Read berom Roma 2 Bible Online

Roma 2 - berom bible

Roma 2

¹Ano kwong, à hwo mwat de hwó yɛt a bemín shɔt, hwà rɔda tɔk ra cuna e ra pyɛ cak wɛt. Jeng de hwó ra a bemín shɔt, hwà sé gang tó mo na shɔt arɔng, yaga hwo de hwó yɛt shɔt o hwó ra pyɛ́ yane mo arɔng.

²Wot a tɔk, shɔt Dagwi e ra vemo de be ra pyɛ́ yerê yemo ya sé tyɛng.

³Ko hwo, hwó yɛt a yɛn shɔt, mwa ano de hwó ra pyɛ́ yerê yane mo arɔng. A sé a hwo, hwà rɔda hywit o shɔt Dagwi arɛt?

⁴Kɛ rɔ̌ hwô byɛnɛng nepyak nerat mɛ na gbɔng niri mɛ arɛt? Hwà tɔk wɛt a? Dagwi a vɔk nerat, yaga yɛ e simo nɔng o gwong, na hwo doyo yi e banɛn mō.

⁵Ko yey mō ya sé gbarak, ko hwó to simo hwo doyo yi e banɛn mō wɛt. Yi e negwɔn mō mo, hwà sé tula gbɔng tabak e ra to mo vɔk e jeng de Dagwi a rɔda ba dura shom mɛ. Jeng a yane de Dagwi a rɔda ba dura wɛshɛrɛk shom mɛ de ya sé cik.

⁶Dagwi a rɔda ba tala kawɛ mwat tyɛng na pyɛ de a ga kana ra.

⁷Mwa vemo de be re nuyel e de ragâs pyɛ́ ryat, vemo de be jāma na Dagwi a nɔng ɛn gbɔng nerat, na nerey, tanga neken de ne tala hɛ wɛt, Dagwi a rɔda nɔng ɛn neken gbak-gbak.

⁸Ko mwa vemo de be simo bato mɛn zɔng, vemo de ba kyɛ́ ɛn tsak há na yɛn a raa neves, Dagwi a rɔda tɛ̀ gbɔng shom mɛ e ra yɛn.

⁹Mwa vemo de be ragas neves ba rɔda di reyɔm na rezot. Pyɛ́ yemo ya rɔda tānga hwo e ra BeYuda e mɛsɛng o ko e ra bemât yére dyuk arɔng.

¹⁰Ko mwa vemo de be ragas pyɛ́ de ya sé ryat ba rɔda sɛ̀ gbɔng nerat, na nerey, na yêy dyɛngɛ arɔng. Pyɛ́ yemo ya rɔda tānga hwo e ra BeYuda e mɛsɛng o ko e ra yére dyuk arɔng.

¹¹Yaga Dagwi e dura kasâ bemat wɛt.

¹²Mwa bemat de be ra banɛn sana tɔk Badu de Dagwi à kana nɔ̂ng Mose yɛn a rɔda wey, mwa ano de yɛn a tɔk Badu mo wɛt. Ko mwa vemo de be ra banɛn ná tɔ̂k Badu, ba rɔda ba ra a yɛn shɔt na Badu mo arɔng.

¹³Yaga a sé e vemo de be wok Badu zɔng wɛt de ba sé cik e bayîs Dagwi. Ko a sé e vemo de be gyenges Badu, de Dagwi a rɔda ba dura, yɛn a sé cik e bayis mɛ.

¹⁴Bemât yére dyuk ba vɔk Badu mo wɛt. Ko kayɛ jeng de be raa Badu mo, be raa vɛ yi na pyɛ de yɛn a di e yey mɛn zɔng, ko e jeng o, yɛn e dura, yɛn a tɔk pyɛ de ya jam na mwat a ra. Ko yɛn e dura ano, mwa ano de yɛn a vɔk Badu Dagwi wɛt.

¹⁵Negwɔn mɛn ne dura, ba ga jɛk pyɛ́ de Badu mo be simo e neyey mɛn. Barê yey mɛn arɔng he nɔng nuha e ra pyɛ mo arɔng. Ko báre mɛn he tang ɛn e jeng cak wɔgɔ, yɛn a ra tyɛng wɛt, ko e jeng cak he tang ɛn, yɛn a ra tyɛng.

¹⁶Pyɛ́ ma yemo de ba rɔda ba di e jeng de Dagwi a rɔda ba ra a barê neyaang de ha sé e neyey bemat shɔt; ko a rɔda ba ra shɔt o yi na Yɛsu Kristi. Yɛgɛt Yat de ma sé shara yɛ̄ ya dura, pyɛ́ mo ya rɔda sè tyɛng ano.

¹⁷Ko di hwo, hwó tâng tó mo, à WoYuda, ko hwà tɛ̀ gap mō e ra Badu Dagwi. Hwó to dak kaa wɔgɔ, nesa na sé e tē mō na Dagwi.

¹⁸Hwà tɔk pyɛ́ de Dagwi e simo, ko hwà tɔk pyɛ́ de ya dal na nerat, yaga a sé yi na Badu mɛ mo de ba basa a hwo pyɛ́ yemo.

¹⁹Hwó ye sana tô yey wɔgɔ, e hwo wɛ de hwó hwɔlɔ a bebók gwele, ko hwó to dura á vemo de ba sé e ji lwīl negbey.

²⁰Hwó masa a betɔn, ko hwó to basa a nèy arɔng, yaga Badu mo ba ga nɔng o tɔ̂k mwa, na be to dura a hwo tsak hâ mwa.

²¹Ko hwo kwong, hwó basa a bemat behak, ko yaga sɛ́ de hwó basa a tó mo wɛt arɛt? Hwo de hwó shara há wɔgɔ, be shigi wɛt, yaga sɛ́ de hwó shigi arɛt?

²²Hwo de hwó tē, bemat be ra nejwang wɛt, yaga sɛ́ de hwó ra nejwang arɛt? Hwo de hwó kyɛ́ o cī sizɔng, yaga sɛ́ de hwó kyese wɔ̀ shigshi e kwɔn de be tikis ɛ̀ yɛ̄ arɛt?

²³Hwó dak kaa yaga hwà tɔk Badu Dagwi, ko hwó gyili Badu mo; yi ano, hwó tɛ̀ be tik nà nɔ̂ng Dagwi nerey,

²⁴sede remo de bà jɛk e Bwok-basa Dagwi wɔgɔ, “E yin BeYuda de yin e tɛ̀ bemât yére dyuk be ha há ves e ra Dagwi.”

²⁵Wɔ́ e cwɛl ha vɔk sɛlɛ, ka sede hwó gyenges Badu Dagwi. Ko ka sede hwó gyilsit Badu mo, ko hwà ga tɛ́ o sede ba ga wɔ́ a hwo e cwɛl wɛt.

²⁶Ka sede womo de ba ga yosom hɛ wɛt e gyenges pyɛ́ de Badu mo be simo, ko Dagwi a rɔda di ɛ sede ba ga yosom hɛ.

²⁷Mwat de e gyenges Badu mo, mwa ano de ba ga yosom hɛ e rebek mɛ wɛt, yɛ a rɔda gang o, hwo WoYuda, na shɔt. A rɔda ra ano, yaga hwó gyili Badu, mwa ano de hwà vɔk Badu mo de bà jɛk vɛ, ko ba ga to yosom hwo arɔng.

²⁸Yaga a sé e bwang bayis mɛ wɛt de gwo tɛ̀ mwat a sè WoYuda wo mwin. Yosom hê mwin arɔng ha sé pyɛ de be di kɛ pyɛ de be ra a mwat e rebek mɛ zɔng wɛt.

²⁹Wey, mwat de a sé WoYuda e yey mɛ, e yɛ wɛ de a sé WoYuda mwin; ko yosom hê mwin ha sé hemo de be ra e yêy mwat. A sé e Gabik Dagwi de he tɛ̀ mwat a sè WoYuda e yey mɛ, ko a sé e neha Badu de ba jɛk zɔng de ne tɛ̀ ano wɛt. Yerê mwat wane e sey nerey mɛ yi na mwat wɛt ko yi na Dagwi e negya.