Read berom Roma 15 Bible Online

Roma 15 - berom bible

Roma 15

¹Wot vemo de wot e tumal gak e ra rehâ pyɛ̂ Dagwi, a sé gbing-gbing na wot a sɛlɛ vemo de be tumal gak wɛt e kwɔn de yɛn a radɛ hɛn ɛ̀. Wot ra pyɛ de yê pɛngɛ a wot yey zɔng wɛt.

²Tik na kawɛ e ji mot a ra pyɛ de ya sé ryat yaga mumwɛ, na a pɛngɛ a yɛ yey. A ra ano, yaga na a sɛlɛ hɛ na a re nuyel e tɔ̂k pyɛ̂ Dagwi.

³Yaga Kristi pyɛ mɛ a ka ra pyɛ de ya pɛngɛ a yɛ yey wɛt. Ko bà jɛk e ra yɛ wɔgɔ, “Sedusâ vemo de ba ga dùsa hwo sa ga to ɛ e ra me.”

⁴Kayɛ pyɛ de bà jɛk e Bwok-basa Dagwi, bà jɛk yɛ, yaga na be basa a wot mɛ̀. Ba to jɛk yɛ, yaga na neha Bwok-basa mo ne tɛ̀ wot a niri, na ne to gwɛ̌ a wot gap arɔng. Ko yi ano, wot ê sɛt yey mot e ra Dagwi.

⁵Tik na Dagwi de e tɛ̀ bemat mɛ be niri, na a to gwɛ̌ a yɛn gap, a tɛ̀ in na yin a sè vining na bemín e de raà gwong de Kristi Yɛsu a dura a wot.

⁶Tik na a ra ano, yaga na yin mwa yin a bin nɔ̂ng Dagwi, yɛ Dâ Darwey mot Yɛsu Kristi, nerey na nu hining.

⁷Ano kwong, séy in bemín, tyɛng sede remo de Kristi a sey in, yaga na bemat be bin nɔ̂ng Dagwi nerey.

⁸Yaga ma sé ha a yin, Kristi a ga tɛ́ ɛ mwât fwom BeYuda, na a bin dura, há de Dagwi à kana ha ha sé mwin. A to tɛ́ ɛ mwât fwom, yaga na a sila mɛ̀ sira de à kana ra a bedabeda mɛn vê mɛsɛng o,

⁹yaga na bemât yére dyuk be nɔ̂ng Dagwi nerey, yaga a tosho reyɔm mɛn. Sede remo de bà jɛk e Bwok-basa Dagwi wɔgɔ, “Pyɛ ma yemo de ya tɛ̀, ma rɔda somo hwo e tê bemât yére dyuk; ma rɔda ra lɛlɛ na me somo mɛ̀ reza mō.”

¹⁰Bà to jɛk, “À yin bemât yére dyuk, vɔk in yey pyɛng tanga bemât Dagwi!”

¹¹Ko bà to jɛk, “À yin bemât yére dyuk mwa hin, somo hin Darwey! Tik na mwa yére bemat jey be somo hɛ arɔng!”

¹²Yɛshaya à ye arɔng, “Yerê Yɛsɛ ya rɔda vey, yɛ a rɔda sogo na a re negwɔm e ra yére bemat jey. Ko bemât yére dyuk bê sɛt yey mɛn e ra yɛ.”

¹³Tik na Dagwi de e tɛ̀sɛ bemat be sɛt yey mɛn e ra yɛ a sila hin na yey pyɛng sizɔng, na a tɛ̀ yey min ye dyɛng arɔng, yaga yin a sey tsak o na yɛ. Tik na a ra ano, yaga na yin a gwɛ̌ sɛt yey min e ra yɛ yi na retô Gabik Jɛrɛ.

¹⁴À begwa hom, me pyɛ hom ma tɔk tsɛng-tsɛng, yin pyɛ min yin a sé berat sizɔng. Yin a tɔk pyɛ̂ mwa de Dagwi e simo, ko yin a vey, na yin a basa a bemin.

¹⁵Ko mwa ano, ma ga jɛk a yin na jɛk de ha nusu wɛshɛrɛk e ra neha nehak, yaga na me to gwɛ̌ bare a yin na nɛ. Ma ga jɛk ano yaga nɔrɔ de Dagwi a nɔng me yi na nerat mɛ

¹⁶wɔgɔ, ma sé mwât fwom wo Kristi Yɛsu vɔk na bemât yére dyuk. Ma sé ra fwom yere gwô piris e de sharâ Yɛgɛt Yat mɛ, yaga na bemât yére dyuk be bin tɛ́ ɛn sede nɔrɔ̂ yas de be yɛt vɔk na Dagwi, hemo de a rɔda sey hɛ. A sé yi na Gabik Jɛrɛ de yɛn ê tɛ́ ɛn nɔrɔ de ha sé hê Dagwi.

¹⁷Yaga ma sé sangal e ji nesa na Kristi Yɛsu, ko me tɔk ra kaa e ra fwom de me ra a Dagwi.

¹⁸Mê kyɛm me hanat e ra pyɛ cak wɛt sɛ̌ e rà pyɛ de Kristi a ga ra yi na me, na a tɛ̀, me vey na bemât yére dyuk na be gyeng hâ Dagwi. Ma tɛ̀ ɛn be vey yi na pyɛ de ma ga ha tanga yemo de ma ga ra.

¹⁹Ma to ra ano yi na retô pyɛ̂ langat tanga hê pyɛ̂ bes, na yi na retô Gabik Dagwi arɔng. Ano kwong, e ji kwɛngɛl hom yi e Yɛrusalɛm mwa vɔk e yɛnɛ̂ sevwêl Ilirikum, ma ga shara Yɛgɛt Yat e ra Kristi e hwomo mwa.

²⁰Gbɔng pyɛ de ma tɛ̀ e yey hom kayɛ jeng ya sé wɔgɔ, me shara Yɛgɛt Yat e kwɔn de bá kana tɔk ɛ̀ pyɛ cak e ra Kristi wɛt. Ma tɛ̀ e yey hom ano, yaga na me ra fwom de gwa sé sede ma sé lɔk e ra retis de mwat hwak a ga kana tɛ̀ wɛt.

²¹Sede remo de bà jɛk e Bwok-basa Dagwi wɔgɔ, “Bemat de ba ga kana ha a yɛn e ra yɛ wɛt, yɛn a rɔda di; ko vemo de ba ga kana wok há mɛ wɛt, yɛn a rɔda tɔk.”

²²Pyɛ ma yane de ya ga dulus me zang pyak nà vey na yin.

²³Ko a remo, vit a bwang kwɔn hak de ma rɔda ra ɛ̀ fwom e neyɛnɛ̂ bavwel vemo. Ko sede remo de a ga tɛ̀ neshey pyak de ma vɔk cwey di in,

²⁴ma ga yong ɛ̀, ma rɔda ra ano jeng de me kyè vɔk e Ɛspanya[1]. Ma sɛt yey hom, na me bin vey di in jeng de ma sé kwey e hane. E bama de ma wok netâ sangal na yin jeng tyɔng, ko me simo na yin a sɛlɛ me e kwɛngɛl hom vɔk e hwomo.

²⁵Ko a remo, ma sé kaba gwong vɔk e Yɛrusalɛm na me wɔ̀ nɔ̂ng bemât Dagwi sɛlɛ e hwomo.

²⁶Yaga bemat-raà neyɛnɛ̂ bavwêl Makedonya na Akaya yɛn a wok netâ nɔ̂ng nɔrɔ̂ yey pyɛng yaga bepɛng de ba sé e ji bemât Dagwi e Yɛrusalɛm.

²⁷Yɛn a wok netâ ra ano, ko e ji hâ mwin, a sé fwom mɛn na yɛn a ra ano. Yaga, sede remo de bemât yére dyuk yɛn a sɛ̀ numo mɛn hê nerât Gabik Dagwi de na sé ne BeYuda, ko a sé tyɛng na BeYuda arɔng be sɛ̀ numo mɛn hê pyɛ́ ryat yê jey yemo de bemât yére dyuk ba vɔk arɔng.

²⁸Ano kwong, e bama de ma ga tala fwom gwomo, ko ma ga nára a yɛn nɔrɔ de ba ga tula yaga yɛn, ma rɔda kyè vɔk e Ɛspanya, ko mê pe di in e gwong vɔk e hwomo mo.

²⁹Ma tɔk wɔgɔ, jeng de ma rɔda ba wul na yin, ma rɔda vey nɔng in nerât Kristi de na sila e kagwɛ gwong.

³⁰À begwa, yaga Darwey mot Yɛsu Kristi, ko yaga tɛ̂ yey de Gabik Dagwi ha dura a wot, ma sé shonong e ra yin wɔgɔ, yin wuna hin tanga me e ji pyɛ de ma sé re yɔ́m e de râ yɛ. Wuna hin ano yi na râ won vɔk na Dagwi yaga me.

³¹Rá in won, yaga na me bin sǎ tyang yi e vɔ bemât yɛnɛ̂ sevwêl Yudiya de ba sey tsak o wɛt. Yin to ra hɛ arɔng, yaga na bemât Dagwi e Yɛrusalɛm be sey sɛlɛ hom na yey pyɛng.

³²Ano kwong, ka sede Dagwi a simo, ma rɔda vey na yin na yey pyɛng, ko a rɔda to yang me wɛng-wɛng jeng de ma sé na yin.

³³Me ra won, yaga na Dagwi de e tɛ̀sɛ neyey bemat ne dyɛng a sè tanga yin mwa. Ano.