Read berom 1 Kɔrintɔs 14 Bible Online

1 Kɔrintɔs 14 - berom bible

1 Kɔrintɔs 14

¹Jāma hin na gap min mwa na yin a tɛ̀ yey na bemat, ko yē in ngyɛ́k e de jāma nenɔrɔ̂ Gabik Dagwi, a kat mɛ̀ nɔrɔ hê zarap.

²Kawɛ mwat de e ha na relem de a tɔk rɛ wɛt e ha na bemat wɛt, ko e ha na Dagwi. Mwin, vit a mwat de e tɔk pyɛ́ de e ha. E ha yi na Gabik Dagwi pyɛ́ de ya sé yê neyaang.

³Ko kawɛ mwat de e zarap e ha na bemat, na a sɛlɛ hɛn na be re nuyel e gwông raa, na a gwɛ̌ a yɛn gap, na a to wɔrɔk hɛn arɔng.

⁴Mwat de e ha na relem de a tɔk rɛ wɛt e sɛlɛ tó mɛ zɔng; ko yɛ womo de e zarap e sɛlɛ bemât ekilisiya.

⁵Me simo na kawɛ e ji min a ha na balem de a tɔk vɛ wɛt, ko me dal na simo na yin a zarap. Yɛ womo de e zarap a dal womo de e ha na relem de a tɔk rɛ wɛt, sɛ̌ ba sɛ̀ mwat de ê doyo há mo, yaga na bemât ekilisiya be bin sɛ̀ sɛlɛ yi na há mo.

⁶Ko di, à begwa, ka ma vey e hàne na yin, ko me ha na balem de ma tɔk vɛ wɛt, ko yin a rɔda sɛ̀ nerât sɛ́ yi na me arɛt? Yin a rɔda sɛ̀ pyɛ cak wɛt, sɛ̌ ma vey dura a yin pyɛ cak de Dagwi a dura a me yɛ wɛshɛrɛk, kɛ ma vey na pyɛ cak de ya rɔda gwɛ̌ a yin tɔ́k, kɛ ma zarap kɛ ma basa a yin rehâ Dagwi ayi.

⁷A sé tyɛng ano na pyɛ́ de ya vɔk neken wɛt, yēmo de ye tosho sede ju kɛ yom: Yi e rɛ̌ de mwat a rɔda tɔk lwɛ̄lɛ de ba sé ra na yɛ̄ sana wok tɔ̀ mɛn o kyɛrɛng arɛt?

⁸Ko ka sede durum wo tosho na fwɔ rɛng-rɛng wɛt, e wà de a rɔda yóng ɛ vɔk e de como arɛt?

⁹A sé tyɛng na yin ano arɔng: Ka sede yin e ha na balem de bemat bê wok vɛ kyɛrɛng wɛt, yi e rɛ̌ de mwat hwak a rɔda tɔk pyɛ de yin e ha arɛt? Yin a rɔda sè ha e gul zɔng à wane.

¹⁰Mwin, yére balem ya sé detidetu e jey yemo, ko ba tɔk neyɛnɛ̂ pyɛ de karɛ relem o re ha.

¹¹Ko ka sede ma tɔk nezɛɛt neha de mwat hwak e ha wɛt, ko ma sé mwat duk na mwat de e ha há mo, ko yɛ a sé a me mwat duk arɔng.

¹²A sé tyɛng na yin ano arɔng. Sede remo de yin a vɔk gananâng sɛ̂ nenɔrɔ̂ Gabik Dagwi, yē in ngyɛ́k na yin a shǎl e de râ fwom na nenɔrɔ de ne sɛlɛ bemât ekilisiya na be re nuyel e ji tɔ̂k pyɛ̂ Dagwi.

¹³Yaga ano, tik na mwat de e ha na relem de a tɔk rɛ wɛt a ra won, yaga na be nɔng ɛ nɔrɔ̂ doyo há mo.

¹⁴Yaga, ka sede ma sé ra won na relem de ma tɔk rɛ wɛt, ko a sé e yey hom de ye ra won o, ko báre hom he ra pyɛ cak wɛt.

¹⁵Yaga ano, mê ra sɛ́ arɛt? Ma rɔda ra won na relem de re yi na Gabik Dagwi, ko ma rɔda to me ra hɛ na báre hom arɔng. Ma rɔda ra lwɛ̄lɛ na relem de re yi na Gabik Dagwi, ko ma rɔda to ra gwɛ na báre hom arɔng.

¹⁶Ka sede hwà sé feng a Dagwi na relem de re yi na Gabik Dagwi, yi e rɛ̌ de mwat de a sé e tē min ko a tɔk pyɛ de yin a sé ra wɛt a rɔda ye “Ano” e rà won mō mo arɛt? A rɔda tɔk ye “Ano” wɛt, yaga a tɔk pyɛ de hwà sé ha wɛt.

¹⁷Mwa ano de won mō hê feng o ha sé naka, ko yɛ wane mo a rɔda sɛ̀ sɛlɛ hak wɛt.

¹⁸Ma feng a Dagwi de me ha na balem de ma tɔk vɛ wɛt me dal in mɛ̀ mwa.

¹⁹Ko mwa ano, e dem tulâ bemât ekilisiya a rɔda dal a me na me ha neha netungun de bemat ba rɔda tɔk nɛ, na me basa a yɛn mɛ̀, de mê ha neha gu kuru (10,000) e relem de ma tɔk rɛ wɛt.

²⁰À begwa, yin re nuyel e de bare sede nèy wɛt. Sè in sede nèy-vɔ e ra râ pyɛ́ vyes. Ko tik na báre min he sè hê bemat de ba ga vey.

²¹E Bwok-basa Dagwi bà jɛk wɔgɔ, “Ma rɔda ha na bemat vemo yi na bemât balem baduk; ma rɔda ha yi na hâ nû bemat beduk. Ko mwa ano, yɛn a rɔda tɛ̀ tong na be wok há hom wɛt. E Darwey de a ye ano.”

²²Yaga ano, ka sede be ha na balem de ba tɔk vɛ wɛt, há mo ha sé pyɛ dura vɔk na vemo de ba sé bemat-raa wɛt; ko yaga vemo de ba sé bemat-raa, ha sé a yɛn pyɛ dura wɛt. Ko ka sede be zarap, há mo ha sé pyɛ dura vɔk na vemo de ba sé bemat-raa; ko yaga vemo de ba sé bemat-raa wɛt, ha sé a yɛn pyɛ dura wɛt.

²³Sede ngan: Mwa yin bemât ekilisiya yin a tula hin, ko kawɛ e ji min a hwo ha na balem de a tɔk vɛ wɛt. Ka sede bemat de ba tɔk pyɛ de yin a sé ra wɛt, kɛ behak de ba sé bemat-raa wɛt, ba vey e kwɔn o, ko mwin, yɛn a rɔda ye, ba ga tɛ̀ a yin vɔ e yey.

²⁴Ko ka sede mwa hin yin a sé zarap, ko mwat de a sé mwat-raa wɛt, kɛ mwat hwak de a tɔk pyɛ de yin a sé ra wɛt, a vey e kwɔn de yin a sé ɛ̀, há min o mwa ha rɔda dura a yɛ wɔgɔ, yɛ a sé mwât banɛn, ko ba rɔda ra a yɛ shɔt yi na há min o.

²⁵Ko ha rɔda dura pyɛ̂ neyaàng yey mɛ wɛshɛrɛk arɔng. Yaga ano, a rɔda gaba e vwel, na a re a Dagwi fongol, ê tē, “Mwin, Dagwi a sé e tē min!”

²⁶À begwa, mê ye ala arɛt? Jeng de yin e tula hin, tik na kawɛ e ji min a vɔk pyɛ cak: Hwak a vɔk lwɛ̄lɛ, ko hwak a basa hâ Dagwi, hwak a ha e ra pyɛ de Dagwi a dura a yɛ, ko hwak a ha na relem de a tɔk rɛ wɛt, ko hwak a doyo há mo. Tik na be ra pyɛ́ yemo mwa, yaga na be gwɛ̌ a bemât ekilisiya mo mɛ̀ gap.

²⁷Ka sede bemat behak bê ha na balem de ba tɔk vɛ wɛt, ko tik na bemat beba, ko be dal betat wɛt, be ha na balem o. Tik na yɛn a raa bemɛn vivining, ko be sɛ̀ mwat de ê doyo há mo arɔng.

²⁸Ko ka sede vit a mwat de ê doyo há mo, ko tik na mwat de ê ha na relem de a tɔk rɛ wɛt a sǎ yuu e de tula mo. Tik na a ha na tó mɛ pyɛ mɛ zɔng tanga na Dagwi arɔng.

²⁹Tik na bezarap Dagwi beba kɛ betat be ha, ko bwang bemat o bē masa na nehywɛ pyɛ́ de vane mo ba ha.

³⁰Ka sede Dagwi a dura a mwat hwak de a sé sangal pyɛ cak, ko tik na mwat de a sé ha a ka tik há mo e ngyen.

³¹Yin mwa yin ê tɔk zarap, yin a raa mɛ̀ bemín vivining, yaga na mwa bemat be masa pyɛ cak yi e há mo, na be to gwɛ̌ a yɛn gap arɔng.

³²Bemat de ba vɔk nɔrɔ̂ zarap, tik na be vɔk reto e ra nɔrɔ mo.

³³Yaga Dagwi a sé womo de e ra pyɛ́ kpɛɛ wɛt, ko e simo bemat be sangal tyang na bemɛn. E ji mwa be-ekilisiyâ bemât Dagwi,

³⁴tik na beha be sǎ yuu e ji tula mo. Ba simo a yɛn na yɛn a hanat wɛt, ko yɛn a dyɛng bato mɛn, sede remo de bà jɛk e Bwok-basa Badu.

³⁵Ka sede yɛn e simo be rangal na be tɔk pyɛ cak, ko tik na yɛn a rangâl beras mɛn e lɔ. Yaga a sé pyɛ rekyen na hwā a ha e de tulâ ekilisiya.

³⁶Hâ Dagwi ha susu na yin arɛt? Kɛ e yin zɔng de há mo ha ga wul na yin arɛt?

³⁷Ka sede mwat hwak e bare, a sé zarap Dagwi kɛ a vɔk nɔrɔ Gabik Dagwi, ko tik na yɛ a tɔk, pyɛ́ yemo de ma sé jɛk a yin ya sé redu Darwey.

³⁸Ko ka sede mwat o a kyɛ́ ɛ há hemo ngan o, ko tik na be kyɛ́ ɛn hɛ́ arɔng.

³⁹Yaga ano, à begwa hom, yē in ngyɛ́k na yin a zarap; ko yin dul bemat de be ha na balem de ba tɔk vɛ wɛt.

⁴⁰Ko bē ra kayɛ pyɛ e gwong de gwa jam, de gwa sé yɛɛlɛl arɔng.