Read berom 1 Kɔrintɔs 1 Bible Online

1 Kɔrintɔs 1 - berom bible

1 Kɔrintɔs 1

¹Bwok-rwang gwomo yi e vwɔ hom Bulus de Dagwi a yila yi na simo mɛ, na me sè tom Kristi Yɛsu. Bwok-rwang o gwa yi na me tanga gwa mot Sostenes,

²Vɔk na bemât ekilisiyâ Dagwi de ba sé e Kɔrintɔs. Yi na sangâl nesa na Kristi Yɛsu, ba ga tik in jaram yaga Dagwi, ko ba to yila hin na yin a sè bemât Dagwi. Bwok-rwang o gwa to sé vɔk na mwa vemo e kahɛ kwɔn de be ra won na Darwey mot Yɛsu Kristi, de a sé Darwey mɛn tanga mwot arɔng:

³Tik na Dagwi Da mot tanga Darwey Yɛsu Kristi be dura a yin nerat mɛn, na be tɛ̀ yey min ye dyɛng.

⁴Me feng a Dagwi jojot yaga yin, yaga nerat mɛ de a dura a yin yi na Kristi Yɛsu.

⁵Yaga yi na sangâl nesa na yɛ, Dagwi a ga tɛ̀ in na yin a tɛ́ in bedaberey e kagwɛ gwong: Yin a vɔk tɔ̂k pyɛ̂ mwa yê Dagwi, ko yin e tɔk ha yɛ̄ mwa wɛshɛrɛk,

⁶yaga ba ga di yi na neken min wɔgɔ, nuha mot e ra Kristi ha sé mwin.

⁷Yaga ano, yin a bidɛ nɔrɔ hak de Dagwi e nɔngɔs wɛt a remo de yin a sé gyeng jeng de Darwey mot Yɛsu Kristi a rɔda ba dura tó mɛ wɛshɛrɛk.

⁸Yɛ a rɔda tɛ̀ na yin a tumal gak vɔk e yɛnɛ mo, yaga na be bin sɛ̀ pyɛ cak vyes e ra yin wɛt e tuk de Darwey mot Yɛsu Kristi e ba to vɛ̄ hɛ.

⁹Dagwi e ra pyɛ́ de a ha, ko e yɛ de a yila hin na yin a wuna nesa na Hwey mɛ Yɛsu Kristi, Darwey mot.

¹⁰À begwa, ma sé shonong e ra yin yi na retô Darwey mot Yɛsu Kristi wɔgɔ, vɔk in mwa hin nu hining na bemin. Hâ gas detidetu he sè e ji min wɛt. Ko wuna hin mwa naka, na yin a vɔk báre hining, na yin a tɛ̀ yey min e ra pyɛ jining arɔng.

¹¹À begwa hom, ma ga sɛ̀ há e ra yin yi na belɔ Kolowe wɔgɔ, yin e ragas nu na bemin.

¹²Me ye ngan: Kawɛ e ji min e ha há mo mɛ detu. Hwak e tē, “Me raa Bulus”, ko hwak e tē, “Me raa Apɔlɔs”, ko hwak, “Me raa Kefas”, ko hwak arɔng, “Me raa Kristi.”

¹³Ano ā! Ba ga gas Kristi zang ba arɛt? A sé e Bulus de bá kak ɛ e ra cɔ́gɔt yaga yin arɛt? Bá tɛ̀ a yin batisma e ji rezâ Bulus arɛt?

¹⁴Ma feng a Dagwi de ma tɛ̀ a hwak e ji min batisma wɛt sɛ̌ Kirispus tanga Gayus zɔng.

¹⁵Yaga ano, vit a mwat de e tɔk ye, ba tɛ̀ a yin batisma e ji reza hom.

¹⁶Yēe ey ow! Má tɛ̀ a belɔ Istifanus batisma arɔng; ko ma tɔk bare kɛ ma to tɛ̀ a mwat hwak batisma e bamâ vane wɛt.

¹⁷Kristi a tomo me na me tɛ̀sɛ a bemat batisma wɛt, ko yaga na me shara Yɛgɛt Yat. E ji shara mo, me ra fwom na neha de ne dura netsitsɛ̂ng tɔ̂k há wɛt, yaga na rehâ rekû Kristi e ra cɔ́gɔt-kak re kwon bidɛ reto de ra vɔk wɛt.

¹⁸Rehâ rekû Kristi e ra cɔ́gɔt-kak ra sé pyɛ netɔn zɔng na bemat de be weres; ko na wot de Dagwi e seres neken mot, reha mo ra sé retô Dagwi.

¹⁹Bà jɛk e Bwok-basa Dagwi wɔgɔ, “Ma rɔda wey na netsitsɛ̂ng vê netsitsɛng, ko ma rɔda tik tɔ̂k vê tɔ́k e hagat.”

²⁰Ano kwong, mwât netsitsɛng o a sé e gwa arɛt? Ko mwât basâ badu mo a sé e gwa arɛt? Ko mwât tô badu wo jeng yemo mo a sé e gwa arɛt? Dagwi a ga dura wɔgɔ, netsitsɛ̂ng jey yemo na sé netɔn zɔng!

²¹Yaga Dagwi, yi na netsitsɛng mɛ, a simo na bemât jey yemo be tɔk ɛ yi na netsitsɛng mɛn wɛt. Ko a di a jam a yɛ, na a bin sey vemo de ba sey tsak o na há de wot e shara, há hemo de ha sé pyɛ netɔn e bayîs bemat zɔng.

²²BeYuda be simo be dura a yɛn pyɛ̂ bes, ko BeGirik be simo be sɛ̀ netsitsɛng.

²³Ko wot, wot e shara reha e ra Kristi de ba kak ɛ e ra cɔ́gɔt. BeYuda be kyɛ́ ɛn reha mo, ko bemât yére dyuk be jut rɛ sede pyɛ netɔn zɔng.

²⁴Ko yaga vemo de Dagwi a ga yila hɛn, kɛ yɛn a sé BeYuda kɛ vê yére dyuk, reha mo ra sé Kristi, yɛ de a sé retô Dagwi na netsitsɛng mɛ arɔng.

²⁵Yaga pyɛ de bemat be bare, ya sé netɔ̌n Dagwi, ya dal netsitsɛ̂ng mwasi, ko pyɛ de be bare, ya sé negbɛrɛ̂k Dagwi, ya dal gap de mwasi a vɔk arɔng.

²⁶À begwa, bàre hin na yerê bemat de yin á kana sè jeng de Dagwi á yila hin. A sé pyak e ji min wɛt de bemât jey bá kana jut, yin a vɔk netsitsɛng. A sé pyak e ji min wɛt de bá vɔk reto, ko a to sé pyak e ji min wɛt de bá tɔs ɛn yi e nelɔ nerey.

²⁷Dagwi a kasa pyɛ yemo de bemât jey be bɛrɛng sede ya sé netɔn, yaga na a bin nɔ̂ng vemo de ba vɔk netsitsɛng rekyen. Ko a kasa pyɛ́ yemo de bemât jey be bɛrɛng sede ya vɔk gap wɛt, yaga na a bin nɔ̂ng vemo de ba vɔk gap rekyen.

²⁸Dagwi a kasa pyɛ́ yemo de bemât jey be bɛrɛng sede ya sé shɛl o, yēmo de be byɛs yɛ̄, ko be bɛrɛng, ya ka sé pyɛ cak mwa wɛt. A ra ano, yaga na a bin tɛ̀ pyɛ́ de bemât jey be bɛrɛng, ya sé ryey, ye sè yapyi.

²⁹Yi ano, vit a mwasi hwak de ê tɔk ra kaa e nuyêl Dagwi.

³⁰A sé yi na Dagwi de yin a sé sangal e ji nesa na Kristi Yɛsu, ko yɛ a tɛ̀ Kristi mo a sé netsitsɛng mot. Yi na Kristi mo, wot a tɛ́ ot cik e bayîs Dagwi, wot a tɛ́ ot bemât Dagwi, ko ba to vibis hot arɔng.

³¹Yaga ano, tik na a sè sede remo de bà jɛk e Bwok-basa Dagwi wɔgɔ, “Tik na yɛ womo de e simo a ra kaa, a ra kaa mo e ra pyɛ́ de Darwey a ra.”