Read berom 1 Kɔrintɔs 8 Bible Online

1 Kɔrintɔs 8 - berom bible

1 Kɔrintɔs 8

¹Ko di, e rà rehâ nama de ba ga kana ra sekwit na hɛ: A sé mwin, sede remo de yin a ye, “Wot mwa wot a vɔk tɔ́k.” Ko yerê tɔ́k o he tɛ̀ bemat be pus; a sé e tɛ̂ yey zɔng de he tɛ̀ mwat a re nuyel e gwông raa.

²Mwat de e bare, a tɔk pyɛ cak a rɔngɔl nà tɔk pyɛ de ya sé naka na a tɔk.

³Ko mwat de a tɛ̀ yey mɛ na Dagwi e yɛ de Dagwi a tɔk ɛ arɔng.

⁴Ko e rà rehâ rê banama de ba ga kana ra sekwit na vɛ: Wot a tɔk, ci ya sé e tô pyɛ cak de ya vɔk neken wɛt. Wot a to tɔk arɔng, vit a Dagwi hwak sɛ̌ yɛ gwining zɔng.

⁵Ka bemat ba ka vɔk pyɛ́ cak de be tâng yɛ̄, à bedagwi, kɛ ba sé e lagwi kɛ e jey ayi — ko mwin, “bedagwi o” tanga “bedaberey o” ba sɛ́ pyak —

⁶ko mwa ano, wot a tɔk, wot a vɔk Dagwi gwining zɔng. Yɛ a sé Da de pyɛ̂ mwa ya yi na yɛ, ko sángal mot e jey ha sé yaga yɛ. Wot a to tɔk Darwey gwining zɔng, yɛ Yɛsu Kristi. A sé yi na yɛ de kayɛ pyɛ ya yi, ko a to sé yi na yɛ arɔng de wot a sé na neken.

⁷Ko a sé e kawɛ mwat wɛt de a tɔk, ci ya sé pyɛ cak wɛt. Bemat behak bá kana tɔ́k ɛn na cī. Yaga ano, pere vey e jeng yemo, jeng de yɛn e re banama yerê vane mo, yɛn e bare na vɛ wɔgɔ, ba sé pyɛ de ba ga kana ra sekwit na vɛ. Sede remo de yɛn a rɔngɔl nà tumal gak e gwông raa, yɛn e bare, yɛn a ga tɛ́ ɛn ligis.

⁸Ko pyɛ̂ re ye tɔk tɛ̀ ot na wot a gwɛ̌ sè berat e nuyêl Dagwi wɛt. Ka wot a ka re vɛ, ko wot e gwɛ̌ pyɛ cak wɛt; ko ka wot a ka re vɛ wɛt, ko wot a rɔda bidɛ pyɛ cak arɔng wɛt.

⁹Yin de yin a tɔk, yin a sé washak na yin a re kayɛ pyɛ, tē in naka, yin ra pyɛ cak de yê tɛ̀ vemo de ba rɔngɔl gbɛrɛk e ra rehâ pyɛ̂ Dagwi be ye bugurɛk wɛt.

¹⁰Sede ngan: Hwà vɔk tɔ́k hemo mo, ko hwó re pyɛ́ e duk re fongol wo ci. Ko mwat de a rɔngɔl nà tumal gak e gwông raa a di o e hwomo. Hwó bare, rá ano ha rɔda nɔng ɛ yey ting na a re banama de ba ga ra sekwit na vɛ wɛt arɛt?

¹¹Ko yɛ de a rɔngɔl gbɛrɛk e ra rehâ pyɛ̂ Dagwi a rɔda wey yaga tɔ́k mō hane mo. Ko di, yɛ a sé gwà mō mwat-raa de Kristi a ku yaga yɛ.

¹²Jeng de yin e ra a begwa min banɛn e yerê gwong gwomo, na yin a mǎ bare yey mɛn de ha vɔk gap wɛt, ko yin e ra a Kristi banɛn à wane.

¹³Yaga ano, ka sede ma di, pyɛ de mê re yê tɛ̀ gwa hom a ra banɛn, ko ma rɔda to me re nama e ngamo nuyel wɛt, yaga na me kwon tɛ̀ ɛ a gaba wɛt.