Read berom Roma 12 Bible Online

Roma 12 - berom bible

Roma 12

¹Ano kwong, à begwa, yaga Dagwi a ga tosho reyɔm mot sizɔng, ma sé shonong e ra yin wɔgɔ, yin a nára bato min sede nɔrɔ̂ yas de be yɛt vɔk na Dagwi jeng de yin a rɔngɔl beken. Nára hin bato min, na yin a ra a yɛ fwom, na yin a pɛngɛ a yɛ yey. Gwong a gwomo de gwa sé tyɛng na yin a re a Dagwi fongol e ji gwɛ.

²Yin to re nuyel na tɛ́sɛ bato min e de raà negwɔn jey yemo wɛt. Ko tik na Dagwi a sege neyey min yi na sege báre min, na he tɛ́ ɛ pas. Yi ano, yin a rɔda tɔk pyɛ de Dagwi e simo. Pyɛ mo ya sé ryat, ye pɛngɛ a yɛ yey, ko ya to sé gyat arɔng.

³Yaga nɔrɔ de Dagwi a ga nɔng me yi na nerat mɛ, ma sé ha a kawɛ e ji min há hemo ngan: Yin pyɛ min yin bare wɛt wɔgɔ, yin a sé berey yin a dal pyɛ de yin a sé. Ko gyéng in bato min, na yin a mara bato min tyɛng na nepyak sêy tsak o de Dagwi a nɔng in.

⁴Kawɛ mwat a vɔk rebek rining de ra vɔk nedem pyak, ko nedem o na vɔk tom mɛn detidetu.

⁵A sé tyɛng ano arɔng na wot. Mwa ano de wot a sé pyak, ko wot a wuna hot na wot a tɛ́ ot rebek rining, yaga wot a sé sangal e ji nesa na Kristi. Ko kawɛ e ji mot a sé dem hê mwa bwang vane de ba ga wuna hɛn ano.

⁶Wot a vɔk nenɔrɔ detidetu tyɛng na nerat de Dagwi a dura a wot. Ka sede ba nɔ̂ng mwat hwak nɔrɔ̂ zarap, ko tik na a ra fwom na hɛ tyɛng na pyɛ́ de wot a sey tsak o na yɛ̄.

⁷Ka sede ba nɔng ɛ nɔrɔ̂ râ fwôm sɛlɛ̂ bemat-raa, ko tik na a ra fwom o. Ka sede ha sé hê bása, ko tik na a basa.

⁸Ka sede ha sé na a gwɛsɛ a bemat gap, ko tik na a gwɛsɛ a yɛn gap. Mwat de a vɔk pyɛ́ na a sɛlɛ mɛ̀ vemo de ba bidɛ, tik na a nɔng yɛ̄ gǎn. Mwat de a sé mwât nuyel, tik na a ye ngyɛ́k e de râ fwom o. Ko mwat de e sɛlɛ vê reyɔm, tik na a sɛlɛ hɛn na yey pyɛng.

⁹Tik na yin a tɛ̀ yey na bemat e gwong de gwa sé mwin. Bɛrɛng hin pyɛ́ de ya sé vyes fus. Ko wuna hin gak na pyɛ́ de ya sé ryat.

¹⁰Tɛ̀ in yey na bemín sede begwa. Nɔng în bemín nerey de na dal nemo de yin e simo pyɛ min.

¹¹Yē in ngyɛ́k e ji fwom min, ko yin sè beriri wɛt. Rá in a Darwey fwom na yey rining yi na Gabik Dagwi.

¹²Vɔk in yey pyɛng, yaga yin a sɛt yey min e ra Dagwi. Niri hin jeng de yin e sɔ reyɔm. Rá in won kayɛ jeng.

¹³Gás in pyɛ́ de yin a vɔk na bemât Dagwi de ba bidɛ. Tɔ́k in e de bɛrɛng bemat naka e nelɔ min.

¹⁴Rá in won na Dagwi, na a tɛ̀ nerat e ra vemo de be tak a yin reyɔm. Ey, rá in won na a tɛ̀ nerat e ra yɛn, ko yin dùsa hɛn wɛt.

¹⁵Vɔk in yey pyɛng tanga vemo de ba vɔk yey pyɛng; tosho hin tanga vemo de be tosho.

¹⁶Sangal hin tyang na bemín. Yin dak kaa wɛt, ko yin simo na yin a wuna bato min na vemo de ba sé pyɛ cak wɛt. Yin tɛ̀ bato min wɛt wɔgɔ, yin a vɔk tɔ́k.

¹⁷Ka sede mwat hwak a ra a yin pyɛ vyes, yin to tala hɛ na neves wɛt. Yē in ngyɛ́k, na yin a ra pyɛ de ya sé ryat e bayîs kawɛ mwat.

¹⁸Rá in kayɛ pyɛ de yin ê tɔk ra e bak o mwin, na yin a bin sangal tyang na bemât mwa.

¹⁹À besâ yey hom, yin toyo a bemat na neves de yɛn a ra a yin wɛt. Ko tík in pyɛ yane na Dagwi, na yɛ a bin dura shom mɛ e ra yɛn. Yaga Dagwi à ye e Bwok-basa mɛ wɔgɔ, “E me de mê toyo a bemat na neves mɛn, ko ma rɔda ra ano mwin.”

²⁰Ko di, rá in pyɛ de bà jɛk wɔgɔ, “Ka sede mwât repugu mō a vɔk vyong, ko nɔng ɛ pyɛ̂ re. Ka sede a wok yêy hwɔshɔ, ko nɔng ɛ pyɛ cak na a sɔ. Yaga, ka sede hwà rá ano, ko hwà rɔda tɛ̀ ɛ a vo rekyen.”

²¹Hwo tik pyɛ́ vyes ye di wɛng e ra hwo wɛt, ko di wɛng e ra pyɛ́ vyes yi na râ pyɛ́ ryat.