Read berom 1 Kɔrintɔs 3 Bible Online

1 Kɔrintɔs 3 - berom bible

1 Kɔrintɔs 3

¹Ko me, à begwa, ma tɔk ha na yin wɛt, tyɛng sede remo de me ha na bemat de ba vɔk Gabik Dagwi. Ko ma ha na yin sede me ha na bemat de ba sé vê jey e negya, vemo de ba sé sede nèy necereng e gwông raà Kristi.

²A sé sede ma nɔngɔs hin nevasal zɔng, ko ma nɔngɔs hin pyɛ̂ re tying o wɛt, yaga yin a ga vey yaga yɛ̄ e ngyen wɛt. Ko mwin, pere vey e jeng yemo, yin a rɔngɔl nà vey.

³Yin a rɔngɔl ná negwɔn bwang bemât jey zɔng. Sede remo de yin e bɛrɛng bemin ves, ko yin e to ragas nu na bemin, pyɛ́ yemo ye dura, yin a sé sede bwang bemât jey, ko yin e raa negwɔn yerê nemɛn zɔng.

⁴Ka sede hwak e ji min e tē, “Me raa Bulus”, ko hwak e tē, “Me raa Apɔlɔs”, ko yin e raa negwɔn yerê ne bemât jey wɛt arɛt?

⁵Apɔlɔs a sé wà, ko Bulus arɔng a sé wà arɛt? Wot a sé bemât fwôm Dagwi de ba tɛ̀ in na yin a sey tsak o na Kristi. Kawɛ e ji mot a vɔk fwom de Dagwi a ga nɔng ɛ na a ra:

⁶Me ma tus yére, Apɔlɔs á tɛ̀sɛ nshi, ko e Dagwi de á tɛ̀ pyɛ́ mo ye ras.

⁷Yaga ano, kɛ mwat de a tus kɛ mwat de a tɛ̀sɛ nshi, ba sé pyɛ cak wɛt sɛ̌ Dagwi zɔng, yaga e yɛ de e tɛ̀ pyɛ́ mo ye ras.

⁸Mwat de e tus yére tanga womo de e tɛ̀sɛ nshi ba sé tyɛng, ko ba rɔda ba talâ kawɛ e ji mɛn pyɔlɔ mɛ tyɛng na fwom de a ra.

⁹Yaga wot a sé besâ fwom tanga Dagwi, ko yin, yin a sé sede hwirî Dagwi. Yin a to sé sede pyɛ de Dagwi a sé lɔk arɔng.

¹⁰Dagwi a nɔng me nɔrɔ, ko ma ra fwom na hɛ na sekwɛl gbɔng mwât lɔ̂k duk. Ma tɛ̀ retis o, ko mwat hwak a sé lɔk e ra rɛ. Tik na kawɛ mwat a tē naka na yerê lɔ́k de e lɔk e ra rɛ.

¹¹Dagwi á kana tɛ̀ Yɛsu Kristi a sè retis o, ko vit a mwat de a rɔda tɔk tɛ̀ retis o rehak detu.

¹²Bemat behak ba rɔda ra fwom na dyam shinang, kɛ dyam pyɛng, kɛ dyéngere ryat sizɔng e de lɔk retis o. Bemat behak arɔng ba rɔda ra fwom na cɔ́gɔt, kɛ sɔng, kɛ mapak.

¹³Tuhak, ba rɔda ba di nezɛɛt fwôm kawɛ mwat; a sé e tuk de Dagwi a rɔda ba ra a jey shɔt de ba rɔda ba dura gwɛ wɛshɛrɛk. Ba rɔda ba dura fwom de kawɛ mwat a ra wɛshɛrɛk na kya, ko kya mo ha rɔda ba mara gwɛ na be di yerê nerât fwom o.

¹⁴Ka sede pyɛ de a lɔk e ra retis o ya nusu hɛ hyɔl, ko mwât lɔk o a rɔda ba sey pyɔlɔ mɛ.

¹⁵Ko ka sede kya ha re pyɛ mo hywiri, yɛ a rɔda bidɛ pyɔlɔ mɛ. Ko yɛ pyɛ mɛ, ba rɔda sey neken mɛ sede mwat de a hywit ɛ yi e kya.

¹⁶Mwin, yin a tɔk, yin a sé sede duk de Dagwi e sangal ɛ̀, ko Gabik mɛ he sangal e ji min arɔng.

¹⁷Ka sede mwat hwak a wey na duk de Dagwi e sangal ɛ̀ mo, ko Dagwi a rɔda wey na yɛ arɔng. Yaga Dagwi a tik duk o jaram yaga yɛ pyɛ mɛ, ko e yin vɛ de yin a sé duk wane mo.

¹⁸Mwat hwak a kwɛlɛng to mɛ wɛt. Ka sede hwak e ji min e bare, a vɔk netsitsɛng yerê ne jey yemo, tik na a tɛ́ ɛ tɔn, yaga na a bin vɔk netsitsɛng ne mwin.

¹⁹Yaga netsitsɛ̂ng jey yemo na sé netɔn e bayîs Dagwi. Sede remo de bà jɛk e Bwok-basa Dagwi wɔgɔ, “Dagwi e vos vemo de ba vɔk netsitsɛng na netsitsɛng neves mɛn o.”

²⁰Ko bà to jɛk wɔgɔ, “Darwey a tɔk, báre vemo de ba vɔk netsitsɛng ha sé yapyi zɔng.”

²¹Yaga ano, mwat a dak kaa e ra mwasi wɛt! Ko tɔk in, pyɛ̂ mwa ya sé myín:

²²Kɛ a sé Bulus, kɛ Apɔlɔs, kɛ Kefas; kɛ a sé jey yemo, kɛ neken, kɛ reku; kɛ a sé pyɛ̂ jeng yemo, kɛ pyɛ̂ jeng de ye kyè vey — pyɛ́ mo mwa ya sé myín.

²³Ko yin, yin a sé vê Kristi, ko Kristi arɔng a sé wo Dagwi.