Read berom 1 Kɔrintɔs 7 Bible Online

1 Kɔrintɔs 7 - berom bible

1 Kɔrintɔs 7

¹Ko di, há hom a het e ra rehâ pyɛ́ de yin á jɛk a me e ra yɛ̄: A sé naka na mwat a ra weneng wɛt.

²Ko a remo de bemat ba kat râ nejwang, tik na kawɛ mwat a vɔk hwā mɛ, ko kawɛ hwā a vɔk rwas mɛ arɔng.

³Tik na rwas a ra a hwā mɛ pyɛ de ya sé tyɛng na redu weneng, ko hwā mo a ra a rwas mɛ tyɛng ano arɔng.

⁴Rebêk hwā mo ra sé remɛ nju mɛ zɔng wɛt, ko ra sé a yɛn e dem o na rwas mɛ mo. Ano arɔng, rebêk rwas o ra sé remɛ nju mɛ zɔng wɛt, ko ra sé a yɛn e dem o na hwā mɛ mo.

⁵Yin ro a bemín mɛ̀ wɛt, sɛ̌ mwa hin yin a simo na yin a sangal ano yaga jeng de yin a di, yaga na yin a bin tɛ̀ bato min e de râ won. E bama mo, tik na yin a to man na bemín, yaga na Shetan a bidɛ gwong de ê tɛ̀ in na yin a ra banɛn, yaga yin e tɔk gyeng bato min wɛt.

⁶Ma sé nɔng in redu wɛt, ko ma sé nɔng in gwong na yin a ra pyɛ de yin e simo.

⁷Yaga a yâng jam a me, ka bemât mwa be sè sede me. Ko kawɛ mwat a vɔk nɔrɔ de Dagwi a nɔng ɛ, hwak a vɔk nɔrɔ yerê hemo, ko hwak a vɔk yerê here detu.

⁸Ko di, ma sé ha na vemo de ba ga ra weneng wɛt tanga bekuma. Ma ye ngan: A sé naka na yɛn a sangal ano sana weneng tyɛng sede me.

⁹Ko ka sede yɛn a tɔk gyeng bato mɛn wɛt, ko tik na yɛn a ra weneng. A dal naka na yɛn a ra weneng; ka ano wɛt, ko cwey weneng o yê beseng a yɛn yey.

¹⁰Ma sé nɔ̂ng bemat de ba ga ra weneng redu remo: Hwā a gas ɛ na rwas mɛ wɛt. A sé e me de me nɔng redu remo wɛt, ko a sé e Darwey.

¹¹Ko ka sede a ra ano, tik na a sangal sana ra weneng. Ka sede ê tɔk sangal ano wɛt, ko a to wɔ̀ yong ɛ́ na rwas mɛ. Ko rwas arɔng, a tɛ̀ hwā mɛ e gwong wɛt.

¹²Há de me ha a remo ha sé báre hom, ko ha sé redu Darwey wɛt: Ka sede gwa mot mwat-raa hwak a vɔk hwā de e raa wɛt, ko hwā mo a simo na a re nuyel na sángal na yɛ, yɛ a tɛ̀ hwā mo e gwong wɛt.

¹³Ko ka sede hwā hwak a vɔk rwas de a sé mwat-raa wɛt, ko rwas o a simo na a re nuyel na sángal na hwā mo, hwā mo a kyè a hàla hɛ wɛt.

¹⁴Yaga Dagwi a jut rwas de a sé mwat-raa wɛt a tɛ́ mɛ̀ mwɛ yaga hwā mɛ mo. Ko a jut hwā de a sé mwat-raa wɛt arɔng a tɛ́ mɛ̀ mwɛ yaga rwas mɛ de a sé mwat-raa. Ka ano wɛt, ka nèy mɛn na yâng sé sede nèy bemat de ba tɔk Dagwi wɛt; ko di a remo, Dagwi a jut nɛ a tɛ́ mɛ̀ nemɛ.

¹⁵Ko ka sede mwat de a sé mwat-raa wɛt e simo a nu ɛ, be tik ɛ a kyè zɔng. Ka sede pyɛ mo ya té ano, ko rwas kɛ hwā de a sé mwat-raa a sé washak na a ra pyɛ de a di zɔng. Dagwi e simo na wot a sangal tyang na bemat.

¹⁶À hwâ weneng, hwà tɔk e rɛ̌ kɛ gyeng hwà rɔda sey nekên rwas mō mo arɛt? Ko hwo rwas arɔng, hwà tɔk e rɛ̌ kɛ gyeng hwà rɔda sey nekên hwā mō mo ɛ?

¹⁷Tik na kawɛ e ji min a sangal e gwong de Dagwi a yong a yɛ, na a nàra e gwong o de á sè e gwɛ jeng de Dagwi á yila hɛ. Redu ma remo de me nɔ̂ng kawɛ ekilisiya.

¹⁸Mwat de Dagwi a yila hɛ e bama de ba ga wɔ́ a yɛ e cwɛl, yɛ a jāma na a to bang yosom o wɛt. Ko mwat de Dagwi a yila hɛ, ko ba ga wɔ́ a yɛ e cwɛl wɛt, yɛ a jāma na be yosom hɛ wɛt.

¹⁹Kɛ ba wɔ́ a mwat e cwɛl kɛ ba wɔ́ a yɛ wɛt ayi, a sé pyɛ cak wɛt. Ko pyɛ de ya dal ya sé wɔgɔ, be gyeng badu Dagwi.

²⁰Tik na kawɛ mwat a nàra e yerê sángal de á sè e ji hɛ jeng de Dagwi á yila hɛ.

²¹Hwá sè sam jeng de Dagwi a yila hwo arɛt? Hwo tik pyɛ yane ye bɔrɔk hwo wɛt; ko sede hwô tɔk sɛ̀ gwong de hwô sangal washak, ko rá fwom na gwɛ.

²²Yaga yɛ de á sè sam jeng de Darwey á yila hɛ, a sé mwat de Darwey a ga tɛ̀ ɛ washak. Ano arɔng, yɛ de á sè washak jeng de bá yila hɛ, yɛ a ga tɛ́ ɛ sam Kristi.

²³Dagwi a ga sey in, ko a ga tala byɛ pyak. Yaga ano, yin tɛ́ in besam bemat wɛt.

²⁴À begwa, tik na kawɛ mwat a nàra e yerê sángal de á sè e ji hɛ jeng de Dagwi a yila hɛ, ko tik na a nàra e ji sangâl nesa na Dagwi.

²⁵Ko e rà rehâ vemo de ba ga ra weneng wɛt: Ma vɔk redu yi na Dagwi wɛt, ko ma sé ha a yin báre hom. Ma sé mwat de be tó yey na há mɛ wɛt, yaga Dagwi a ga tosho reyɔm hom.

²⁶Yaga negbang de na se a remo, ma di, a sé naka na yin a nàra e sangal min, sede remo de yin a sé ra.

²⁷Hwà vɔk hwā arɛt? Hwo jāma na hwo gas weneng mō wɛt. Hwà vɔk hwā wɛt arɛt? Hwo jāma hwā na weneng wɛt.

²⁸Ko ka sede hwà ra weneng, hwà ra renɛn wɛt. Ka sede hwong a ra weneng, ko a ra renɛn arɔng wɛt. Vemo de ba ga ra weneng yɛn a rɔda di reyɔm detidetu e sangal mɛn, ko me simo me dul in nà di reyɔm o.

²⁹À begwa, ma sé ha a yin: Jeng ya to sé pyak a remo wɛt. E ngamo nuyel, tik na vemo de ba vɔk beha yɛn a sangal sede yɛn a vɔk vɛ wɛt.

³⁰Tik na vemo de be tosho be sangal sede be tosho wɛt. Vemo de ba vɔk yey pyɛng bē sangal sede ba vɔk yɛ wɛt. Vemo de be sey pyɛ cak bē sangal sede pyɛ mo ya sé myɛ̀n na yɛn a vɔk wɛt.

³¹Ko vemo de be ra fwom na pyɛ́ de ya sé yê jey bē ra sede pyɛ mɛn ya sé na yɛ̄ wɛt. Yaga jey yemo, e begwong de ya sé a remo, ya sé kwey wɔ̀ tala hɛ.

³²Me simo na yin a sè washak sana pyɛ de ye bɔrɔk hin. Mwat de a ga ra weneng wɛt e tɛ̀ yey mɛ e ra pyɛ̂ Darwey, yaga e jāma gwong de ê pɛngɛ a Darwey o yey.

³³Ko mwat de a ga ra weneng e tɛ̀ yey mɛ e ra pyɛ́ de ya sé yê jey yemo, yaga e jāma gwong de ê pɛngɛ a hwā mɛ yey.

³⁴Yaga ano, nehywɛ mɛ na ga gas ɛn arɔng. Hwā de a ga ra weneng wɛt wɔgɔ, womo de a tɔk rwas wɛt, e tɛ̀ yey mɛ e ra pyɛ̂ Darwey. Báre mɛ ha sé na a ra a Darwey fwom na rebek mɛ tanga yey mɛ mwa arɔng. Ko hwā de a ga ra weneng e tɛ̀ yey mɛ e ra pyɛ́ de ya sé yê jey yemo, yaga e jāma gwong de ê pɛngɛ a rwas mɛ yey.

³⁵Ma sé ha pyɛ́ yemo, yaga na me sɛlɛ hin. Me simo na me ro in nà ra pyɛ de yin e simo wɛt. Me simo yin a sangal e gwong de gwa sé tyɛng, na yin a ra a Darwey fwom na gap min mwa sana gas nehywɛ min e ra pyɛ cak.

³⁶E rà rehâ mwat hwak de e bare, a sé ra pyɛ ryat wɛt, yaga a ga yong ɛ wɛt na a ra weneng na hwong de e hwono hɛ: Ka sede ê tɔk re nuyel na niri wɛt, ko a de di, a sé naka na a ra weneng, ko tik na a ra pyɛ de e simo a ra mo. Ka sede a ra ano mo, ko a sé ra renɛn wɛt.

³⁷Ko e rà rehâ mwat de a ga tɔrɔng há mo mwa e yey mɛ wɔgɔ, a rɔda ra weneng wɛt: Ka sede a ra pyɛ mo sede be tɛ̀ ɛ gbing-gbing wɛt, ko a tɔk gyeng pyɛ de a tɛ̀ e yey mɛ naka, ko a ga tɛ̀ e yey mɛ gak, a rɔda ra wenêng hwong de e hwono hɛ mo wɛt, mwat wane mo arɔng a sé ra pyɛ de ya sé tyɛng.

³⁸Yaga ano, yɛ womo de a ra weneng a ra pyɛ de ya sé tyɛng, ko yɛ womo de a ra weneng wɛt a ra pyɛ de ya dal na sé tyɛng.

³⁹Redu weneng ra rɔgɔs hwā na rwas mwa jeng de rwas o a sé kwen. Ko ka sede rwas mɛ mo a ku, hwā mo a sé washak na a to ra wenêng mwat de e simo. Ko tik na mwat o a sè mwat-raà Darwey.

⁴⁰E di hom, hwā mo a rɔda dal na vɔ̂k yey pyɛng, ka sede a nàra ano sana weneng. Ko ma di, a sé e Gabik Dagwi de ha nɔng me báre hemo.