Read berom Roma 16 Bible Online

Roma 16 - berom bible

Roma 16

¹Ma sé nára a yin gwa mot Fibi de a sé mwât fwom ekilisiya e Kɛnkɛrɛya.

²Ma sé ha a yin, na yin a sey ɛ e ji rezâ Darwey e gwong de gwa jam yaga bemât Dagwi. Sɛlɛ hin hɛ e kagwɛ gwong de ê simo yi na yin, yaga yɛ a ga sɛlɛ bemat pyak mwa tanga me arɔng.

³Tang în Piriskila tanga Akwila show. Yɛn a sé besâ fwom hom yaga Kristi Yɛsu.

⁴Yɛn á kana yong ɛn na be ku yaga me. E me zɔng de me feng a yɛn wɛt, ko mwa be-ekilisiya bemât yére dyuk be feng a yɛn arɔng.

⁵Tang în bemat-raa de be manas e lɔ mɛn show. Tang în sâ yey hom Ɛpainɛtus show. E yɛ wɛ de a tānga sey tsak o na Kristi e sevwêl Asiya.

⁶Tang în Marya show, yɛ de a ra fwom na gap mɛ mwa yaga yin.

⁷Tang în Andoronikus na Yunyas show. Yɛn a sé cáng hom yemo de yá kana sè e lɔ̂ ngyang tanga me. Yɛn a shǎl e ji betom Yɛsu, ko yɛn a tānga yel e gwông Kristi e ra me.

⁸Tang în sâ yey hom Ampilyatus show. Wot a sé sangal e ji nesa na Darwey tanga yɛ.

⁹Tang în Urbanus, sâ fwom mot yaga Kristi, tanga sâ yey hom Istakis show.

¹⁰Tang în Apɛlɛs show. Ba mara hɛ, ko a tumal gak na Kristi. Tang în vemo de ba sé vê lɔ Aristobulus show.

¹¹Tang în Herodyon, cang hom, show. Tang în vemo de ba sé bemat-raa vê lɔ Narkisus show.

¹²Tang în Tirifaina na Tirifosa show. Yɛn beha vemo be ra fwom yaga Darwey na gap mɛn. Tang în sâ yey hom Pɛrsis show, yɛ hwā de a ra fwom na gap mɛ mwa.

¹³Tang în Rufus, de a dal bwang o e de râ fwom yaga Darwey, tanga neng-gwɔ mɛ show. Neng-gwɔ mɛ mo á sè a me neng hom arɔng.

¹⁴Tang în Asinkiritus, na Fɛlɛgɔn, na Hɛrmɛs, na Patrobas, na Hɛrmas, tanga bwang begwa de ba sé tanga yɛn show.

¹⁵Tang în Filologus tanga Yulya, na Nɛrɛyus tanga gwa mɛ hwong o, na Olimpas, tanga mwa bemât Dagwi de ba sé tanga yɛn show.

¹⁶Tang în bemin show e gwong de gwo dura tɛ̂ yey min. Mwa be-ekilisiyâ Kristi be tang in show.

¹⁷À begwa, ma sé shonong e ra yin, na yin a tē naka na vemo de be tɛ̀sɛ hin na yin a gas in na bemin, na be to tɛ̀sɛ pyɛ̂ negbang detidetu e gwông sêy tsak o min. Bemat o be ra repugu na basa de yin a ga basa hɛ. Sangal hin jaram yi na yɛn!

¹⁸Yaga yerê bemat vane be ra a Darwey mot Kristi fwom wɛt, ko yɛn e ra a cwey pyɛ́ de babek mɛn be simo fwom zɔng. Yɛn e kwɛlɛng bemat de ba mâk tɔk pyɛ́ wɛt yi na há rat tanga rwâk-nu de be vos ɛn mɛ̀.

¹⁹Kawɛ mwat a ga wok, yin e gyeng hâ Yɛgɛt Yat. Yaga ano, ma vɔk yey pyɛng na yin. Me simo yin a sè tsɛng-tsɛng e ra pyɛ́ de ya sé ryat; ko pyɛ min cak ye sè na pyɛ́ de ya sé vyes arɔng wɛt.

²⁰Dagwi de e tɛ̀sɛ neyey bemat ne dyɛng a rɔda vey bagât wey na Shetan, na a tɛ̀ ɛ e nɛ̂n bol min. Tik na Darwey mot Yɛsu a dura a yin nerat mɛ.

²¹Sâ fwom hom Timotawus e tang in show, mwa hɛn na Lukiyus, na Yasɔn, tanga Sosipatoros, yɛn de ba sé cáng hom.

²²Me, Tɛrtiyus de ma sé mwat jɛ̂k bwok-rwang gwomo, me tang in show, yaga wot mwa wot a wuna nesa na Darwey.

²³Gayus de e bɛrɛng me tanga mwa bemat-raa de be manas e lɔ mɛ e tang in show. Ɛrastus, de a sé mwât bâng dyâm repomo, yɛ tanga gwa mot Kwartus be tang in show.

²⁴[Tik na Darwey mot Yɛsu Kristi a dura a yin mwa nerat mɛ. Ano.]

²⁵Tik na wot a nɔ̂ng Dagwi nerey! Yɛ wɛ de e kyɛm a tɛ̀ yin a tumal gak e ji sêy tsak o min, sede remo de ma ha a yin jeng de ma shara Yɛgɛt Yat e ra Yɛsu Kristi. Ya to sé sede remo de pyɛ neyaang yane de ya sé mwin ya dura a wot wɛshɛrɛk arɔng. Pyɛ yane mo yà kana sè e lɛrɛ neshey pyak de na kwey.

²⁶Ko a remo, bebok-basa de bezarap Dagwi bà kana jɛk ba tɛ̀ be tɔk pyɛ de ya sé mwin wɛshɛrɛk. Ko Dagwi wo neken gbak-gbak a nɔng nu na be dura a mwa yére bemât jey pyɛ mo, yaga na mwa bemat be sey tsak o na Dagwi, na yɛn a gyeng há mɛ arɔng.

²⁷Tik na wot a nɔ̂ng Dagwi nerey, yɛ nju mɛ de a vɔk mwa netsitsɛ̂ng nesheneshey, yi na Yɛsu Kristi! Ano.