Read berom Roma 6 Bible Online

Roma 6 - berom bible

Roma 6

¹Wot ê ye ala kwong arɛt? Wot ê re nuyel e de ragâs banɛn, yaga na Dagwi a gwɛ̌ dura nerat mɛ arɛt?

²Tyɔng tyɔng wɛt! E rà rehâ banɛn kene — wot a ga kushu. Yi e rɛ̌ de wot a rɔda to re nuyel e sangal e ji vɛ arɛt?

³Mwin, yin a tɔk, mwa wot vemo de ba ga kana tɛ̀ a wot batisma, na wot a tɛ́ ot vining na Kristi Yɛsu, ba tɛ̀ a wot batisma mo, na wot a tɛ́ ot vining na yɛ e reku mɛ arɔng.

⁴Yi na batisma mo ba ga lɛrɛ hot tanga yɛ, na wot a sè tanga yɛ e ji reku. Hemo ha té, yaga na wot a sangal na neken e gwong pwas, tyɛng sede remo de Dagwi Da, yi na retô gbɔng nerey mɛ, a sene Kristi na neken yi e reku.

⁵Sede remo de wot a ga wuna hot na yɛ e reku mɛ, ko mwin, wot a rɔda wuna hot na yɛ e sene mɛ na neken arɔng.

⁶Yaga wot a tɔk, ba ga kak negwɔn mot ne raane e ra cɔ́gɔt tanga Kristi. Yi ano, ba wey na negwɔn mot ne banɛn, yaga na, e ngamo nuyel, wot a to sè besam banɛn wɛt.

⁷Yaga mwat de a ga ku, ba ga viri hɛ yi e retô banɛn.

⁸Sede remo de wot á ku tanga Kristi, ko wot a sey tsak o, wot a rɔda to sè beken tanga yɛ.

⁹Yaga wot a tɔk, sede remo de ba sene Kristi yi e reku, a rɔda to ku wɛt. Reku ra to vɔk reto e ra yɛ wɛt.

¹⁰Jeng de a ku, a ku zang hining zɔng yaga banɛ̂n bemat, ko reku mo ra pere vey yaga mwa jeng. Ko neken de a vɔk na sé yaga Dagwi.

¹¹E gwong gwining gwane mo, bàre hin pyɛ min wɔgɔ, e rà rehâ banɛn à — yin a ga kushu, ko yin a sé beken yaga Dagwi yi na sangâl nesa na Kristi Yɛsu.

¹²Yaga ano, yin kwon tik banɛn be re negwɔm e ra babek min de ba rɔda ba kushu. Yin kwon raa cwey pyɛ́ vyes de yin pyɛ min yin e simo.

¹³Yin nása nedem min na yin a ragas mɛ̀ banɛn wɛt sede pyɛ̂ fwom de ba yong yaga ragâs neves. Ko nása hin bato min vɔk na Dagwi; yin a sé vemo de ba ga to ɛn yi e reku vey e neken. Ko nása hin nedem min vɔk na yɛ sede pyɛ̂ fwom de ba yong yaga ragâs pyɛ́ de ya sé cik.

¹⁴Banɛn ba rɔda re negwɔm e ra yin wɛt, yaga badu ba vɔk reto e ra yin wɛt, ko a sé e nerat de Dagwi a dura a yin de na vɔk reto e ra yin.

¹⁵Ko ala arɛt? Wot ê ra banɛn, yaga badu ba vɔk reto e ra wot wɛt, ko a sé e nerat de Dagwi a dura a wot de na vɔk reto e ra wot arɛt? Kée wey!

¹⁶Mwin, yin a tɔk, jeng de yin e nára a mwat hwak bato min na yin a gyeng há mɛ sede besam, yin a ga tɛ́ in besam yɛ womo de yin e gyeng há mɛ mo. Ka sede yin a sé besam banɛn, ko pyɔlɔ min ya rɔda sè reku. Ka sede yin a sé besam de be gyeng há, ko pyɔlɔ min ya rɔda sè wɔgɔ, Dagwi a rɔda tɛ̀ in na yin a sè cik e bayis mɛ.

¹⁷Tik na wot a feng a Dagwi! Yaga, mwa ano de a raane yin á sè besam banɛn, ko a remo yin e gyeng na yey min mwa yerê basa de ba ga kana basa a yin.

¹⁸Ba ga kana vibis hin yi e banɛn, ko yin a ga tɛ́ in besam Dagwi vemo de be ra pyɛ́ de ya sé cik e bayis mɛ.

¹⁹Ma sé ha há hemo e gwong de wot a tɔ́k ot mɛ̀, yaga yin e mâk tɔk pyɛ de be ha a yin wɛt. A raane, yin á kana kyě nása nedem min sede besam, na yin a ra pyɛ́ de ya sé ligis na yēmo de ya sé vyes, ko yin a to re nuyel e de ragâs neves. Ko a remo, nása hin nedem min sede besam, na yin a ra pyɛ́ de ya sé cik, yaga na sángal min he sè jɛrɛ.

²⁰Jeng de yin á sè besam banɛn, pyɛ min yá sè na pyɛ́ de ya sé cik e bayîs Dagwi wɛt.

²¹E pyɔlɔ̂ sɛ́ de yin á sɛ̀ e jeng o yi na ragâs pyɛ́ mo arɛt? Vit, sɛ̌ pyɛ́ de yin e wokos rekyên yɛ̄ a remo, ko yɛnɛ̂ yɛ̄ ha sé reku!

²²Ko a remo de ba ga vibis hin yi e banɛn, yin a ga tɛ́ in besam Dagwi. Pyɔlɔ de yin e sɛ̀ a remo ya sé wɔgɔ, yin a tɛ́ in jɛrɛ e ji kayɛ pyɛ, ko yɛnɛ̂ yɛ ha sé neken gbak-gbak.

²³Yaga byɛ de be tala mɛ̀ banɛn ya sé reku, ko nɔrɔ de Dagwi e nɔngɔ̂s bemat ha sé neken gbak-gbak yi na Kristi Yɛsu, Darwey mot.