Read berom 1 Kɔrintɔs 10 Bible Online

1 Kɔrintɔs 10 - berom bible

1 Kɔrintɔs 10

¹À begwa, me simo yin a tɔk pyɛ́ yemo de yà té na bedabeda mot de bà raa Mose. Rele rà bang ɛn mwa hɛn na re dul ɛn, ko mwa hɛn arɔng bà kwey e ji Gworep Swinang.

²Jeng de yɛn à sè e ji rele mo tanga e ji gworep o, bà tɛ̀ a yɛn mwa batisma. Batisma mo wà dura, yɛn à wuna hɛn na Mose.

³Mwa hɛn yɛn à re pyɛ́ yerê jining de ya yi na Dagwi.

⁴Ko mwa hɛn yɛn à sɔ nshi yerê nining de Dagwi à nɔng ɛn. Nshi de yɛn à sɔ na yi e gwofwa de Dagwi à dura a yɛn, gwomo de gwà raa hɛn, ko gwofwa mo gwɛ à Kristi.

⁵Ko mwa ano, Dagwi à vɔk yey pyɛng na bwarwey mɛn wɛt. Yaga ano, yɛn à kushu, ko bavin mɛn bà kyě shara hɛn kpɛɛ e hey.

⁶Pyɛ́ yemo ya sé a bemat pyɛ̂ dura na ye tusa hot yi e cwey ragâs pyɛ́ vyes tyɛng sede bedabeda mot bà ra.

⁷Ano kwong, yin sap cī wɛt, sede remo de bebak e ji mɛn bà ra. Sede remo de bà jɛk wɔgɔ, “Bemat o bà sangal na be re na be to sɔ; ko e bama mo, yɛn à sogo be hwo rɛ̌ yerê hê bemat de be sap Dagwi wɛt.”

⁸Wot ra nejwang wɛt, sede remo de behak e ji mɛn bà ra, ko gu kuru baba na vɛ batat (23,000) e ji mɛn bà ku tuk hining.

⁹Wot mara Dagwi wɛt, sede remo de behak mɛn bà ra, ko begwɔ̄m bà mɔbɔs hɛn.

¹⁰Yin shɔk jim wɛt, sede remo de behak mɛn bà ra, ko tom-lagwi de a weres na bemat à mɔbɔs hɛn.

¹¹Pyɛ́ yemo yà kana té na yɛn na ye sè a bemat pyɛ̂ dura; bà jɛk yɛ̄ na ye sè a wot pyɛ̂ tabak, yaga wot a sé sangal e jeng de jey ya vey bagât tala hɛ.

¹²Yaga ano, kawɛ mwat de e bare, a sé tumal gak, tik na a tē naka, a kwon gaba wɛt!

¹³Vit a setɔgɔs sehak de sa ga vey na yin sɛ̌ yere semo de bemât mwa ba ga tɔ́k ɛn na sɛ. Dagwi e sege há mɛ wɛt, ko a rɔda tik in na be mara hin na yerê mara de ha dal gâp niri min wɛt. Ko e jeng de ba sé mara hin o, a rɔda nɔng in gap na yin a tumal gak; yi ano, a rɔda nɔng in gwong hwak de yin a rɔda tɔk nusu hin ɛ̀ tyang.

¹⁴Yaga ano, à besâ yey hom, pyɛ min cak ye sè na sâp cī wɛt.

¹⁵Ma sé ha na yin sede bemat de ba sé tsɛng-tsɛng; yin pyɛ min, mara hin há de ma sé ha, na yin a di.

¹⁶Jeng de wot e re pyɛ̂ Darwey, wot e feng a Dagwi yaga keshi. E de sɔ̂ keshi mo, wot a sé wuna hot na Kristi yi na nemi mɛ. Ko e de kwɔrɔs kpam-tuk na wot a re, wot a sé wuna hot na rebêk Kristi.

¹⁷Regat kpam-tuk o ra sé rining zɔng. Yaga ano, wot mwa wot a sé rebek rining arɔng, mwa ano de wot a sé pyak, yaga wot mwa wot e re yi e regat rining rane mo.

¹⁸Bàre hin na BeIsrayɛl: Vemo de be re nenɔrɔ̂ yas de be yɛt vɔk na Dagwi be wuna nesa na Dagwi, yɛ de be nára nenɔrɔ mo vɔk na yɛ.

¹⁹Yin e bare, kɛ gyeng me tē, nɔrɔ̂ yas de be yɛt na be nɔ̂ng ci ha sé pyɛ cak arɛt? Kɛ me tē, ci mo pyɛ yɛ ya sé pyɛ cak arɛt?

²⁰Wey! Ko jeng de bemat de be tɔk Dagwi wɛt be nára nɔrɔ, be nára ano na be nɔng cēng hɛ, ko a sé e Dagwi de be nɔng ɛ wɛt. Ko me simo na yin a wuna nesa na cēng wɛt.

²¹Yin e tɔk sɔ keshi Darwey, na yin a to sɔ keshi cēng arɔng wɛt. Yin e tɔk re pyɛ́ e tebut Darwey tanga e tebut cēng arɔng wɛt.

²²Kɛ wot e simo wot a tɛ̀ shôm Dagwi ye sogo arɛt? Yin e bare, wot a dal ɛ na gap arɛt?

²³Bemat behak bê ye, “Ba simo a wot na wot ra kayɛ pyɛ.” Ko mwin, a sé e kayɛ pyɛ de ya vɔk a yin nerat wɛt. “Ba simo a wot na wot ra kayɛ pyɛ” — ko a sé e kayɛ pyɛ wɛt de ye tɛ̀, yin a re nuyel e gwông raa.

²⁴Mwat hwak a jāma pyɛ de yê sè a yɛ ryat nju mɛ wɛt, ko tik na a jāma pyɛ de yê sè a bemat behak ryat arɔng.

²⁵Yin ê tɔk re kayɛ pyɛ de be rɛsɛl e kwɔ̂n rɛsɛ̂l banama sana rangal pyɛ de yê tɛ̀ yey min ye sè kàt.

²⁶Yaga bà jɛk e Bwok-basa Dagwi wɔgɔ, “Jey o ya sé yê Darwey tanga kayɛ pyɛ de ya sé e jî yɛ.”

²⁷Ka sede mwat de a sé mwat-raa wɛt a rini hin pyɛ̂ re, ko yin a simo na yin a wɔ́, tik na yin re kayɛ pyɛ de ba nɔng in sana rangal pyɛ de yê tɛ̀ yey min ye sè kàt.

²⁸Ko ka sede mwat hwak a yang in, “Ba ga kana ra sekwit na pyɛ́ yemo”, yin re yɛ̄ wɛt yaga mwat de a ha a yin o tanga yaga bare yey arɔng —

²⁹ma sé ha e ra bare yêy mwat wane mo ko e ra mín wɛt. Kɛ gyeng mwat hwak ê ye, “Yaga sɛ́ de bare yêy mwat hwak hê tɔk vɔk reto e ra me arɛt?

³⁰Ka sede ma feng a Dagwi yaga pyɛ́ mo, ko yaga sɛ́ de be ha há ves e ra me yaga pyɛ́ de ma feng a Dagwi yaga yɛ̄ arɛt?”

³¹Ano kwong, kayɛ pyɛ de yin e ra, kɛ a sé rê pyɛ́ kɛ a sé sɔ̂ pyɛ́ cak ayi, rá in yɛ̄ mwa e gwong de gwo tɛ̀ be nɔ̂ng Dagwi nerey.

³²Yin sangal e gwong de gwô tɛ̀ bemat behak be ye bugurɛk wɛt, kɛ ba sé BeYuda, kɛ bemât yére dyuk, kɛ bemât ekilisiyâ Dagwi ayi.

³³Rá in tyɛng sede remo de me ra: Me tē ngyɛ́k na me pɛngɛ a kawɛ mwat yey e kagwɛ gwong. Yaga me jāma nerât tó hom wɛt ko nerât bemat pyak, yaga na be bin sey neken mɛn.