Read berom 1 Kɔrintɔs 15 Bible Online

1 Kɔrintɔs 15 - berom bible

1 Kɔrintɔs 15

¹Di in, à begwa, me simo na me to bare a yin na Yɛgɛt Yat de ma kana shara a yin. Yin a sey yɛ̄, ko yin a sé tumal gak e de raà yɛ̄.

²A sé yi na Yɛgɛt Yat o de be sey neken min, ka sede yin e re nuyel na kaba na gap há de ma shara a yin. Ka ano wɛt, ka sêy tsak o min ha sé yapyi zɔng.

³Yaga há de ma sey raane, e hɛ de ma to nɔng in arɔng, yaga e hɛ de ha dal mwa na nerey. Há ma het ngan: Kristi a ku yaga banɛn mot tyɛng na pyɛ de bà jɛk e Bwok-basa Dagwi.

⁴Ba lɛrɛ hɛ e sak, ko ba to sene hɛ tuk hê tat tyɛng na pyɛ de bà jɛk e Bwok-basa Dagwi.

⁵Ko a dura tó mɛ na Kefas, ko a to dura a betom mɛ kuru na vɛ beba tó mɛ arɔng.

⁶E bama mo, a dura a begwa bemat-raa de ba dal naga betungun (500) tó mɛ e jeng jining. Bwarwey mɛn ba rɔngɔl na neken a remo, mwa ano de behak mɛn ba ga kushu.

⁷Ano arɔng, a dura tó mɛ na Yakɔp, ko e bama mo, na mwa betom mɛ.

⁸E yɛnɛ mo mwa, a de dura a me tó mɛ arɔng, me de ma sé sede hwey de ba tɔ̀ hɛ e jeng o wɛt.

⁹Yaga e me de ma radɛ me bwang betom Yɛsu mo mwa. Ma ka vey na be yang me, à tom mɛ wɛt, yaga ma kana tak a bemât ekilisiyâ Dagwi reyɔm.

¹⁰Ko a sé yi na nerat de Dagwi a dura a me de ma sé yerê mwat de ma sé a remo. Ko nerat de a dura a me mo ná sè yapyi wɛt. Ná tɛ̀, ma ra fwom na gap hom na me dal mɛ̀ bwang mɛn mwa. Ko á sè e me de ma ra ano wɛt, á sè e nerât Dagwi de na sé na me.

¹¹Yaga ano, kɛ a sé e me de ma shara Yɛgɛt Yat o kɛ e yɛn, mwa gwining o. A sé e pyɛ ma yemo de wot a shara yɛ, ko e yɛ de yin a sey tsak o na yɛ.

¹²Sede remo de be shara reha wɔgɔ, ba ga sene Kristi yi e reku, ko yi e rɛ̌ de behak e ji min be tē, ba rɔda ba sene vemo de ba ga kushu wɛt arɛt?

¹³Ka sede vemo de ba ga kushu ba yâng sene wɛt, ko hemo he dura, ba ka sene Kristi mwa wɛt a wane.

¹⁴Ko ka sede ba yâng sene Kristi wɛt, hemo he dura, há de wot e shara ha yâng sé yapyi zɔng, ko sêy tsak o mot ha yâng sé yapyi arɔng.

¹⁵Ko a yâng to sé: Wot a ga tɛ́ ot bemât nuha vê bɔs e ra Dagwi, yaga wot a ga nɔng nuha wɔgɔ, Dagwi a sene Kristi yi e reku. Ko ka a sé mwin, vit a séne yi e reku, ko hemo he dura, Dagwi a yâng sene Kristi wɛt arɔng.

¹⁶Yaga, ka sede vit a séne yi e reku, ka ba ga sene Kristi yi e reku wɛt arɔng.

¹⁷Ko ka sede ba ga sene Kristi wɛt, ka sêy tsak o min ha yâng sé yapyi zɔng, ko banɛn min ba yâng rɔngɔl na yin.

¹⁸Ko a yâng to sé, mwa vemo de ba ga kana sey tsak o na Kristi gyam na be kushu ba ga vusa hɛn gbak-gbak.

¹⁹Ka a sé yaga neken nemo zɔng de wot a sɛt yey mot e ra Kristi, ka wot a yâng sé pyɛ nemwishish wot dal mɛ̀ bwang bemât mwa.

²⁰Ko e ji hâ mwin, ba ga sene Kristi yi e reku. Ba sene hɛ e mɛsɛng o na a sè pyɛ de yê tɛ̀ be tɔk tsɛng-tsɛng, ba rɔda sene mwa vemo de ba ga kana kushu arɔng.

²¹Tyɛng sede remo de reku ra yi na mwasi, ano arɔng, séne yi e reku ha yi na mwasi.

²²Yaga, sede remo de bemât mwa be kushu, yaga yɛn a wuna yére na Adam, ano arɔng, ba rɔda ba sene bemât mwa na neken, yaga yɛn a wuna hɛn na Kristi.

²³Kawɛ mwat e ba sene e jeng o myɛ: Yɛsu a sé wo mɛsɛng, ko e bama mo, jeng de e ba to vɛ̄ hɛ, mwa vemo de ba sé bemɛ ba rɔda ba raa arɔng.

²⁴E bama mo, jeng ye yɛnɛ mo ya rɔda ba pom. E jeng o, Kristi a rɔda wey na yére begabîk mwa: Vemo de be re negwɔm, na vemo de ba vɔk reto, tanga vemo de ba vɔk gap. Ano arɔng, a rɔda nɔ̂ng Dagwi Da segwɔm o.

²⁵Yaga a sé gbing-gbing na Kristi a re negwɔm sɛ̌ jeng de Dagwi a re mwa bemât repugu mɛ na a tɛ̀ ɛn e nɛ̂n bol Kristi mo.

²⁶Ko mwât repugu wo yɛnɛ mo de ba rɔda wey na yɛ, à reku.

²⁷Sede remo de bà jɛk e Bwok-basa Dagwi wɔgɔ, “Dagwi a ga tɛ̀ kayɛ pyɛ e nɛ̂n bol mɛ.” Ko di, ka sede ba ye, ba ga tɛ̀ “kayɛ pyɛ” e nɛn mɛ, ko a sé wɛshɛrɛk, hane ha tɛ̀ Dagwi e ji pyɛ́ yane mo wɛt, yaga e yɛ̀ de a tɛ̀ kayɛ pyɛ mo e nɛ̂n retô Kristi.

²⁸Jeng de a ga tɛ̀ kayɛ pyɛ e nɛ̂n retô Kristi mo, Hwey o pyɛ hɛ ha rɔda tɛ̀ tô hɛ e nɛ̂n retô Dagwi, de a ga kana tɛ̀ kayɛ pyɛ e nɛ̂n Hwey o. Yaga na Dagwi a bin re negwɔm e ra rak pyɛ̂ mwa.

²⁹Di, ka sede vit a séne yi e reku, ko e sɛ́ de vemo de be tɛ̀sɛ a yɛn batisma e tô vemo de ba ga kushu bê sɛ̀ arɛt? Ka sede a sé mwin, bê sene vemo de ba ga kushu wɛt, ko yaga sɛ́ de be tɛ̀sɛ a bemat batisma e to mɛn arɛt?

³⁰Ko di wot, yaga sɛ́ de wot e sangal e nû reku kayɛ jeng arɛt?

³¹À begwa, me ha a yin vit à jɔgɔ, me nɔng tó hom na me ku kahɛ tuk. Ma ye ano, yaga ma sé ra kaa, yaga yin a ga wuna nesa na Kristi Yɛsu, Darwey mot.

³²E Ɛfɛsus ma sɛ̀ negbang na bemat behak sede ma sè ra yol na ngyāma. Ka sede ma ra ano zɔng yaga pyɛ de bemasi be di, ya sé naka, ko pyɔlɔ hom à sɛ́ arɛt? Ka sede ba sene vemo de ba ga kushu wɛt, ka wot a yâng ye, “Tik na wot a re na wot a sɔ, yaga nahwol wot a rɔda ba kushu.”

³³Mwat hwak a kwon kwɛlɛng hin wɛt: “Besa beves be lashe negwɔn nerat ne mwat.”

³⁴To in e ji nehywɛ min, na yin a tik ragâs banɛn, yaga behak ba sɛ́ de be dunus Dagwi. Me ha ano, yaga na me tɛ̀ a yin rekyen.

³⁵Kɛ gyeng mwat hwak a rɔda rangal, “E rɛ̌ de be sensa vemo de ba ga kushu mo arɛt? Yɛn a rɔda vɔk yerê rɛ̌ rebek arɛt?”

³⁶À hwo tɔn! Pyɛ de hwà tus ye tɔk tulu wɛt, sɛ̌ ya ku e ngyen.

³⁷Pyɛ de hwó tus ya sé yere zɔng, gyeng rɔ̌ yerê yara kɛ yè pyɛ cak ayi; ko hwó tus rebêk pyɛ yane mo wɛt, yaga rebek o ra rɔda ba ras e bama mo.

³⁸Ko Dagwi a rɔda nɔ̂ng yere mo rebek de a simo yaga yɛ. Ko e nɔ̂ng kayɛ yere rebek de ra sé rê yɛ.

³⁹Renama pyɛ̂ mwa de ya sé cen ra sé rining o wɛt. Bemasi ba vɔk yerê mɛn, ngyāma ya vɔk yerê rehak, benon ba vɔk yerê mɛn detu, ko betɔk ba vɔk mɛn arɔng.

⁴⁰Pyɛ́ de ya sé e lagwi ya vɔk babek mɛn detu, ko pyɛ́ de ya sé e jey ya vɔk babek mɛn detu arɔng. Nerât pyɛ̂ lagwi na sé detu, ko nerât pyɛ̂ jey na sé detu arɔng.

⁴¹Gwi gwa vɔk yerê nerat o nehak, pwɛl gwa vɔk yerê nehak, ko netangacɛn na vɔk yerê nehak arɔng. Kakɛ ketangacɛn arɔng ka vɔk yerê nerat detu na nè ketangacɛn kehak.

⁴²A rɔda sè tyɛng ano na séne yi e reku. Rebek de be tus re bɔsɔ, ko jeng de be ba sene mwat o yi e reku, rebek mɛ ra rɔda to bɔsɔ wɛt.

⁴³Rebek de be tus ra vɔk nerat wɛt, ko jeng de be ba sene rɛ re ba vɔk gbɔng nerat. Rebek de be tus ra vɔk gap wɛt, ko jeng de be ba sene rɛ re ba vɔk gap.

⁴⁴Rebek de be tus ra sé pyɛ ye jey yemo, ko jeng de be ba sene rɛ re ba sè pyɛ ye lagwi. Sede remo de rebek yerê rê jey ra sɛ́, rebek yerê rê lagwi ra sɛ́ arɔng.

⁴⁵Yaga bà jɛk e Bwok-basa Dagwi wɔgɔ, “Mwat wo mɛsɛng o, yɛ Adam, à tɛ́ ɛ pyɛ de ya vɔk neken.” Ko yɛ Adam wo yɛnɛ mo a sé Gabik de he nɔngɔs neken.

⁴⁶A sé e rebek de Gabik Dagwi ha vɔk reto e ra rɛ de ra tānga vey wɛt, ko a sé e rebêk jey yemo; ano kwong, rēmo de ra sé rê Gabik ra de vey.

⁴⁷Bà yong Adam wo mɛsɛng yi e fongôl jey, ko wo neba á yi e lagwi.

⁴⁸Bemat de ba sé vê jey ba sé tyɛng sede mwat de bà yong yi e fongôl jey. Ko vemo de ba sé vê lagwi ba sé tyɛng sede mwat de a yi e lagwi o.

⁴⁹A remo, be bɛrɛng hot sede mwasi de bà yong na fongôl jey, ano arɔng, tuhak ba rɔda ba bɛrɛng hot sede mwat de a yi e lagwi.

⁵⁰À begwa, ma sé ha a yin wɔgɔ, pyɛ de ba yong na nama tanga nemi ya rɔda sɛ̀ numo mɛ hê nedanelɔ Segwɔm Dagwi wɛt. Ko pyɛ de ye ba bɔsɔ ya rɔda sɛ̀ numo mɛ wɛt hê nedanelɔ pyɛ de yê tɔk bɔsɔ wɛt.

⁵¹Wok in, ma sé ha a yin pyɛ neyaang cak de ya sé mwin: A sé mwa hot de wot a rɔda ba kushu wɛt, ko ba rɔda ba sege hot mwa.

⁵²Jeng de ba rɔda ba pɛl durum wo yɛnɛ mo, ba rɔda ba sege hot dey-dey sede gbara wa ye dɛbɛt, kɛ sede mwat a ye kwabat a yis mɛ. Yaga jeng de durum o wa rɔda ba tosho, ba rɔda ba sene vemo de ba ga kana kushu na babek de ba rɔda tɔk bɔsɔ wɛt. Ko e jeng o, ba rɔda ba sege babek mot.

⁵³Yaga a sé gbing-gbing na pyɛ de ye bɔsɔ ye tɛ́ ɛ pyɛ de yê tɔk bɔsɔ ko tyɔng wɛt, ko a sé gbing-gbing na pyɛ de ye ku ye tɛ́ ɛ pyɛ de yê tɔk ku ko tyɔng wɛt.

⁵⁴Jeng de pyɛ de ye bɔsɔ ya tɛ́ ɛ pyɛ de ye tɔk bɔsɔ ko tyɔng wɛt, ko jeng de pyɛ de ye ku ya tɛ́ ɛ pyɛ de ye tɔk ku ko tyɔng wɛt, ba rɔda sila há de bà jɛk wɔgɔ, “Ba ga wey na reku! Ba ga yɛnɛ como na reku mo mwa vit!”

⁵⁵“À reku, rê como mō ma hɛ arɛt? À reku, reto de hwó mǎ mɛ̀ bemat a hɛ arɛt?”

⁵⁶Reku ra sey retô mâ bemat yi e banɛn, ko banɛn o ba sey retô vɛ yi e Badu.

⁵⁷Ko tik na wot a feng a Dagwi de e nɔngɔs hot gap, na wot a re como yi na Darwey mot Yɛsu Kristi!

⁵⁸Yaga ano, à begwa yey hom, tumal hin gak; pyɛ cak ye digta hin wɛt. Nɔng în bato min mwa kayɛ jeng e de râ fwôm Darwey, yaga yin a tɔk, fwom de yin e ra na gap min mwa yaga Darwey gwa sé yapyi zɔng wɛt.