Read berom 1 Kɔrintɔs 16 Bible Online

1 Kɔrintɔs 16 - berom bible

1 Kɔrintɔs 16

¹Ko di, e rà rehâ tulâ nɔrɔ yaga bemât Dagwi e Yɛrusalɛm: Rá in pyɛ mo e gwong de ma ha a be-ekilisiyâ Galatya be ra.

²E kahɛ Tuk Wusal, kawɛ e ji min a tik jaram dyām tyɛng na pyɛ de e sɛsɛm. A lɛsɛ yɛ̄ naka, yaga na jeng de ma rɔda ba wul, ba rɔda to be jāma na be tula dyām cak wɛt.

³Ko jeng de ma pom, ma rɔda jɛk bebok-berang na me nɔ̂ng bemat de yin a di, yɛn a vey na be tomo hɛn mɛ̀ na nɔrɔ min o mwa vɔk e Yɛrusalɛm.

⁴Ka sede wot a di, a sé naka na me wɔ mwa arɔng, ko yɛn a rɔda raa me.

⁵E bama de ma kyě gwɔsɔ e yɛnɛ̂ sevwêl Makedonya, ma rɔda vey e hane na yin, yaga ma rɔda kwey e Makedonya.

⁶Gyeng rɔ̌ ma rɔda pe sangal na yin jeng tyɔng, kɛ gyeng mê ka re nabolos e hama. E bama mo, yin ê tɔk sɛlɛ me e kwɛngɛl hom, e kahɛ kwɔn de me kyè vɔk ɛ̀.

⁷Me simo na me di in a remo jeng de mê kwey na yin zɔng wɛt, ma sɛt yey hom na me pɔl ba na yin, ka sede Darwey a simo.

⁸Ko ma rɔda ka gwɛ̌ sangal e ngamo e Ɛfɛsus sɛ̌ Nzem Pɛntɛkɔs e ngyen.

⁹Yaga Dagwi a ga wunta a me gwong na me ra fwom de gwa vɔk gbɔng pyɔlɔ e ngamo. Ko bemat pyak ba sɛ́ de be ra retek na me.

¹⁰Ka sede Timotawus a vey, di in wɔgɔ, yɛ a vɔk yey pyɛng e sangal mɛ na yin jeng de a sé e hane na yin, yaga a sé ra fwôm Darwey tyɛng sede me.

¹¹Mwat hwak a kwon byɛs ɛ wɛt, ko tɛ̀ in hɛ e gwông kwɛngɛl mɛ na netyang, yaga na a to toyo vey na me. Ma sé bɛrɛng véy mɛ tanga begwa mot bemat-raa.

¹²Ko e rà rehâ gwa mot Apɔlɔs: Ma shonong e ra yɛ zang pyak, na a vey na yin tanga bwang begwa mot bemat-raa. Ko a simo vey o a remo wɛt; a rɔda vey jeng de gwông vey o gwa jam a yɛ.

¹³Bɛrɛng hin nekanang; tumal hin gak e pyɛ́ de yin a sey tsak o na yɛ̄; vɔk in yey ting, na yin a vɔk gap arɔng.

¹⁴Rá in kayɛ pyɛ e gwong de gwo dura tɛ̂ yey min.

¹⁵Yin a tɔk, belɔ Istifanus bá sè vê mɛsɛng de bá tɛ́ ɛn bemat-raà Kristi e yɛnɛ̂ sevwêl Akaya. Ko yɛn a ga nɔng bato mɛn yaga rá a bemât Dagwi fwom. À begwa, ma sé shonong e ra yin wɔgɔ,

¹⁶gyéng in hâ bemat yerê vemo sede remo de yin e gyeng hâ bemât nuyel min, ko gyéng in ano arɔng hâ kawɛ mwat de a wuna hɛ na yɛn e ji fwom o, ko e pɛngɛ hɛ e de râ gwɛ.

¹⁷Ma vɔk yey pyɛng, yaga Istifanus, na Fɔrtunatus, tanga Akaikus ba ga pom. Yaga yɛn a sé e to min, remo de yin a sé e ngamo wɛt.

¹⁸Yɛn a tɛ̀ yey hom tanga myín arɔng ye sè wɛng-wɛng. A sé naka na yin di nerât bemat yerê vane.

¹⁹Bemât be-ekilisiya de ba sé e sevwêl Asiya be tang in show. Akwila na Piriskila, na bemât ekilisiya de be manas e lɔ mɛn be tang in show naka-naka, yaga yin mwa yin a sé sangal e ji nesa na Darwey.

²⁰Mwa begwa mot bemat-raa de ba sé e ngamo be tang in show. Tang în bemin show e gwong de gwo dura tɛ̂ yey min.

²¹Me Bulus, ma sé jɛk hemo na vwɔ hom, “Me tang in show.”

²²Ka sede mwat hwak a tɛ̀ yey na Darwey wɛt, tik na a sè pyɛ sedusa! “Marana ta” wɔgɔ, “À Darwey vey!”

²³Tik na Darwey Yɛsu a dura a yin nerat mɛ.

²⁴Ma tɛ̀ yey hom na yin mwa, yaga wot mwa wot a sé sangal e ji nesa na Kristi Yɛsu.