Read berom 1 Kɔrintɔs 4 Bible Online

1 Kɔrintɔs 4 - berom bible

1 Kɔrintɔs 4

¹Ano kwong, tik na bemat be jut ot, wot a sé bemât fwôm Kristi de ba tik a wot e vɔ mot bɛrɛng pyɛ̂ neyaàng Dagwi de ya sé mwin.

²Ko gbɔng pyɛ de be simo na mwat de ba tik pyɛ́ e vɔ mɛ yà sé wɔgɔ, a sè mwat de be tó yey na yɛ wɛt.

³Ko di, a sé a me pyɛ wɛt kɛ e yin de yin e mara me kɛ e bemât shɔt ayi; me ka mara tó hom pyɛ hom wɛt.

⁴Yey hom ya gang me na shɔt wɛt, ko hemo he dura wɛt wɔgɔ, ba ga hàla me washak. A sé e Dagwi de e mara me.

⁵Yaga ano, yin yɛrɛ shɔt e ra mwat hwak gyam na jeng de bá kana yong ɛ ye vey wɛt. Gyéng in sɛ̌ Darwey a vey e ngyen. E yɛ de a rɔda ba dura gbey pyɛ́ de ya sé e lɛrɛ e lwīl, ko a to dura wɛshɛrɛk báre yaang detidetu de ha sé e neyey bemasi. Ko e bama mo, Dagwi a rɔda ba somo kawɛ mwat tyɛng na pyɛ de a ga ra.

⁶À begwa, e rà rehâ pyɛ́ yemo — ma ga dura yɛ̄ sede gwɔrɔ-há e ra me tanga Apɔlɔs, yaga na me bin sɛlɛ hin mɛ̀. Ma ra ano, yaga na yin a bin masa yi na wot cap-hâ há hemo de ha ye, “Yin ra pyɛ de ya dal yemo de ba ga jɛk wɛt.” Hwak e ji min a kwon dak kaa e ra mwat gwining, na a byɛs hwak wɛt.

⁷E wà de a tɛ̀, hwà dal bwang behak arɛt? Hwà vɔk pyɛ cak de ba nɔng o wɛt arɛt? Ko sede remo de ba nɔng o kayɛ pyɛ de hwà vɔk, yaga sɛ́ de hwó dak kaa sede ba nɔng o yɛ̄ wɛt arɛt?

⁸Hm, yē wěy ow! Yin á kana vɔk kayɛ pyɛ de yin e simo! Yin a ga kana tɛ́ in bedaberey! Yin a ga kana tɛ́ in begbɔng begwɔ̀m, ko yin a ga tɛ́ in ano sana wot! Káa! Ma yâng simo ka yin a tɛ́ in begbɔng begwɔ̀m o mwin, na wot a yâng sè begbɔng begwɔ̀m o tanga yin arɔng!

⁹Yaga a sé a me, Dagwi a tɛ̀ ot, wot betom Yɛsu Kristi, na wot a sè vê yɛnɛ mo mwa, sede bemat de ba ga gang ɛn na shɔt na be mɔbɔs hɛn e nuyêl bemat. Wot a tɛ́ ot pyɛ bɛrɛng e nuyêl jêy mwa, e nuyêl betom-lagwi tanga e nuyêl bemat arɔng.

¹⁰Wot a sé sede betɔn, yaga wot e raa Kristi. Ko yin à, yin a sé tsɛng-tsɛng e sangâl nesa min na Kristi! Wot a sé gbɛrɛk, ko yin à, yin a vɔk gap! Ba byɛs ot, ko yin à, ba nɔng in nerey!

¹¹Pere vey e jeng yemo, wot e wokos vyong na yêy hwɔshɔ, wot e tɛ̀sɛ cɛ̂k berugu, ko be dakas hot, ko vit a wot na nelɔ.

¹²Wot e ra fwom na vɔ mot na gap. Jeng de bemat be dùsa hot, wot e tɛ̀ a yɛn nerat. Jeng de be tak a wot reyɔm, wot e niri na rɛ.

¹³Jeng de be ha hâ bɔs e ra wot, wot e toyo a yɛn na há mo e gwong rwat. Pere vey e jeng yemo, wot a ga tɛ́ ot sede pyɛ́ de ya sé byɛm-byɛm e nuyêl bemât jey, wot a ga tɛ́ ot sede gwɔ̂t fongôl jey yemo arɔng.

¹⁴Ma sé jɛk pyɛ́ yemo, yaga na me tɛ̀ a yin rekyen wɛt, ko yaga na me vo a yin redu, sede nèy yey hom.

¹⁵Mwa ano de yin a vɔk bemat gu kuru (10,000) de be gyeng in e ji sangal min na Kristi, ko yin a vɔk da gwining zɔng. Yaga e ji sangal min hê nesa na Kristi Yɛsu, ma ga tɛ́ me da min yi na Yɛgɛt Yat de ma shara a yin.

¹⁶Yaga ano, me shonong e ra yin wɔgɔ, masa hin pyɛ́ de me ra.

¹⁷Pyɛ ma yemo de ya tɛ̀ ma sé tomo Timotawus vey na yin. Yɛ a sé hwêy yey hom, ko be tó yey na yɛ wɛt e rà pyɛ́ de e ra yaga Darwey. Yɛ a rɔda bare a yin na badu de me raa e ji sangâl nesa hom na Kristi Yɛsu. Badu mo ba sé tyɛng na pyɛ de me basa e kawɛ ekilisiya e kahɛ kwɔn.

¹⁸Behak e ji min ba ga hwo tos bato mɛn, sede yɛn e bare, me kyè vey e hane na yin wɛt.

¹⁹Ko di, me à wane ba pom na yin ziri, ka sede Dagwi a simo. E jeng o, ma rɔda ba wok yerê neha zɔng wɛt de vemo de be tos bato mɛn o be ha, ko mê ba di yerê reto de yɛn a vɔk arɔng.

²⁰Yaga jeng de be ha e ra negwɔm de Dagwi e re, be ha e ra rehâ neha wɛt, ko be ha e ra rehâ reto.

²¹Yin e dal na simô sɛ́ arɛt? Yin e simo me vey a yin na gwele na me tabak hin, kɛ me vey na negwɔn tɛ̂ yey na negwɔn nehywɛ arɛt?