Read berom Roma 5 Bible Online

Roma 5 - berom bible

Roma 5

¹Ano kwong, sede remo de Dagwi a ga tɛ̀ ot cik e bayis mɛ, yaga wot a sey tsak o, Darwey Yɛsu Kristi a tɛ̀ ot na wot a sangal tyang na Dagwi.

²Yɛsu mo a to tɛ̀ ot na wot a tɔk gwong de Dagwi a dura a wot nerat mɛ nemo de wot a sé wok netâ nɛ a remo. Ko a sé yaga wot a sey tsak o na Yɛsu Kristi de a tɛ̀ ot, wot a sey nerat o. Wot a vɔk yey pyɛng, yaga wot a sɛt yey mot, wot a rɔda sè tanga Dagwi e kwɔ̂n gbɔng nerey mɛ.

³Ko a sé ano zɔng wɛt, ko wot a vɔk yey pyɛng e ji sɔ̂ reyɔm mot arɔng, yaga wot a tɔk, sɔ̂ reyɔm he tɛ̀, wot a niri.

⁴Ko niri mo arɔng he yong negwɔn mot de ba ga kana mara nɛ. Ko negwɔn o ne tɛ̀ wot a sɛt yey e ra Dagwi.

⁵Ka sede wot a sɛt yey mot e ra Dagwi e gwong gwomo, ko wot a rɔda bidɛ pyɛ cak wɛt. Yaga Dagwi a ga dura a wot, yɛ a ga tɛ̀ yey mɛ na wot ding-ding. A dura ano yi na Gabik Jɛrɛ mɛ, hemo de a ga nɔng ot hɛ.

⁶E jeng de wot a rɔngɔl vit nà gap, Kristi a ku yaga vemo de be raa Dagwi wɛt. Yɛ a ku e jeng de Dagwi a di ya jam.

⁷A sé gbang na be sɛ̀ mwat de a rɔda ku e tô mwat de a sé cik. Ko gyeng rɔ̌ bê sɛ̀ mwat de ê simo a ku e tô mwat de a sé rwat.

⁸Ko Kristi á kana ku yaga wot e jeng de wot a rɔngɔl bemât banɛn. A sé yi ano de Dagwi a dura a wot, a tɛ̀ yey na wot sizɔng.

⁹Kristi a shushu nemi mɛ, ko yi ano ba ga tɛ̀ ot na wot a sè cik e bayîs Dagwi. Ka sede ano, ko a rɔda ba sey neken mot, vit a tô yey, e jeng de Dagwi e ba ra a bemat shɔt e ji shom mɛ.

¹⁰Jeng de wot á sè bemât repugû Dagwi, yɛ a gang-nshi na wot yi na rekû Hwey mɛ. Sede remo de Dagwi a ga gang-nshi na wot, ko ba rɔda ba sey ot, vit a tô yey, yi na nekên Kristi.

¹¹Pyɛ́ ma yemo zɔng wɛt, ko wot a vɔk yey pyɛng yaga Dagwi arɔng yi na Darwey mot Yɛsu Kristi. Yaga a sé yi na yɛ de Dagwi a ga gang-nshi na wot a remo.

¹²À sè mwat gwining de à kana ra banɛn, ko yi ano, banɛn ba yel e ji jey, ko reku arɔng ra yel yi na banɛn o. Yi e gwong gwomo, reku ra vey e ra bemât mwa, yaga yɛn mwa ba ra banɛn.

¹³Gyam na Dagwi à nɔ̂ng Mose Badu, bemat bà kana ra banɛn e ji jey. Ko e kwɔn de vit a hɛ nà badu, be basa nepyak banɛn de bemat be ra wɛt.

¹⁴Yi e jeng Adam vɔk e jeng Mose à sè gbing-gbing na kawɛ mwat a ku. Reku ra re negwɔm ano e ra mwa bemat, mwa na vemo de bà kana gyili redu Dagwi wɛt tyɛng sede remo de Adam à kana gyili rɛ. Adam o à sè sede rezinâ wane de e kyè vey.

¹⁵Ko gwong de Dagwi e nɔngɔ̂s bemat pyɛ́ e nɔrɔ gwa sé detu na gwong de Adam à buru. A sé mwin, bemat pyak ba kushu, yaga mwat gwining a buru. Ko gwong de Dagwi a dura nerat mɛ tanga nɔrɔ mɛ de a nɔ̂ng bemat pyak e nɔrɔ gwa dal mwa na nerey. A sé yi na nerat de mwat gwining, yɛ Yɛsu Kristi, a dura a bemat, de Dagwi a nɔng nɔrɔ mɛ mo.

¹⁶Me to ye ngan, gwong de Dagwi e nɔngɔ̂s bemat nɔrɔ gwa sé detu na gwong de mwat gwining a ra banɛn. Bama de Adam à ra renɛn rining, bà ra a yɛ shɔt, ko bà gang ɛ na yɛ. Ko e bama de bemat ba buru zang pyak, Dagwi a nɔng nɔrɔ mɛ de ha tɛ̀ ba hàla hɛn washak.

¹⁷Mwin, yi na buru mwat gwining, reku ra hwo re negwɔm e ra bemat yaga mwat gwining o. Ko yi na mwat gwining arɔng, yɛ Yɛsu Kristi, wot ê sɛ̀ pyɛ de ya dal mwa na nerey, yɛ à yet: Mwa vemo de Dagwi a dura a yɛn nerat mɛ shɛrɛk, na a to nɔng ɛn nɔrɔ wɔgɔ, yɛn a sè cik e bayis mɛ, yɛn mwa ba rɔda re negwɔm e ji neken mɛn, yaga pyɛ de Kristi a ra.

¹⁸Ano kwong, tyɛng sede remo de burû mwat gwining ha ga tɛ̀ be gang bemât mwa na shɔt, ano arɔng, fwôm mwat gwining de gwa sé cik gwa ga tɛ̀ be hàla bemât mwa washak, na yɛn a sè na neken arɔng.

¹⁹Yaga mwat gwining a kyɛ́ ɛ nà gyeng há, ko bemat pyak ba tɛ́ ɛn vê banɛn. Ano arɔng, yaga mwat gwining a gyeng há, ko Dagwi a rɔda tɛ̀ bemat pyak be sè cik e bayis mɛ.

²⁰Ba nɔng Badu na be tɛ̀ bemat be gwɛ̌ buru. Ko jeng de bemat ba gwɛ̌ râ banɛn, Dagwi a dal na gwɛ̂ durâ nerat mɛ.

²¹Tyɛng sede remo de banɛn bá kana vɔk reto yi na râ fwom na reku, ano arɔng, gwong de Dagwi e dura nerat mɛ gwa vɔk reto yi na tɛ́sɛ bemat cik e bayis mɛ. Ko e tɛ̀ ot na wot a vɔk neken gbak-gbak yi na Yɛsu Kristi Darwey mot.