Read berom Roma 4 Bible Online

Roma 4 - berom bible

Roma 4

¹Wot ê ye ala e ra dâ beda mot Abraham arɛt? À di sɛ́ e ji pyɛ́ yemo mo arɛt?

²Ka sede ba yâng tɛ̀ Abraham a sè cik e bayîs Dagwi yi na tomong mɛ, ka à vɔk pyɛ cak de a rɔda dak kaa e ra yɛ. Ko mwin, à vɔk pyɛ de ê dak kaa e ra yɛ e nuyêl Dagwi wɛt,

³yaga bà jɛk e Bwok-basa Dagwi wɔgɔ, “Abraham à sey tsak o na Dagwi, ko yi na sêy tsak o mɛ mo, Dagwi à jut ɛ, à sè cik e bayis mɛ.”

⁴Hwà di ā — jeng de mwat e ra fwom, byɛ mɛ ye sè a yɛ sede pyɛ de ba nɔng ɛ e nɔrɔ wɛt, ko ye sè pyɛ de a sɛ̀ na selong mɛ.

⁵Ko ka sede mwat a tɛ̀ gap mɛ e ra tomong mɛ wɛt, ko a sey tsak o na Dagwi, Dagwi a rɔda di sêy tsak o mɛ mo, ko yaga ano, a rɔda jut ɛ, a sé cik yi na hɛ. Dagwi de e ra ano a sé womo de e tɛ̀sɛ bemat beves be sè cik e bayis mɛ.

⁶Davit à kana ha pyɛ jining o jeng de à ha e ra yey pyɛng de mwat a rɔda sɛ̀. Yey pyɛng o ya rɔda sè na mwat de Dagwi a tɛ̀ a sè cik e bayis mɛ sana bàre na tomong de mwat o a ga ra. Ko Davit à ye,

⁷“Vê yey pyɛng a vemo de ba ga hàla a yɛn banɛn mɛn, vemo de ba ga fugut banɛn mɛn arɔng!

⁸Wo yey pyɛng a womo de Dagwi a rɔda to bare na banɛn de a ga kana ra wɛt!”

⁹Ko yey pyɛng yemo ya sé yaga vemo zɔng de ba ga wɔ́ a yɛn e cwɛl arɛt? Kée wey! Ya to sé yaga mwa vemo de ba ga yosom hɛn wɛt. Wot a ga ha wɔgɔ, Dagwi à jut Abraham à sè cik e bayis mɛ, yaga à sey tsak o na yɛ.

¹⁰E yɛ̌ jeng de pyɛ mo ya té arɛt? Yà té gyam na be yosom Abraham o kɛ e bama mo arɛt? Yà té gyam na be yosom hɛ ko e bama mo wɛt.

¹¹Bà wɔ́ a yɛ e cwɛl e bama mo zɔng. Yosom mɛ mo ha sé pyɛ de ha dura, Dagwi a ga jut ɛ à sè cik, yaga Abraham o a sey tsak o e jeng de ba rɔngɔl nà yosom hɛ. Yi ano, Abraham a sé dâ mwa vemo de ba sey tsak o, mwa ano de ba ga yosom hɛn wɛt. E yɛn bemat de Dagwi a jut ɛn ba sé cik e bayis mɛ.

¹²Abraham o a to sé dâ vemo de ba ga yosom hɛn. Ko a sé e vemo de ba ga yosom hɛn zɔng wɛt, ko e ji sangal mɛn yɛn e nàra e ji sêy tsak o na Dagwi arɔng, sede remo de da mot Abraham à sey tsak o gyam na be wɔ́ a yɛ e cwɛl.

¹³Dagwi à kana sira a Abraham na yére mɛ wɔgɔ, yɛ a rɔda sè mwât rê nedanelɔ jey. A sira ano wɛt, yaga Abraham a gyenges Badu, ko yaga yɛ a jut Abraham à sè cik yi na sêy tsak o mɛ.

¹⁴Yaga, ka sede a sé e vemo de be gyenges Badu Dagwi de be ba sɛ̀ pyɛ de Dagwi à kana sira e ra yɛ, ko hane he dura, sêy tsak o ha vɔk sɛlɛ hak wɛt, ko pyɛ de Dagwi à kana sira e ra yɛ arɔng ya sé yapyi zɔng.

¹⁵Badu mo be vɛ̀sɛ na shôm Dagwi e ra bemat. Ko kwɔn de vit a hɛ nà badu, bemat be tɔk gyili vɛ wɛt.

¹⁶Yaga ano, Dagwi a sira e ra pyɛ yane mo, yaga Abraham à sey tsak o na yɛ. Hemo ha té ano, yaga na pyɛ de Dagwi a sira e ra yɛ mo ye sè e nɔrɔ, na he to sè pyɛ de ba ga yong yɛ gak yaga mwa yére Abraham. Ya sé yaga vemo de be gyeng Badu zɔng wɛt, ko ya sé yaga vemo mwa de ba sey tsak o sede Abraham. E yɛ wɛ de a sé da mot mwa,

¹⁷sede remo de bà jɛk e Bwok-basa Dagwi wɔgɔ, “Ma ga tɛ̀ o na hwo sè dâ yére bemât jey pyak.” Ko Abraham a sé da mot e bayîs Dagwi, yɛ de Abraham à sey tsak o na yɛ, yɛ de e nɔngɔ̂s bavîn bemat neken, ko e to yila pyɛ́ de ya kana sɛ́ wɛt na ye sɛ̀ a remo.

¹⁸Abraham à sey tsak o, ko à sɛt yey e ra pyɛ̂ Dagwi, mwa ano de jeng de yà sè naka na a sɛt yey e ra yɛ̄ yà ga kwey. Ko yaga à ra ano, Dagwi à tɛ̀ ɛ a sè dâ yére bemât jey pyak, sede remo de à kana ha a yɛ, “Yére mō ya rɔda ba sè pyak ano.”

¹⁹Neshey Abraham nà sè sede naga gwining (100), ko sêy tsak o mɛ ha tɛt ɛ wɛt jeng de à tɔk, rebek mɛ ra ga tɛ́ ɛ sede revin o, ko jeng tɔ̂s hwā mɛ Sara ya ga kana kwey arɔng.

²⁰Ko mwa ano, à hàla sêy tsak o mɛ wɛt, ko a tó yey e ra pyɛ de Dagwi à kana sira a yɛ e ra yɛ wɛt. Ko sêy tsak o mɛ ha gwɛ̌ a yɛ gap, ko à nɔ̂ng Dagwi nerey.

²¹À tó yey ko tyɔng wɛt, Dagwi a vɔk reto na a ra pyɛ de a ga kana sira e ra yɛ.

²²Pyɛ ma yane de ya tɛ̀, “Ba jut ɛ a sé cik e bayîs Dagwi.”

²³Bà jɛk neha nemo wɔgɔ, “Ba jut ɛ a sé cik” yaga yɛ nju mɛ wɛt,

²⁴ko nà sé yaga wot arɔng, wot vemo de Dagwi a rɔda ba jut ot wot a sé cik e bayis mɛ. Nà sé yaga wot vemo de wot a sey tsak o na yɛ, yɛ de á sene Darwey mot Yɛsu yi e reku.

²⁵Bá kana nára hɛ na a ku yaga banɛn mot, ko bá to sene hɛ na neken, yaga na wot a bin sè cik e bayîs Dagwi.