Read berom Roma 9 Bible Online

Roma 9 - berom bible

Roma 9

¹Ma sé ha tsak o; ma sé wo Kristi, ko ma sé vɛ́ bɔs wɛt. Barê yey hom ha nɔng nuha ano arɔng yi na Gabik Jɛrɛ jeng de me ye,

²yey hom ye lashe hɛ ding-ding yaga bemat hom, ko pyɛ mo ye re a me yey jojot.

³Me pyɛ hom ma yâng simo na me tɛ́ me pyɛ sedusa na Dagwi, na be gas me na Kristi yaga begwa hom vê yere jining

⁴wɔgɔ, BeIsrayɛl. A sé e yɛn de Dagwi a jut ɛn na a tɛ̀ ɛn be sè nèy mɛ. A dura a yɛn gbɔng nerey mɛ; a wuna hɛ na sira tanga yɛn e jeng detidetu, ko a nɔng ɛn Badu. A dura a yɛn gwông rê fongol de gwa sé mwin, ko a sira a yɛn e ra pyɛ́ detidetu.

⁵Yɛn a sé nèy gbɔng bedabeda vê susu mo vê yére mɛn. Ko Kristi a sé yi e yere mɛn arɔng yi e sangal mɛ hê jey yemo. Tik na be somo Dagwi gbak-gbak, yɛ de e re negwɔm e ra kayɛ pyɛ! Ano.

⁶Ma sé ha wɛt wɔgɔ, Dagwi a rɔda sila há mɛ hemo de a sira e ra hɛ wɛt. Yaga e mwa bemat de yére mɛn ya nusu yi e Israyɛl de ba sé BeIsrayɛl mwin wɛt,

⁷ko e mwa vemo de ba yi e yére Abraham de ba sé nèy Abraham mwin arɔng wɛt. Ko Dagwi à kana ha a Abraham wɔgɔ, “A sé yi na Yishak de yére mō ya rɔda nusu.”

⁸Hemo ha dura, a sé e nèy nemo wɛt de ba tɔs nɛ yi e gwong de ba tɔ́k ɛn mɛ̀ de na sé nèy Dagwi. Ko a sé e nèy de ba tɔs nɛ tyɛng na há de Dagwi à kana sira e ra hɛ de be bɛrɛng nɛ sede yére Abraham.

⁹Yaga há de Dagwi a sira e ra hɛ a het ngan: “Ma rɔda toyo e jeng de ma tɛ̀, ko Sara a rɔda vɔk hwey.”

¹⁰A sé e pyɛ yane zɔng wɛt. Nèy Rɛbɛka na vɔk da gwining zɔng, yɛ à yere mot Yishak.

¹¹Ko mwa ano, gyam na be tɔ nèy shisha nane mo, ko gyam na ne hwo râ pyɛ de ya sé ryat kɛ pyɛ de ya sé vyes cak,

¹²Dagwi à yâng Rɛbɛka, “Kunat o a rɔda ra a swɛl o fwom.” À ha ano, yaga na a dura, pyɛ de ya tɛ̀, a kasa hwey hining zɔng ya sé yaga pyɛ de yà sè e yey mɛ. Kása mo hà sè yi na Dagwi de e yila mwat, ko hà sè yi na pyɛ de mwat e ra wɛt.

¹³Sede remo de bà jɛk e Bwok-basa Dagwi wɔgɔ, “Ma tɛ̀ yey na Yakɔp, ko ma kyɛ́ me Esau.”

¹⁴Wot ê ye ala kwong arɛt? Wot ê ye, Dagwi e gas badu e tē wɛt, arɛt? Tyɔng tyɔng wɛt!

¹⁵Yaga à yâng Mose, “Ma rɔda tosho reyɔ̂m womo de mê tosho reyɔm mɛ, ko ma rɔda wok nemwishish womo de mê wok nemwishish mɛ.”

¹⁶Yaga ano, kasâ Dagwi ha sé yi na pyɛ de mwat a vɔk cwey yɛ wɛt kɛ yi na pyɛ de mwat o e sɛ̀ na selong mɛ arɔng wɛt, ko ha sé yi na toshô reyɔ̂m Dagwi zɔng.

¹⁷Sede remo de bà jɛk e Bwok-basa Dagwi há de à ha a Farawo wɔgɔ, “Ma nɔng o negwɔm yaga pyɛ jining yemo mo, yaga na me dura reto hom yi na hwo, na bemat be tɔk reza hom e jêy mwa.”

¹⁸Yaga ano, Dagwi e tosho reyɔ̂m mwat de e simo, ko e to tɛ̀ yêy mwat de e simo ye sè gbarak.

¹⁹Gyeng rɔ̌ hwak e ji min a rɔda yang me, “Ka sede a sé ano, ko yaga sɛ́ de Dagwi e rɔɔ ra a wot nu arɛt? E wà de a tɔk ra retek na pyɛ de yɛ e simo arɛt?”

²⁰Ko, à mwat, hwà sé wà, na hwo toyo a Dagwi na há arɛt? Sɛ̌ pyɛ de ba lɔk yê yâng mwat de a lɔk yɛ, “Yaga sɛ́ de hwà lɔk me ano arɛt a?”

²¹Mwât lɔ̂k nerwèy a vɔk reto na a lɔk pyɛ de e simo: Yi na regat secwem rining e tɔk lɔk rwey hak yaga jeng nzem na rwey o hak yaga râ fwom gwô kayɛ jeng.

²²Pyɛ de Dagwi a ra ya sé sede gwɔrɔ-há hane. A simo na a dura shom mɛ, na a tɛ̀ bemat be di reto mɛ. Ko a niri na gbɔng niri na vemo de a sé tyɛng na yɛn a di shom o, yɛn vemo de ba ga vey na be wey na yɛn.

²³Ko a to simo na a dura gbɔng nerat mɛ de vit a yerê nɛ vɔk na vemo de a tosho reyɔm mɛn, vemo de a ga kana yong ɛn gyam na be sey gbɔng nerat mɛ mo.

²⁴Ko wot a sé vemo de a ga yila hot. A ga yila hot yi e ji BeYuda zɔng wɛt ko yi e ji vemo de ba sé yére dyuk arɔng.

²⁵Sede remo de Hosheya à jɛk e bwok-basa mɛ pyɛ de Dagwi à ha wɔgɔ, “Bemat de bá sè benang me wɛt, ma rɔda yila hɛn, à bemat hom. Ko yere de ma kana tɛ̀ yey hom na yɛ wɛt, ma rɔda yila yɛ, à wo tɛ̂ yey hom.

²⁶Ko e kwɔn hining hane de bà kana yang ɛn, ‘Yin a sé bemat hom wɛt’, e hwomo ba rɔda yila hɛn, à nèy Dagwi wo neken.”

²⁷Ko Yɛshaya à dɛrɛ na gbɔng fwɔ e ra rehâ BeIsrayɛl, a ye, “Mwa ano de nepyak BeIsrayɛl na yâng sè sede nepyak bazɛk e vwarâ gworep, ko e bwang mɛn tyɔng zɔng de ba rɔda sey neken mɛn.

²⁸Yaga Darwey a rɔda ra dey-dey na a yɛnɛ ra a bemât jey pyɛ de à kana ha.”

²⁹A sé tyɛng na pyɛ de Yɛshaya à kana ha a raane wɔgɔ, “Ka sede Darwey Wo Retô Mwa à kana tɛt a wot ɛ̀ yére mot cak wɛt, ka wot a yâng tɛ́ ot sede repomô Sɔdɔm, ka wot a yâng to sè sede repomô Gɔmɔra.”

³⁰Wot ê ye ala kwong arɛt? Wot ê ye ngan: Dagwi a tɛ̀ bemât yére dyuk be sè cik e bayis mɛ, mwa ano de yɛn à jāma ano wɛt. A tɛ̀ ɛn cik, yaga yɛn à sey tsak o na Yɛsu Kristi.

³¹Ko BeIsrayɛl de bá jāma badu de bê tɔk tɛ̀ ɛn be sè cik e bayîs Dagwi ba ga sɛ̀ badu mo wɛt.

³²Yaga sɛ́ de yɛn a sɛ̀ vɛ wɛt arɛt? Yaga yɛn a jāma na be pɛngɛ a Dagwi yey yi na tomong mɛn de ba ragas ko yi na sêy tsak o wɛt. Ko yi ano, yɛn a tiris bol mɛn e ra gwofwa de be tiris bol e ra gwɛ.

³³Sede remo de bà jɛk e Bwok-basa Dagwi wɔgɔ, “Di, ma tɛ̀ gwofwa de gwo tɛ̀sɛ bemat be tiris bol mɛn e ra gwɛ e Siyɔn; e gwɛ à gwogbɔng gwofwa de gwo tɛ̀sɛ bemat be gabsa. Ko kawɛ mwat de a tɛ̀ gap mɛ e ra Dagwi, yɛ de a sé gwofwa gwane mo, a rɔda vo rekyen wɛt.”