Read berom 1 Kɔrintɔs 2 Bible Online

1 Kɔrintɔs 2 - berom bible

1 Kɔrintɔs 2

¹À begwa, ma kana vey na yin, na me shara a yin rehâ pyɛ neyaang de ya sé mwin, yemo de Dagwi a dura a wot. Jeng de ma shara yɛ mo, ma ra na rwâk-nu wɛt kɛ na netsitsɛng hyiw arɔng wɛt.

²Yaga ma yong ɛ̀ gyam jeng de ma rɔngɔl na yin wɔgɔ, ma rɔda simo na me tɔk pyɛ cak detu wɛt sɛ̌ Yɛsu Kristi zɔng — ey, Yɛsu Kristi de ba kak ɛ e ra cɔ́gɔt.

³Ko ma vey na yin e ji nevît gap tanga e ji bengyip na vôw rebek pyak.

⁴Jeng de ma basa a yin, na jeng de ma shara rehâ Dagwi, ma ra ano na neha netsitsɛng wɛt, yerê nemo de ne tɛ̀ yin a raa me zɔng, ko á sè e retô Gabik Dagwi de ra dura, neha mo na sé mwin.

⁵Yaga ano, retîn sêy tsak o min ra sé e netsitsɛ̂ng mwasi wɛt, ko ra sé e retô Dagwi.

⁶Mwa ano, wot e ha hâ netsitsɛng vɔk na vemo de ba ga vey naka e gwông Dagwi. Ko a sé e netsitsɛng yerê ne jey yemo wɛt kɛ yerê ne vemo de be re negwɔm e jey yemo arɔng wɛt. Yaga negwɔm mɛn o na sé kyè wɔ̀ tala hɛ.

⁷Ko netsitsɛng de wot e ha há e ra nɛ na sé netsitsɛ̂ng Dagwi nemo de na sé ne neyaang, nemo de ba ga lɛrɛ nɛ. E nɛ de Dagwi à kana yong ɛ̀ yimo, gyam na a yong jey, yaga na a nɔng ot gbɔng nerey mɛ.

⁸Vit a hwak e ji vemo de be re negwɔm e jey yemo de á tɔk netsitsɛng o. Ka bá tɔk nɛ, ka bá yâng kak Darwey wo gbɔng nerey wɛt.

⁹Ko di, sede remo de bà jɛk e Bwok-basa Dagwi wɔgɔ, “Pyɛ de vit a mwasi de a ga di kɛ a ga wok, pyɛ de ya ga yel e báre mwasi wɛt, e yɛ à pyɛ de Dagwi a ga kana yong yaga vemo de ba tɛ̀ yey mɛn na yɛ.”

¹⁰Ko a sé e wot de Dagwi a ga dura a wot pyɛ yemo wɛshɛrɛk yi na Gabik mɛ. Yaga Gabik o he ngyɛgɛt kayɛ pyɛ, mwa na pyɛ̂ neyaàng Dagwi de ya sé ciwil arɔng.

¹¹Vit a mwat de a tɔk báre mwat hwak sɛ̌ gabîk mwat o zɔng. Ko e gwong gwining o arɔng, vit a mwat de a tɔk báre Dagwi sɛ̌ Gabik Dagwi zɔng.

¹²Wot á sey gabik hê jey yemo wɛt; ko wot á sey Gabik de ha yi na Dagwi, yaga na wot a bin tɔk pyɛ̂ mwa de Dagwi a nɔng ot e nɔrɔ.

¹³Ano kwong, wot e ha na neha de bemat ba basa a wot yi na netsitsɛng mɛn wɛt, ko na neha de Gabik Dagwi ha basa. Ko wot e misang a vemo de ba vɔk Gabik Dagwi pyɛ́ e ra Gabik o.

¹⁴Mwat de a vɔk Gabik Dagwi wɛt e tɔk sey pyɛ́ de ya yi na Gabik o wɛt. Pyɛ́ mo ya sé pyɛ̂ netɔn zɔng na yɛ, ko ê kyɛm a tɔk yɛ̄ wɛt, yaga a sé e Gabik Dagwi zɔng de he tɛ̀ mwat a tɔk yɛ̄.

¹⁵Mwat de a vɔk Gabik Dagwi e tɔk mara kayɛ pyɛ, mwa ano de vit a mwat de ê tɔk mara hɛ.

¹⁶Sede remo de bà jɛk e Bwok-basa Dagwi wɔgɔ, “E wà de a ga kana tɔk báre Darwey, na a bin basa a yɛ arɛt?” Ko wot, wot a vɔk báre Kristi.