Read berom Roma 8 Bible Online

Roma 8 - berom bible

Roma 8

¹Yaga ano, vit a mwat de a rɔda gang vemo de ba sé sangal e ji nesa na Kristi Yɛsu na shɔt.

²Yaga badu de ba sé vê Gabik Dagwi, de be tɛ̀ wot a vɔk neken e ji nesa na Kristi Yɛsu, ba ga viri me yi e badu de be vɛ̀sɛ na banɛn tanga reku.

³Dagwi á ra pyɛ de badu ba vɔk gap na be ra wɛt, yaga negwɔn mot ne bemasi ná tɛ̀ badu mo gbɛrɛk. Á tomo Hwey mɛ na rebek de rá sè tyɛng na rebêk bemat de be ragas banɛn. Á tomo hɛ, yaga na be nára hɛ̄ sede nɔrɔ̂ yas de be yɛt vɔk na Dagwi, yaga na be hàla mɛ̀ banɛ̂n bemat. Ko yi ano, á gang banɛn de ba sé e ji mwasi na shɔt.

⁴Dagwi á ra ano, yaga na wot a ra pyɛ̂ mwa de badu de ba sé cik be simo wot a ra, wot de wot e sangal tyɛng na pyɛ de Gabik Dagwi he simo, ko wot e sangal tyɛng na pyɛ de negwɔn mot ne bemasi ne simo wɛt.

⁵Bemat de be sangal tyɛng na negwɔn mɛn de ne bemasi ne simo, yɛn e sɛt báre mɛn e ra pyɛ́ de negwɔn mɛn o ne simo. Ko vemo de be sangal tyɛng na pyɛ de Gabik Dagwi he dura, yɛn e sɛt báre mɛn e ra pyɛ́ de Gabik o he simo arɔng.

⁶Ka sede mwat e sɛt báre mɛ e ra pyɛ́ de negwɔn mɛ ne mwasi ne simo, ko hemo ha sé reku. Ko ka sede mwat e sɛt báre mɛ e ra pyɛ́ de Gabik Dagwi he simo, a rɔda sɛ̀ neken tanga yêy dyɛngɛ.

⁷Bemat de be dopse bare e ra pyɛ̂ rebek mɛn zɔng ba sé bemât repugû Dagwi. Be dyɛng bato mɛn na be gyeng badu Dagwi wɛt, ko mwin, yɛn e kyɛm be gyeng vɛ wɛt.

⁸Bemat de be raa negwɔn mɛn ne bemasi yɛn e tɔk pɛngɛ a Dagwi yey wɛt.

⁹Ko yin à, ka sede Gabik Dagwi he sangal e ji neyey min, yin e raa negwɔn min ne bemasi wɛt, ko yin e raa pyɛ de Gabik Dagwi he dura a yin. Mwa mwat de a vɔk Gabik Kristi wɛt a sé wo Kristi wɛt.

¹⁰Ko ka sede Kristi a sé sangal e neyey min, ko Gabik ha rɔda tɛ̀ in na yin a sè beken, yaga ba ga tɛ̀ in cik e bayîs Dagwi. Yin a sé beken, mwa ano de babek min be ba kushu yaga banɛn.

¹¹Ka sede Gabik Dagwi de á sene Yɛsu yi e reku ha sé sangal e neyey min, ko yɛ Dagwi de a sene Kristi yi e reku mo a rɔda nɔ̂ng babek min de ba rɔda ba kushu neken. Gabik mɛ de ha rɔda ra ano ha sé sangal e neyey min.

¹²Yaga ano, à begwa, wot a vɔk pyɛ de ya sé gbing-gbing wot a ra, yɛ a yet ngan: A sé gbing-gbing wot a raa pyɛ de Gabik Dagwi he dura a wot, ko wot kwon raa negwɔn mot ne bemasi na wot a ra pyɛ de ne simo wɛt.

¹³Yaga, ka sede yin e sangal tyɛng na pyɛ de negwɔn min ne bemasi ne simo, ko yin a rɔda kushu. Ko ka sede yin a weres na tomong min ve banɛn yi na sɛlɛ̂ Gabik Dagwi, ko yin a rɔda sè beken.

¹⁴Bemat de Gabik Dagwi he hwɔlɔ a yɛn gwong, e yɛn vɛ de ba sé nèy Dagwi.

¹⁵Yaga yin á sey yerê gabik de he tɛ̀ in na yin a sè besam wɛt, na yin a vɔk bengyip arɔng wɛt. Ko yin a sey Gabik Dagwi de ha tɛ̀ in na yin a tɛ́ in nèy Dagwi. Ko e hɛ de he tɛ̀ wot a yila Dagwi, “À Dara, à Da hom!”

¹⁶Gabik Dagwi o pyɛ hɛ he wuna hɛ tanga gabik mot na be nɔng nuha wɔgɔ, wot a sé nèy Dagwi.

¹⁷Sede remo de wot a sé nèy mɛ, ko wot ê re nedanelɔ de Dagwi a sira na a nɔ̂ng bemat mɛ. Wot ê re nɛ tanga Kristi arɔng. Yaga, ka sede wot e sɛ̀ numo mot hê reyɔm de a sɔ, ko wot ê ba sɛ̀ numo mot hê gbɔng nerat mɛ arɔng.

¹⁸Ma di, reyɔm de wot e sɔ a remo ra vey na be mara rɛ ko tyɔng wɛt na gbɔng nerat de Dagwi a rɔda ba nɔng ot.

¹⁹Mwa pyɛ́ de Dagwi a yong ya sé gyeng tyɔng wɛt na ye di nèy Dagwi de a rɔda ba dura nɛ wɛshɛrɛk.

²⁰Dagwi a tɛ̀ na mwa pyɛ́ de a yong a sè a yɛ̄ kpɛɛ zɔng. A sé a pyɛ́ mo ano yi na simô yɛ̄ wɛt, ko a sé yaga Dagwi a simo na ye sè ano. Ko mwa ano, a tɛ̀ yɛ̄ ye sɛt yey yɛ̄ e ra pyɛ yemo ngan:

²¹Tuhak, Dagwi a rɔda ba vibis pyɛ́ de à yong yi e sesam de he tɛ̀ yɛ̄ ye bɔsɔ zɔng. Ko ba rɔda ba wuna yɛ̄ tanga nèy Dagwi e de wokos netâ gbɔng nerat de na vey yi na vibis hɛn washak.

²²Wot a tɔk, vey e jeng yemo, mwa pyɛ́ de Dagwi à yong ya sê bûm rus, ko ye di reyɔm sede hwâ tɔ́.

²³A sé e pyɛ́ mo zɔng wɛt, ko wot de Gabik he sangal e ji mot sede pyɛ de ya tɛ̀ ot na wot a tɔk tsɛng-tsɛng, wot a rɔda sɛ̀ pyɛ de Dagwi a sira e ra yɛ, wot arɔng wot e rus e neyey mot. Wot e rus jeng de wot a sé gyeng na Dagwi a jut ot, na a tɛ̀ ot wot a tɛ́ ot nèy mɛ, na a vibis babek mot arɔng.

²⁴A sé yaga wot a sɛt yey mot e ra Dagwi de a sey ot. Ko ka sede wot a di pyɛ de wot a sɛt yey mot e ra yɛ, ko sɛ̂t yey o ha sé pyɛ wɛt. E wà de e sɛt yey mɛ e ra pyɛ de a kana vɔk yɛ arɛt?

²⁵Ko ka sede wot e sɛt yey mot e ra pyɛ de wot a di yɛ wɛt, wot e niri e de gyeng pyɛ mo.

²⁶A sé e gwong gwining gwomo de Gabik Dagwi he sɛlɛ hot e jeng de a sé a wot gbɛrɛk. Wot a tɔk wɛt gwong de gwa sé naka na wot a ra won; ko Gabik Dagwi pyɛ hɛ he ra won e to mot na rus de ha dal pyɛ de neha mot ne tɔk ha.

²⁷Ko Dagwi de e di e ji neyey mot a tɔk báre hê Gabik. Yaga Gabik o he ra won na Dagwi yaga bemat mɛ tyɛng na pyɛ de yɛ e simo.

²⁸Wot a tɔk, e ji pyɛ̂ mwa Dagwi e ragas fwom e gwong de gwo vey na nerat yaga vemo de ba tɛ̀ yey mɛn na yɛ, vemo de a ga yila hɛn tyɛng na pyɛ de ya sé e yey mɛ.

²⁹Mwa vemo de Dagwi à kana tɔk ɛn, à to yong a yɛn gyam, na yɛn a sè tyɛng na Hwey mɛ, yaga na he bin sè hwey kunat e ji begwa mɛ pyak.

³⁰Ko vemo de à ga kana yong a yɛn gyam, à to yila hɛn arɔng. Ko vemo de à yila hɛn o, à tɛ̀ ɛn na yɛn a sè cik e bayis mɛ. Ko vemo de à tɛ̀ ɛn na yɛn a sè cik o, à nɔng ɛn gbɔng nerat arɔng.

³¹Wot ê ye ala e ra pyɛ́ yemo kwong arɛt? Ka sede Dagwi a sé e gura mot, ko wà a rɔda sè wo repugu mot arɛt?

³²Yɛ a ka ro na Hwey mɛ wɛt, ko a nára hɛ yaga wot mwa. Ko sɛ̌ yɛ de a nɔng ot Hwey mɛ mo a rɔda to nɔng ot tanga hɛ kayɛ pyɛ e nɔrɔ wɛt arɛt?

³³E wà de a rɔda vey na sekun sehak e ra vemo de Dagwi a ga kana kasa arɛt? Vit a mwat, yaga a sé e Dagwi de e hàla hɛn washak.

³⁴E wǎ kwong de e gang ɛn na shɔt arɛt? Vit a mwat, yaga a sé e Kristi Yɛsu de a ku. A ku zɔng wɛt, ko ba to sene hɛ na neken arɔng. A sé sangal e vwɔ yegê Dagwi, ko a to sé ra won yaga wot.

³⁵E wà de a rɔda gas ot na tɛ̂ yêy Kristi arɛt? A sé reyɔm, kɛ rezot, kɛ reyɔm de be tak a wot remo de rê tɔk gas ot arɛt? Ka sede wot a vɔk pyɛ̂ re kɛ pyɛ̂ banga wɛt, kɛ ka sede pyɛ vyes cak yê hwo e ra wot kɛ bê wey na wot — pyɛ́ yemo yê tɔk gas ot na tɛ̂ yêy Kristi arɛt?

³⁶Sede remo de bà jɛk e Bwok-basa Dagwi wɔgɔ, “A sé yaga hwo de wot a sé e nû reku yimo nagasi vɔk e nahywegelek. Ba sé bɛrɛng hot sede vyēl de be kyè wɔ̀ yɛt yɛ̄.”

³⁷Ko e ji pyɛ́ mo mwa wot e di wɛng de ha dal mwa yi na yɛ̀ de a tɛ̀ yey na wot!

³⁸Yaga ma tɔk tsɛng-tsɛng, vit a pyɛ de yê tɔk gas ot na tɛ̂ yêy Dagwi, kɛ a sé reku kɛ neken, kɛ a sé betom-lagwi kɛ cēng, kɛ a sé pyɛ̂ jeng yemo kɛ yê jeng de ye kyè vey, kɛ yerê reto rehak.

³⁹Vit a pyɛ de ya vɔk reto e lagwi kɛ e nɛ̂n vwel, kɛ kayɛ pyɛ cak e ji pyɛ̂ mwa de Dagwi à yong de yê tɔk gas ot na tɛ̂ yêy Dagwi de a nɔng ot yi na Kristi Yɛsu, Darwey mot.