔgɔ, ba sé bemɛ. Yin a tɔk pyɛ de bà jɛk e Bwok-basa Dagwi e ra Eliya wɛt arɛt? Jeng de à tɛ̀ sekûn BeIsrayɛl na Dagwi,

³à ye, “À Darwey, ba ga mɔbɔs bezarap mo, ko ba ga to gangas nekwɔn rangâs pyɛ́ vɔk na hwo arɔng. E me nju hom zɔng de ma pɔl, ko yɛn a sé jāma na be wey na me arɔng.”

⁴Ko Dagwi à toyo a yɛ, à ye ala arɛt? À yang ɛ, “Ma ga tik a tó hom bemat gu bataama (7,000) jaram vemo de ba ga ye guduruk na be re a Baal de a sé dagwî bɔs fongol wɛt.”

⁵A sé ano arɔng e jeng yemo: Bwang bemat ba sɛ́ de Dagwi a kasa hɛn, yaga e dura a bemat nerat mɛ ding-ding.

⁶A sé yaga e dura a bemat nerat mɛ sizɔng de e kasa bemat e gwong de e ra, ko a to sé yaga tomong mɛn wɛt. Ka a sé ano wɛt, ka nerat mɛ mo na yâng sé nerat ne mwin wɛt.

⁷Wot ê to ye ala arɛt? Pyɛ de BeIsrayɛl ba jāma, yɛn a sɛ̀ yɛ wɛt. Ko vemo de Dagwi a ga kana kasa hɛn, e yɛn de ba sɛ̀. Bwang o bá sè gbàrak e ra yíla Dagwi.

⁸Sede remo de bà jɛk e Bwok-basa Dagwi wɔgɔ, “Dagwi a bang tɔ́k mɛn; a tɛ̀ ɛn be bɛrɛng pyɛ́ na bayis mɛn wɛt, na be to wok pyɛ́ na betong mɛn arɔng wɛt. Pyɛ́ mo ya sé ano pere vey e remo.”

⁹Ko Davit à ye, “Tik na nzem mɛn ne sè a yɛn sede segun de sa rɔda vos ɛn, na ne tɛ̀ ɛn be gaba, na be tabak hɛn mɛ̀ arɔng.

¹⁰Tik na bayis mɛn be sè mwangalang, na yɛn a tɔk bɛrɛng jey wɛt; tik na nèma mɛn ne ye gup nesheneshey.”

¹¹Ma sé to rangal ngan: Jeng de BeYuda mo ba tiri bwol, ba gaba na be pere wey ɛ̀ arɛt? Tyɔng tyɔng wɛt! Ko a sé yi na buru mɛn o de ba wunta gwong, yaga na Dagwi a sey nekên bemât yére dyuk. Pyɛ yemo ya tɛ̀, BeYuda be bɛrɛng bemât yére dyuk o ves.

¹²Burû BeYuda ha vey a jêy mwa na nerat sizɔng, ko pyɛ de yɛn a bidɛ ya vey a bemât yére dyuk na nerat sizɔng. Ko ka sede a sé ano, jeng de mwa nepyak BeYuda na rɔda wuna hɛn tanga vemo de Dagwi a ga sey neken mɛn, nerat o na rɔda dal na nerey sizɔng!

¹³Ma sé ha na yin, à yin bemât yére dyuk: Sede remo de ma sé tom Yɛsu vɔk na bemât yére dyuk, ko me ra kaa e de râ fwom de Dagwi a nɔng me.

¹⁴Kɛ gyeng mê tɛ̀ bemat hom be bɛrɛng bemat de me ra fwom na yɛn ves, yaga na Dagwi a sey behak e ji mɛn yi na fwom hom.

¹⁵Yaga jeng de Dagwi a kyɛ́ ɛ hɛn, ko kyɛ́ ɛ mo ha wunta gwong na Dagwi a gang-nshi na bwang bemât jey. Ko jeng de ê to sey ɛn, pyɛ mo ya rɔda sè ryat e rɛ̌ arɛt? Ya rɔda sè sede ba to sene bemat yi e reku!

¹⁶Ka sede ba nára a Dagwi cɛk kpam-tuk ye mɛsɛng o, ko mwa regat kpam-tuk o ra rɔda sè remɛ́ arɔng. Ka sede berinîs cɔgɔt ba sé ve Dagwi, ko nelang o na rɔda sè nemɛ arɔng.

¹⁷BeYuda ba sé sede tîn pwât lɔ de ba ga kwɔrɔs nelang o nehak yi e hɛ. Ko, à yin bemât yére dyuk, yin a sé sede lâng pwât hey de ba zep e kwɔn mɛn o. A remo, yin e sɛ̀ nerat yi e berinis de be nɔngɔ̂s cɔgɔt o nemenêng vwel.

¹⁸Yaga ano, yin dak a nelang nane mo kaa wɛt. Ka sede yin e ra ano, ko tik na yin a bare, a sé e yin de yin e vɔk berinîs cɔgɔt o wɛt, ko a sé e berinis o de be vɔk in.

¹⁹Gyeng rɔ̌ yin ê ye, “Ba kwɔrɔs nelang o, yaga na be zep ot ɛ̀ e to mó.”

²⁰A sé ano. Ko ba kwɔrɔs nelang nane mo, yaga nà sey tsak o wɛt, ko yin a nàra e cɔgɔt o, yaga yin a sey tsak o. Yin tós bato min wɛt, ko vɔk in bengyip e negya.

²¹Yaga, ka sede Dagwi a tik BeYuda wɛt, vemo de ba sé sede nelang cɔgɔt o ne mwin, ko a rɔda tik in arɔng wɛt, yin vemo de ba zep in ɛ̀.

²²Yaga ano, di in gwong de Dagwi e dura a mwat nerat, ko di in gwong de e ra jɔgɔ na mwat o arɔng wɛt. Yɛ e ra jɔgɔ na vemo de ba gaba e gwong mɛ wɛt. Ko e dura a yin nerat mɛ, ka sede yin e re nuyel na wokos nerat mɛ mo. Ka ano wɛt, ko ba rɔda tow in arɔng.

²³Ka sede BeYuda ba hàla nevît sêy tsak o mɛn o, ko ba rɔda to zep ɛn e kwɔn mɛn. Yaga Dagwi a vɔk reto na a ra ano.

²⁴Ko di, à yin bemât yére dyuk, yin a sé sede lâng pwât hey de ba tow hɛ, ko ba to zep hɛ e ra tîn pwât lɔ, mwa ano de ba ga tɔ́k ɛn na ra ano wɛt. BeYuda ba sé sede nelang pwât lɔ gwane mo. Ko a rɔda dal na sé kpɛgɛrɛk na be to zep nelang nane mo e tîn pwat de bá kana tow ɛ̀ nɛ.

²⁵À begwa, me simo na yin a tɔk pyɛ de ya sé mwin yemo de yà kana sè e lɛrɛ. Ka sede yin a tɔk yɛ, ko ya rɔda dul in nà tâng bato min, yin a vɔk tɔ́k. Pyɛ mo ya sé ngan: BeIsrayɛl ba sé gbàrak yaga jeng zɔng sɛ̌ mwa nepyak bemât yére dyuk na vey na Dagwi e ngyen.

²⁶Ko e gwong a gwomo de ba rɔda sey nekên BeIsrayɛl mwa, sede remo de bà jɛk wɔgɔ, “Mwât Sêy bemat a rɔda yi e Siyɔn; ê doyo yére Yakɔp yi e kyɛ́ ɛ ràa Dagwi.

²⁷Ko ma rɔda wuna me na sira hemo tanga yɛn e jeng de ma rɔda hashe banɛn mɛn.”

²⁸Ko e rà rehâ Yɛgɛt Yat — BeYuda ba kyɛ́ ɛn yɛ̄, ko ba tɛ́ ɛn vê repugû Dagwi. Ko yi na kyɛ́ ɛ mɛn o, yin bemât yére dyuk yin a sɛ̀ nerat. Ko e rà rehâ bemat de Dagwi a kasa hɛn — Dagwi a tɛ̀ yey mɛ na yɛn, yaga à kana sira a bedabeda mɛn ano yimo gyam.

²⁹Yaga Dagwi a rɔda to sey ɛ̀ nɔrɔ mɛ kɛ yíla mɛ yi na bemat wɛt.

³⁰A raane, yin a kyɛ́ in nà gyeng hâ Dagwi. Ko a remo, Dagwi a ga tosho reyɔm min, yaga BeYuda ba kyɛ́ ɛn nà gyeng há mɛ.

³¹Ano arɔng, yaga Dagwi a tosho reyɔm min, BeYuda be kyɛ́ ɛn nà gyeng hâ Dagwi a remo, yaga na Dagwi a bin tosho reyɔm mɛn a remo arɔng.

³²Yaga Dagwi a tɛ̀ bemât mwa be tɛ̀ ɛn sede bemât ngyang, yaga yɛn a gyeng há mɛn wɛt. A ra ano, yaga na a bin tosho reyɔm mɛn mwa hɛn.

³³Di in, nedanerêy Dagwi na vɔk yɛnɛ wɛt, netsitsɛng mɛ na sé pyak, ko tɔ́k mɛ ha sé ciwil sizɔng! Vit a mwat de ê tɔk begwông yɛ̂t shɔt mɛ, ko vit a mwat de ê tɔk raa begwong mɛ arɔng. Sede remo de bà jɛk,

³⁴“E wà de a ga tɔk bárê Dagwi arɛt? E wà de a ga sè mwât vo a yɛ redu arɛt?

³⁵E wà de a ga nɔ̂ng Dagwi pyɛ cak, yaga na Dagwi a bin to tala hɛ arɛt?”

³⁶Yaga pyɛ̂ mwa ya yi na yɛ, yɛ̀ e to gyeng yɛ̄, ko ya to sé yaga yɛ arɔng. Tik na gbɔng nerey ne sè nemɛ gbak-gbak! Ano.