Read berom Roma 14 Bible Online

Roma 14 - berom bible

Roma 14

¹Séy in mwat de a rɔngɔl gbɛrɛk e ra rehâ pyɛ̂ Dagwi. Yin kwon ra cuna na yɛ e rà pyɛ de a rɔda ra kɛ a rɔda ra wɛt.

²Mwat hwak e di, yɛ̀ e tɔk re kayɛ pyɛ. Ko mwat hwak de a rɔngɔl gbɛrɛk e ra rehâ pyɛ̂ Dagwi, e re sehwonong zɔng.

³Mwat de e re kayɛ pyɛ, a kwon byɛs womo de e tɔk re kayɛ pyɛ wɛt. Ko womo de e re sehwonong zɔng, a ra a womo de e re kayɛ pyɛ shɔt wɛt, yaga Dagwi a ga sey ɛ arɔng.

⁴Hwà sé wà na hwo ra a mwât fwôm mwat hwak shɔt arɛt? A sé e dalɔ mɛ zɔng de e tɔk ye, mwat mɛ mo a sé tumal gak e de râ pyɛ de ya sé ryat, kɛ e gaba e pyɛ de e ra. Ko a rɔda tumal gak, yaga Darwey a vɔk reto na a tɛ̀ ɛ a tumal gak o.

⁵Mwat hwak e jut tuhak he dal bwang negasi na nerat; ko mwat hwak e jut negasi mo mwa na sé tyɛng. Tik na kawɛ mwat a tɔk tsɛng-tsɛng, pyɛ de e bare ya sé tyɛng.

⁶Yɛ womo de e gyeng tuhak wɔgɔ, ha dal bwang o e rá ano na a nɔ̂ng Dagwi nerey. Yɛ womo de e re pyɛ́ cak e rá ano na a nɔ̂ng Dagwi nerey, yaga e feng a yɛ̀ yaga yɛ̄. Ko womo de e kyɛ́ ɛ nà re yerê pyɛ́ mo cak e rá ano na a nɔ̂ng Dagwi nerey, ko e to feng a yɛ arɔng.

⁷Vit a hwak e ji mot de a sé sangal na neken yaga tó mɛ pyɛ mɛ zɔng, ko vit a hwak e ji mot de ê ku yaga tó mɛ pyɛ mɛ zɔng.

⁸Ka sede wot a sé beken, ko wot a sé sangal yaga Darwey; ko ka sede wot ê ku, wot ê ku yaga Darwey arɔng. Yaga ano, ka wot a sé beken kɛ wot a ku ayi, ko wot a sé vê Darwey.

⁹A sé yaga pyɛ yemo de Kristi a ku, ko a to toyo na neken, yaga na a bin sè Darwêy vemo de ba ga kushu, mwa tanga vemo de ba sé beken.

¹⁰Ko di hwo à, yaga sɛ́ de hwó ra a gwa mō shɔt arɛt? Ko hwo à, yaga sɛ́ de hwó byɛs gwa mō arɛt? Mwa hot wot a rɔda ba tumal e nuyêl Dagwi na a ra a wot shɔt.

¹¹Sede remo de bà jɛk e Bwok-basa Dagwi wɔgɔ, “Darwey a ye, ‘Ma ga sira me na neken hom wɔgɔ, kawɛ mwat ê ye guduruk e nuyel hom, ko kawɛ mwat ê somo Dagwi na gbɔng fwɔ.’ ”

¹²Yaga ano, kawɛ e ji mot a rɔda ba ha a Dagwi neyɛnɛ̂ pyɛ de a ga ra.

¹³Yaga ano, wot re nuyel na yɛt a bemot shɔt wɛt. Ko tɛ̀ in e neyey min e negya wɔgɔ: Wot a rɔda tɛ̀ pyɛ de ye tɛ̀ gwa mot hwak a ye bugurɛk wɛt kɛ a gaba e ji banɛn.

¹⁴Me de ma sé sangal e ji nesa na Darwey Yɛsu ma tɔk tsɛng-tsɛng, vit a pyɛ cak de ya sé ligis pyɛ yɛ. Ko ka sede mwat hwak a jut pyɛ cak, ya sé ligis, ko ya ga tɛ́ ɛ a yɛ ano.

¹⁵Ka sede gwa mō e lashe yey yaga pyɛ de hwó re, ko hane he dura, hwó to tɛ̀ yey mō na gwa mō wɛt. Kristi a ga ku yaga yɛ arɔng. Hwo tɛ̀ be wey na yɛ wɛt yi na pyɛ de hwó re mo.

¹⁶Yin kwon tɛ̀ bemat be ha há ves e ra pyɛ de yin e bare ya sé ryat.

¹⁷Jeng de be ha e ra negwɔm de Dagwi e re, be ha e ra rehâ pyɛ̂ re na pyɛ̂ sɔ wɛt. Ko be ha e ra rehâ pyɛ de ya sé cik e bayîs Dagwi ko e rà rehâ yêy dyɛngɛ tanga rehâ yey pyɛng de Gabik Jɛrɛ he nɔngɔs.

¹⁸Kawɛ mwat de e ra a Kristi fwom e yerê gwong gwomo e pɛngɛ a Dagwi yey, ko bemat be simo pyɛ de e ra arɔng.

¹⁹Yaga ano, tik na wot a ye ngyɛ́k, na wot dopse ra pyɛ́ de ye vey na yêy dyɛngɛ, na ye tɛ̀ wot nɔngɔ̂s bemot gap.

²⁰Hwo wey na fwôm Dagwi wɛt, yaga hwó bare, be tɔk re kayɛ yerê pyɛ́. Mwin, kayɛ pyɛ́ ya sé naka na be re. Ko a sé tyɛng wɛt na mwat a re pyɛ de yê tɛ̀ mwat hwak a ye bugurɛk.

²¹A sé naka na hwo kyɛ́ o nà re nama, kɛ hwo sɔ nshî anap, kɛ hwo ra pyɛ cak de ya rɔda tɛ̀ gwa mō a ye bugurɛk.

²²Ano kwong, kayɛ pyɛ de hwà di a sé tyɛng e ra rehâ pyɛ́ yemo, tik na pyɛ mo ye sè e tē mō tanga Dagwi. Mwat a rɔda vɔk yey pyɛng, ka sede yey mɛ ya gang ɛ na shɔt wɛt e jeng de e ra pyɛ de a di ya sé tyɛng.

²³Ko mwat de e tó yey e ra pyɛ de e re, ko a re yɛ gbak, yɛ a ga ra renɛn. Yaga a ga ra pyɛ de ya sé tyɛng na pyɛ de yɛ a tɔk e yey mɛ ya sé naka wɛt. Kayɛ pyɛ de mwat e ra sana tɔk e yey mɛ, ya sé naka, pyɛ mo ya sé renɛn.