Read berom 1 Kɔrintɔs 5 Bible Online

1 Kɔrintɔs 5 - berom bible

1 Kɔrintɔs 5

¹Be tē, behak e ji min be ragas nejwang. Ko yerê nejwang o na shɛsh ne bemat de ba tɔk Dagwi mwa wɛt, na sé wɔgɔ, mwat a vɔk hwâ da mɛ.

²Kée! Ko yin e dak kaa wɛt a? A yâng sé naka na yin a vɔk lashê yey e negya, na yin a pat yerê mwat de a ra pyɛ yane yi e nesa min.

³Mwa ano de ma sé na yin e rebek hom wɛt, ko ma sé tanga yin e yey hom tyɛng sede ma yâng sè e hane. Ko ma ga kana gang mwat de a ra pyɛ yane na shɔt à me e ji rezâ Darwey mot Yɛsu. Pyɛ de yin ê ra a yet ngan: Tula hin e dem tula min, ko me, mê sè ɛ̀ tanga yin e yey hom, ko retô Darwey mot Yɛsu rê sè ɛ̀ tanga yin arɔng.

⁵Pat in mwat wane mo, na yin a nára hɛ e vwɔ̂ Shetan, yaga na be bin wey na rebek mɛ rê banɛn, na be ba sey neken mɛ tuk de Darwey a rɔda ba vɛ̄ hɛ.

⁶A jam na yin a dak kaa wɛt. Yin a tɔk há hemo de be ye, “A sé e kegéy-sing tyɔng zɔng de ke pere tɛ̀ nemuk kpam-tuk de ba ga bɔrɔk nɛ ne puu mwa.”

⁷Yaga ano, pat in banɛn de ba sé e tē min sede géy-sing roso, na yin a sè jɛrɛ. Ko ano, yin a rɔda sè sede nemuk kpam-tuk de ba bɔrɔk nɛ vit a géy-sing. Ey, yin a sé jɛrɛ, yaga ba ga nára Kristi sede nɔrɔ̂ yas de be yɛt vɔk na Dagwi yaga wot. Yɛ Kristi mo a sé sede ketyimit de ba ga nára e jeng Nzem Gyilsit Nelɔ BeIsrayɛl.

⁸Tik na wot a pat kanɛ nengyas na neves yi e ji mot, sede BeYuda de be pat géy-sing roso ano e jeng nzem o. Ko tik na negwɔn mot ne sè jɛrɛ, na ne to sè ne tsak o arɔng. Ko ano, wot ê ra nzem o na kpam-tuk sana géy-sing.

⁹Ma ga kana jɛk a yin e ji bwok-rwang hom wɔgɔ, pyɛ min cak ye kwon sè na bemat de be ragas nejwang.

¹⁰Ma kana bare e ra bemât jey wɛt vemo de be ra nejwang, kɛ vemo de be vɔk gananâng pyɛ́, kɛ vemo de be mɔt bemat, kɛ vemo de be sap cī. Ka sede yin e simo na yin a wuna hin na yɛn wɛt, ka a yâng sè gbing-gbing na yin a hàla jey yemo e gùna mo.

¹¹Ko ma kana bare, pyɛ min cak ye kwon sè na kawɛ mwat de e tâng tó mɛ, a sé gwà min e ji raa, ko mwa ano, e ragas nejwang, kɛ e vɔk gananâng pyɛ́, kɛ e sap cī, kɛ e ha há ves e ra bemat, kɛ e feng siring, kɛ e mɔt bemat. Yin ka re pyɛ́ na yerê mwat wane wɛt.

¹²Sɛ́ hom ya sé na me ra a vemo de ba sé bemat-raa wɛt shɔt arɛt? E Dagwi de a rɔda ra a yɛn shɔt. Ko a sé e vemo de ba sé e ji ekilisiya de yin ê ra a yɛn shɔt wɛt arɛt? Sede remo de bà jɛk e Bwok-basa Dagwi wɔgɔ, “Ró in mwat vwes wane yi e tē min.”