Read berom 1 Kɔrintɔs 12 Bible Online

1 Kɔrintɔs 12 - berom bible

1 Kɔrintɔs 12

¹Ko di, à begwa, e rà rehâ nenɔrɔ ne Gabik Dagwi — me simo na yin a sè e ji dunus wɛt.

²Yin a tɔk, jeng de yin á sè bemat de ba tɔk Dagwi wɛt, bemat ba doysa hin e begwong detidetu na yin a ye rɛng e de sâp cī de ye tɔk ha wɛt.

³Yaga ano, me simo na yin a tɔk, vit a mwat de Gabik Dagwi ha vɔk reto e ra yɛ de ê ye, “Bē dùsa Yɛsu!” Ko vit a mwat de a tɔk ye, “Yɛsu a sé Darwey”, sɛ̌ a ye ano yi na retô Gabik Jɛrɛ.

⁴Nezap nenɔrɔ̂ Gabik Dagwi detidetu na sɛ́, ko mwa ne yi na Gabik hining o.

⁵Nezâp tom detidetu na sɛ́, ko mwa na sé yaga Darwey gwining o.

⁶Nezap begwông râ fwom detidetu na sɛ́, ko a sé e Dagwi gwining o de e nɔ̂ng kawɛ mwat retô râ fwom o mwa.

⁷Ko Gabik Dagwi he dura a kawɛ mwat pyɛ cak, yaga na bwang bemât mwa be sɛ̀ nerat yi e pyɛ́ mo.

⁸Gabik o he nɔ̂ng hwak reto na a ha na netsitsɛng, ko he nɔ̂ng hwak reto na a ha na tɔ́k.

⁹E Gabik hining o de he nɔ̂ng hwak reto na a sey tsak o, Dagwi ê tɔk ra kayɛ pyɛ, ko he nɔ̂ng hwak nɔrɔ̂ tɛ́sɛ bemat tyang.

¹⁰He nɔ̂ng hwak retô ragâs pyɛ̂ bes detidetu, ko he nɔ̂ng hwak reto na a zarap. He nɔ̂ng hwak reto na a gas pyɛ́ de ye yi na Gabik Dagwi na yēmo de ye yi na hɛ wɛt. He nɔ̂ng hwak reto na a ha na balem detidetu de a tɔk vɛ wɛt, ko he to nɔ̂ng hwak reto na a doysa há mo.

¹¹Mwa pyɛ́ yemo ya sé fwôm Gabik hining hemo mo, ko he nɔ̂ng kawɛ mwat nɔrɔ tyɛng na pyɛ de he simo.

¹²Rebek ra sé pyɛ jining, mwa ano de ba yong rɛ na nedem pyak. Ko nedem o pyak na wuna hɛn na ne tɛ́ ɛn rebek rining. A sé tyɛng ano na Kristi arɔng.

¹³Yaga wot mwa, kɛ wot a sé BeYuda kɛ bemât yére dyuk, kɛ wot a sé besam kɛ nèy lɔ, wot a ga tɛ́ ot sede rebek rining e jeng de ba ga ra a wot batisma yi na Gabik hining o. Ko wot mwa wot a ga sey Gabik hining o sede wot a ga sɔ hɛ.

¹⁴Ko di, ba yong rebek na re sè dem hining wɛt, ko ba yong rɛ na re sè nedem pyak.

¹⁵Ka sede bwol gwa yâng ye, “Remo de ma sé vwɔ wɛt, ma sé wo rebek o wɛt”, ko há hemo ha rɔda tɛ̀ gwo tik nà sè dem rebek o wɛt.

¹⁶Ko ka sede fwong gwa yâng ye, “Remo de ma sé yis wɛt, ma sé wo rebek o wɛt”, ko há hemo ha rɔda tɛ̀ gwo tik nà sè dem rebek o wɛt.

¹⁷Ka rebek o mwa ra yâng sé yis, ka mwat o a rɔda sɛ̀ gwông wokos há e gwa arɛt? Ko ka rebek o mwa ra yâng sé fwong, ka mwat o a rɔda sɛ̀ gwông wokos nesang e gwa arɛt?

¹⁸Ko mwin, Dagwi a ga ngyɛrɛ nedem rebek, ko a tɛ̀ kahɛ mo e kwɔn de e simo na he sè e rebek o.

¹⁹Ka mwa nedem o na yâng sé dem hining, ka rebek o ra yâng sé e gwa arɛt?

²⁰Ko mwin, nedem o na sé pyak, ko rebek o ra sé rining zɔng.

²¹Ano kwong, vit a gwong na yis he yâng vwɔ, “Me simo hwo wɛt!” Vit a gwong arɔng na rato wo yâng bol, “Me simo hin wɛt!”

²²Ko pyɛ de ye té ya sé ngan: Nedem rebek de wot e bɛrɛng nɛ sede na vɔk gap yɛt wɛt, e nɛ de wot ê tɔk ra pyɛ cak sana nɛ wɛt.

²³Ko nedem de wot e bɛrɛng, nà mâk vɔk nerat wɛt, e nɛ de wot e dal na té naka na nɛ. Ko nedem de wot e bɛrɛng, nà mâk sé nerat e bɛrɛng wɛt, e nɛ de wot e dal na té hywɛ na nɛ arɔng.

²⁴Ko nedem mot de na sé pyɛ bɛrɛng, be simo na be tē naka na nɛ e gwong hwak detu wɛt. Ko Dagwi a ga wuna nedem rebek o mwa, ko a nɔ̂ng nedem de nà vɔk nerat yɛt wɛt nerat de na dal.

²⁵Yaga ano, vit a pyɛ de yê vey na gas e ji rebek o, ko nedem rɛ detidetu ne bɛrɛng bemɛn e gwong gwining o.

²⁶Ka sede dem o hak ha sé sɔ reyɔm, ko mwa nedem o ne sɔ rɛ tanga hɛ. Ko ka sede ba nɔ̂ng dem o hak nerey, ko mwa nedem o na vɔk yey pyɛng tanga hɛ.

²⁷Ko di, yin mwa yin a sé rebêk Kristi, ko kawɛ e ji min a sé dem rɛ.

²⁸E ji ekilisiya, Dagwi a ga tɛ̀ kawɛ mwat a vɔk fwom mɛ: E mɛsɛng o, a tɛ̀ betom Yɛsu Kristi. A tɛ̀ vê neba, à bezarap Dagwi, ko vê netat, à bemât basa. Ano arɔng, a tɛ̀ bemât ragâs pyɛ̂ bes, tanga vemo de ba vɔk retô tɛ́sɛ bemat tyang, tanga vemo de be tɔk sɛlɛ behak, tanga vemo de be tɔk kyè na tom detidetu naka, tanga vemo de be ha na balem detidetu de ba tɔk vɛ wɛt.

²⁹Mwa bemat o ba sé betom Yɛsu Kristi, kɛ bezarap Dagwi, kɛ bemât basa arɛt? Mwa bemat o be tɔk ragas pyɛ̂ bes,

³⁰kɛ ba vɔk retô tɛ́sɛ bemat tyang, kɛ be tɔk ha na balem de ba tɔk vɛ wɛt, arɛt? Mwa bemat o be tɔk doyo hâ balem vane mo arɔng arɛt?

³¹Ko yē in ngyɛ́k, na yin a vɔk nenɔrɔ de na dal e ji nenɔrɔ detidetu mo na nerey. Ko a remo, ma rɔda dura a yin gwong de gwa dal mwa na nerat.