Read berom 1 Kɔrintɔs 6 Bible Online

1 Kɔrintɔs 6 - berom bible

1 Kɔrintɔs 6

¹Ka sede mwat hwak e ji min a vɔk há hak na gwa mɛ mwat-raa, ko ê yi e rɛ̌ na a wɔ́ na há mo e nuyêl bemât shɔt de ba tɔk Dagwi wɛt, na a tik bemât Dagwi arɛt?

²Yin a tɔk, a sé e bemât Dagwi de ba rɔda ba ra a jey shɔt wɛt arɛt? Ko ka sede yin a rɔda ba ra a jey shɔt, ko mwin, yin ê kyɛm yin ra a bemin shɔt e ra pyɛ́ shɛl o wɛt arɛt?

³Yin a tɔk, wot a rɔda ba ra a betom-lagwi shɔt wɛt arɛt? Ka ano, yi e rɛ̌ de pyɛ̂ jey yemo ya rɔda dal ot ɛ?

⁴Ka sede yin a vɔk há e ra pyɛ́ yemo, ko yin e tɛ̀sɛ bemat de ba sé pyɛ cak wɛt e ji ekilisiya be sè bemât râ shɔt min arɛt?

⁵Ma sé ha ano, yaga na yin a vo rekyen. Yin e tɔk sɛ̀ mwat gwining e ji min de a vɔk netsitsɛng na a ra shɔt e ra há hak de ha sé e tē min wɛt arɛt?

⁶Ko di, mwat-raa e kyese shɔt na mumwɛ; ko yɛn e kyese yɛ na vemo de ba sé bemat-raa wɛt!

⁷A remo de yin e kyese shɔt na bemin, hemo he dura, yin a ga radɛ hin hywiri. Ê dal naka na be buru a yin e ra pyɛ cak wɛt arɛt? Ê dal naka na be mɔt in e negya wɛt a?

⁸Ko di, yin pyɛ min yin e buru a bemin, yin e to mɔt bemin, ko mwin, yin e ra a begwa min bemat-raa pyɛ́ yemo mo.

⁹Mwin, yin a tɔk, bemat beves ba rɔda ba yel e kwɔn de Dagwi a rɔda ba re ɛ̀ negwɔm wɛt. Yin kwon kwɛlɛng bato min wɛt: Bemat de be ra nejwang, kɛ vemo de be sap cī, kɛ vemo de be ra jɛ̀m, kɛ beras de be dyɛngɛs na bemɛn,

¹⁰kɛ begbik, kɛ vemo de be vɔk gananâng pyɛ́, kɛ vemo de be feng siring, kɛ vemo de be ha há ves e ra bemat, kɛ vemo de be mɔt bemat ba rɔda ba yel e kwɔn de Dagwi a rɔda ba re ɛ̀ negwɔm wɛt.

¹¹Behak e ji min bá kana sè yerê bemat vane mo. Ko ba ga kana kus in yi e banɛn min, ba ga tik in jaram na yin a sè vê Dagwi, ba ga to tɛ̀ na yin a sè cik e bayis mɛ yi na rezâ Darwey Yɛsu Kristi tanga yi na Gabik Dagwi mot.

¹²Mwat hwak ê ye, “Ba simo a me na me ra kayɛ pyɛ.” Ey, ko a sé e kayɛ pyɛ de ya vɔk a hwo nerat wɛt. Me yâng tɔk ye, ba simo a me na me ra kayɛ pyɛ; ko me simo na me sè sam pyɛ cak wɛt.

¹³Ko hwak arɔng ê ye, “Pyɛ̂ re ya sé yaga jim, ko jim arɔng ya sé yaga pyɛ̂ re.” Ey, ko Dagwi a rɔda ba wey na yɛ̄ mwa. Ba yong rebek yaga ragâs nejwang wɛt, ko ba yong rɛ, yaga na be ra a Darwey mɛ̀ fwom. Ko Darwey o a sé wo rebek o arɔng.

¹⁴Dagwi a sene Darwey yi e reku, ano arɔng, yɛ a rɔda ba sene hot yi na reto mɛ.

¹⁵Yin a tɔk, babek min ba sé nedem rebêk Kristi. Ko a rɔda jam na me jut dem rebêk Kristi, na me wuna hɛ na devwes arɛt? Tyɔng tyɔng wɛt!

¹⁶Yin a tɔk, mwat de a wuna hɛ na devwes a ga tɛ́ ɛ gwining na yɛ e rebek mɛ. Yaga bà jɛk, “Yɛn beba mo ba rɔda tɛ́ ɛn rebek rining.”

¹⁷Ko mwat de a wuna hɛ na Darwey a sé gwining na yɛ e yey mɛ.

¹⁸Pyɛ min cak ye sè na ragâs nejwang wɛt. Mwa bwang banɛn de mwat e ra be ra rebek mɛ e ji mo wɛt; ko mwat de e ra nejwang e ra renɛn de re lashe rebek mɛ.

¹⁹Mwin, yin a tɔk, rebek min ra sé sede duk de Gabik Dagwi he sangal ɛ̀. Dagwi a ga nɔng in Gabik mɛ, hemo de ha sé e ji min. Yin a sé vê bato min pyɛ min wɛt.

²⁰Dagwi a ga sey in, ko a ga tala byɛ pyak. Yaga ano, rá in fwom na rebek min o e gwong de gwô nɔ̂ng Dagwi nerey.