Read berom 1 Kɔrintɔs 11 Bible Online

1 Kɔrintɔs 11 - berom bible

1 Kɔrintɔs 11

¹Masa hin me, sede remo de me masa Kristi.

²Me somo hin, yaga yin e bare na me e ji kayɛ pyɛ. Yin e to raa bása detidetu de ma basa a yin arɔng.

³Ko di, me simo na yin a tɔk, mwât nuyêl kawɛ rwas a sé Kristi, ko mwât nuyêl hwā a sé rwas, ko mwât nuyêl Kristi a sé Dagwi.

⁴Kawɛ mwat de e ra won kɛ e zarap na Dagwi na rato mɛ e banga a nɔ̂ng Kristi, mwât nuyel mɛ, nerey wɛt.

⁵Ko kawɛ hwā de e ra won na rato mɛ pyot, kɛ e ha há de ha yi na Dagwi e gwong gwomo arɔng a nɔ̂ng rwas mɛ de a sé mwât nuyel mɛ nerey wɛt; yɛ a sé tyɛng na hwā de ba ga wula a yɛ rato.

⁶Ka sede hwā a bang rato mɛ wɛt, ko tik na a tɛ̀ be yɛt a yɛ tot mɛ. Ko sede remo de a sé pyɛ byɛs na hwā a tɛ̀ be yɛt a yɛ tot mɛ kɛ be wula a yɛ hɛ, tik na a bang rato mɛ.

⁷A sé tyɛng na rwas a bang rato mɛ wɛt, sede remo de ba yong ɛ sede Dagwi, ko a dura gbɔng nerât Dagwi o arɔng. Ko hwā a dura gbɔng nerât rwas.

⁸Yaga Dagwi a yong rwas yi e hwā wɛt, ko a yong hwā yi e rwas.

⁹A to yong rwas yaga hwā wɛt, ko a yong hwā yaga rwas.

¹⁰Pyɛ ma yemo de ya tɛ̀, a jam na hwā a bang rato mɛ, na a bin dura mɛ̀ retô rwas mɛ e ra yɛ. Tik na a ra ano yaga betom-lagwi.

¹¹Ko e ji sangâl nesa mot na Darwey, hwā a sé pyɛ cak wɛt sana rwas, ko rwas arɔng a sé pyɛ cak wɛt sana hwā.

¹²Yaga, sede remo de ba yong hwā yi na rwas, ko e hwā arɔng de a tɔ rwas. Ko pyɛ̂ mwa ye yi na Dagwi.

¹³Mara hin na yin a di: A jam na hwā a ra a Dagwi won sana bang rato mɛ arɛt?

¹⁴Wot e di yi na negwɔn pyɛ̂ jey yemo wɔgɔ, ka sede rwas a vɔk tot lis, ko ha sé pyɛ de yê tɛ̀ be byɛs ɛ.

¹⁵Ko ka sede hwā a vɔk tot lis, ha sé a yɛ pyɛ ryat. Yaga ba nɔ̂ng hwā tot lis na a bang ɛ mɛ̀.

¹⁶Ka sede mwat hwak e simo a ra cuna e ra há hemo, tik na a tɔk, wot e raa negwɔn o nehak wɛt. Ko be-ekilisiyâ Dagwi arɔng yɛn e to raa negwɔn o nehak wɛt.

¹⁷E ji pyɛ́ yemo de ma sé nɔng in nu na yin a ra, ma sé ha a yin, me somo hin wɛt. Yaga negwɔn de yin e ragas e de tula min ne lashe pyɛ́ e tô yông yɛ̄.

¹⁸E mɛsɛng o, ma wok, jeng de yin bemât ekilisiya yin e tula hin, yin e gas in e ra pyɛ́ detidetu. Me bare, neha mo nehak na sé tsak o.

¹⁹A sé gbing-gbing na yin a gas in e ra pyɛ́ cak e tē min, yaga na, yi e gwong gwane, be tɔk vemo de be raa Kristi na yey mɛn mwa.

²⁰Jeng de yin e tula hin, a sé e pyɛ̂ Darwey de yin e re wɛt.

²¹Yaga e jeng de yin e re yɛ̄, kawɛ e ji min e hwo re pyɛ́ mo myɛ zɔng. Yaga ano, hwak e nàra na vyong, ko hwak e feng na pyɛ́ mo de a ga sɔ.

²²Kée! Yin a vɔk nelɔ min de yin a rɔda re na yin a sɔ e ji nɛ wɛt arɛt? Kɛ yin e byɛs ekilisiyâ Dagwi arɛt? Yin e to tɛ̀ vemo de ba vɔk pyɛ wɛt be sè pyɛ rekyen e nuyel min arɛt? Mê yang in ala arɛt? Yin e bare, mê somo hin yaga pyɛ yemo arɛt? Wey, mê somo hin ko tyɔng wɛt!

²³Yaga ma ga kana sey basa hemo yi na Darwey de ma ga nɔng in wɔgɔ: Darwey Yɛsu, e naturuk nane de ba row ɛ, a jut kpam-tuk.

²⁴E bama de a feng a Dagwi, a kwɔrɔs wɛ, ko a ye, “Rebek hom a remo de me nɔng yaga yin. Ragas hin ano, na yin a bare mɛ̀ na me.”

²⁵Ano arɔng, e bamâ rê pyɛ́, a jut keshi, a ye, “Keshi kemo ka sé wuna-na-sira pas de Dagwi a man na nemi hom. Kayɛ jeng de yin e sɔ kɛ, ragas hin ano, na yin a bare mɛ̀ na me.”

²⁶Yaga kayɛ jeng de yin e re kpam-tuk womo, na yin a sɔ keshi mo, yin e shara rehâ rekû Darwey sɛ̌ jeng de e ba to vɛ̄ hɛ.

²⁷Yaga ano, kawɛ mwat de e re kpam-tûk Darwey kɛ e sɔ keshi mɛ e gwong de gwa jam wɛt a ga ra renɛ̂n kyɛ́ ɛ nà nɔ̂ng rebêk Darwey tanga nemi mɛ nerey.

²⁸Ano kwong, tik na kawɛ mwat a mara tó mɛ gyam na a re kpam-tuk o na a sɔ keshi mo.

²⁹Yaga, ka sede e re na a sɔ sana tɔk, a sé e rebêk Darwey a remo, ko a tɛ̀ na Dagwi a gang ɛ na shɔt yi na re na sɔ mo.

³⁰Pyɛ ma yemo de ya tɛ̀, pyak e ji min ba vɔk gap wɛt, ko be to rō ɛn arɔng. Ko behak e ji min ba ga kushu.

³¹Ko ka wot a yâng mara bato mot gyam, ka Dagwi a yâng ba ra a wot shɔt wɛt.

³²Darwey e ra a wot shɔt, ko e tabak hot arɔng, yaga na be bin ba gang ot na shɔt tanga bemât jey wɛt.

³³Yaga ano, à begwa hom, jeng de yin e tula hin na yin a re pyɛ̂ Darwey o, gyéng in bemín.

³⁴Ka sede mwat hwak e wok vyong, ko tik na a tānga re pyɛ́ e lɔ mɛ, yaga na Dagwi a kwon gang in na shɔt wɛt yaga negwɔn de yin e ra e de tula min o. Ko jeng de ma vey wul, ma rɔda to gwɛ̌ vo a yin redu e ra pyɛ́ mo cak de yin a rɔda ra.